1-3. (a) Met meefien Jiowa usun féffér mi ngaw me ren Kölfel 5:4-6? (b) Pwata sia tongeni apasa pwe féfférún kirikiringaw ngeni semirit a ú ngeni “än Kraist allük”?

JIOWA KOT a oput sókkun féffér mi ngaw meinisin. (Álleani Kölfel 5:4-6.) A fókkun oput féfférún kirikiringaw ngeni semirit lón pekin lisowu, ina eú tipis mi ánioput! Kich Chón Pwáraatá Jiowa sia áppirú Jiowa me fókkun ánioputa ena féffér, me ena féffér ese fókkun ketiw lón ewe mwichefelin Chón Kraist.​—Rom 12:9; Ipru 12:15, 16.

² Meinisin féfférún kirikiringaw ngeni semirit ra fókkun ú ngeni “än Kraist allük”! (Kal. 6:2) Pwata sia tongeni apasa ena? Sia káé lón ewe lesen mwen ei pwe án Kraist allúk a weneiti meinisin áitian kewe lón an kapas me féffér, a lóngólóng wóón tong me a apéchékkúla pwúngiéch. Fán emmwenien ena allúk, ekkewe Chón Kraist mi enlet ra túmúnú pwe ekkewe semirit repwe meefi núkúnúkéch me tong enlet. Nge ewe féfférún kirikiringaw ngeni semirit ina eú féffér ese pwúng, me ina eú féfférún pwisin achéchééi. A efisi án ekkewe semirit repwe meefi núkúnúkúngawer me aúcheangawer.

³ A elichippúng pwe féfférún kirikiringaw ngeni semirit lón pekin lisowu a usun eú samau watte mi chéú wóón unusen fénúfan nge a pwal kkúú ekkewe Chón Kraist mi enlet. Pwata? Pún “ekewe aramasangau me soulängatuputup” ra chóchchómmóngóló me ekkóch neman ra sótun tolong lón ewe mwichefel. (2 Tim. 3:13) Pwal och, ekkóch mi erá pwe iir chón ewe mwichefel ra ttur lón ena mocheniaingaw me ra fen kirikiringaw ngeni ekkewe semirit. Sipwe pwóróus ika pwata ena féffér, a ina eú tipisilap. Mwirin, sipwe nengeni met ekkewe mwán mi ásimaw ra féri lupwen emén a féri eú tipis mi chou, kapachelong ei féfférún  kirikiringaw ngeni semirit, me ifa usun ekkewe sam me in ra tongeni túmúnú néúr kewe. *

4-5. Ifa usun ewe féfférún kirikiringaw ngeni semirit a ina eú tipis ngeni ewe emén mi fis ngeni?

⁴ A kon watte efeiengawen féfférún kirikiringaw ngeni semirit. Ese chék eriáfféwú ekkewe semirit nge pwal meinisin chókkewe mi tongeer, áwewe chék ren chón ar famili me chiener kewe Chón Kraist. Ena féfférún kirikiringaw ngeni semirit ina eú tipisilap.

⁵ Eú tipis ngeni ewe mi fis ngeni kirikiringaw. A eú tipis án emén epwe efisi riáfféún ekkewe ekkóch. Sipwe káé lón en lesen mwirin ei pwe ina met ekkewe chón kirikiringaw ngeni semirit ra féri, a efisi watteen riáfféú ngeni. A atai án ewe semirit lúkúlúk wóón aramas, me an meefi núkúnúkéch. Mi lamot ekkewe semirit repwe kúna túmún seni ena esin féffér mi ngaw, me mi lamot ourur me álillis ngeni chókkewe mi fen fis ngeniir ena esin kirikiringaw.​—1 Tes. 5:14.

6-7. Pwata emén chón kirikiringaw ngeni semirit a tipis ngeni ewe mwichefel me ewe mwú?

⁶ Eú tipis ngeni ewe mwichefel. Ika emén chón ewe mwichefel a kirikiringaw ngeni emén semirit, a eitengawa ewe mwichefel. (Mat. 5:16; 1 Pet. 2:12) A ifa me ngawen minne a féri pún fite million Chón Kraist mi tuppwél ra fen achocho le “maun fänäsengesin ewe lükülük”! (Jut. 3) Sisap mut ngeni ekkena sókkun aramas ar repwe nóm lón ewe mwichefel, chókkewe rese aier seni féfféringawer me ra atai itéchún ewe mwichefel.

⁷ Eú tipis ngeni ewe mwú. Ekkewe Chón Kraist “repwe aleasochisi nöüwisen ewe mwü mi nemeniir.” (Rom 13:1) Sia ánnetatá pwe sia nóm fán nemenien ewe mwú ren ach súféliti allúkún kewe. Ika emén lón ewe mwichefel a atai eú allúkún mwú, áwewe chék ren an kirikiringaw ngeni emén semirit, iwe a tipis ngeni ewe mwú. (Apépé ngeni Föför 25:8.) Esap wisen ekkewe mwán mi ásimaw ar repwe apwúngaló pwúngún allúkún mwú, me rese eppeti seni emén mi kirikiringaw ngeni semirit an epwe angei chappen an tipis ngeni ewe mwú. (Rom 13:4) Ewe chón tipis epwe kini minne a fótukatiw.​—Kal. 6:7.

8. Met meefien Jiowa usun án aramas tipis ngeni aramas?

⁸ Lap seni meinisin, a tipis ngeni Kot. (Kölf. 51:4) Lupwen emén aramas a tipis ngeni emén, i a pwal tipis ngeni Jiowa. Ekieki usun ei pwóróus seni ewe Allúk Kot a ngeni Israel. Ewe Allúk a erá pwe emén mi solá are chofona ngeni chón órun, i a “tipis ngeni ewe Samol mi Lapalap.” (Lif. 6:2-4) Iwe, emén chón ewe mwichefel mi kirikiringaw ngeni emén semirit a soláái seni ena semirit an meefi núkúnúkéch, ina popun a tipis ngeni Kot. Ewe chón kirikiringaw a eitengawa iten Jiowa we. Ren ena popun, kirikiringaw ngeni semirit a fókkun ánioput, ina eú tipis watte ngeni Jiowa.

9. Menni pwóróus seni Paipel án Jiowa we mwicheich a kan awora lón ekkewe ier tori ikenái, me pwata?

⁹ Lón ekkewe ier tori ikenái, án Jiowa we mwicheich a fen awora chómmóng pwóróus seni Paipel usun ei itelap féfférún kirikiringaw ngeni semirit. Áwewe chék, a wor ekkewe pwóróus lón Ewe Leenien Mas me Awake! ren ifa usun ekkewe mi fis ngeniir kirikiringaw lón pekin lisowu ra tongeni likiitú fán ewe watteen  riáfféú ra kúna, ifa usun ekkóch ra tongeni álisiir me apéchékkúler, me ifa usun ekkewe sam me in ra tongeni túmúnú néúr kewe. Ekkewe mwán mi ásimaw ra angei káit mi tichik me ren Paipel wóón met repwe féri ika a fis ena tipisin kirikiringaw ngeni semirit. Ewe mwicheich a kan ekketittina ekkewe emmwen mi kawor ngeni ekkewe mwán mi ásimaw wóón met repwe féri atun a fis ena féfférún kirikiringaw ngeni semirit. Pwata? Ren án ach we mwicheich epwe túmúnú pwe ekkewe mwán mi ásimaw ra kan apwénúetá án Kraist allúk, me minne ra féri a lóngólóng wóón tong me pwúngiéch.

10-12. (a) Met ekkewe mwán mi ásimaw repwe chemeni lupwen ra angang wóón met mi weneiti án emén féri eú tipis mi chou, me met ra ekieki usun? (b) Met ekkewe mwán mi ásimaw ra achocho le féri me ren James 5:14, 15?

¹⁰ Lupwen ekkewe mwán mi ásimaw ra angang wóón met mi weneiti eú tipis mi chou, ra chemeni pwe án Kraist allúk a allúkú ar repwe pwári tong ngeni ekkewe siip me féri met mi múrinné me pwúng me ren Kot. Ina minne, a lamot repwe ekieki chómmóng mettóch lupwen a toriir kapasen otuttur usun án emén féri eú tipis mi chou. Ekkewe mwán mi ásimaw ra ákkáeúin ekieki ésúfélún me itéchún iten Kot we. (Lif. 22:31, 32; Mat. 6:9) Ra pwal fókkun ekieki ar repwe túmúnú péchékkúlen án chón ewe mwichefel lúkú, me ra mochen álisi ekkewe mi fis ngeniir kirikiringaw.

¹¹ Pwal och, ika ewe chón tipis i emén chón lón ewe mwichefel, ekkewe mwán mi ásimaw repwe ekieki le achocho le álisi ika mi tufich. (Álleani James 5:14, 15.) Emén Chón Kraist mi ttur ren mochenin mi ngaw me féri eú tipis mi chou, a semmwen lón pekin lúkú. A wewe ngeni pwe ese chúen ririéch ngeni Jiowa. * Iwe lón kapas áwewe, ekkewe mwán mi ásimaw ra usun tokter lón pekin lúkú. Repwe achocho le “apöchöküla ewe chon samau [weween, ewe mi tipis].” Ar kewe kapasen fén seni Paipel a tongeni álisi an epwe ririéchsefál ngeni Kot, nge epwe chék tufich ena ika pwe a enletin aier.​—Föf. 3:19; 2 Kor. 2:5-10.

¹² A ffat pwe a mmen chou wisen ekkewe mwán mi ásimaw. Ra fókkun tongei ekkewe siip pokiten Kot a fen onómuur fán ar túmún. (1 Pet. 5:1-3) Ra mochen pwe pwiir kewe repwe meefi núkúnúkéch lón ewe mwichefel. Iwe, ren ena popun, ra mwittir mwékút lupwen a toriir eú kapasen otuttur usun án emén féri eú tipis mi chou, kapachelong ewe féfférún kirikiringaw ngeni semirit lón pekin lisowu. Nengeni ekkewe kapas eis lepoputáán  parakraf 13,  15, me  17.

13-14. Itá ekkewe mwán mi ásimaw repwe álleasochisi allúkún mwú usun repotun án emén erá pwe a fis eú féfférún kirikiringaw ngeni semirit? Áweweei.

 ¹³ Itá ekkewe mwán mi ásimaw repwe álleasochisi allúkún mwú usun repotun eú otuttur ren fissin eú féfférún kirikiringaw ngeni semirit? Ewer. Lón ekkewe fénú mi wor ena esin allúk lón, ekkewe mwán mi ásimaw repwe achocho le álleasochisi allúkún mwú usun repotun eú otuttur ren fissin kirikiringaw. (Rom 13:1) Ekkena allúk rese ú ngeni án Kot allúk. (Föf. 5:28, 29) Ina minne, lupwen emén a ereni ekkewe mwán mi ásimaw pwe a fis ngeni emén semirit eú kirikiringaw, ra mwittir kútta emmwen seni ewe keangen ofesilap ren ifa usun repwe álleasochisi allúkún ewe mwú usun ar esilei ngeniir met a fis.

¹⁴ Ekkewe mwán mi ásimaw ra alúkúlúkú ngeni ekkewe mi fis ngeniir kirikiringaw, me semer kewe me iner, me pwal chókkewe mi silei  usun met a fis pwe ese wor ngawen ar repwe wisen repotei ngeni polis ena féfférún kirikiringaw. Nge met epwe fis ika ewe repot a weneiti emén chón ewe mwichefel me ena pwóróus a chéúfetál? Itá ewe Chón Kraist mi wisen repotei met a fis epwe meefi pwe a fen eitengawa iten Kot we? Aapw. Ewe chón kirikiringaw, i ewe a eitengawa iten Kot we.

15-16. (a) Pwata a lamot epwe wor rúúemén chón pwáraatá me mwen ekkewe mwán mi ásimaw repwe tongeni féri angangen kapwúng me ren 1 Timoty 5:19? (b) Met ekkewe mwán mi ásimaw repwe féri lupwen ra silei pwe emén a etipisi emén lón ewe mwichefel pwe a kirikiringaw ngeni emén semirit?

 ¹⁵ Lón ewe mwichefel, pwata a lamot an epwe wor rúúemén feitá chón pwáraatá me mwen ekkewe mwán mi ásimaw repwe féri angangen kapwúng? Ena mettóch ina kinikinin án Paipel allúk mi tekia usun pwúngiéch. Lupwen ewe emén ese pwári pwe a féri ewe tipis, iwe mi lamot epwe wor rúúemén chón pwáraatá repwe ánnetatá pwe eménna a wesewesen tipis, me mwen ekkewe mwán mi ásimaw repwe tongeni féri eú angangen kapwúng. (Tut. 19:15; Mat. 18:16; álleani 1 Timoty 5:19.) A itá wewe ngeni pwe a lamot epwe wor rúúemén chón pwáraatá me mwen emén epwe tongeni repotei ngeni polis eú kapasen otuttur usun fissin eú féfférún kirikiringaw? Aapw. Ena allúk ese weneiti ika ekkewe mwán mi ásimaw are ekkewe ekkóch repwe repotei eú kapasen otuttur fán iten eú féfférún atai allúk.

¹⁶ Lupwen ekkewe mwán mi ásimaw ra silei pwe emén a etipisi emén lón ewe mwichefel pwe a kirikiringaw ngeni emén semirit, iwe repwe achocho le álleasochisi allúkún ewe mwú usun repotun ena mettóch. Mwirin, fán emmwenien ewe Paipel, repwe chosani met a wesewesen fis. Ika a erá pwe ese féri ena tipis, iwe ekkewe mwán mi ásimaw repwe aúseling ngeni alon pwal ekkewe ekkóch mi silei met a fen fis. Ika ewe chón etipisi me pwal emén chón pwáraatá are lap seni ra affata pwe eménna a fen kirikiringaw ngeni ena semirit are pwal ekkóch semirit, iwe ina atun epwe tongeni fférútá eú kúmiin chón apwúng. * Esap weween pwe ese pwúng alon ewe chón etipisi ika ese pwal wor ewe arúúeménún chón pwáraatá. Inaamwo ika ese wor rúúemén chón pwáraatá mi tongeni ánnetatá pwúngún pwe eménna a fen kirikiringaw ngeni semirit, nge ekkewe mwán mi ásimaw repwe mirititi pwe neman a fen fis eú tipis mi chou mi fókkun ámeteki ekkewe ekkóch. Ekkewe mwán mi ásimaw repwe ákkálisi chókkewe mi kúna riáfféú. Pwal och, ekkewe mwán mi ásimaw repwe túmúnúéchú ewe mwichefel seni eménna neman a fen kirikiringaw ngeni semirit.​—Föf. 20:28.

17-18. Áweweei án ewe kúmiin chón apwúng angang.

 ¹⁷ Met án ewe kúmiin chón apwúng angang? Ewe kapas “apwúng” ese wewe ngeni pwe ekkewe mwán mi ásimaw ra wisen apwúngaló ika mi lamot án ewe chón kirikiringaw epwe angei chappen an tipis me ren allúkún mwú pokiten an atai allúk. Ekkewe mwán mi ásimaw rese angolong lón án ewe mwú angangen kapwúng, ra likiti ngeniir ena. (Rom 13:2-4; Tit. 3:1) Nge wisen ekkewe mwán mi ásimaw ar repwe apwúngaló ika ewe emén epwe chúen nóm lón ewe mwichefel.

¹⁸ Ekkewe mwán mi ásimaw lón eú kúmiin chón apwúng ra chék apwúngaló met mi weneiti án emén riri ngeni Jiowa me chiener kewe chón lúkú. Fán emmwenien ewe Paipel, ra apwúngaló ika ewe chón kirikiringaw a aier are ese. Ika ese aier, iwe epwe katowu, me epwe esilesil lón ewe mwichefel. (1 Kor. 5:11-13) Ika a aier, a tongeni nóm lón ewe mwichefel. Iwe  nge, ekkewe mwán mi ásimaw repwe ereni pwe ese tongeni fich ngeni an epwe wor wisan lón ewe mwichefel ren fitu ier are lón ánein manawan. Pokiten ekkewe mwán mi ásimaw ra ekieki túmúnún ekkewe semirit, repwe éúréúra ekkewe sam me in lón ewe mwichefel mi wor néúr semirit ar repwe túmúnúéchú néúr kewe ika eménna a nóm. Lupwen ekkewe mwán mi ásimaw ra féri ena, ra túmúnú ar resap pwal pwári chókkewe eménna a fen kirikiringaw ngeniir.

19-22. Met ekkewe sam me in ra tongeni féri pwe repwe túmúnú néúr kewe? (Ppii ewe sasing wóón péén.)

¹⁹ Wisen ié an epwe túmúnú ekkewe semirit seni feiengaw? Wisen ekkewe sam me in. * Néúmi kewe, iir liffang seni Jiowa “alemwiriach me ren ewe Samol.” (Kölf. 127:3, Testament Mi Fö) Jiowa a fen ewisa ngenikemi pwe oupwe túmúnú néúmi kewe. Met oua tongeni féri pwe oupwe túmúnúúr seni féfférún kirikiringaw?

²⁰ Áeúin, oupwe silei pwóróusen kirikiringaw ngeni semirit. Oupwe káé met sókkun aramas ra kan kirikiringaw ngeni semirit me met ra féri pwe repwe otupuur. Túmúnúéchú met mi efeiengaw a tongeni fis are chókkewe iir mi tongeni aramas mi efeiengaw. (SalF. 22:3; 24:3) Chechchemeni pwe lape ngeni, ewe chón kirikiringaw, i emén ewe semirit a fen sissilei me lúkúlúk wóón.

²¹ Oruuan, epwe chék sussuuk alen pwóróusfengen me néúmi kewe. (Tut. 6:6, 7) A kapachelong ámi oupwe aúselingéch ngeniir. (Jas. 1:19) Chechchemeni pwe fán chómmóng ekkewe semirit ra pireir le akkaffat ika emén a kirikiringaw ngeniir. Neman ra niwokkus pwe ese wor epwe lúkúúr, are neman ewe chón kirikiringaw ngeniir a ereniir pwe epwe efeiengawer ika repwe oturu. Ika oua meefi pwe a fis ngeni néúmi kewe och mettóch, iwe fán kirekiréch oupwe kapas eis ngeniir me aúseling ngeniir fán mosonottam.

²² Aúlúngátin, asukula néúmi kewe. Áiti ngeniir ekkewe sókkun pwóróus mi fich ngeni ieriir usun féfférún lisowu. Áiti ngeniir met repwe apasa me féri ika emén a sótun attaper fán limengaw. Áeá ekkewe pwóróus án Kot we mwicheich a fen awora ren ifa usun oupwe túmúnú néúmi kewe.​—Ppii ewe pwóór itelapan “ Pwisin Asukulakemi me Néúmi Kewe.”

23. Met ach ekiek usun féfférún kirikiringaw ngeni semirit, me ifa ewe kapas eis sipwe pélúweni lón en lesen mwirin ei?

²³ Me rech Chón Pwáraatá Jiowa, ewe féfférún kirikiringaw ngeni semirit ina eú tipisilap mi fókkun ánioput. Fán án Kraist we allúk, kich Chón Pwáraatá Jiowa sise eppeti ekkewe chón kirikiringaw seni ar angei chappen ar kewe féffér. Nge, met sia tongeni féri le álisi chókkewe mi kúna riáfféú seni ena esin kirikiringaw? Ewe lesen mwirin ei epwe pélúweni ena kapas eis.