1. Ifa ussun Paipel a áweweei tong mi enlet?

 “TONG a chök kükkü, nge ngetengetan a fokun sarara. Chomong koluk resap tongeni kunuela tong, nge chomong lölö resap pwal tongeni amopu.” b (SalK. 8:6, 7) A ifa me múrinnéén áweween ena esin tong mi enlet! Ekkeei itiitin kapas ra tongeni apéchékkúla letipen ekkewe mi pwúpwúlú: Ámi tongfengen lefilemi a tongeni péchékkúleló.

2. Met a lamot eú pea pwúpwúlú repwe féri pwe ar tong esap patapateló?

² A lamot án ekkewe pwúpwúlú repwe achocho pwe repwe chék tongfengen lefiler lón ánein manawer. Áwewe chék, eú ekkei a tongeni sópwósópwoló kúún iká emén a kan sóssópwetá amúchún. Iká ese wor emén a sópwetá amúchún, iwe ekis me ekis epwele kunuló. Pwal ina ussun ren ewe tong lefilen pwúpwúlú, epwe péchékkúleló iká repwe akkapéchékkúla ar riri. Fán ekkóch, eú pea pwúpwúlú ra tongeni meefi pwe ar tong a patapateló, ákkáeúin iká ra aúreki osupwanger lón pekin moni, ra semmwen, are a weires túmúnún néúr kewe. Ina minne, iká en mi pwúpwúlú, ifa ussun ka tongeni sópweeló le apéchékkúla ewe tong mi pop seni Jiowa lón óm pwúpwúlú? Lón ei lesen, sipwe pwóróusfengen wóón úlúngát mettóch mi lamot kopwe féri pwe óm ririin pwúpwúlú epwe chék péppéchékkúleló me epwe wor pwapwa lón. c

3. Ifa ussun án eú pea pwúpwúlú ririéch ngeni Jiowa a tongeni álisiir ar repwe chék tottongfengen? (Än Salomon Afalafal 4:12) (Pwal ppii ewe sasing.)

³ Ren án ekkewe pwúpwúlú repwe sópweeló le apéchékkúla ar tong lón ar pwúpwúlú, a lamot iir me rúúemén repwe achocho le ririéch ngeni Jiowa. Ifa ussun ar ririéch ngeni a tongeni álisi ar pwúpwúlú? Lupwen ekkewe pwúpwúlú ra aúcheani ar riri ngeni Semer we lón láng, repwe mochen apwénúetá an kapasen pesepes, me ena epwe álisiir le ttiiseniir me pworacho ngeni ekkewe osukosuk mi tongeni apatapataaló ar we tong lefiler. (Álleani Än Salomon Afalafal 4:12.) Chókkewe mi ririéch ngeni Jiowa ra pwal achocho le áppirú I me eáni napanapan kewe, áwewe chék ren kirekiréch, mosonottam, me omusaaló tipis. (Ef. 4:32–5:1) Atun eú pea pwúpwúlú ra eáni ekkena esin napanap, a mecheres an epwe péchékkúleló ar tongfengen lefiler. Emén Chón Kraist fefin itan Lena, mi fen pwúpwúlú ren lap seni 25 ier, a apasa, “A mecheres ach sipwe tongei me súféliti emén mi ririéch ngeni Kot.”

4. Pwata Jiowa a filaatá Josef me Meri ar repwe semen me inen ewe emén epwe wiliiti ewe Messaia?

⁴ Ekieki ei pwóróus lón Paipel. Atun Jiowa a filaatá eú pea pwúpwúlú ar repwe semen me inen ewe emén epwe wiliiti ewe Messaia, a filaatá Josef me Meri me lein mwirimwirin Tafit kewe mi chómmóng. Pwata? Pún iir me rúúemén ra ririéch ngeni Jiowa, me Jiowa a silei pwe repwe akkomwa i lón ar ririin pwúpwúlú. Ámi kana mi pwúpwúlú, met oua tongeni káé seni Josef me Meri?

5. Met ekkewe mwán mi pwúpwúlú ra tongeni káé seni Josef?

⁵ Josef a mwittir le apwénúetá án Jiowa kapasen emmwen, me ina met a álisi an epwe emén mwán pwúpwúlú mi múrinné. Ina epwe fán úlúngát, a angei emmwen seni Kot fán iten an we famili. Lón eú me eú ekkena atun, a mwittir apwénúetá inaamwo iká mi lamot an epwe féri watteen ekkesiwil. (Mat. 1:20, 24; 2:13-15, 19-21) Ren án Josef álleasochisi án Kot emmwen, a túmúnú Meri, álisi, me awora met mi lamot ngeni. Anchangei ifa ussun féfférún Josef a efisi an epwe lapóló án Meri tongei me súféliti! Ámi kana mwán mi pwúpwúlú, oua tongeni áppirú Josef le kútta ekkewe kapasen emmwen mi lóngólóng wóón Paipel ren ifa ussun oupwe túmúnú ámi famili. d Lupwen oua apwénúetá ekkena kapasen emmwen, inaamwo iká mi lamot ámi oupwe féri watteen ekkesiwil, oua pwáári ámi tongei pwúlúwemi kewe me apéchékkúla ámi ririin pwúpwúlú. Emén Chón Kraist fefin lón Vanuatu mi fen pwúpwúlú lap seni 20 ier, a apasa: “Lupwen pwúlúwei we a kútta emmwen seni Jiowa me apwénúetá, a lapóló ái súféliti. Úa meefi túmún, me úa lúkúlúk wóón minne a eáni kefil.”

6. Met ekkewe fefin mi pwúpwúlú ra tongeni káé seni Meri?

 ⁶ A pwisin wor án Meri riri ngeni Jiowa. A achocho le apéchékkúla an lúkú. A silefichi masouen ewe Paipel. (Ppii Ewe Leenien Mas minen February 2016 p. 17, par. 17.) A pwal awora an fansoun le ekilonei met a káé. (Luk. 2:19, 51) Iwe, sia lúkúlúk pwe án Meri ririéch ngeni Jiowa, ina met a efisi an epwe emén fin pwúpwúlú mi fókkun múrinné. Lón ei fansoun, chómmóng fefin mi pwúpwúlú ra achocho le áppirú Meri. Áwewe chék, emén Chón Kraist fefin itan Emiko a apasa: “Atun ái we lipich, a wor ái pwisin kókkótun fel ngeni Kot úa kan fiti. Nge mwirin ái úa pwúpwúlú, úa mirititi pwe pokiten pwúlúwei we a kan wisen iótek fán item me emmweni ám fel ngeni Kot, iwe úa meefi pwe úa chék lóngólóng wóón an epwe féri ekkena mettóch. Úa kúna pwe mi lamot ái úpwe pwisin akkapéchékkúla ái riri ngeni Jiowa. Ina minne, iei, úa awora fansoun ái úpwe pwisin iótek ngeni Kot, álleani Paipel, me ekilonei an ekiek.” (Kal. 6:5) Ámi kana fefin mi pwúpwúlú, atun oua sópweeló le akkapéchékkúla ámi riri ngeni Jiowa, a pwal ina chómmóngólóón popun án pwúlúwemi kewe repwe mwareitikemi me tongekemi.—SalF. 31:30.

7. Met ekkewe mi pwúpwúlú ra tongeni káé seni Josef me Meri ussun ar repwe fel ngeni Jiowa lón ar pwúpwúlú?

⁷ Josef me Meri ra pwal angangfengen le akkapéchékkúla ar riri ngeni Jiowa. Ra weweiti pwe mi lamot ar repwe fel ngeni Jiowa lón ar famili. (Luk. 2:22-24, 41; 4:16) Ese mwáál a pwal weires ena, ákkáeúin atun a lallapoló chóchóón ar we famili, nge ra tongeni féri. A ifa me fókkun múrinnéén ena leenien áppirú ngeni ekkewe mi pwúpwúlú lón ei fansoun! Iká a wor néúmi ussun chék Josef me Meri, iwe eli oupwe kúna pwe a pwal weires ngenikemi le fiti mwiich are féri kókkótun ámi famili fel. Eli epwe fen kon lapóló weiresin ámi oupwe akkóta fansoun le káéfengen are iótekfengen lón ámi pwúpwúlú. Iwe nge, chemeni pwe atun oua fel ngeni Jiowa lón ámi pwúpwúlú, oupwe ririéch ngeni i me pwal ririéch lefilemi. Ina minne, oupwe akkomwa lón manawemi ámi fel ngeni Jiowa.

8. Met ekkewe pwúpwúlú mi wor osukosuk lefiler ra tongeni féri pwe repwe unusen feiéch seni ar famili fel?

⁸ Met oua tongeni féri iká a wor osukosuk lón ámi pwúpwúlú? Eli ouse kon sani le férifengeni ámi famili fel. Iká ina, oupwe poputá le ekieki och mettóch ámi me rúúemén oupwe tipeeúfengen le pwóróus wóón, och pwóróus mi chék mwoch me oupwe pwapwaiti. Ámi féri ena, epwe tongeni apéchékkúlaló ámi riri me ámi mochen féri ekkewe mettóchun ngún lón ámi pwúpwúlú.

9. Pwata a lamot án eú pean pwúpwúlú repwe awora ar fansounfengen?

⁹ Ámi kana mi pwúpwúlú, oua pwal tongeni apéchékkúla ámi tongfengen ren ámi awora ámi fansounfengen. Iká oua féri ena, epwe álisikemi le sissilei met pwúlúwemi ra kan ekieki me meefi. (Ken. 2:24) A lap seni 15 ierin án Lilia me Ruslan pwúpwúlú, nge iei met ra mirititi ekiseló mwirin ar pwúpwúlú. Lilia a apasa: “Áúa mirititi pwe ese kon watte ám fansounfengen ussun met áúa ekieki. Áúa fókkun busy ren ám angangen moni, féri angangen leimw, me mwirin ren néúm kewe. Áúa kúna pwe iká áúse awora och fansoun fán item lón ám pwúpwúlú, iwe a tongeni apwangapwangoló ám tongfengen.”

10. Ifa ussun ekkewe mi pwúpwúlú ra tongeni apwénúetá ewe kapasen emmwen lón Efisos 5:15, 16?

¹⁰ Met ekkewe pwúpwúlú ra tongeni féri pwe epwe chék wokkor ar fansounfengen?  Oua tongeni akkóta are áimuoló och fansoun fán itemi lón ámi pwúpwúlú. (Álleani Efisos 5:15, 16.) Emén Chón Kraist mwán lón Nigeria itan Uzondu, a apasa: “Atun úa akkóta ái kewe angang, úa apachaalong och fansoun fán item me pwúlúwei we, me ina met úa akkomwa.” (Fil. 1:10) Ekieki ifa ussun pwúlúwen emén chónemmwen mi wisen sáifetál lón Moldova, itan Anastasia, a áeáéchú an fansoun. A apasa: “Úa kan achocho le féri ekkewe mettóch úa akkóta ái úpwe féri atun pwúlúwei we a busy le féri wisan kewe. Iwe, áúa tongeni awora fansounfengen mwirin.” Nge ifa ussun iká ámi schedule a áweiresi ámi oupwe awora fansounfengen?

11. Menni angang Akwila me Prisila ra kan mwin le féri?

¹¹ Ekkewe mi pwúpwúlú ra tongeni káé seni pwóróusen Akwila me Prisila, ewe pean pwúpwúlú chómmóng Chón Kraist lóóm ra fókkun aúcheaniir. (Rom 16:3, 4) Ikaamwo ewe Paipel ese áiti ngenikich chómmóng pwóróusen án Akwila me Prisila pwúpwúlú, nge a pwáári pwe ra kan mwin le féri ar angang, mwin le afalafal, me mwin le álisi aramas. (Föf. 18:2, 3, 24-26) Ren enletin, atun ewe Paipel a kan fós ussun Akwila me Prisila, a kan pani iter me rúúemén.

12. Met ekkewe pwúpwúlú ra tongeni féri pwe epwe lapóló ar fansounfengen? (Pwal ppii ewe sasing.)

¹² Ifa ussun ekkewe mi pwúpwúlú ra tongeni áppirú Akwila me Prisila? Ekieki ussun ekkewe chómmóng mettóch mi lamot en me pwúlúwom we oupwe féri. Oua tongeni angangfengen le féri ekkóch me lein ekkena mettóch lap seni án emén chék me leimi epwe féri? Áwewe chék, Akwila me Prisila ra mwin le afalafal. Oua kan akkóta ámi oupwe pwal ina ussun? Akwila me Prisila ra pwal angangfengen. Ese mwáál, a sókkofesen ekkewe angang en me pwúlúwom we oua kan féri, nge ámi mi tongeni féri fengeni angangen lón imwemi we? (SalAf. 4:9) Lupwen oua álillisfengen le féri eú angang, epwe lapóló ámi meefi pwe ámi chék eú me epwe suuk ngenikemi ámi oupwe pwóppwóróusfengen. Robert me Linda ra fen pwúpwúlú lap seni 50 ier. Robert a apasa: “Ren enletin, ese wor ám fansoun fán iten ám áúpwe kukkunoufengen. Nge atun úa wisen téttél sepi nge pwúlúwei we a wisen áppwáser, are atun úa otot lúkún nge pwúlúwei we a towu me álisiei, úa fókkun pwapwa. Ám álillisfengen le féri ám angang a eririéchúfengenikem. A lallapoló ám tongfengen.”

13. Met a lamot ewe mwán me pwúlúwan we repwe féri pwe repwe enletin ririéchfengen?

¹³ Iwe nge, chemeni pwe án ekkewe pwúpwúlú nómfengen, esap fansoun meinisin ina met epwe eririéchúfengeniir. Emén fefin mi pwúpwúlú seni Brazil, a apasa: “Lón ei fansoun, a chómmóng met si kan féfféri lón manawach ina minne a mecheres ach sipwe ekieki pwe a wor ach fansounfengen pokiten sia nóm lón eú chék imw. Úa kúna pwe ese naf ám chék nónnómfengen. A pwal lamot úpwe  áfánni met pwúlúwei we a osupwangan.” Ekieki met Bruno me pwúlúwan we itan Tays ra féri pwe repwe áfánnifengeniir. Bruno a erá: “Atun ese wor met ám me rúúemén áúa féri, áúa watiw néúm kewe cell phone me áeá ena fansoun le pwóppwóróusfengen me kunoufengen.”

14. Iká eú pea pwúpwúlú rese kan sani le kunoufengen are mwin le féri mettóch, met ra tongeni féri?

¹⁴ Iwe nge, ifa ussun iká en me pwúlúwom we ouse kan sani le kunoufengen are mwin le féri mettóch? Neman mi sókkofesen met oua sani, are neman oua kan asongafengenikemi. Met oua tongeni féri? Ekieki ewe ekkei sia fen fós ussun lepoputáán ei lesen. Atun a kerán poputá kú, ese kon watte ngetan. A lamot emén epwe kan sóssópwetá amúchún kewe. Pwal ina ussun lón pwúpwúlú, pwata ouse poputá le awora ámi fansounfengen ekis me ekis iteiten rán? Oupwe féri och mettóch ámi me rúúemén oua sani, nge esap ewe epwe asonga emén me leimi. (Jas. 3:18) Iká oua poputá le féri ena, iwe ese mwáál oupwe kúna pwe ámi tongfengen lefilemi a péchékkúlsefál.

15. Pwata a mmen lamot súfél ngeni péchékkúlelóón ewe tong lón pwúpwúlú?

¹⁵ A fókkun lamot súfél lón pwúpwúlú. A ussun enienin ásepwál mi ángetengeta eú ekkei. Iká ese pépé ásepwál, ewe ekkei epwe mwittir kunuló. Pwal ina ussun lón pwúpwúlú, iká ese wor súfél, epwe tongeni mwittir patapateló ewe tong lefilen ekkewe rúúemén. Iwe nge, ekkewe pwúpwúlú mi achocho le pwáári ar súfélfengen lefiler, ra akkapéchékkúla ar we tongfengen. Nge chemeni pwe ese lamot óm ekieki pwe ka pwáári súfél, ewe mi lamot ina án pwúlúwom we epwe meefi pwe ka súféliti. Penny me Aret ra fen pwúpwúlú ren lap seni 25 ier. Penny a erá: “Pokiten áúa súfélfengen, iwe imwem we a eú leeni mi ur ren tong. A mecheres ám áúpwe pwáraawu meefiem pokiten áúa silei pwe áúa aúcheani meefien emén me emén leim.” Iwe, met ka tongeni féri pwe kopwe álisi pwúlúwom we an epwe meefi pwe ka wesewesen súféliti? Sipwele ppii pwóróusen Eperiam me Sara.

16. Met ekkewe mwán mi pwúpwúlú ra tongeni káé seni Eperiam? (1 Petrus 3:7) (Pwal ppii ewe sasing.)

¹⁶ Eperiam a súféliti Sara. A aúseling ngeni Sara me áfánni ekiekin me meefian. Lón eú atun, Sara a meefi riáfféú, me a ereni Eperiam meefian, a pwal mwo nge erá pwe tipisin Eperiam minne a fis. Itá Eperiam a song me eáni kapas mi chou ngeni? Aapw. A silei pwe Sara emén fefin mi álleasochis me a álisaatá ewe kókkót a fen aotaaló. Eperiam a aúseling ngeni me achocho le atawei ewe osukosuk. (Ken. 16:5, 6) Met sia tongeni káé seniir? Ámi mwán mi pwúpwúlú, a wor ámi nemenem le féri kefil lón ámi famili. (1 Kor. 11:3) Iwe nge, oua tongeni pwáári ámi tongei pwúlúwemi kewe ren ámi lóóm angei meefier mwen oupwe féri kefil, ákkáeúin iká ewe kefil epwe kkúú nónnómun  manawer. (1 Kor. 13:4, 5) Fán ekkóch pwúlúwemi kewe neman repwe meefi riáfféú me neman a lamot ar repwe uwawu meefier. Oua kan súféliti meefier ren ámi aúselingéch ngeniir? (Álleani 1 Petrus 3:7.) Angela me Dmitry ra fen pwúpwúlú arapakkan 30 ier. Iei met Angela a apasa ren ifa ussun pwúlúwan na a ámmeef ngeni pwe a súféliti: “Dmitry a kan mmólnetá fansoun meinisin le aúseling ngeniei atun úa osukosuk, are atun úa chék mochen fós. A mosonottam ngeniei, pwal mwo nge atun a fókkun weires letipei.”

17. Met ekkewe fefin mi pwúpwúlú ra tongeni káé seni Sara? (1 Petrus 3:5, 6)

¹⁷ Sara a súféliti Eperiam ren an álisaatá minne a eáni kefil. (Ken. 12:5) Lón eú atun, Eperiam a awasélaéchú ekkóch waséla mi toriir nge rese silei ussun. A ereni Sara an epwe likitaaló met ewe a féri me ammólnatá chómmóng pilawa. (Ken. 18:6) Sara a mwittir le féri met Eperiam a ereni an epwe féri. Ámi fefin mi pwúpwúlú, oua tongeni áppirú Sara ren ámi álisaatá met pwúlúwemi a eáni kefil. Iká oua féri ena, oua apéchékkúlaló ámi ririin pwúpwúlú. (Álleani 1 Petrus 3:5, 6.) Dmitry, ewe sia kerán fós ussun, a áweweei ifa ussun pwúlúwan we a ámmeef ngeni pwe a súféliti. A apasa: “Úa aúcheani án Angela achocho le álisaatá met úa eáni kefil inaamwo iká i ese tipeeú ngeni. Iká ese sópwéch met ewe úa eáni kefil, i ese esiitaei.” A ifa me mecheresin ach sipwe tongei emén mi súfélitikich!

18. Ifa ussun ekkewe pwúpwúlú repwe kúna feiéch ren ar akkapéchékkúlaló ar tong lefiler?

¹⁸ Lón ei fansoun, Setan a mochen pwe ekkewe Chón Kraist pwúpwúlú repwe úkútiw le tongfengen. A silei pwe iká ese chúen wor tong lefilen eú pea pwúpwúlú, repwe poputá le towawoló seni Jiowa. Iwe nge, tong mi enlet epwe chék kúkkú! Iwe, amwo ewe tong lón ámi pwúpwúlú epwe ussun ewe tong Än Salomon Köl a áweweei ussun. Oupwe tipeppós le akkomwa Jiowa lón ámi pwúpwúlú, awora ámi fansounfengen, súféliti meefien emén me emén leimi me áfánni osupwangemi. Iká oupwe féri ekkena mettóch, iwe ámi pwúpwúlú epwe elingaaló Jiowa, ewe Popun tong enlet, me ámi tong epwe péchékkúl lón ánein manawemi, ussun chék eú ekkei emén mi kan sóssópwetá amúchún.