1. Ifa ewe kefil mi aúchea mi lamot aramas meinisin repwe eáni?

 A WOR eú kefil mi aúchea a lamot aramas repwe eáni. Repwe itá filatá le peni Jiowa Kot, ewe mi pwúng an epwe Sounemenemen láng me fénúfan, are repwe peni Satan ewe Tefil, ewe chón oputa mi fókkun kirikiringaw? Aramas meinisin repwe fili ié me leir repwe peni me rese tongeni chék útá lukanaper. Minne ra filatá epwe affata ika repwe eáni ewe manaw esemuch are resap. (Mat. 25:31-33, 46) Atun “ewe riaföü mi lapalap,” repwe angei esissillen kúna manaw are kitetter.​—Pwär. 7:14; 14:9-11; Is. 9:4, 6.

2. (a) Met Ipru 10:35-39 a pesei ngenikich ach sipwe féri? (b) Ifa usun ewe puken Pwärätä a tongeni álisikich?

² Álleani Ipru 10:35-39. Ika ka filatá óm kopwe álisatá án Jiowa nemenem, ka eáni eú kefil mi pwúng. Iwe iei, ka mochen álisi ekkewe ekkóch ar repwe pwal eáni ena esin kefil. Ka tongeni áeá minne a mak lón ei puken Pwärätä le álisiir. Ena puk a affata met epwe fis ngeni chókkewe mi ú ngeni Jiowa, nge a pwal pwári ifa usun epwe efeiéchú chókkewe mi tuppwél le álisatá an nemenem. A lamot sipwe káé ekkena pwóróus mi enlet. Ika sia féri ena, epwe lapóló ach tipeppós le akkangang ngeni Jiowa. Pwal och, sia tongeni áeá met sia fen káé le álisi ekkewe ekkóch ar repwe filatá le angang ngeni Jiowa me sópwósópwóló le angang ngeni.

3. Met sipwele káé lón ei lesen?

³ Lón ei lesen, sipwe pwóróus wóón ekkeei kapas eis: Met epwe fis ngeni chókkewe mi álisatá án Kot nemenem? Nge met epwe fis ngeni chókkewe mi filatá ar repwe álisatá ewe manmwacho mi par, ewe mi mak pwóróusan lón puken Pwärätä?

4. Menni ewe kúmi aposel Johannes a kúna ar útá ren Jesus lón láng?

⁴ Lón kúnaen aposel Johannes we, a kúna ruu kúmi mi álisatá án Jiowa nemenem me angei feiéchún ar repwe kúna manaw tori feilfeiló. Ewe áeúin kúmi, iir 144,000. (Pwär. 7:4) Ra kefil ar repwe feitá láng me fiti Jesus le fératá eú nemenem, are Mwú lón láng. Ra fiti Jesus le nemeni fénúfan. (Pwär. 5:9, 10; 14:3, 4) Lón kúnaen Johannes we, a kúna ar útá ren Jesus lón láng wóón ewe chuuk Sion.​—Pwär. 14:1.

5. Ekiseló chék, met epwe fis ngeni ekkewe lusun 144,000?

⁵ Seni lón fansoun ekkewe aposel tori lón ei fansoun, fitengeréú aramas ra fen kefil ar repwe chóni ewe kúmiin 144,000. (Luk. 12:32; Rom 8:17) Iwe nge, Johannes a erá pwe epwe wor ekkewe lusun, are fitemén mi kepit, repwe chúen manaw atun ekkeei ránin lesópwólóón. Ekkena “lusun” repwe angei ar we sáingoon “pwau” me mwen poputáán ewe riáfféú mi lapalap. Ina met a esissillatá ar ketiw me ren Jiowa. (Pwär. 7:2, 3; 12:17) Iwe, atun ewe riáfféú mi lapalap, Jesus epwe uweiretá láng pwe repwe kapachelong lein meinisin ekkewe 144,000, chókkewe mi fen máló lón ar tuppwél. Iwe, repwe fiti Jesus le nemenem lón án Kot we Mwú.​—Mat. 24:31; Pwär. 5:9, 10.

6-7. (a) Menni ewe kúmi Johannes a pwal kúna, me met sia silei usur? (b) Pwata minne a mak lón Pwärätä sópwun 7 a aúchea ngeni ekkewe lusun mi kepit me ewe “mwich mi fokun chocho”?

⁶ Mwirin án Johannes kúna ewe kúmi repwe manaw lón láng, i a pwal kúna eú “mwich mi fokun chocho.” Ena kúmi a sókko seni ekkewe 144,000, pún ese tongeni lea chóchóór. (Pwär. 7:9, 10) Met sia silei usur? Johannes a apasa: “Ekei aramas, ir chokewe mi towu seni ewe riaföü mi lapalap. Ra limeti üfer o apwecher lon chaan ewe Lam.” (Pwär. 7:14) Mwirin án ena “mwich mi fokun chocho” manawewu seni ewe riáfféú mi lapalap, repwe manaw wóón fénúfan me kúna ekkewe feiéch mi fókkun apwapwa.​—Kölf. 37:9-11, 27-29; SalF. 2:21, 22; Pwär. 7:16, 17.

⁷ Ese lifilifil ika sia kefil ach sipwe manaw lón láng are wóón fénúfan, nge a lamot ach sipwe lúkú pwe sipwe kúna pwénútáán minne sia álleani lón Pwärätä sópwun 7. A ifa me apwapwaan ena fansoun ngeni ekkena ruu kúmi mi angang ngeni Kot! Sipwe fókkun pwapwa ren ach filatá le álisatá án Jiowa nemenem. Met ewe puken Pwärätä a pwal apasa usun ewe riáfféú mi lapalap?​—Mat. 24:21.

8. Ifa usun epwe poputá ewe riáfféú mi lapalap, me met lape ngeni aramas repwe féri?

⁸ Sia fen káé me lón ewe lesen mwen ei pwe ekiseló chék ekkewe mwúún fénúfan repwe ataieló Papilon mi Lapalap, ewe mwicheichen lamalam chofona. (Pwär. 17:16, 17) Ena mettóch, epwe ina poputáán ewe riáfféú mi lapalap. Nge ena epwe itá efisi án chómmóng aramas repwe poputá le angang ngeni Jiowa? Aapw. Pwärätä sópwun 6 a fen affata pwe lón ena fansoun, chókkewe rese angang ngeni Jiowa repwe kútta túmún seni ekkewe mwú me pekin business wóón ei fénúfan iir mi usun ekkewe chuuk. Pokiten chókkana rese álisatá án Jiowa we Mwú, iwe me ren pwe iir chón oputa.​—Luk. 11:23; Pwär. 6:15-17.

9. Ifa usun epwe pwápwááló sókkólóón néún Jiowa kewe chón angang atun ewe riáfféú mi lapalap, me met epwe fis ngeniir?

⁹ Ewer, lón ena fansoun mi fókkun áweires,  epwe pwápwááló sókkólóón néún Jiowa kewe chón angang mi tuppwél. Epwe iir chék ewe kúmiin aramas wóón fénúfan mi angang ngeni Jiowa Kot me rese álisatá “ewe manmwacho.” (Pwär. 13:14-17) Pokiten ra chék tuttuppwél ngeni Jiowa, iwe chókkewe mi oputa i repwe fókkun song. Iwe, eú mwichen mwúún aramas repwe maunei néún Kot kewe aramas wóón unusen fénúfan. Paipel a fen oesini pwe ina ewe maun án Kok seni Makok.​—Is. 38:14-16.

10. Me ren Pwärätä 19:19-21, met Jiowa epwe féri atun Kok seni Makok epwe maunei néún kewe aramas?

¹⁰ Met Jiowa epwe féri atun Kok seni Makok epwe maunei néún kewe aramas? Iei met a apasa: “Ai song epwe säsewu.” (Is. 38:18, 21-23) Pwärätä sópwun 19 a áweweei met epwe fis mwirin. Jiowa epwe tiinaaló Néún we an epwe túmúnú néún kewe aramas me okkufu chón koputer kewe. “Ekewe mwichen sounfiu seni läng,” iir ekkewe chónláng mi tuppwél fengen me ekkewe 144,000, repwe fiti Jesus lón ena maun. (Pwär. 17:14; 19:11-15) Iwe, epwe ifa mwirilóón? Meinisin aramas me ekkewe mwicheich mi ú ngeni Jiowa, repwe unusen móróló!​—Álleani Pwärätä 19:19-21.

11. Ifa ewe mettóch mi fókkun aúchea epwele fis mi mak lón ewe puken Pwärätä?

¹¹ Anchangei meefien chókkewe mi tuppwél wóón fénúfan ren ar kúna manaw mwirin ninniilóón chókkewe mi oputa Kot! Epwe fókkun apwapwa ena atun! Ikaamwo epwe fókkun apwapwa lón láng atun Papilon mi Lapalap a kataló, nge mi pwal wor eú mettóch epwe fen kon apwapwa seni ena. (Pwär. 19:1-3) Ina ewe mettóch mi fókkun aúchea mi mak lón ewe puken Pwärätä, ina “apwüpwülüen ewe Lam.”​—Pwär. 19:6-9.

12. Ineet epwe fis apwúpwúlúún ewe Lam usun met a mak lón Pwärätä 21:1, 2?

¹² Ineet ena apwúpwúlú epwe fis? Meinisin ekkewe 144,000 repwe unus lón láng me mwen chék fisin ewe maunen Armaketon. Iwe nge, esap ina ewe atun epwe fis apwúpwúlúún ewe Lam. (Álleani Pwärätä 21:1, 2.) Ena apwúpwúlú epwe fis mwirin ewe maunen Armaketon, mwirin án meinisin chókkewe mi oputa Kot ra ninniiló.​—Kölf. 45:3, 4, 13-17.

13. Met epwe fis atun apwúpwúlúún ewe Lam?

¹³ Met epwe fis atun apwúpwúlúún ewe Lam? Eú apwúpwúlú a kan ochufengeni emén mwán me emén fefin. A pwal ina usun ren apwúpwúlúún ewe Lam, epwe ochufengeni ewe King Jesus Kraist me ewe “fin apwüpwülü söfö,” ekkewe 144,000. Ena fansoun mi aúchea, epwe efisatá eú mineféén mwú epwe nemeni fénúfan ren úkúkún 1,000 ier.​—Pwär. 20:6.

14-15. Pwärätä sópwun 21 a aléllééi ekkewe 144,000 ngeni met? (Ppii ewe sasing wóón péén.)

¹⁴ Mwirin, Pwärätä sópwun 21 a aléllééi ekkewe 144,000 ngeni eú telinimw mi lingemwarar itan “Jerusalem mi fö.” (Pwär. 21:2, 9) Ena telinimw a kaútá wóón engol me rúúeféú féún lóngólóng mi mak wóór “iten nöün ewe Lam kewe engol me ruoman soukünö.” Pwata Johannes a aúcheani ena pwóróus? Pún itan a mak wóón eféú me lein ekkena féún lóngólóng. A ifa me aúchean ena!​—Pwär. 21:10-14; Ef. 2:20.

¹⁵ Ese wor táppin ena telinimw. Alan kewe  ra ffér seni kolt mi fókkun múrinné, ekkewe engol me ruu asamalap ra ffér seni féún pwei, tittin kewe me lóngólóngun kewe ra afout ngeni faú mi aúchea, me a unuséch aúkúkún. (Pwär. 21:15-21) Nge Johannes a kúna pwe usun ese unus! Iei met a erá mwirin: “Üsap küna eu imwenfel me lon ewe telinimw, pun imwenfelin lon iei ewe Samol Kot mi Unusen Manaman me ewe Lam. Esap lomot ngeni ewe telinimw tinen akkar ika tinen maram, pun än Kot ling a tinetiu won, o ewe Lam iei an atitin.” (Pwär. 21:22, 23) Chón lón ewe Jerusalem mi Fé repwe nóm ren Jiowa. (Ipru 7:27; Pwär. 22:3, 4) Ina popun, Jiowa me Jesus iir ewe imwenfel lón ena telinimw.

16. Met epwe fis ngeni aramas atun án Kot we Mwú epwe Nemenem Úkúkún Engeréú Ier?

¹⁶ A amwarar ngeni ekkewe mi kepit ar repwe ekieki usun pwóróusen ena telinimw. Nge a pwal wor popun mi lamot án chókkewe mi eáni ewe ápilúkúlúkún manaw wóón fénúfan repwe aúcheani ena pwóróus. Atun án Kot we Mwú epwe Nemenem Úkúkún Engeréú Ier, ewe Jerusalem mi Fé epwe atoto chómmóng feiéch wóón ei fénúfan. Johannes a kúna pwe ekkena feiéch ra pupuwu usun eú “chanpupun kolukun manau.” Me a wor “irän manau” wóón iir me rúúepek ena chénúpupu me chéér kewe ra “apöchöküla chon ekewe mwü.” (Pwär. 22:1, 2) Epwe suuk ngeni meinisin chókkewe mi manaw lón ena fansoun ekkewe feiéch mi kawor. Ekis me ekis, meinisin chókkewe mi álleasochis repwe ukkunuséchúló. Esap chúen wor samau, metek, me kechiwen riáfféú.​—Pwär. 21:3-5.

17. Me ren Pwärätä 20:11-13, ié kewe repwe feiéch seni ewe Nemenem Úkúkún Engeréú Ier?

¹⁷ Ié kewe repwe feiéch seni ekkena mettóch mi amwarar? Akkomw, chókkewe mi manawewu seni ewe Armaketon, iir chón ewe mwich mi lapalap, fengen me ekkewe semirit mi uputiw lón ewe ótót séfé. Nge Pwärätä sópwun 20, a pwal pwonei pwe ekkewe mi máló repwe manawsefál. (Álleani Pwärätä 20:11-13.) Ekkewe aramas “mi pung” iir mi fen máló fengen me ekkewe “rese pung,” iir kewe ese suuk ngeniir alen ar repwe káé usun Jiowa, iir meinisin repwe manawsefál wóón fénúfan. (Föf. 24:15, Testament mi Fö; Joh. 5:28, 29) Iwe weween  pwe meinisin repwe manawsefál wóón fénúfan atun án Kot we Mwú epwe Nemenem Úkúkún Engeréú Ier? Aapw. Chókkewe rese fókkun mochen angang ngeni Jiowa nge itá mi fen suuk ngeniir lemanawer, iir resap manawsefál. Itá mi fen suuk ngeniir ena feiéch, nge ra pwári pwe rese mochen manaw lón ewe Paratis wóón fénúfan.​—Mat. 25:46; 2 Tes. 1:9; Pwär. 17:8; 20:15.

18. Met epwe fis wóón fénúfan lesópwólóón ewe 1,000 ier?

¹⁸ Lesópwólóón ewe 1,000 ier, meinisin chókkewe mi nóm wóón fénúfan repwele unuséch. Esap chúen wor emén epwe riáfféú ren ewe tipis sia álemwiri seni Atam. (Rom 5:12) Anúmamaúen án Atam tipis epwe unusen morolo. Weween pwe chókkewe mi nóm wóón fénúfan repwe eáni sefál ewe manaw mi unuséch lesópwólóón ewe 1,000 ier, are lón och itiitin, usun itá repwe “manausefäl.”​—Pwär. 20:5.

19. Pwata a lamot an epwe pwal wor eú sáingoon sóssót?

¹⁹ Sia silei pwe Jesus a chék tuttuppwél ngeni Kot pwal mwo nge atun Satan a sótuni. Iwe, itá weween pwe meinisin aramas mi unuséch repwe pwal chék tuttuppwél ngeni Jiowa atun Satan a sótuniir? Emén me emén epwe pwári an tuppwél ngeni Jiowa atun Satan epwe musowu seni ewe pwaang mi alóllóól lesópwólóón ewe 1,000 ier. (Pwär. 20:7) Chókkewe mi pwári pwe ra tuppwél atun ena sáingoon sóssót, repwe kúna manaw esemuch me eáni ewe ngaseló mi enlet. (Rom 8:21) Chókkewe mi ú ngeni Jiowa repwe máffócholó fengen me ewe Tefil me néún kewe chónláng mi ngaw.​—Pwär. 20:8-10.

20. Met meefiom ren ekkewe oesini mi amwarar lón ewe puken Pwärätä?

²⁰ Met meefiom mwirin óm ei káé menlapen masouen ei puken Pwärätä? Ka pwapwa le anchangei pwe ka kapachelong lón ekkena oesini mi aúchea? Ese efisi óm kopwe mochen etiwa ekkewe ekkóch ar repwe fitikich lón ewe fel mi enlet? (Pwär. 22:17) Pokiten sia fen káé ekkeei mettóch repwele fis lón mwachkkan, iei sia pwapwa me mochen aloni alon aposel Johannes ei: “Amen! Kopwe etto äm Samol Jesus!”​—Pwär. 22:20.