1. Met Jesus a apasa usun wéú lón láng?

A WOR ekkewe mettóch mi aúchea sia tongeni kúna, nge mi pwal wor ekkewe sise tongeni kúna. Nge ren enletin, ekkewe mettóch sise tongeni kúna ren mesach, fen ikkena ekkewe mettóch mi aúchea seni meinisin. Lón án Jesus we Afalafal wóón ewe Chuuk, a fós usun wéú lón láng, iir mi aúchea lap seni wéún fénúfan. A pwal apasa: “Ia wöümi a nom ie, ikenan lelukemi epwe pwal nom ie.” (Mat. 6:19-21) Letipach epwe amwékútúkich le achocho ngeni ekkewe mettóch sia fókkun aúcheaniir. Sia iseis ‘wöüch lon läng’ ren ach achocho ach sipwe iteúéch are úéch mwen mesen Kot. Jesus a apasa pwe ekkena mettóch mi aúchea resap tongeni taló are aramas resap tongeni solááni.

2. (a) Met Paulus a pesekich le nefótófót wóón me ren 2 Korint 4:17, 18? (b) Met sipwe pwóróus wóón lón ei lesen?

² Ewe aposel Paulus a pesekich ach sipwe “afota mesach won ekewe mettoch sisap tongeni küna.” (Álleani 2 Korint 4:17, 18.) A kapachelong ekkewe feiéch sipwe pwapwaiti lón án Kot we ótót sefé. Lón ei lesen sipwe káé usun rúáánú mettóch mi aúchea sise tongeni kúna ren mesach nge sia tongeni feiéch seni iei. Ach chiechiéch ngeni Kot, ewe liffangen iótek, álillis seni án Kot we ngún mi fel, me álillis seni Jiowa, Jesus me ekkewe chónláng lón ewe angangen afalafal. Sipwe pwal káé ifa usun sipwe tongeni pwári ach kilisou ren ekkena mettóch mi aúchea sise tongeni kúna.

3. Ifa ewe mettóch mi aúchea seni meinisin sise tongeni kúna, me ifa usun a tufich ena?

³ Ewe mettóch mi aúchea lap seni meinisin, ina ach chiechi  ngeni Jiowa Kot. (Kölf. 25:14) Epwe ifa usun epwe tufich án emén Kot mi pin epwe chiechi ngeni aramas tipis? A tufich pokiten án Jesus asoren méén kepich “a uweela tipisin chon fanüfan.” (Joh. 1:29) Pwal mwo nge me mwen án Jesus máló, Jiowa a silei pwe Jesus epwe tuppwél tori máló pwe epwe tongeni amanawa aramas. Ina popun Jiowa a tongeni chiechi ngeni ekkewe aramas mi manaw mwen án Jesus máló.​—Rom 3:25.

4. Apwóróusa ekkóch ekkewe mwán mi manaw mwen Jesus nge ra wiliti chiechien Kot.

⁴ Ekieki usun ekkóch ekkewe mwán mi manaw mwen Jesus, nge ra wiliti chiechien Kot. Apraham, emén mwán mi watteen an lúkú. Lap seni 1,000 ier mwirin málóón Apraham, Jiowa a eita ngeni “chiechiei.” (Ais. 41:8) Iwe, pwal mwo nge máló esap tongeni áimufeseni Jiowa seni chiechian kewe. Lón án Jiowa ekiek pwe Apraham a chúen manaw. (Luk. 20:37, 38) Hiop pwal emén chiechien Jiowa. Jiowa a fós usun Hiop fán lúkúlúk mwen mesen eú mwichen chónláng lón láng. Jiowa a apasa pwe “a pwüng o wenechar, a niuokusitiei o kul seni föför mi ngau.” (Hiop 1:6-8) Me met meefien Jiowa usun Taniel, néún we chón angang mi tuppwél ren úkúkún 80 ier lón ewe fénú aramas rese fel ngeni Jiowa ie? Fán úlúngát ekkewe chónláng ra alúkúlúkú ngeni ena chinnap mwán pwe a “fokun chen” me ren Kot. (Tan. 9:23; 10:11, 19) Sia tongeni lúkúlúk pwe Jiowa a mwétéresiti ewe fansoun epwe amanawasefáli chiechian kewe mi fen máló.​—Hiop 14:15.

5. Met a lamot emén epwe féri ren an epwe pwapwaiti an enletin chiechiéch ngeni Jiowa?

⁵ Fitemén aramas tipis lón ei fansoun iir mi enletin chiechiéch ngeni Jiowa? A wor fite million. Sia silei ena pokiten chómmóng mwán, fefin, me semirit ekis meinisin wóón ei fénúfan ra ánnetatá ren ar féffér pwe ra mochen wiliti chiechien Kot. Jiowa a chiechiéch ngeni are “lükülükü eman mi wenechar.” (SalF. 3:32) A tufich ena chiechi pokiten ra lúkú án Jesus we asorun méén kepich. Ren ewe méén kepich, sia tongeni wiliti chiechien Jiowa me fangóló manawach ngeni me papatais. Lupwen sia féri ekkena mettóch mi lamot, sia fiti ekkewe fite million Chón Kraist mi fen fangóló manawer ngeni Kot me papatais, iir mi pwapwaiti ar enletin chiechiéch ngeni ewe mi Lapalap seni meinisin wóón unuselapen láng me fénúfan!

6. Ifa usun sipwe pwári ach aúcheani ach chiechiéch ngeni Kot?

⁶ Ifa usun sipwe tongeni pwári pwe sia aúcheani ach chiechiéch ngeni Kot? Mi lamot sipwe akkamwéchú ach tuppwél ngeni ese lifilifil úkúkún ttamen ach sia fen akkangang ngeni lón ei ótót, usun án Apraham me Hiop akkamwéchú ar tuppwél ren fitepúkú ier. Sipwe usun chék Taniel, mi lamot sipwe aúcheani ach chiechiéch ngeni Kot lap seni ach aúcheani manawach. (Tan. 6:7, 10, 16, 22) Ren án Jiowa álillis, sia tongeni likiitú fán ese lifilifil sóssót me akkamwéchú ach ririéch ngeni.​—Fil. 4:13.

7. (a) Met meefien Jiowa usun ach kewe iótek me ren Än Salomon Fos 15:8? (b) Ifa usun Jiowa a pélúweni ach kewe iótek?

⁷ Pwal eú mettóch mi aúchea sise tongeni kúna, ina ach iótek. Chiechi ra kan sani le pwóróusfengen usun met ra ekieki me meefi. A pwal ina usun ren ach chiechifengen me Jiowa? Ewer! Jiowa a fós ngenikich ren an we Kapas, me an we Kapas a pwár ngenikich an ekiek me memmeef. Sia fós ngeni lón iótek, me sia tongeni uwawu ngeni alóllóólun ach ekiek me memmeef. Jiowa a pwapwa le aúseling ngeni ach iótek. (Álleani Än Salomon Fos 15:8.) Jiowa ese chék aúselinga  ach kewe iótek nge a pwal pélúweniir pokiten I chiechiach me a tongekich. Fán ekkóch a mwittir pélúweni ach kewe iótek, nge fán ekkóch neman a lamot sipwe likiitú le ikkiótek usun och mettóch. Nge sia tongeni lúkúlúk pwe epwe pélúweni ach iótek lón ewe fansoun fich me lón ewe napanap mi múrinné seni meinisin. Pwúngún pwe neman pélúwen ach kewe iótek epwe sókkóló seni met sia ekieki. Áwewe chék, neman Kot esap áwesi ach kewe weires are sóssót, nge epwe ngenikich ewe tipachem me péchékkúl le “pwora ngeni.”​—1 Kor. 10:13.

8. Ifa usun sia tongeni pwári ach aúcheani ewe liffang iótek?

⁸ Ifa usun sia tongeni pwári ach aúcheani ewe liffang mi fókkun aúchea iótek? Sia pwári ach kilisou ren ach álleasochisi án Jiowa ei pesepes pwe sipwe “iotek fansoun meinisin.” (1 Tes. 5:17) Jiowa ese eriánikich le iótek ngeni. Nge a súféliti ach pwúngún pwisin filatá, me a pesekich ach sipwe “achocho ngeni iotek.” (Rom 12:12, Testament Mi Fö) Ina minne, sia tongeni pwáraatá ach aúcheani ena liffang ren ach iótek fán chómmóng iteiten rán. Sisap pwal ménúki le apasaatá ach kilisou me mwareiti Jiowa lón ach kewe iótek.​—Kölf. 145:2, 3.

9. Met meefien emén Chón Kraist mwán usun iótek, me met meefiom usun?

⁹ Lupwen sia angang ngeni Jiowa ren fansoun langattam me kúna ifa usun a fen pélúweni ach kewe iótek, iwe itá epwe pwal lapóló ach aúcheani iótek. Áwewe chék, emén Chón Kraist mwán itan Chris a fen angang ngeni Jiowa full-time ren 47 ier. A erá: “A ifa me apwapwaan ai nelókkái lesossorusich pwe upwe tongeni iótek. A mmen ekinamwe ai fós ngeni Jiowa atun ewe akkar a ttinetiw me omwónupwa ekkewe amurenipwin! Ena mettóch a achchúngúei le apasaatá ai kilisou ngeni ren mettóch meinisin a liffang ngenikich, kapachelong ewe liffang iótek. Iwe, wesin ai iótek lepwin, ua fókkun annutéch fán mwelien letipei mi kinamwe.”

10. Pwata sipwe aúcheani án Kot we ngún mi fel?

¹⁰ Án Kot we ngún mi fel, pwal ina eú liffang  sise tongeni kúna, sipwe aúcheani. Jesus a pesekich ach sipwe ikkiótek fán iten án Kot we ngún mi fel. (Luk. 11:9, 13) Ren án Jiowa we ngún mi fel, a ngenikich péchékkúl pwal mwo nge ewe “tufich mi somwola.” (2 Kor. 4:7; Föf. 1:8) Ren álillisin án Kot we ngún mi fel, sia tongeni likiitú fán ese lifilifil sóssót epwe torikich.

11. Ifa usun án Kot we ngún mi fel a tongeni álisikich?

¹¹ Án Kot we ngún mi fel a tongeni álisikich le apwénúetá wisach lón ach angang ngeni. A tongeni ámúrinnééló ach kewe tufich. Sia silei pwe sópwéchún ach angang ngeni Kot a chék fis ren álillisin ewe ngún mi fel.

12. Me ren Kölfel 139:23, 24, met sia tongeni ióteki pwe án Kot we ngún mi fel epwe álisikich ren?

¹² Pwal eú alen ach sipwe pwári pwe sia aúcheani án Jiowa we ngún mi fel, ina ren ach tittingorei an epwe álisikich le esilla ika a nóm rech och ekiek are mochen ese pwúng. (Álleani Kölfel 139:23, 24.) Ika sia eáni ena esin tingor, iwe Jiowa epwe pwár ngenikich ren an we ngún mi fel ena ekiek are mochen ese pwúng. Iwe, ika sia silei ena, mi lamot sipwe tingorei Kot an we ngún mi fel pwe epwe ngenikich ewe péchékkúl le ú ngeni ekkena ekiek me mochen ese pwúng. Iwe, sia pwári pwe sia tipeppós le túmúnú senikich met epwe efisi án Jiowa epwe úkútiw le álisikich ren an we ngún mi fel.​—Ef. 4:30.

13. Ifa usun sipwe tongeni alapaaló ach aúcheani ewe ngún mi fel?

¹³ Sia tongeni alapaaló ach aúcheani án Kot we ngún mi fel ren ach ekilonei met a féfféri lón ach ei fansoun. Iei alon Jesus ngeni néún kewe chón káé me mwen an feitá láng: “Ämi oupwe angei ewe manaman lupwen Ngünmifel epwe feitiu womi, iwe, oupwe pwäriei . . . tori lon unusen fanüfan.” (Föf. 1:8) Ena mettóch a fiffis lón ei fansoun. Ren álillisin ewe ngún mi fel, ina epwe walu esopw million aramas seni sókkopaten fénú ra wiliti chón fel ngeni Jiowa. Sia pwal nónnóm lein néún Kot kewe aramas mi tipeeúfengen fán kinamwe pokiten án Kot we ngún mi fel a álisikich le ámááraatá ekkewe napanap mi echipwér ren choweán tong, pwapwa, kinamwe, mosonottam, kirekiréch, aramaséch, lúkú, tipepwetete, me nemeniéchú  pwisinkich. Ekkena napanap iir “uän Ngün.” (Kal. 5:22, 23) A ifa me aúchean ena liffang, án Kot we ngún mi fel!

14. Ié kewe ra álisikich lón ach angangen afalafal nge sise tongeni kúner?

¹⁴ A nóm rech pwal eú liffang mi aúchea sise tongeni kúna, ina ach “angangfengen” me Jiowa, Jesus, me ekkewe chónláng. (2 Kor. 6:1) Iteiten sia fiti ewe angangen afalafal, sia angangfengen me iir. Paulus a apasa pwe iir me chókkewe mi fiti ena angang ra “akkangangfengen me Kot.” (1 Kor. 3:9, NW) Lupwen sia fiti ena angang, sia pwal angangfengen me Jesus. Chemeni pwe mwirin án Jesus allúkú ngeni néún kewe chón káé ar repwe “feila o asoulängala chon ekewe mwü meinisin,” a ereniir: “Ngang üpwe etikemi.” (Mat. 28:19, 20) Nge ifa usun ren ekkewe chónláng? A ifa me feiéchúch ren ach nóm fán emmwenien ekkewe chónláng atun sia afalafala ewe “Pworausen Manau esemüch . . . ngeni chon fanüfan”!​—Pwär. 14:6.

15. Apwóróusa eú pwóróus seni Paipel mi áiti ngenikich usun wisen Jiowa mi aúchea lón ach angangen afalafal.

¹⁵ Met ena álillis seni láng a álisikich le apwénúetá? Lupwen sia amworafeili pwikilin pwóróusen Mwúún Kot we, ekkóch ekkena pwikil ra mworetiw wóón letipen chókkewe mi etiwa ewe pwóróus, iwe a mááritá. (Mat. 13:18, 23) Ié a wisen efisi mááritáán me uwaéchún ekkena pwikilin enlet? Jesus a áweweei pwe emén esap tongeni wiliti néún chón káé are “ewe Sam . . . esap panato.” (Joh. 6:44) Ewe Paipel a áiti ngenikich eú pwóróus usun ena mettóch. Chemesefáli ewe atun Paulus a afalafal ngeni eú kúmiin fefin lúkún ewe telinimwen Filipi. Nengeni met Paipel a apasa usun emén me lein ekkena fefin itan Litia: “Ewe Samol a suki lelukan pwe epwe rongosochis ngeni än Paulus afalafal.” (Föf. 16:13-15) Jiowa a pwal panato fite million aramas usun chék Litia.

16. Itá ié sipwe elingaaló lupwen a uwaéch ach angangen afalafal?

¹⁶ Ié a wesewesen asopwéchú ach angangen afalafal? Paulus a pélúweni ena kapas eis lupwen a makkeei ei usun ewe mwichefelin Korint: “Ngang üa fotuki ekewe pwükil, Apolos a atütüür, nge Kot a amäriiretä. Iei mine ewe chon fotuki me ewe chon atütü esap wor aüchear, nge Kot echök ewe mi aüchea, pun a amärätä ekewe irä.” (1 Kor. 3:6, 7) Sipwe usun Paulus, me elingaaló Jiowa pún I a wisen asopwéchú ach angangen afalafal.

17. Ifa usun sipwe pwáraatá ach aúcheani feiéchúch le “angangfengen” me Kot, Kraist, me ekkewe chónláng?

¹⁷ Ifa usun sipwe pwári pwe sia aúcheani feiéchúch le “angangfengen” me Kot, Kraist me ekkewe chónláng? Ren ach tinikken le kúkkútta alen ach sipwe afalafala ewe kapas allim ngeni aramas. A wor chómmóng alen ach sipwe afalafal, áwewe chék ren ach afalafala aramas lein “mwichen aramas pwal lon en me imwan.” (Föf. 20:20) Chómmóng ra pwal sani le afalafal sereseréch. Lupwen ra chuuri emén rese sissilei, ra chiechiéch me kapong ngeni, me sótun poputááni eú pwóróusfengen. Ika eménna a pwapwa le aúseling, iwe repwe poputá le afalafal ngeni fán súfél usun kapas allimen ewe Mwú.

18-19. (a) Ifa usun sia étútúúi pwikilin ewe enlet? (b) Apwóróusa eú pwóróus mi áiti ngenikich ifa usun Jiowa a álisi emén chón káé Paipel.

¹⁸ Lón ach “akkangangfengen me Kot,” sise chék fótuki ekkewe pwikilin enlet, nge sia pwal étútúúr. Lupwen emén a pwapwaiti pwóróusen ewe enlet, sia mochen achocho le chuursefáli are akkóta án emén epwe chuursefáli me ppii ika a mochen káé ewe Paipel. Lupwen a feffeitá  lón an káé, sia pwapwa le kúna án Jiowa álisi ena chón káé Paipel le féri siwil lón an ekiek me féffér.

¹⁹ Nengeni pwóróusen Raphalalani, emén sourong lón South Africa. A aúcheani minne a káé seni Paipel. Nge a mmen weires ngeni an epwe etiwa met Paipel a apasa usun án aramas sótun fós ngeni aramaser kewe mi fen máló. (Tut. 18:10-12) Ekis me ekis a mut ngeni Kot an epwe anapanapa an ekiek. Ló, ló, ló, a úkú seni an sourong, inaamwo ika ina chék alen an moni tolong. Iei alon Raphalalani iei lón an ier 60: “Ua fókkun kilisou ren án Chón Pwáraatá Jiowa álisiei lón chómmóng mettóch, áwewe chék, ra álisiei le kút ai angang. Nge lap seni meinisin, ua kilisou ngeni Jiowa ren an álisiei le elimeliméchú manawei pwe iei ua tongeni fiti ewe angangen afalafal me emén néún Kot Chón Pwáraatá mi papatais.”

20. Met sipwe tipeppós le féri?

²⁰ Lón ei lesen, sia fen káé usun ekkewe rúáánú mettóch mi aúchea sise tongeni kúna ren mesach. Ewe mi lap seniir meinisin, ina ach wiliti chiechien Jiowa. Ina met a atufichikich le kúna feiéch seni pwal ekkewe ekkóch mettóch mi aúchea sise tongeni kúna ren mesach, áwewe chék ren ach arap ngeni Kot lón iótek, kúna álillisin án Kot we ngún mi fel, me angei álillis seni Kot lón ach we angangen afalafal. Amwo sipwe tipeppós le alapaaló ach aúcheani ekkena mettóch mi aúchea sise tongeni kúna. Me sia mochen kilisou ngeni Jiowa iteitan pwe i Chiechiach mi fókkun múrinné.