1. Pwata a lamot ngenikich meinisin ewe tipachem seni Kot? (Än Salomon Fos 4:7)

 IKA ka fen piin eáni eú kefil mi aúchea, ese mwáál ka fen tingor tipachem seni Kot pokiten ka silei pwe a lamot ngonuk. (Jas. 1:5) King Salomon a erá pwe a fókkun aúchea tipachem. (Álleani Än Salomon Fos 4:7.) Salomon ese fós usun ese lifilifil sókkun tipachem, nge a fós usun ewe tipachem seni Jiowa Kot. (SalF. 2:6) Nge ena tipachem seni Kot a tongeni álisikich lón ekkewe sókkun osukosuk sia kúkkúna lón ei fansoun? Ewer a tongeni, usun met sipwele kúna me lón ei lesen.

2. Ifa eú alen ach sipwe eáni enletin tipachem?

² Eú alen ach sipwe tongeni eáni enletin tipachem ina ren ach káé me apwénúetá met ekkewe rúúemén mwán mi fókkun tipachem ra eáni káit. Áeúin, sipwe káé usun Salomon. Ewe Paipel a erá pwe “Kot a fang ngeni Salomon tipachem me ekialolol esor aükükün.” (1 King 4:29) Oruuan, sipwe káé usun Jesus, ewe mwán mi fókkun tipachem seni meinisin mi manaw wóón fénúfan. (Mat. 12:42) Iei met Paipel a oesini usun Jesus: “Ngünün ewe Samol mi Lapalap epwe nonom won, ewe Ngün epwe ngeni tipachem me mirit.”​—Ais. 11:2.

3. Met sipwele káé lón ei lesen?

³ Kot a fang ngeni Salomon me Jesus watteen tipachem, ina popun ra tongeni awora kapasen emmwen wóón ekkewe mettóch mi aúchea ngenikich meinisin. Sipwe káé úlúngát me leir lón ei lesen: Lamoten ach sipwe eáni ekiek mi pwúng usun moni, angangen moni, me pwisinkich.

4. Ifa usun nónnómun Salomon lón pekin aion a sókko seni nónnómun Jesus?

⁴ Salomon a fókkun wéúéch, me a wor imwan mi fókkun múrinné me ling. (1 King 10:7, 14, 15) Nge Jesus, ese kon chómmóng pisekin me ese pwal wor pwisin imwan. (Mat. 8:20) Nge iir me rúúemén ra eáni ekiek mi pwúng usun wéú me pisek pokiten ewe tipachem mi nóm rer a pop seni Jiowa Kot.

5. Ifa án Salomon ekiek mi pwúng usun moni?

⁵ Salomon a erá pwe moni a “alisi aramas.” (SalAf. 7:12) Ika a wor néúch moni, sia tongeni kamé ekkewe mettóch mi lamot ngenikich me eli pwal ekkóch mettóch sia mochen. Iwe nge inaamwo ika Salomon a pisekisek, nge a mirititi pwe a wor ekkewe mettóch mi aúchea lap seni moni. Áwewe chék iei met a makkeei: “Kopwe filätä iteüöch lap seni wöümong.” (SalF. 22:1) Salomon a pwal erá pwe chókkewe mi tongei moni rese menemenéch are pwapwa ren minne mi wor rer. (SalAf. 5:10, 12) Me a éúréúrakich ach sisap unusen lúkúlúk wóón moni pokiten a tongeni mwittir morolo.​—SalF. 23:4, 5.

6. Ifa án Jesus ekiek mi pwúng usun mettóchun aion? (Mateus 6:31-33)

⁶ Jesus a eáni ekiek mi pwúng usun mettóchun aion. A sani mwéngé me ún. (Luk. 19:2, 6, 7) Lón eú atun, a féri wain mi fókkun múrinné me ina ewe áeúin manaman a féri. (Joh. 2:10, 11) Me atun a máló, a úféúf eché úf mi mémmóng. (Joh. 19:23, 24) Nge Jesus ese mut ngeni mettóchun aion an epwe nampa eú lón manawan. A ereni néún kewe chón káé: “Esap wor eman a tongeni angang ngeni ruoman samol . . . Ousap tongeni angangepök ngeni Kot me wöün fanüfan.” (Mat. 6:24) Jesus a áiti ngenikich pwe ika sia akkomwa án Kot we Mwú lón manawach, iwe Jiowa epwe awora met mi lamot ngenikich.​—Álleani Mateus 6:31-33.

7. Ifa usun emén Chón Kraist mwán a kúna álillisin an eáni ekiek mi pwúng usun moni?

⁷ Chómmóng chienach kewe Chón Kraist ra kúna álilliséchún ar apwénúetá án Jiowa  kapasen emmwen mi pwúng usun moni. Áwewe chék, iei pwóróusen emén Chón Kraist mwán mi lipich itan Daniel. A erá: “Lealúwéli, ua filatá ai upwe akkomwa lón manawei ai angang ngeni Jiowa.” Pokiten Daniel a chék menemenéch ren met mi wor ren, iwe a tongeni áeá an kewe tufich me an fansoun le álillis lón chómmóng angang lón án Jiowa we mwicheich. Iei met a pwal erá: “Ua tongeni enletin erá pwe use fókkun niamam ren met ua filatá. Ren enletin, ua tongeni wéúéchúló ika ua filatá ai upwe akkomwa moni lón manawei. Ika ina, iwe usap eáni ei sókkun riri mi fókkun aúchea ua eáni iei. Ika ua akkomwa moni lón manawei, usap eáni ei pwapwa ua eáni ren ai akkomwa ai angang ngeni Jiowa. Jiowa a fen fang ngeniei ewe esin pwapwa moni ese tongeni atoto.” A ffat pwe sia feiéch ren ach akkomwa ach angang ngeni Jiowa nge esap fen moni.

8. Pwata sia silei pwe Salomon a eáni ekiek mi pwúng usun angang? (Än Salomon Afalafal 5:18, 19)

⁸ Salomon a erá pwe án emén angang weires a tongeni atoto watteen an pwapwa. A eita ngeni ena mettóch “eu lifang me ren Kot.” (Álleani Än Salomon Afalafal 5:18, 19.) Iei met a makkeei: “Eman mi weires le angang epwe angei winnan.” (SalF. 14:23) Salomon a silei pwe a pwúng minne a apasa. I emén mi chófó lón an angang! A kan kaú imw, féri ataken wain, me a féri tánipi me leenien konik. A pwal kaú telinimw. (1 King 9:19; SalAf. 2:4-6) A mmen weires ekkena angang, nge ese wor tipemwaramwar pwe a efisi pwapwaan. Nge ese naf an féri ekkena mettóch ren an epwe enletin pwapwa. A pwal féri chómmóng mettóch fán iten Jiowa. Áwewe chék, ren úkúkún fisu ier a emmweni angangen kaútáán án Jiowa we imwenfel mi fókkun lingemwarar! (1 King 6:38; 9:1) Mwirin án Salomon féri sókkopaten sókkun angang lón pekin aion me pekin ngún, a mirititi pwe án emén angang ngeni Jiowa, ina ewe angang mi fókkun múrinné seni meinisin. A makkeei: “Oupwe rong ei kapasen lesopolan: Oupwe niueiti Kot o alesochisi an kewe allük.”​—SalAf. 12:13.

9. Ifa usun Jesus a túmúnú pwe an angangen moni esap ina ewe mi kon aúchea me ren?

⁹ Jesus i emén mi fókkun chófó lón an angang. Atun a nóm fénúfan, lealúwélún a féri angangen kaú imw. (Mark. 6:3) Ese mwáál, inan kewe me seman ra fókkun kilisou ren álilliséchún ngeniir lón ar achocho le atufichi ar we watteen famili. Pokiten Jesus a unuséch, iwe a tongeni féri mettóch mi fókkun múrinné, iwe eli chómmóng aramas ra mochen eáni ekkewe mettóch a fériir! Ese mwáál a fókkun sani an angang. Inaamwo ika i emén mi fókkun tinikken lón an angang, nge iteitan a awora fansoun le angang ngeni Jiowa. (Joh. 7:15) Mwirin, atun a áeá unusen an fansoun lón ewe angangen afalafal, a ereni chókkewe mi aúseling ngeni: “Ousap angang fän iten mongö mi tongeni ngauala, nge oupwe angang fän iten mongö mi nonomola tori manau esemüch.” (Joh. 6:27) Me iei met a pwal erá lón an we Afalafal Wóón ewe Chuuk: “Oupwe iseis wöümi lon läng.”​—Mat. 6:20.

10. Met a tongeni fis lón ach leenien angang ika pwe kich emén chón angang mi angangéch?

¹⁰ Atun sia apwénúetá án Jiowa kapasen emmwen, sipwe eáni ekiek mi pwúng usun ach angangen moni. Pokiten kich Chón Kraist, sia káit pwe sipwe “achocho le angang” me féréchú ach angang. (Ef. 4:28) Fán chómmóng, néúch kewe boss ra kan  kúna pwe sia wenechar me chófó le angang, me eli repwe erenikich úkúkún ar aúcheani ach féri ach angang. Ena mettóch epwe tongeni efisi ach sipwe alapaaló néúch awan angang pwe sia mochen pwe néúch kewe boss repwe eáni ekiek mi pwúng usun Chón Pwáraatá Jiowa. Nge ika sia féri ena, eli esap chúen naf ach fansoun ngeni ach famili are ach fansoun le angang ngeni Jiowa. Iwe a lamot ach sipwe siwili ena pwe epwe lapóló ach fansoun le féri ekkewe mettóch mi kon aúchea.

11. Ifa usun emén alúwél a káé an epwe eáni ekiek mi pwúng usun angangen moni?

¹¹ Emén Chón Kraist alúwél itan William, me lóóm a angang ren emén Chón Kraist mwán nge a káé seni aúchean an epwe eáni ekiek mi pwúng usun an angangen moni. Iei met William a erá usun átena: “[Ena Chón Kraist mwán] a isetiw leenien áppirú mi fókkun múrinné usun emén mi eáni ekiek mi pwúng usun angang. A fókkun chófó lón an angang, me néún kewe kastomer ra mmen sani pokiten a mmen angangéch. Nge sárin an angang lekuniol, a áeá an fansoun me péchékkúl fán iten an we famili me fán iten Jiowa. Me i emén me lein chókkewe ua sissileer pwe ra fókkun pwapwa!” *

12. Ifa usun Salomon a pwári pwe a eáni ekiek mi pwúng usun pwisin i, nge met a efisi an esap chúen eáni ena esin ekiek?

¹² Atun Salomon a tuppwél lón an fel ngeni Jiowa, a eáni ekiek mi pwúng usun pwisin i. Pokiten a chúen alúwél, iwe a mirititi aúkúkún tufichin me a tingorei Jiowa an epwe emmweni. (1 King 3:7-9) Lepoputáán an nemenem, a pwal silei efeiengawen lamalamtekia. Iei met a makkeei: “Lamalamtekia a akom mwen feiengau, nge tunosikesik a akom mwen än eman tur.” (SalF. 16:18) A solap pwe ló, ló, ló Salomon ese chúen apwénúetá an na pesepes. Atun a nemenem, a lamalamtekia me a poputá le túnaló án Kot kewe allúk. Áwewe chék, eú me lein ekkewe allúk a  erá pwe a lamot án emén king re Ipru esap “achomongala pwülüan pwe lelukan esap tokola seni Kot.” (Tut. 17:17) Salomon a tunaló ena allúk me a wor 700 pwúlúwan me 300 únúpwúlúwan, chómmóng me leir iir chón fel ngeni kot chofona! (1 King 11:1-3) Eli Salomon a ekieki pwe ese pwal efeiengaw an féri ena. Nge mwirin, a kúna sópwongawen an kun seni Jiowa.​—1 King 11:9-13.

13. Met sia tongeni káé seni ach ekilonei tipetekisonun Jesus?

¹³ Fansoun meinisin, Jesus a itepék me rúúepek me eáni ekiek mi pwúng usun pwisin i. Me mwen an feito fénúfan, a féri chómmóng mettóch mi amwarar lón an angang ngeni Jiowa. Jiowa a néúnéú i le “föri mettoch meinisin lon läng me won fanüfan.” (Kol. 1:16) Lupwen Jesus a papatais, ese mwáál a chechchemeni ekkena mettóch a fériir atun a nóm ren Seman we. (Mat. 3:16; Joh. 17:5) Nge ena mettóch ese efisi án Jesus epwe lamalamtekia. Me i ese fókkun átekiatáái pwisin i seni ekkewe ekkóch. A ereni néún kewe chón káé pwe ese feito fénúfan “pwe aramas repwe angang ngeni, nge a feito an epwe angang ngeniir o fangala manauan fänäsengesin chomong.” (Mat. 20:28) A pwal apasa pwe ese fókkun tongeni féri och mettóch wóón pwisin an. (Joh. 5:19) Jesus i emén mi fókkun tipetekison! A isetiw ngenikich eú leenien áppirú mi múrinné.

14. Met sia tongeni káé seni án Jesus eáni ekiek mi pwúng usun pwisin i?

¹⁴ Jesus a áiti ngeni ekkewe chón tapweló mwirin ar repwe eáni ekiek mi pwúng usun pwisin iir. Lón eú atun, a alúkúlúkúúr ren an ereniir: “Meten möküremi kewe mwo nge ra lea meinisin.” (Mat. 10:30) Minne a erá a pwal fókkun alúkúlúkúkich, ákkáeúin ika sia kan ákkeáni ekiek ese pwúng usun pwisinkich. Weween pwe Semach we lón láng a unusen tongekich me sia aúchea me ren. Ika Jiowa a mut ngenikich ach sipwe fel ngeni me a ekieki pwe a fich ngenikich ach sipwe manaw tori feilfeiló lón an we ótót séfé, iwe a lamot ach sisap ekieki pwe ese pwúng ena.

15. (a) Ifa ewe ekiek mi pwúng usun pwisinkich The Watchtower a pesengenikich ach sipwe ámááraatá? (b) Usun met a pwá me lón ekkewe sasing lón pekin taropwe 24, ikkefa ekkewe feiéch sisap eáni ika sia kon nefótófót wóón pwisinkich?

 ¹⁵ Engol me nimu ier a ló, The Watchtower a pesengenikich ach sipwe ámááraatá ach eáni ekiek mi pwúng usun pwisinkich. A erá: “Ren enletin, sise mochen ekieki pwe sia múrinné seni ekkewe ekkóch pwe site lamalamtekia. Nge a pwal lamot ach sisap ekieki pwe sia aúcheangaw pwe site letipengaw. Sipwe fen eáni ekiek mi pwúng usun pwisinkich, weween sipwe weweiti pwe a wor met ekkewe sia lipwákéch wóór me lipwákingaw wóór. Iei met emén Chón Kraist fefin a áweweei usun ena: ‘Esap ngang emén aramas mi fókkun ngaw, me esap pwal ngang emén mi fókkun éch. A wor met ekkewe ua lipwákéch wóór me a pwal wor met ekkewe ua lipwákingaw wóór. Me a pwal ina usun ren aramas meinisin.’” * A fókkun ffat pwata a múrinné ach sipwe eáni ekiek mi pwúng usun pwisinkich.

16. Pwata Jiowa a awora ngenikich kapasen emmwen mi múrinné?

¹⁶ Jiowa a awora ngenikich kapasen emmwen mi múrinné me ren an we Kapas. I a tongekich me a mochen sipwe pwapwa. (Ais. 48:17, 18) Ach féfféri ekkewe mettóch mi apwapwaai Jiowa, ina ewe kefil mi múrinné seni meinisin sia tongeni eáni me ina met epwe atoto ach enletin pwapwa. Ika sia féri ena, sipwe ttii senikich ekkewe osukosuk mi tori chókkewe mi nefótófót wóón moni, angangen moni, are pwisin iir. Amwo oukich meinisin ousipwe sópweló le eáni mirit me apwapwaai letipen Jiowa!​—SalF. 23:15.