1. Pwata ekkóch ra meefi ar rese mochen káé?

LÓN ei fansoun, a lamot ngeni chómmóng aramas ar repwe angang weires le atufichi manawer. Chómmóng pwiich kewe ra angang fite fite awa ren ar repwe atufichi ar famili lón pekin aion. Ekkóch ra áeá watteen fansoun iteitan le sái ngeni ar kewe leenien angang me liwin ngeni imwer kewe. Chómmóng ra atufichi manawer me ar kewe famili ren ar féri ekkewe sókkun angangen wóón paw mi áweires. Sárin angang, pwiich kana mi angang weires ra fókkun pekkus! Ese chúen wor ar péchékkúl le féri ar káé.

2. Ineet atun ka kan féri óm káé?

² Nge ren enletin, mi lamot ach sipwe awora fansoun le wesewesen káé án Kot we Kapas, me néúch kewe puk. Ach riri ngeni Jiowa me ach kúna manaw esemuch a lóngólóng wóón ena! (1 Tim. 4:15, NW) Ekkóch ra nelókái iteiten rán me káé atun a mosonoson lón imwer kewe, me a chúen saram ekiekiir mwirin ar kerán pwáátá seni ar annut kinamwe. Ekkóch ra néúni fitu minich lepwin ren ar repwe féri ar káé me ekilon fán kinamwe.

3-4. Ikkefa ekkewe siwil wóón úkúkún ekkewe pwóróus ach we mwicheich a akkawora, me pwata?

³ Ese mwáál, kopwe tipeeú ngeni pwe a lamot óm kopwe awora fansoun le káé. Nge met kopwe káé? Neman kopwe erá: ‘A kon tep met sipwe állea. Use tongeni álleaniir meinisin.’ Ekkóch ra tongeni álleani meinisin néúch kewe puk me katol meinisin néúch kewe video ra katowu. Nge a weires ngeni chómmóng pwiich kewe ar repwe féri ena. Ewe Mwichen Soupwúngúpwúng a silei ena mettóch. Ina popun, kukkuto chék a apwúngaló kekisilóón ekkewe pwóróus sia angei lón taropwe me wóón ewe Internet.

⁴ Áwewe chék, ese chúen peres ewe Yearbook of Jehovah’s Witnesses, pún a fen wor chómmóng pwóróusen pwiich kewe  mi apéchékkúl wóón ewe jw.org^® me pwal seni ewe JW Broadcasting^® iteiten maram. Iei Ewe Leenien Mas fán iten aramas ese lifilifil me ewe Awake! ra chék katowu fán úlúngát lón eú ier. Esap weween pwe fisin ekkena siwil epwe alapaaló ach fansoun le féri pwal ekkóch mettóch rese weneiti ach fel ngeni Jiowa. Nge popun an fis pwe sipwe tongeni nefótófót wóón “mine a fokun mürina.” (Fil. 1:10) Sipwe pwóróus wóón ifa usun kopwe akkomwa met mi kon lamot, me ifa usun kopwe kúna watteen feiéch seni óm pwisin káé Paipel.

5-6. Ikkefa ekkewe puk mi lamot sipwe káéfichiir?

⁵ Met sipwe akkomw káé? Mi lamot sipwe awora fansoun iteiten rán le káé án Kot we Kapas. A kekisiló ekkewe wokisin fán iten án ewe mwichefel we kkótun álleaan Paipel iteiten wiik. A siwil pwe epwe lapóló ach fansoun ekilonei minne sia álleani me research. Sise chék achocho le álleani ekkena wokisin, nge sia achocho le mut ngeni ekkewe pwóróus seni Paipel ar repwe achchúngú letipach, me álisikich le arap ngeni Jiowa.​—Kölf. 19:14.

⁶ Met sipwe pwal káéfichi? Pwúngún sia mochen ammólnatá ewe lesen sipwe káé lón Ewe Leenien Mas me Án ewe Mwichefel we Káéén Paipel me ekkewe lesen fán iten ewe mwich lón weekday. Mi lamot sipwe pwal álleani ekkewe Leenien Mas me Awake! mi kan katowu.

7. Itá sipwe lichippúng ika sise tongeni álleani meinisin ekkewe mettóch mi katowu wóón ach we website me ewe JW Broadcasting?

⁷ Neman kopwe erá, ‘iwe, mei pwúng nge ifa usun ekkewe pwóróus wóón ach we website jw.org, me lón ewe JW Broadcasting? A mmen tepetep!’ Ekieki mwo ei kapas áwewe: A wor chómmóng mwéngé mi anné me sóssókkopat mi kawor lón eú leenien mwéngé. Nge saminne ekkewe customer repwe tongeni áni meinisin ekkena mwéngé mi kawor. Ina popun ra chék fili fitu. Pwal ina chék usun, kosap lichippúng ika kese tongeni álleani meinisin met ekkewe ach we mwicheich a awora wóón ewe Internet. Ren úkúkún óm tufich, kopwe álleaniir me katol. Iei sipwele pwóróus usun met weween ach káé me epwe ifa napanapen ach káé pwe sipwe unusen feiéch seni.

8. Met ka tongeni féri lupwen ka káé Ewe Leenien Mas, me ifa usun kopwe feiéch ika ka féri ena?

⁸ Lupwen sia káé, sia kan nefótófót wóón minne sia álleani pwe sipwe tongeni káé eú lesen mi lamot. Nge ese wewe ngeni ach chék mwittir álleani eú pwóróus me erii pélúwen ekkewe kapas eis. Áwewe chék, lupwen ka ammólnatá ewe Káéén Ewe Leenien Mas, kopwe akkomw álleani minne sipwele káé lepoputáán ewe lesen. Mwirin, nengeni itelapen ewe lesen me pwal ekkewe itelap kisikis me enniwilin pwóróus. Mwirin, álleani ewe lesen nge kopwe chék akkammang me álleanifichi. Ekieki usun ewe sentence mi áiti ngonuk met ewe parakraf a fós usun nge lap ngeni ina ewe áeúin sentence lón eú me eú parakraf. Fán chómmóng ena sentence epwe álisuk le silei met ewe parakraf a mochen menlapei. Atun ka álleani unusen ewe lesen, ekieki ifa usun eú me eú parakraf a álisatá ewe itelap kisikis me ifa usun a riri ngeni menlapen ewe lesen. Makkeetiw ekkewe kapas kese silei me ekkóch pwóróus ka mochen research wóón.

9. (a) Pwata a lamot ach sipwe ekiekifichi ekkewe wokisin lupwen sia káé Ewe Leenien Mas me ifa usun sipwe féri ena? (b) Met sipwe féri me lúkún ach álleani ekkewe wokisin, usun met Josua 1:8 a apasa?

⁹ Ewe Káéén Leenien Mas, ina eú káéén Paipel. Ina minne, ekiekifichi ekkewe wokisin lón, nge ákkáeúin ekkewe sipwe álleani atun ach káé lón mwich. Nengeniéchú ifa usun  ekkóch kapas are mwuten kapas lón ekkewe wokisin ra álisatá ewe pwóróus ewe parakraf a mochen menlapei. Pwal och, awora fansoun le ekilonei ekkewe wokisin ka álleani, me ekieki ifa usun kopwe tongeni apwénúetá lón pwisin manawom.​—Álleani Josua 1:8.

10. Seni met sia káé seni Ipru 5:14, pwata a lamot án ekkewe sam me in awora fansoun atun famili fel le áiti ngeni néúr kewe ifa usun repwe káé me research?

¹⁰ Sia weweiti pwe ekkewe sam me in ra mochen pwe ar fansoun Famili Fel iteiten wiik epwe apwapwa fán iten néúr kewe. Iwe nge, inaamwo ika mi lamot án ekkewe sam me in repwe akkóta och mettóch repwe féri lón ar famili fel iteitan, nge ese pwal lamot ar repwe meefi pwe itá repwe akkóta eú sókkun project mi ámmeseik me mi kkóló aúchean iteiten wiik. Pwúngún pwe atun ewe Famili Fel, chón ewe famili ra tongeni katol ewe prokram wóón JW Broadcasting mi kan katowu iteiten maram, are fán ekkóch angang wóón och project mi kkóló aúchean, áwewe chék ren ar féri liosun falaien Noa we waimw. Nge mi lamot pwe ekkewe semirit repwe pwal káit wóón ifa usun repwe káé. A lamot repwe silei ifa usun repwe ammólnatá fán iten ekkewe mwich, áwewe chék ren ifa usun repwe research wóón eú kapas eis a ppiitá lón sukul. (Álleani Ipru 5:14.) Ika ra awora fansoun le pwisin káé ekkóch pwóróus lón Paipel, iwe epwe ámecheresi ar repwe nefótófót me weweiti met ra rong lón ekkewe mwich me mwichelap. Pún saminne lón iteiten ekkewe mwich epwe fich video epwe ámmeseikeretá. Pwúngún pwe ttamen eú me eú fansoun káé epwe lóngólóng wóón ierin me nónnómun ekkewe semirit.

11. Pwata a lamot sipwe áiti ngeni néúch kewe chón káé ifa usun repwe féri ewe sókkun pwisin káé mi alóllóól?

¹¹ A pwal lamot án néúch kewe chón káé repwe pwal silei ifa usun repwe káé. Lupwen ra kerán káé, sia pwapwa le kúna ar erii pélúwen ekkewe kapas lupwen ra ammólnatá ar káé are ekkewe mwich. Nge mi lamot sipwe áiti ngeniir ifa usun repwe research me féri ewe sókkun pwisin káé mi alóllóól. Iwe ika a ppiitá och osukosuk, resap chék mwittir kútta álillis seni ekkóch lón ewe mwichefel, nge repwe fen silei ifa usun repwe pwisin kútta emmwen seni néúch kewe puk epwe tongeni álisiir.

12. Ikkefa ekkewe mettóch sia tongeni achocho ngeni atun sia káé?

¹² Ika kese kon sani le káé, neman kopwe ekieki pwe esap tufich óm kopwe pwapwaiti le káé. Nge ka tongeni. Lepoputáán, amwocha  chék óm káé, nge ekis me ekis kopwap attamaaló. Ekieki met kopwe achocho ngeni lón óm káé. Ren enletin, ach arap ngeni Jiowa itá ina met sipwe fókkun achocho ngeni lón ach káé. Nge neman sipwe pwal achocho ngeni le mwittir tikeri ei mettóch, ina ach sipwe pélúweni án emén kapas eis are research usun eú osukosuk sia nóm fan.

13. (a) Ikkefa ekkewe mettóch emén kúkkún are sáráfé a tongeni féri ren an epwe áwewe ngeni chienan chón sukul an lúkú? (b) Ifa usun kopwe tongeni apwénúetá ewe kapasen fén lón Kolose 4:6?

¹³ Áwewe chék, en emén kúkkún are sáráfé mi kan sussukul? Neman meinisin chienom kewe ra féri apwapwaan ránin uputiw. Eli ka mochen áwewe ngeniir seni Paipel popun kese féri apwapwaan ena rán, nge neman ka meefi pwe kese tongeni. Iwe, a lamot óm kopwe káé me research! Ka tongeni féri ekkeei ruu mettóch: (1) apéchékkúla pwisin óm lúkú pwe Kot ese pwapwa ren án aramas féri apwapwaan ránin uputiwer, me (2) elipwákéchuk lón óm tufichin áweweei ewe enlet. (Mat. 14:6-11; 1 Pet. 3:15) Neman kopwe pwisin eisinuk, ‘Met popun chienei kewe chón sukul ra kan féri apwapwaan ránin uputiwer?’ Mwirin kopwe research seni néúch kewe puk. Kopwe kúna pwe ese kon pwal weires óm kopwe áweweei minne sia lúkú. Lape ngeni aramas ra chék féri apwapwaan ránin uputiw pokiten meinisin ra pwal féri. Ika ka tongeni áiti ngeniir mwaren eú are ruu pwóróus, neman kopwe tongeni álisi emén mi wesewesen mochen silei ewe enlet.​—Álleani Kolose 4:6.

14-16. (a) Ifa usun kopwe weweéchúti pwóróusen eú puk lón Paipel kese kon lien sissilei? (b) Néúnéú ekkewe wokisin mi mak lón ewe parakraf le áweweei ifa usun kopwe weweiti unusen pwóróusen ewe puken Amos. (Pwal ppii ewe pwóór “ Alapaaló Óm Silei Ekkewe Aramas lón Paipel!”)

¹⁴ Anchangei pwe lón ach mwich sipwe álleani me pwóróusfengen wóón eú me lein ekkewe puken oesini lón Paipel mi chék mwoch nge sise kon lien silei. Iwe, akkomw neman kopwe alapaaló óm mochen silei met ena soufós a makkeei. Ifa usun kopwe féri ena?

¹⁵ Akkomw, kopwe pwisin eisinuk: ‘Ifa úkúkún ai silei ewe emén mi makkeei ena puk? Ié na, ia a nónnóm ie, met an angang?’ Ach silei nónnómun manawen ena soumak a tongeni álisikich le weweéchúti popun an néúnéú ekkóch itiitin kapas are an eáni ekkóch kapas áwewe. Atun ka álleani ewe Paipel, kútta ekkewe mwuten kapas mi pwári ika met sókkun aramas ewe soumak.

¹⁶ Mwirin, epwe álilliséch ika kopwe ppii ineet a mak ewe puk. A mecheres óm kopwe silei ena ren óm cheki ewe “Table of the Books of the Bible” lón ewe New World Translation of the Holy Scriptures. Pwal och, ka tongeni cheki ewe chart fán iten ekkewe soufós me ekkewe king lón ewe puk Minen Álillis fán Iten Káéén Paipel pekin taropwe 14-17. Ika eú puken oesini ewe puk ka káé, iwe mi éch kopwe cheki nónnómun ewe fénú me ekkewe aramas atun a mak ena puk. Ikkefa ekkewe féffér me ekiek mi ngaw aramas ra eáni lón ena atun nge ena soufós a ekiekin áwena? Ié kewe ra manaw lemanawen ena soufós? Ren óm kopwe weweiti unusen pwóróusen ena puk, neman a lamot óm kopwe pwal álleani ekkewe ekkóch wokisin lón pwal ekkewe ekkóch puken Paipel. Áwewe chék, ren óm kopwe weweéchúti nónnómun aramas lemanawen Amos we, ka tongeni álleani 2 King me 2 Kronika, ekkewe wokisin mi mak fatiwen Amos 1:1. Pwal och, ka tongeni álleani makkeien Osea we, ewe mi manaw lemanawen Amos. Meinisin ekkena puk lón Paipel repwe tongeni álisuk le weweéchúti nónnómun manawen aramas lemanawen Amos we.​—2 King 14:25-28; 2 Kron. 26:1-15; Os. 1:1-11; Am. 1:1.

17-18. Apwóróusa ekkóch pwóróus lón ekkeei parakraf are met oua pwisin kúna mi pwári ifa usun ach kútta tichikin eú pwóróus lón Paipel a tongeni efisi apwapwaan ach pwisin káé.

¹⁷ Lupwen sia állea Paipel, a éch an epwe nóm rech ewe mochen le alapaaló ach sile. Áwewe chék, ka álleani án Sekaraia we oesini usun málóón ewe Messaia lón sópwun 12. (Sek. 12:10) Lupwen ka tori wokisin 12 ka álleani pwe “ekewe famili ir mwirimwirin Natan” repwe ngúngúres me kechiweiti ewe Messaia. Mi éch ach sipwe etittinafichi ena wokisin, ekis kaúló me pwisin eisinuk: ‘Met ririin mwirimwirin Natan kewe ngeni ewe Messaia? Ia ua tongeni kútta me ie pwal ekkóch pwóróus usun?’ Iwe, kopwele chosani. Áwewe chék, ka tongeni cheki ewe New World Translation of the Holy Scriptures ren ekkewe epwipwiin wokisin lukanapen ewe chéén taropwe. A wor ruu epwipwiin wokisin fán iten Sekaraia 12:12. Ewe áeúin, 2 Samuel 5:13, 14, ewe mi áiti ngonuk pwe Natan i emén me lein néún Tafit kewe át. Nge ewe oruuen epwipwiin wokisin, Lukas 3:23, 31, epwe áiti ngonuk pwe Natan tettelin semelapen Jesus lón tettelin an Maria we famili. (Ppii Ewe Leenien Mas minen August 2017 p. 32 par. 4.) Iwe, me ikena ie kopwele fókkun mwaar! Ka silei pwe Paipel a oesini pwe Jesus epwe mwirimwirin Tafit. (Mat. 22:42) Nge a wor lap seni 20 néún Tafit át. Esap pwe a mmen amwarar án Sekaraia affata pwe a wor popun án mwirimwirin Natan kewe repwe kechiweiti málóón Jesus?

¹⁸ Ekieki pwal eú pwóróus. A mak lón Lukas sópwun eú pwe ewe chónláng itan Kapriel a chuuri Maria me ereni met epwe fis ngeni néún we át epwe néúnatiw, a erá: “Epwe fakkun napanap o epwe iteni Noun ewe God Mi Fakkun Tekia. Ewe Samol God epwe seikata i  pwe epwe emon king, ussun chok an we newo David, pwan i epwe kingen murimurin Jacob kewe feinfeino chok.” (Luk. 1:32, 33, Kapasen God) Neman sipwe chék nengeni áeúin kinikinin alon Kapriel na, mi erá pwe Jesus epwe “Noun ewe God Mi Fakkun Tekia.” Nge Kapriel a pwal oesini pwe Jesus “epwe emon king.” Iwe, sia mochen silei ekiekin Maria ren met Kapriel a ereni. Itá Maria epwele ekieki pwe Jesus epwe siwili King Herotes are emén me lein néún kewe le sounemenemen Israel? Nge ika Jesus epwe wiliti king, weween pwe Maria epwe kiwin pwe I inen ewe King, me chón an we famili repwe nóm lón ewe imwen king. Nge Paipel ese apasa pwe Maria a eppiietá ekkena sókkun ekiek ngeni Kapriel. Ese pwal wor pwóróusen án Maria tingorei an epwe eáni och wis mi aúchea lón Mwúún Kot we, usun chék met néún Jesus kewe rúúemén chón káé ra tingorei. (Mat. 20:20-23) Ena mettóch a áiti ngenikich met sia fen ekieki usun Maria, pwe i emén mi fókkun tipetekison!

19-20. Met sia mochen achocho ngeni lupwen sia káé, usun met James 1:22-25 me 4:8 a áweweei?

¹⁹ Sipwe chechchemeni pwe ach arap ngeni Jiowa ina met sia fókkun achocho ngeni lón ach káé an we Kapas me néúch kewe puk. Sia pwal mochen kúna ‘lapalapen inisich’ are ika kich met sókkun aramas me ekkewe siwil mi lamot sipwe féri ren ach sipwe apwapwaai Kot. (Álleani James 1:22-25; 4:8.) Iwe, iteiten fansoun me mwen ach sipwe káé, sipwe tingorei Jiowa an we manaman mi fel. Mi lamot sipwe tingormaú ngeni an epwe álisikich le unusen feiéch seni ewe lesen, me ach sipwe esilla ekkewe siwil mi lamot sipwe féri lón manawach.

²⁰ Amwo kich meinisin sipwe usun néún Kot we chón angang mi tuppwél ewe soumakken kélfel a fós usun. A erá: ‘A pwapwaiti än ewe Samol mi Lapalap allük o ekieki usun lerän me lepwin. . . . Meinisin mine a föri a fisiöch.’​—Kölf. 1:2, 3.