1-3. Met neman a fis lefilen Eutia me Sintike? Ifa usun sipwe túmúnú an esap fis ekkena esin osukosuk? (Ppii ewe sasing lepoputáán ei lesen.)

 SIA fókkun aúcheani ewe Paipel pún sia silei pwe ina án Kot we Kapas. Mi wor ekkewe emmwen lón mi tongeni álisikich ach sipwe túmúnúkich seni osukosuk, me a tongeni áwenakich lupwen sia mwáálliló. Ina minne, ifa meefiach usun án ewe Paipel emmwen? Ekieki usun pwóróusen rúúemén Chón Kraist fefin mi kepit lón fansoun ekkewe aposel, iter Eutia me Sintike. Ewe Paipel a erá pwe ra áninifengen, nge ese affata ika pwata. Sipwe sótun kachitoni met neman a fis lefiler lón ena atun.

² Neman Eutia a etiwa ekkóch pwiin kewe lón mwichefel ar repwe mwéngéfengen lón imwan. Nge ese pwal etiwa Sintike. Mwirin, Sintike a fókkun song lupwen a rongorong án ekkewe ekkóch akkapwóróus usun ar pwapwaiti ewe mwéngéfengen. Neman Sintike a ekieki: ‘Mwa met, use tongeni lúkú ika pwata Eutia ese etiwaei! Tittipei pwe ám aua fókkun pwipwi.’ Sintike a meefi pwe Eutia ese wesewesen pwapwaiti i me ese mochen chiechi ngeni. Iwe mwirin, Sintike a féri eú mwéngéfengen me  a etiwa ekkena pwal chék aramas, nge ese etiwa Eutia! Ei mettóch neman a pwal mwo nge aosukosuka ekkóch lón ewe mwichefel. Ewe Paipel a pwáraatá pwe Paulus a apwúngú pwiich kana rúúemén me peseer ar repwe kinamwefengen. Neman ra aúseling ngeni Paulus me sópweló lón ar akkangang ngeni Jiowa fán pwapwa.​—Fil. 4:2, 3.

³ Lón ach kewe mwichefel ikenái, fán ekkóch epwe pwal tongeni fis osukosuk lefilach me emén pwiich. Nge ika sia fiti án Paipel kewe emmwen, sia tongeni ataweei ekkena esin osukosuk. Ren enletin, a mwo nge tongeni álisikich le túmúnú pwe esap fis ekkena osukosuk. Lupwen sia álleasochisi met ewe Paipel a apasa, sia pwáraatá pwe sia enletin aúcheani án Jiowa Kapas.​—Kölf. 27:11.

4, 5. Ifa án Paipel emmwen usun ach sipwe nemeni ach kewe memmeef?

⁴ Ese mecheres ach sipwe nemeni meefiach. Sia tongeni fókkun letipechou are song ika emén a ákkápiikich are eáni féffér ese pwúng ngenikich neman pokiten eéreniach, anúwen únúchach, are napanapen inisich. Epwe fen kon watte ach letipengaw ika eménna i chienach chón lúkú. Iwe, menni emmwen lón Paipel a tongeni álisikich?

⁵ Jiowa a silei met a tongeni fis lupwen aramas rese nemeni ar memmeef. Lupwen sia song, sia tongeni apasa are féri och mettóch sipwe niamam ren mwirin. Lón Paipel, Jiowa a éúréúrakich ach sipwe nemeni meefiach me a apasa: “Kosap songokai.” Ekieki ekkewe chómmóng osukosuk sia tongeni ttii senikich ika sia apwénúetá ena kapasen emmwen me sisap mwittir song. (Álleani Än Salomon Afalafal 7:9; Än Salomon Fos 16:32.) Ewe Paipel a pwal erenikich ach sipwe omusaaló tipisin aramas. Jesus a fen apasa pwe ika sise omusaaló ar tipis, Jiowa esap pwal omusaaló ach tipis. (Mat. 6:14, 15) Ka meefi lamoten óm kopwe angang wóón óm kopwe mosonottam are tipemecheres le omusaaló tipis?

6. Met a tongeni fis ika sise nemeni ach memmeef?

⁶ Ika sise nemeni ach memmeef, iwe sia tongeni akkamwéchú ach song me pwal mwo nge poputá le oput emén. Are, sia pwal tongeni etipetipa ekkóch lón ewe mwichefel ar repwe pwal eáni ach memmeef. Inaamwo ika sipwe sótun túkúmaaló ach song are oput, nge ló, ló, ló, epwe pwáló ngeni ekkóch met enletin meefiach. Iwe pwiich kewe neman resap chúen mochen chiechi ngenikich. (SalF. 26:24-26) Ekkewe mwán mi ásimaw repwe néúnéú ewe Paipel le álisikich ach sipwe péútaaló song me oput me sipwe omusaaló tipis. (Lif. 19:17, 18; Rom 3:11-18) Ika ra féri ena, met, sipwe apwénúetá ewe emmwen seni án Jiowa we Kapas?

7, 8. (a) Ifa usun Jiowa a emmweni néún kewe aramas? (b) Ikkefa ekkóch me lein ekkewe emmwen mi kawor lón Paipel, me pwata sipwe álleasochisiir?

⁷ Jiowa a emmweni me asukula chón an we mwicheich wóón fénúfan ikenái. Ifa usun? I a fen seikaatá Kraist pwe epwe “möküren mwichefel,” nge Kraist a filatá ewe “chon angang mi allükülük o tipachem” an epwe wisen asukula me emmweni néún Kot kewe aramas. (Ef. 5:23; Mat. 24:45-47) Ei chón angang a usun chék ewe mwichen soupwúngúpwúng lón fansoun ekkewe aposel, a fókkun aúcheani ewe Paipel pún ina án Kot we Kapas. (Álleani  1 Tesalonika 2:13.) Ikkefa ekkóch me lein ekkewe emmwen mi kawor lón Paipel?

⁸ Ewe Paipel a pesekich ach sipwe fiti ekkewe mwich iteitan. (Ipru 10:24, 25) A apéchékkúla ngenikich meinisin ach sipwe tipeeúfengen lón minne sia lúkú lón ewe Paipel. (1 Kor. 1:10) A pwal erenikich ach sipwe kútta akkomw án Kot we Mwú. (Mat. 6:33) Ewe Paipel a ewisa ngenikich ach sipwe afalafal imw me imw me ikewe ia aramas ra nóm ie. (Mat. 28:19, 20; Föf. 5:42; 17:17; 20:20) A ereni ekkewe mwán mi ásimaw ar repwe túmúnú liméchún ekkewe mwichefel. (1 Kor. 5:1-5, 13; 1 Tim. 5:19-21, Testament Mi Fö) A pwal erenikich lamoten ach sipwe túmúnú liméchún inisich me ttii senikich sókkun ekiek me féffér Jiowa a oput.​—2 Kor. 7:1.

9. Ié Jesus a seikaatá an epwe álisikich le weweiti án Kot we Kapas?

⁹ Neman ekkóch ra meefi pwe ese pwal lamot án emén epwe áweweei ngeniir Paipel. Nge seni ewe ier 1919, Jesus a fen néúnéú ewe “chon angang mi allükülük o tipachem” le álisi néún Kot kewe aramas le weweiti met ewe Paipel a apasa me apwénúetá. Sia túmúnú liméchún, kinamween, me tipeeúin ewe mwichefel ren ach álleasochisi ewe Paipel. Pwisin eisinuk, ‘Upwe tuppwél ngeni Jesus me fiti emmwenien ewe chón angang mi alúkúlúk?’

10. Ifa usun ewe puken Isikiel a áweweei usun kinikinin án Jiowa we mwicheich lón láng?

¹⁰ Sia silei seni Paipel pwe néún Jiowa kewe chón angang lón láng ra pwal kókkótéch. Áwewe chék, Isikiel a kúna lón eú lángipwi án Jiowa wawa efóch woken mi mwittir le sáfeil ia chék i a mochen epwe ssáló ie. (Is. 1:4-28) Ewe woken a liosuetá kinikinin án Kot we mwicheich lón láng, ewe a mwittir le apwénúetá an emmwen. Iwe ena mwicheich a emmweni kinikinin án Kot we mwicheich wóón fénúfan. Ekieki usun ekkewe chómmóng ekkesiwil mi fis lón án Kot we mwicheich lón ekkewe 10 ier ra ló. Chechchemeni pwe Jiowa i ewe a emmweni ekkena ekkesiwil mi fis. Ekiseló chék Kraist me ekkewe chónláng repwe ataieló ei ótót mi ngaw. Iwe esap chúen wor chón ésúfélúngawa Jiowa me itan we are eitengawa an nemenem!

11, 12. Ikkefa ekkóch mettóch án Jiowa we mwicheich a fen féfféri lón ekkeei ránin lesópwólóón?

¹¹ Ekieki met án Jiowa we mwicheich a fen féfféri lón ekkeei ránin lesópwólóón. Áwewe chék ren angangen kaú. Fitepúkú pwiich kewe ra angang weires le aúetá ewe mineféén ofesilap lón Merika, New York, Warwick. A pwal wor fitengeréú pwiich kewe wóón unusen fénúfan ra álillis lón kaútáán ekkewe Leenien Mwich me keangen ofesilap. Ewe Ofesin Pekin Angangen Kaú Wóón Unusen Fénúfan a wisen emmweni ekkena angang. Sia fókkun kilisou ngeni chókkana mi angang weires  lón kaútáán ekkena imw! Néún Jiowa kewe chón angang ekis meinisin ra fangóló úkúkún ar tufich fán iten álillisin kaútáán ekkena leeni. Jiowa a efeiéchú néún kana aramas ren ar tipetekison me tuppwél ngeni.​—Luk. 21:1-4.

¹² Asukul. Jiowa a pwapwaiti le asukula néún kewe aramas. (Ais. 2:2, 3) Ekieki ekkewe sókkopaten sukul mi kawor. Áwewe chék ewe Sukulen Pioneer, Sukulen Chón Afalafala ewe Mwú, Sukulen Gilead, Sukul fán Iten Mineféén Chón Bethel, Sukul fán Iten Chónemmwen mi Wisen Sáifetál me Pwúlúwer Kewe, Sukul fán Iten Mwán mi Ásimaw, Sukul fán Iten Mwán mi Ásimaw me Chónálillisin Mwichefel, me ewe Sukul fán Iten Ekkewe Chón Túmúnú Keangen Ofesilap me Pwúlúwer Kewe. Pwal och, lón ach website, jw.org, mi kawor ewe Paipel me pwal ekkóch puk lón fitepúkú fósun fénúfan. Mi pwal wor ekkewe kinikin lón ena website a ákkáeúin kawor fán iten semirit me fán iten famili. Mi pwal wor ewe kinikin fán iten news. Ka kan ákkáeá ewe jw.org lón óm angangen afalafal me lón óm famili fel?

13. Ifa wisen néún Jiowa kewe aramas?

¹³ A ifa me feiéchúch pwe sia chón án Jiowa we mwicheich me silei met i a mochen ach sipwe féri! Pwúngún, pokiten sia silei met Kot a pwapwaiti, wisach ach sipwe álleasochisi I me féri minne mi pwúng. Inaamwo ika chómmóng aramas ra pwapwaiti le féri mettóch mi ngaw, mi lamot sipwe “oput mine a ngau” usun chék Jiowa. (Kölf. 97:10) Sisap usun ekkewe “mi aita ngeni mürina mine a ngau, nge ngeni ngau mine a mürina.” (Ais. 5:20) Sia mochen apwapwaai Jiowa, ina popun sia tipeppós le akkamwéchú liméchúch lón mettóch meinisin. (1 Kor. 6:9-11) Án Jiowa kapas ngenikich lón ewe Paipel a kawor fán iten pwisin feiéchúch. Sia tongei Kot me mochen tuppwél ngeni. Ina popun sia álleasochisi an kewe emmwen lupwen sia nóm lón imwach, lón ewe mwichefel, lón ach leenien angang, lón sukul, are ese lifilifil ia sia nóm ie. (SalF. 15:3) Ekieki lón menni atun epwe lamot sipwe tuppwél ngeni Kot.

14. Ifa usun ekkewe sam me in ra tongeni pwáraatá ar tuppwél ngeni Jiowa?

¹⁴ Emiritin néúch kewe. Lón Paipel, Jiowa a awora ngeni ekkewe sam me in emmwen ren ifa usun repwe emiriti néúr semirit. Mi lamot Chón Kraist repwe túmúnú pwe resap tipetipeló ren ekiekin fénúfan mi chéúfetál iei. (Ef. 2:2) Áwewe chék, lón ekkóch leeni, emén sam mi tongeni ekieki, ‘Iwe, ikeei ie ekkewe fefin ra wisen emiriti semirit.’ Nge a ffat án ewe Paipel allúk ngeni ekkewe sam pwe repwe asukula néúr kewe usun Jiowa. (Ef. 6:4, TF) Ekkewe sam me in mi tongei Jiowa ra mochen pwe néúr kewe repwe ririéch ngeni Jiowa, usun chék Samuel atun a kúkkún.​—1 Sam. 3:19.

15. Ifa usun sia tongeni tuppwél ngeni Jiowa lupwen sia féri kefil mi lamot?

¹⁵ Féri kefil. Me mwen ach sipwe féri eú kefil mi lamot lón manawach, sipwe mochen akkomw ppii án Jiowa ekiek pwe sipwe tongeni tuppwél ngeni. Ewe Paipel me án Jiowa we mwicheich ra tongeni álisikich. Áwewe chék, ikenái ekkóch sam me in mi ló ngeni eú fénúen ekis pwe repwe nóm ie ra filatá ar repwe tiinaaló néúr kewe upwufé ngeni aramaser kewe lón pwúkún fénúer we. Ren ar féri ena, iir me rúúemén ra tongeni sópweló ar angangen moni. Pwúngún pwe ewe sam me ewe in chék repwe pwisin féri ewe kefil, nge itá repwe pwisin eisiniir, ‘Met Jiowa epwe ekieki  usun minne aupwe filatá le féri?’ (Álleani Rom 14:12.) Epwe eú alen tipachem ach sipwe akkomw ekieki met Paipel a apasa me mwen ach sipwe féri ekkewe kefil mi lamot fán iten ach famili me ach angang. Mi lamot ngenikich án Semach we lón láng álillis pokiten sise tongeni pwisin emmwenikich.​—Jer. 10:23.

16. Menni kefil a nóm ren emén inelap lupwen néún we át a uputiw? Met a álisi le féri kefil mi pwúng?

¹⁶ Mwirin án eú pean pwúpwúlú mwékút ngeni pwal eú fénúen ekis, a uputiw néúr we át, nge ra filatá ar repwe tiinaaló i ngeni pwúkún fénúer we pwe epwe nóm ren semen me inen ewe sam. Nge lón ena atun, ewe fefin a poputá le káé Paipel ren Chón Pwáraatá Jiowa. A káé pwe wisan an epwe asukula néún we át usun Jiowa. (Kölf. 127:3; SalF. 22:6) Neminna a iótek ngeni Jiowa, usun met ewe Paipel a pesekich ach sipwe féri, me a tingormaú an epwe álisi le féri minne mi pwúng. (Kölf. 62:7, 8) A pwal pwáraawu ngeni ewe emén mi káé ngeni ewe Paipel weiresin letipan, me a fós ngeni pwal ekkóch lón ewe mwichefel. Inaamwo ika aramasan me chiechian kewe ra peppesei an epwe tiinaaló ewe ménúkol, nge a apwúngaló pwe ese pwúng ena. Pwúlúwan we a kúna watteen álillisin chón ewe mwichefel ngeni pwúlúwan na me néúr ménúkol. A fókkun mwaar rer, iwe a poputá le káé ewe Paipel me fiti an famili le ló fiti ekkewe mwich. Anchangei pwapwaan ei inelap lupwen a mirititi pwe Jiowa a pélúweni an iótek!

17. Lupwen sia káé ngeni emén ewe Paipel, menni emmwen sipwe apwénúetá?

¹⁷ Ach apwénúetá emmwen. Ika sia tuppwél ngeni Kot, sipwe apwénúetá ekkewe emmwen mi feito seni an we mwicheich. Áwewe chék, nengeni met a lamot sipwe féri ekiseló mwirin ach poputá le káé ngeni emén ewe puk Met ewe Paipel A Wesewesen Apasa? A fen wor ewe pesepes pwe iteiten mwirin ach káé ngeni emén, sipwe awora fitu minich le álisi an epwe silefichi án Jiowa we mwicheich. Sia tongeni néúnéú ewe video Met A Fiffis lón ewe Leenien Mwich? me ewe puk Ié Kewe Ra Féfféri Letipen Jiowa Lón Ei Fansoun? Lupwen a wes ach káé lón ewe puk Paipel A Apasa, sia tongeni álisi an epwe ‘pöpöchökülela lon an lükü’ ren ach káé ngeni ewe puk Oupwe Chék Nóm lón ewe Tongen Kot, inaamwo ika a fen papatais atun sia chúen kákkáé. (Kol. 2:7) Ka akkapwénúetá ei emmwen seni án Jiowa we mwicheich?

18, 19. Ikkefa ekkóch popun mi lamot sipwe kilisou ngeni Jiowa?

¹⁸ A wor chómmóng popun itá sipwe kilisou ngeni Jiowa! Eú popun, pún “sia manau me mwökütüküt me nonom.” (Föf. 17:27, 28) A pwal fang ngenikich an we Kapas, ewe Paipel. Kich sia usun ekkewe Chón Kraist lón Tesalonika, sia aúcheani ena liffang pokiten ina án Kot Kapas.​—1 Tes. 2:13.

¹⁹ Ewe Paipel a álisikich ach sipwe akkarap ngeni Jiowa, me i a pwal akkarap ngenikich. (Jas. 4:8) Sia fókkun kilisou pwe Semach na a etiwakich ach sipwe chón an we mwicheich! Sia meefieni meefien ewe soumakken kélfel, ewe a apasa: “Oupwe kilisou ngeni ewe Samol mi Lapalap, pun i a kirikiröch, an tong ellet a nonom tori feilfeilachök.” (Kölf. 136:1) Lón iteiten ekkewe wokisin lón Kölfel 136, ewe soumakken kélfel a ekkenniwili ei itiitin kapas, “an tong ellet a nonom tori feilfeilachök.” Enlet, ika sia tuppwél ngeni Jiowa me fitipachei an kewe emmwen me ren an we mwicheich, i epwe fang ngenikich manaw esemuch me an tuppwél epwe nóm tori feilfeiló chék!