1-2. Ikkefa ekkewe weires chómmóng Chón Pwáraatá ra kúna?

APOSEL PAULUS a pesei Timoty kapachelong meinisin ekkewe Chón Kraist ar repwe unusen apwénúetá wiser lón ewe angangen afalafal. (2 Tim. 4:5) Ina popun, sia álleasochisi án Paulus na kapasen pesepes me achocho úkúkún ach tufich lón ach angang ngeni Kot. Nge fán ekkóch a áweires. Chómmóng pwiich kewe ra pireir le afalafal. (2 Tim. 4:2) Áwewe chék, ekieki usun pwiich kewe iir mi nóm lón ekkewe leeni mi aúkúk are pwal mwo nge pinepin ach angang ie. Ra afalafal inaamwo ika ra silei pwe ra tongeni kalapus ren.

² Néún Jiowa kewe aramas ra kúna sókkopaten weires mi tongeni eletipechouur. Áwewe chék, a lamot án chómmóng repwe angangoló fitu awa ren chék ar repwe atufichi chón ar famili. Ra mochen alapaaló ar angang lón ewe angangen afalafal, nge ese chúen wor ar péchékkúl. A kaúk minne ekkóch ra tongeni féri pokiten ar samau, apwangapwangen chinnap, me eli ra pwal mwo nge mwenilóng lón imwer kewe. Pwal ekkóch, ra kan meefi pwe ese wor aúchear me ren Jiowa. Iei alon Mary, * emén Chón Kraist fefin seni Middle East: “Ua fókkun achocho le nemeni ai kewe memmeef atun ua letipechou, me a ápekkusuei. Iwe mwirin, ua mengiringir pokiten a fen angealó ai fansoun me péchékkúlei fán iten ai angangen afalafal.”

3. Met sipwe káé lón ei lesen?

³ Ese lifilifil met sókkun osukosuk sia kúna, nge Jiowa a tongeni ngenikich ewe péchékkúl mi lamot pwe sipwe tongeni sópweló le akkangang ngeni úkúkún ach tufich. Me mwen ach sipwe káé ifa usun Jiowa a tongeni álisikich, sipwe lóóm ppii ifa usun a fen apéchékkúla Paulus me Timoty le apwénúetá wiser lón ar angangen afalafal inaamwo ika ra kúna weires.

4. Ikkefa ekkewe weires Paulus a kúna?

⁴ Paulus a kúna chómmóng osukosuk. A ákkáeúin lamot ngeni péchékkúl lupwen aramas ra awata, monei ngeni faú, me kalapusei. (2 Kor. 11:23-25) Paulus ese sáw le erá pwe fán ekkóch a fókkun achocho le fiu ngeni an letipechou. (Rom 7:18, 19, 24) A pwal likiitú fán ‘eu samau a fokun metek ren,’ ewe a fókkun mochen pwe Kot epwe amóeló.​—2 Kor. 12:7, 8.

5. Met Paulus a tufichin apwénúetá inaamwo ika a kúna chómmóng weires?

⁵ Jiowa a apéchékkúla Paulus le sópweló an angangen afalafal inaamwo ika a kúna chómmóng weires. Nengeni met Paulus a tufichin apwénúetá. Áwewe chék, atun a kalapus lón eú imw Rom, a tinikken le afalafal ngeni ekkewe néúwis chón Jus, me pwal eli me mwen ekkewe néúwisin mwú. (Föf. 28:17; Fil. 4:21, 22) A afalafal ngeni chómmóng chókkewe mi masa, me meinisin chókkewe mi etto chuuri. (Föf. 28:30, 31; Fil. 1:13) Lón pwal chék ena atun, Kot a emmweni Paulus le makkeei ekkewe taropwe mi álilliséch ngeni ekkewe Chón Kraist mi enlet lóóm tori lón ach ei fansoun. Pwal och, án Paulus leenien áppirú a apéchékkúla chienan kewe lón ewe mwichefelin Rom, iwe “a lapala ar pwora le afalafala ewe kapasen Kot, nge resap niuokus.” (Fil. 1:14) Inaamwo ika a aúkúk minne Paulus a tongeni féri, nge a achocho, me a “wesewesen alisi chöülan ewe Pworausen Manau.”​—Fil. 1:12.

6. Me ren 2 Korint 12:9, 10, met a álisi Paulus le apwénúetá an angangen afalafal?

⁶ Paulus a mirititi pwe meinisin minne a féri lón án Jiowa angang, a fis pokiten án Jiowa manaman nge esap pokiten pwisin an. A apasa pwe án Kot manaman a ‘unusöchüla lon an apwangapwang.’ (Álleani 2 Korint 12:9, 10.) Jiowa a fang ngeni Paulus an we ngún mi fel pwe epwe unusen apwénúetá an angangen afalafal inaamwo ika a kúna riáfféúmwáál, a kalapus, me kúna pwal ekkóch weires.

7. Ikkefa ekkewe weires Timoty a kúna mi eppeti an epwe unusen apwénúetá wisan?

⁷ A pwal lamot ngeni chienen Paulus we alúwél Timoty an epwe lúkúlúk wóón án Kot we manaman le apwénúetá an angangen afalafal. Timoty a fiti Paulus lón an kewe sái lón an angangen misineri. Paulus a tinaló  Timoty ngeni pwal ekkóch mwichefel pwe epwe apéchékkúler. (1 Kor. 4:17) Eli Timoty a meefi lipwákingaw, iwe ese mwáál ina ewe popun Paulus a pesei: “Kopwe tümwünuk, pwe esap wor eman epwe urumwoteek pokiten om alüal.” (1 Tim. 4:12) Pwal och, lón ena atun, Timoty a pwal pwisin weires pokiten a “samau fän chomong.” (1 Tim. 5:23) Nge Timoty a silei pwe án Jiowa we ngún mi fel mi manaman a tongeni apéchékkúla le afalafala ewe kapas allim me álisi pwiin kewe.​—2 Tim. 1:7.

8. Ifa usun Jiowa a apéchékkúla néún kewe aramas lón ei fansoun?

⁸ Lón ei fansoun, Jiowa a fang ngeni néún kewe aramas ewe “tufich mi somwola” pwe repwe tongeni sópweló le angang ngeni fán tuppwél. (2 Kor. 4:7) Sipwe káé rúáánú mettóch Jiowa a awora pwe epwe apéchékkúlakich me álisikich le chék tuttuppwél ngeni. Ikkeei: iótek, ewe Paipel, chienach kewe Chón Kraist, me ach angangen afalafal.

9. Ifa usun iótek a tongeni álisikich?

⁹ Iótek a apéchékkúlakich. Usun met a mak lón Efisos 6:18, Paulus a pesekich ach sipwe iótek ngeni Kot “fansoun meinisin.” Iwe, Kot epwe apéchékkúlakich. Jonnie seni Bolivia, a kúna án Jiowa álisi atun a nóm fán chómmóng osukosuk. Pwúlúwan we, me seman kewe me inan ra semmwenippék, nge a fókkun chou ar kana semmwen. A fókkun áweires ngeni Jonnie an epwe túmúnúúr me úlúmén. Inan we a máló, me a ttam me mwirin án pwúlúwan we me seman we repwe chikar. Atun Jonnie a chemesefáli minne a fis, a apasa: “Atun ua fókkun lólilen, a kan álilliséch ngeniei ai iótek ngeni Jiowa me tichiki ngeni meefiei.” Jiowa a apéchékkúla Jonnie pwe epwe tongeni likiitú. Ronald, emén mwán mi ásimaw seni Bolivia, a silei pwe inan we a kanser. A máló mwirin eú maram. Met a álisi Ronald le likiitú? Iei alon: “Ai ikkiótek ngeni Jiowa, a atufichiei le ereni unusen meefiei. Ese pwal wor emén a weweiti meefiei me lúkún Jiowa, pwal mwo nge pwisin ngang.” Fán ekkóch, sise silei met sipwe ióteki, nge Jiowa a etiwakich ach sipwe iótek ngeni inaamwo ika a weires ach sipwe tichiki ngeni úkúkún meefiach.​—Rom 8:26, 27.

10. Me ren Ipru 4:12, pwata a fókkun aúchea ach ákkálleani ewe Paipel me ekkekilonei usun?

¹⁰ Ewe Paipel a apéchékkúlakich. Sia tongeni lúkúlúk wóón álillisin ewe Paipel le apéchékkúlakich me oururukich, usun chék Paulus. (Rom 15:4) Atun sia álleani ewe Paipel me ekilonei, Jiowa a tongeni álisikich le weweiti ifa usun epwe tongeni álisikich. (Álleani Ipru 4:12.) Ronald ewe mi mak pwóróusan me mwan, a apasa: “Ua kilisou pwe ua aéérngeniei le ákkálleani ewe Paipel iteiten pwiin. Ua kan alapa ai ekilonei napanapen Jiowa kewe me an féfférún tong ngeni néún kewe chón angang, ena mettóch a apéchékkúlaei.”

11. Ifa usun ewe Paipel a apéchékkúla emén Chón Kraist fefin mi letipeta?

¹¹ Sia tongeni ámááraatá ewe ekiek mi pwúng usun minne a fis lón manawach ren ach ekkekilonei wóón án Kot we Kapas. Áwewe chék, ekieki ifa usun ewe Paipel a álisi emén fefin mi chúúpwúl ren málóón pwúlúwan. Emén mwán mi ásimaw a ereni pwe a tongeni káé chómmóng lesen mi álilliséch ngeni ren an álleani ewe puken Hiop. Atun a álleani, akkomwan a esiita Hiop ren an eáni ekiek ese pwúng. A anchangei an ereni: “Hiop! Kete ekieki chék pwisin óm  kewe osukosuk!” Nge, a mirititi pwe an ekiek a léllé ngeni án Hiop ekiek. Ena mettóch a álisi le ekkesiwili an ekiek, me a apéchékkúla an epwe likiitú fán metekin málóón pwúlúwan we.

12. Ifa usun Jiowa a néúnéú pwiich kewe le apéchékkúla kich?

¹² Chienach kewe Chón Kraist ra apéchékkúlakich. Pwal eú alen án Jiowa apéchékkúlakich, ren álillisin chienach kewe Chón Kraist. Paulus a makkeei pwe a fókkun mochen pwe “ämi me ngang sipwe apöchökülafengenikich.” (Rom 1:11, 12) Mary ewe sia fen pwóróusan me mwan, a aúcheani ena esin chiechi. A erá: “Jiowa a néúnéú pwiich kewe iir kewe rese pwal mwo silei ai kewe weires. Ra ereniei och mettóch mi apéchékkúlaei, are mak taropwe ngeniei, me ina met a wesewesen lamot ngeniei. A pwal álilliséch ach sipwe fós ngeni ekkóch Chón Kraist fefin iir mi pwal eáni ekkena esin osukosuk, me káé seni met ra féri. Me ekkewe mwán mi ásimaw ra kan ámmeef ngeniei pwe chón ewe mwichefel ra tongeei.”

13. Ifa usun sia tongeni apéchékkúlafengenikich lón ach kewe mwich?

¹³ Lón ach we leenien mwich, ina ewe leeni mi kon múrinné seni meinisin ach sipwe apéchékkúlafengenikich ie. Atun ka fiti mwich ka tongeni sótun apéchékkúla ekkewe ekkóch ren óm ereniir pwe ka tongeer me kilisou ren met ra féri. Áwewe chék, me mwen eú mwich, emén mwán mi ásimaw itan Peter a ereni emén Chón Kraist fefin pwúlúwan we esap i emén chón lúkú: “A fókkun apéchékkúlaei ai kúnók óm etto fiti mwich. Ka chék ukkuwei noum keei wonomén, me ra chék mommolnetá le uwawu meefier.” A cháicháiwu me lemesan, me apasa: “A fókkun achchúngú letipei met ena ke erá.”

14. Ifa usun ach fiti ewe angangen afalafal a álisikich?

¹⁴ Ewe angangen afalafal a apéchékkúlakich. Atun sia áiti ngeni aramas ewe enlet seni Paipel, sia péchékkúletá ese lifilifil ika ra etiwa are rese. (SalF. 11:25) Emén Chón Kraist fefin itan Stacy a kúna úkúkún án ewe angangen afalafal tongeni apéchékkúla. Atun emén chón an we famili a katowu, a fókkun letipechou. A mmen weires ngeni Stacy an epwe wes le ekkekieki ena osukosuk ika mi chúen wor met a tongeni féri le álisi. Met a álisi le likiitú fán ena osukosuk mi áweires? Ina ewe angangen afalafal! Lupwen a fiti ewe angangen afalafal, a poputá le nefótófót wóón chókkewe lón an we territory mi lamot ngeniir an álillis. A apasa: “Lón ena atun, Jiowa a ngeniei emén nei chón káé mi mwittir feffeitá. Ena mettóch a fókkun apéchékkúlaei. Ai fiti ewe angangen afalafal, a fókkun anúkúcharaei.”

15. Met ka káé seni meefien Mary?

¹⁵ Eli ekkóch ra meefi pwe ese pwal lap met ra tongeni féri lón ewe angangen afalafal pokiten nónnómun manawer. Ika a ina usun meefiom, chemeni pwe Jiowa a pwapwa ika ka féri úkúkún óm tufich lón óm angang ngeni. Nengeni pwóróusen Mary, ewe sia fen pwóróusan me mwan. Lupwen a mwékút ngeni eú mwichefel mi eáni fósun ekis, a meefi pwe ese naf an álillis. A apasa: “Ren ekis fansoun, atun ua wawu meefiei lón mwich a chék mwoch, are ua chék álleani eú wokisin, are atun ua fiti ewe angangen afalafal, ua chék anéúnéú eché tract.” A meefi pwe a lipwákingaw ese usun chókkewe mi angéch ena fós. Iwe nge, a siwili an ekiek. A poputá le mirititi pwe Jiowa a tongeni néúnéú i inaamwo ika a aúkúk tufichin. A erá: “A mecheres án aramas repwe weweiti ekkewe pwóróus mi enlet lón Paipel, nge fen ikkena  met a amwékútú aramas le féri ekkesiwil lón manawer.”

16. Met a tongeni álisi chókkewe mi mochen afalafal nge ra mwenilóng lón imw?

¹⁶ Jiowa a kúna me aúcheani ach mochen le fiti ewe angangen afalafal inaamwo ika sia mwenilóng lón imw. A tongeni suuki alen ach sipwe afalafal ngeni ekkewe chón túmúnúkich, are chón angangen pioing. Ika sia aléllééi minne sia fen féri me lóóm ngeni nónnómuch iei, sia tongeni lichippúng. Nge ika sia mirititi ifa usun Jiowa a ákkálisikich iei, epwe nóm rech ewe péchékkúl mi lamot pwe sipwe tongeni likiitú fán ese lifilifil sóssót fiti pwapwa.

17. Me ren Än Salomon Afalafal 11:6, pwata a lamot ach sipwe chék sóssópweló le afalafal inaamwo ika ese wor a etiwa?

¹⁷ Sise silei ika epwe menni lein ekkewe pwikilin enlet sia fen fótuki epwe té waran me poputá le pwúk. (Álleani Än Salomon Afalafal 11:6.) Áwewe chék, iei pwóróusen Barbara emén Chón Kraist fefin lap seni walik ierin mi kan akkafalafal wóón phone me mak taropwe. Lón eché me lein néún kana taropwe, a waalong eú Leenien Mas minen March 1, 2014 itelapan, “Met Kot A Fen Féri fán Itom.” Barbara ese tepereni nge a fen tinaló ena taropwe ngeni eú pean pwúpwúlú esap chúen iir Chón Pwáraatá Jiowa. Ra ákkálleani ena Leenien Mas fán fite. Ewe mwán a meefi pwe usun itá nge Jiowa a pwisin fós ngeni. Ewe pean pwúpwúlú ra poputá le fiti ekkewe mwich me ló, ló, ló, ra wilisefáliti Chón Pwáraatá Jiowa mi achocho mwirin lap seni 27 ier. Barbara a fókkun péchékkúletá le kúna sópwéchún eché me lein néún kewe taropwe a makkeei.

18. Met a lamot ach sipwe féri pwe Kot epwe apéchékkúlakich?

¹⁸ Jiowa a awora chómmóng mettóch pwe epwe apéchékkúlakich. Áwewe chék ren iótek, ewe Paipel, chienach kewe Chón Kraist, me ewe angangen afalafal. Atun sia alamota ekkena mettóch, sia pwár ngeni pwe sia lúkúlúk pwe i a tongeni álisikich me a mochen an epwe féri ena. Sipwe lúkúlúk wóón Semach we lón láng fansoun meinisin, ewe mi pwapwa le “apöchöküla chokewe mi fang ngeni unusen letiper.”​—2 Kron. 16:9.