1-2. Met eli sipwe ekieki ussun ach kewe iótek?

 KA KAN ekieki iká Jiowa mi fen pélúweni óm kewe iótek? Iká ewer, iwe, esap chék en ka ina ussun. Chómmóng chienach kewe Chón Kraist ra pwal meefi ena, ákkáeúin atun ra nóm lón fansoun weires. Atun sia nóm lón osukosuk, eli epwe pwal weires ngenikich ach sipwe weweiti ifa ussun Jiowa a pélúweni ach kewe iótek.

² Iei sipwe enniwilisefáli popun sia tongeni lúkúlúk pwe Jiowa a pélúweni án ekkewe chón fel ngeni iótek. (1 Joh. 5:15) Sipwe pwal pwóróusfengen wóón ekkeei kapas eis: Fán ekkóch, pwata ussun itá Jiowa ese pélúweni ach kewe iótek? Ifa ussun Jiowa a pélúweni ach kewe iótek lón ei fansoun?

3. Pwata Jiowa a mochen ach sipwe iótek ngeni?

³ Ewe Paipel a alúkúlúkú ngenikich pwe Jiowa a fókkun tongekich me sia aúchea me ren. (Ak. 2:7; 1 Joh. 4:10) Ina minne, a etiwakich ach sipwe tingorei an álillis lón iótek. (1 Pet. 5:6, 7) A mochen álisikich ach sipwe ririéch ngeni me sópwéch lón ach likiitú fán ekkewe weires sia kúkkúna.

4. Pwata sia silei pwe Jiowa a pélúweni án ekkewe chón fel ngeni iótek? (Pwal ppii ewe sasing.)

⁴ Fán chómmóng sia álleani me lón ewe Paipel pwe Jiowa a pélúweni án ekkewe chón fel ngeni iótek. Ka tongeni ekieki pwóróusen emén leir? Áwewe chék ren pwóróusen King Tafit. Lón unusen manawan, a chómmóng chón koputan kewe mi kirikiringaw, me a kan soun tingorei Jiowa an epwe álisi. Fán eú, a sié ngeni Jiowa: “Kopwe aüselinga ai iotek, ai Samol mi Lapalap,  kopwe aü selingom ngeni ai kewe tüngor o pälüeniei lon om allükülük me pwüng.” (Kölf. 143:1) Jiowa a kan pélúweni án Tafit tingorei an epwe angasaaló. (1 Sam. 19:10, 18-20; 2 Sam. 5:17-25) Tafit a tongeni lúkúlúk le apasa: “Ewe Samol mi Lapalap a arap ngeni ir meinisin mi köri.” Kich sia pwal tongeni eáni ena esin lúkúlúk.—Kölf. 145:18.

5. Itá fansoun meinisin Jiowa a pélúweni án ekkewe chón fel ngeni lóóm iótek lón ewe napanap ra ekieki? Apwóróusa eú pwóróus. (Pwal ppii ewe sasing.)

⁵ Neman Jiowa esap pélúweni ach kewe iótek lón ewe napanap sia ekieki. Ina met a fis ngeni aposel Paul. A tingorei Kot an epwe angei seni ewe ‘fölun ira lon fitukan.’ Fán úlúngát, Paul a tichikin iótek fán iten an na osukosuk mi áweires. Jiowa mi pélúweni an kana iótek? Ewer, nge esap lón ewe esin napanap Paul a mochen. Jiowa ese angei seni an na osukosuk, nge a fen fang ngeni ewe péchékkúl mi lamot pwe epwe sópweeló le angang ngeni fán túppwél.—2 Kor. 12:7-10, Testament mi Fö.

6. Fán ekkóch, pwata ussun itá Jiowa ese pélúweni ach kewe iótek?

⁶ Fán ekkóch, eli pélúwen ach kewe iótek a sókkóló seni met sia ekieki. Sia tongeni lúkúlúk pwe Jiowa a fókkun silei ifa ussun epwe awora ngenikich álillis mi fókkun fichiitikich. A pwal mwo nge “tongeni föri mettoch meinisin lap seni mine sia tongeni tüngor ika ekieki.” (Ef. 3:20) Ina popun, a tongeni pélúweni ach kewe iótek lón ewe atun are napanap sise ekieki ngeni.

7. Pwata eli a lamot ach sipwe siwili met sia iótek ussun? Apwóróusa eú pwóróus.

⁷ Eli a lamot ach sipwe siwili met sia iótek ussun atun a fate ngenikich met Jiowa a tipeni. Ekieki pwóróusen Martin Poetzinger. Ekiseló mwirin án Pwiich Poetzinger pwúpwúlú, a kalapus lón eú án chón Nazi leenien kalapus. Me akkomwan, a tingorei Jiowa an epwe atowu me lón ewe leenien kalapus pwe epwe tongeni túmúnú pwúlúwan we me sópweeló an angangen afalafal. Iwe nge, mwirin ruu wiik, ese wor met a esissillatá pwe Jiowa a suuki ngeni alen an epwe musowu. Ina minne, a poputá le iótek: “Jiowa kese mochen pwáár ngeniei met ka mochen úpwe féri.” Mwirin a poputá le ekieki met chienan kewe Chón Kraist lón ewe leenien kalapus ra likiitú fan. Chómmóng me leir ra fókkun aúreki pwúlúwer kewe me néúr kewe. Iwe, iei met Pwiich Poetzinger a eáni iótek: “Jiowa kilisou ren wisei ei minefé. Kopwe álisiei le  apéchékkúla letipen chienei keei.” Iwe, ina met a wesewesen féri lón ewe leenien kalapus úkúúkún tiu ier!

8. Ikkefa ekkewe mettóch mi lamot sipwe chemeni atun sia iótek?

⁸ A lamot sipwe chemeni pwe mi wor met Jiowa a tipeni, me i epwe apwénúetá lón ewe atun a fen filaatá. A kapachelong an epwe unusen amóeló meinisin ekkewe osukosuk mi efisi watteen riáfféú lón ei fansoun, áwewe chék ren feiengaw watte, semmwen, me máló. Jiowa epwe áeá an we Mwú le apwénúetá letipan. (Tan. 2:44; Pwär. 21:3, 4) Iwe nge, ren mwo iei, Jiowa a chúen mut ngeni Setan an epwe nemeni ei fénúfan. b (Joh. 12:31; Pwär. 12:9) Iká Jiowa epwe pwákini meinisin án aramas kewe osukosuk lón ei fansoun, iwe ussun itá nge án Setan nemenem a sópwéch. Ina minne, atun sia witiwiti án Jiowa epwe apwénúetá ekkóch an kewe pwon, esap weween nge a likitaaló an epwe álisikich. Iei sipwele pwóróus wóón ekkóch mettóch Jiowa a féri pwe epwe álisikich.

9. Ifa ussun Jiowa a tongeni álisikich atun a lamot sipwe féri kefil? Apwóróusa eú pwóróus.

⁹ A fang ngenikich tipáchem. Jiowa a pwonei pwe epwe ngenikich ewe tipáchem mi lamot ngenikich pwe sipwe féri kefil mi múrinné. A ákkáeúin lamot ngenikich tipáchem seni Kot, atun sia féri ekkewe kefil mi kkúú unusen manawach, áwewe chék iká sipwe chék lipich are iká sipwe pwúpwúlú. (Jas. 1:5) Ekieki pwóróusen emén Chón Kraist lipich itan Maria. c A pwapwa lón ewe angangen pioneer atun a chuuri emén Chón Kraist mwán. A apasa: “Atun a lapóló ám chiechifengen, a pwal lapóló ám sanifengenikem. Úa silei pwe a lamot ái úpwe féri kefil. Úa iótek fán chómmóng ussun ena mettóch. A lamot ngeniei án Jiowa emmwen, nge úa pwal silei pwe Jiowa esap wisen féri kefil fán itei.” Neminna a silei pwe Jiowa a pélúweni an tingor tipáchem. Ifa ussun? Atun a research lón néúch kewe puk, a kúna ekkewe lesen mi álisi le pélúweni an kewe kapas eis. A pwal etiwa án inan we mi túppwél kapasen emmwen ngeni. Ena kapasen emmwen a álisi Maria le etittina meefian. Iwe neminna a tongeni féri kefil mi múrinné.

10. Me ren Filipi 4:13, met Jiowa epwe féri pwe epwe álisi ekkewe chón fel ngeni? Apwóróusa eú pwóróus. (Pwal ppii ewe sasing.)

¹⁰ A fang ngenikich ewe péchékkúl pwe sipwe likiitú. Jiowa epwe fang ngenikich ewe péchékkúl mi lamot ngenikich pwe sipwe tongeni likiitú fán ach kewe weires, ussun chék met a féri ngeni aposel Paul. Filipi 4:13, NW a apasa: “A wor ái péchékkúl lón mettóch  meinisin ren ewe emén mi fang ngeniei manaman.” Ekieki ifa ussun Jiowa a álisi emén Chón Kraist itan Benjamin le likiitú ngeni weiresin nónnómun manawan. Lape ngeni lón án Benjamin ierin sáráfé, i me an we famili ra kan nóm lón ekkewe leenien choisá lón Afrika. Benjamin a apasa: “Úa kan ikkiótek ngeni Jiowa, me tingorei an epwe fang ngeniei péchékkúl pwe úpwe féri ekkewe mettóch mi apwapwaai i. Jiowa a pélúweni ái kewe iótek ren an fang ngeniei kinamween letip, pwora le sópweeló ái angangen afalafal, me an awora néúch kewe puk pwe epwe chék péppéchékkúl ái lúkú.” A pwal apasa: “Ái álleani pwóróusen chienei kewe Chón Pwáraatá me ái silei ifa ussun Jiowa a álisiir le likiitú, a álisiei ái úpwe úppós le chék túttúppwél.”

11-12. Ifa ussun Jiowa a tongeni filaatá le néúnéú chienach kewe le pélúweni ach iótek? (Pwal ppii ewe sasing.)

¹¹ A néúnéú chón ach we famili lón pekin ngún. Lón ewe pwinin me mwen án Jises epwele fangoló manawan, a fókkun sié ngeni Jiowa lón an iótek. A tingorei an esap mut ngeni ekkewe ekkóch ar repwe ekieki pwe i emén chón turunufasa Kot me apwúngú pokiten ena. Jiowa ese féri ena, nge a fen álisi ren an tiinaaló emén me lein pwiin kewe chónláng an epwe apéchékkúla. (Luk. 22:42, 43) Jiowa a pwal tongeni álisikich ren an néúnéú emén me lein pwiich kewe an epwe kékkérikich wóón phone are etto chuurikich pwe epwe apéchékkúlakich. Kich meinisin sia tongeni kútta alen ach sipwe awora kapasen apéchékkúl ngeni chienach kewe chón lúkú.—SalF. 12:25.

¹² Iei pwóróusen emén Chón Kraist itan Miriam. Fitu wiik mwirin málóón pwúlúwen Miriam we, i a chék áláeménúló lón imwan we. A meefi ápilúkúngaw me letipengaw. A chék kekkechiw me a lamot an epwe fós ngeni emén. A apasa: “Ese wor ái péchékkúl le kékkéri emén, ina minne úa iótek ngeni Jiowa. Lepwolen ái kekkechiw me iótek, a riing nei we phone. Emén chienei mi áchengicheng, i emén mwán mi ásimaw.” Miriam a kúna oururun letipan seni ena mwán mi ásimaw me pwúlúwan we. I a lúkúlúk pwe Jiowa a amwékútú ena mwán an epwe kékkéri.

13. Apwóróusa eú pwóróus ren ifa ussun Jiowa a tongeni néúnéú chókkewe rese fel ngeni le pélúweni ach iótek.

 ¹³ A tongeni néúnéú chókkewe rese fel ngeni. (SalF. 21:1) Fán ekkóch, Jiowa a pélúweni án néún kewe aramas iótek ren an amwékútú chókkewe rese fel ngeni ar repwe álisiir. Áwewe chék, a amwékútú King Artaksasta an epwe etiwa án Nehemia we tingor an epwe liwiniti Jerusalem pwe epwe álillis lón fférsefálin ewe telinimw. (Ne. 2:3-6) Lón ei fansoun, Jiowa a pwal tongeni amwékútú ekkewe aramas rese fel ngeni ar repwe álisikich atun a lamot ngenikich ar álillis.

14. Ifa ussun pwóróusen Soo Hing a apéchékkúlok? (Pwal ppii ewe sasing.)

¹⁴ Emén Chón Kraist fefin itan Soo Hing a meefi pwe Jiowa a álisi ren an néúnéú néún we tokter. Néún neminna we át a wor osukosuken tupwuan. Atun a fis ngeni néún na át eú watteen ákseten, iir me pwúlúwan we ra towu seni ar angang pwe repwe túmúnú. Ina minne, ra osupwangen moni. Soo Hing a erá pwe ese chúen tongeni likiitú. A iinaawu masouen letipan ngeni Jiowa me tingorei an álillis. Néún neminna we tokter a kútta ifa ussun epwe álisi me an we famili. Pokiten ena, ra angei álillis seni pekin mwú me kúna eú leeni ra tongeni nóm lón nge ese mémmóng. Soo Hing a apasa: “Áúa kúna ifa ussun Jiowa a álisikem. I wesewesen chón ‘aüselinga iotek.’”—Kölf. 65:2.

15. Met a álisi Yoko le mirititi pwe Jiowa a kan pélúweni an kewe iótek?

¹⁵ Lape ngeni esap pélú ach kewe iótek lón ewe esin napanap mi amwarar. Nge pélúwen ach kewe iótek ina met a fókkun lamot ngenikich ren ach sipwe akkamwéchú ach túppwél ngeni Semach we lón láng. Ina minne, kopwe silleni ifa ussun Jiowa a pélúweni óm kewe iótek. Emén fefin Chón Kraist itan Yoko a meefi pwe Jiowa ese pélúweni an kewe iótek, iwe a poputá le makkeei lón eú notebook minne a tingorei Jiowa. Mwirin fitu fansoun, a katólsefál néún na notebook, me a mirititi pwe Jiowa a fen pélúweni lape ngeni an kewe iótek, pwal mwo nge ekkewe a fen ménúkiireló. Fán ekkóch, a lamot sipwe ekis kaúló me ekieki ifa ussun Jiowa a pélúweni ach kewe iótek.—Kölf. 66:19, 20.

16. Ifa ussun sia tongeni pwáári ach lúkú atun sia iótek? (Ipru 11:6)

¹⁶ Sia pwáári ach lúkú esap chék ren ach iótek ngeni Jiowa, nge pwal ren ach etiwa  pélúwen ach kewe iótek ese lifilifil ifa ussun a pélúweniir. (Álleani Ipru 11:6.) Ekieki ussun pwóróusen Mike me pwúlúwan we itan Chrissy. Iir ra mochen angang lón Bethel. Mike a apasa: “Áúa apply fán fite me iótek ngeni Jiowa fán chómmóng ussun ena mettóch, nge áúse fókkun ketiw.” Mike me Chrissy ra chék lúkúlúk pwe Jiowa a fókkun silei ifa ussun epwe néúnéú iir lón an angang. Ra sópweeló le féri meinisin met ra tongeni féri, ra fiti ewe angangen regular pioneer ikewe mi osupwangen chón álillis ie, me ra álillis lón ekkewe angangen kaú fán iten án Jiowa we mwicheich. Lón ei fansoun, ra fiti ewe angangen sáifetál. Mike a apasa: “Esap fansoun meinisin Jiowa a pélúweni ám kewe iótek lón ewe napanap áúa ekieki, nge a fen pélúweniir lón ewe napanap mi kon múrinné lap seni met áúa ekieki.”

17-18. Me ren Kölfel 86:6, 7, met sia tongeni lúkúlúkú?

¹⁷ Álleani Kölfel 86:6, 7. Tafit, ewe soumakken kélfel, a lúkúlúk pwe Jiowa a aúseling me pélúweni an kewe iótek. Ka pwal tongeni eáni ena esin lúkúlúk. Pwóróusen ekkewe aramas sia káé lón ei lesen, a alúkúlúkú ngenikich pwe Jiowa a tongeni fang ewe tipáchem me péchékkúl mi lamot ngenikich ren ach sipwe tongeni likiitú. A tongeni néúnéú chón ach we famili lón pekin ngún pwal mwo nge chókkewe rese fel ngeni lón ei fansoun ar repwe álisikich lón ekkóch mettóch.

¹⁸ Sia silei pwe Jiowa epwe pélúweni ach kewe iótek inaamwo iká esap iteitan a kan pélúweniir lón ewe napanap sia ekieki. Epwe awora met chék a lamot ngenikich me epwe awora ineet chék a lamot. Kopwe sópweeló le iótek me lúkú pwe Jiowa epwe aúselingok, kopwe pwal lúkúlúk pwe i epwe túmúnuk lón ei fansoun me epwe fang ngeni “mönümanau meinisin mine repwe menemenöch ren” lón ewe ótót séfé epwe feito.—Kölf. 145:16.