1, 2. (a) Ifa ewe win néún Kot kewe aramas ra ápilúkúlúkú? (b) Met epwe álisikich le nefótófót wóón ewe win? (Ppii ewe sasing lepoputáán ei lesen.)

 EKKEWE Chón Kraist mi kepit a wor ar ápilúkúlúk mi aúchea. Ra ápilúkúlúkún manaw lón láng. Aposel Paulus a apasa pwe ena ápilúkúlúk, ina “ewe win, iei än Kot kö.” (Fil. 3:14) Repwe chienen Jesus Kraist lón láng le nemenem lón Mwúún, me repwe angangfengen le álisi aramas ar repwe unuséchúló. (Pwär. 20:6) A ifa me amwararen ena ápilúkúlúk! Ekkewe ekkóch siip ra pwal ápilúkúlúkú eú sókkun win. Ra ápilúkúlúkún manaw esemuch lón eú Paratis wóón fénúfan, me ena ápilúkúlúk a atoto ngeniir pwapwa enlet!​—2 Pet. 3:13.

² Paulus a mochen álisi pwiin kewe Chón Kraist mi kepit ar repwe akkamwéchú ar tuppwél me angei winner. A ereniir: “Oupwe tipeni ekewe mettoch mi nom läng.” (Kol. 3:2) A lamot ngeniir ar repwe nefotofot wóón ar we ápilúkúlúk mi aúchea lón láng. (Kol. 1:4, 5) Án néún Jiowa kewe chón angang ekieki usun feiéchúr kewe me ren, epwe álisiir le afóta meser wóón  winner. Ena mettóch a weneiti chókkewe mi ápilúkúlúkún manaw lón láng me chókkewe repwe manaw wóón fénúfan.​—1 Kor. 9:24.

3. Met Paulus a éúréúra ngeni ekkewe Chón Kraist?

³ Paulus a pwal éúréúra ekkewe Chón Kraist usun ekkewe mettóch mi efeiengaw epwe tongeni eppetiir le angei winner. Áwewe chék, a mak ngeni ekkewe chón Kolose usun ekkewe Chón Kraist chofona mi achocho le apwapwaai Kot ren ar álleasochisi Allúkún Moses nge rese fen lúkú Kraist. (Kol. 2:16-18) Paulus a pwal pwóróus wóón ekkewe mettóch mi chúen efeiengaw lón ach ei fansoun mi tongeni eppetikich le angei winnach. A áweweei ifa usun sipwe ú ngeni mochenin futuk me met sipwe féri ika a fis osukosuk lefilach me chón ach famili are pwiich kewe Chón Kraist lón ewe mwichefel. Án Paulus kapasen fén mi aúchea a tongeni álisikich lón ei fansoun. Iwe, sipwe etittina ekkóch an kana kapasen éúréúr fán tong mi mak lón néún we taropwe ngeni ekkewe chón Kolose.

4. Pwata mochenin futuk a tongeni eppetikich le angei winnach?

⁴ Iei met Paulus a makkeei mwirin an áchema ngeni pwiin kewe Chón Kraist usun ar ápilúkúlúk mi amwarar: “Oupwe amäloi ekewe mochenian fanüfan mi nom remi: sokopaten föförün lisowu, lüangau, mocheisou, mocheniangau me tipemong.” (Kol. 3:5) Mochenin futuk a tongeni fókkun péchékkúl me a tongeni angei senikich ach ririéch ngeni Jiowa me ach ápilúkúlúk fán iten mwachkkan. Emén Chón Kraist mwán mi ttur lón mochenin futuk, me mwirin liwiniti ewe mwichefel, a erá pwe an kana mocheniangaw a fókkun péchékkúl, iwe “a fen ser lupwen an miritiló.”

5. Ifa usun sipwe túmúnúkich atun a fis ngenikich eú mettóch epwe tongeni sótunikich?

⁵ A lamot sipwe ákkáeúin túmúnúéch ika epwe fis ngenikich eú mettóch epwe tongeni emmwen ngenikich ach sipwe atai án Jiowa allúkún liméchún manaw. Áwewe chék, seni chék lepoputáán a eú alen tipachem fán iten ekkewe mi kammwet ar repwe aúkúkú féfférúr lefiler, ren choweán attapfengen, kis, me rúúeménúló chék. (SalF. 22:3) Pwal ekkóch mettóch ra tongeni emmwenaalong emén Chón Kraist lón sóssót, ina atun a sái fán iten an angang, are ika i emén mwán nge ra angangfengen me emén fefin, are ika i emén Chón Kraist fefin nge ra angangfengen me emén mwán. (SalF. 2:10-12, 16) Met kopwe féri pwe kopwe tongeni túmúnuk? Affata pwe en emén Chón Pwáraatá Jiowa. Féfférum epwe ésúfél me kopwe fókkun chechchemeni pwe núesik a tongeni emmwen ngeni feiengaw watte. A pwal lamot ach sipwe túmúnúéch atun sia meefi tipitipingaw are letipengaw. Eli sipwe mochen án emén epwe tongekich. Iwe ssenúkún ach letipechou me tipitipingaw epwe efisi ach sipwe chék etiwa ese lifilifil án ién tong. A mmen efeiengaw ena. Ika ka meefi ena, iwe kosap fókkun féri met epwe eppetuk ren seni óm angei ewe win. Kul ngeni Jiowa me pwiium kewe Chón Kraist ren álillis.​—Álleani Kölfel 34:18; Än Salomon Fos 13:20.

6. Met mi lamot sipwe chemeni atun sia filatá ach minen apwapwa?

⁶ Ren ach sipwe ámálooi mochenin futuk, mi lamot ach sipwe túmúnú senikich ekkewe minen apwapwa mi limengaw. A chómmóng ekkewe sókkun minen apwapwa lón ei fansoun  mi fókkun ngaw mi áchema ngenikich usun Sotom me Komora. (Jut. 7) Chókkewe mi wisen féri ekkena minen apwapwa ra ámmeef ngeni aramas pwe ese pwal wor ngawen féfférún sikepwach me ese pwal wor efeiengawan. Ina minne mi lamot ach sipwe túmúnúéch iteitan. Sise chék tongeni etiwa ese lifilifil án fénúfan minen apwapwa. Nge, mi lamot sipwe filatá ekkewe sókkun minen apwapwa esap eppetikich ach sipwe angei winnach, ina ewe manaw.​—SalF. 4:23.

7. Met sókkun osukosuk a tongeni ppiitá lón ewe mwichefelin Chón Kraist?

⁷ Sia pwapwa pwe sia chóni ewe mwichefelin Chón Kraist. Sia káé án Kot we Kapas lón ekkewe mwich, me sia álillisfengen fán tong. Ena mettóch a álisikich le nefotofot wóón ewe win. Nge fán ekkóch, a tongeni fis osukosuk ika a fis wewengawfengen lefilach me pwiich kewe. Ika sise pwákini ekkena mettóch, a mecheres an epwe efisi song.​—Álleani 1 Petrus 3:8, 9.

8, 9. (a) Ikkefa ekkewe napanap epwe álisikich le nefotofot wóón ewe win? (b) Met a tongeni álisikich ach sipwe kinamwe ngeni emén pwiich mi eletipengawakich?

⁸ Sise tongeni mut ngeni ewe mettóch song an epwe eppetikich le angei ewe win. Paulus a áweweei met mi lamot án ekkewe Chón Kraist repwe féri, a erá: “Ämi chon fil me ren Kot, ämi chon pin kana i a echenikemi, oupwe pwilitalong womi tong, kirikiröch, tipetekison, lukpwetete me mosonotam. Oupwe songomangfengen o amusamusfengen are eman a chou ngeni eman. Oupwe fokun amusamusfengen usun ach Samol a amusala ämi tipis. Nge lükün ekei föför meinisin oupwe echenifengenikemi lefilemi, pun chen a pilüküfengeni ekei mettoch meinisin, pwe ra unusöch lon ar chufengen.”​—Kol. 3:12-14.

⁹ Tong me kirekiréch ra tongeni álisikich le omusaaló tipisin ekkewe ekkóch. Ika sia tipengaw ren met emén a apasa are féri, iwe sia tongeni ekieki ekkewe atun sia fen apasa are féri met mi eletipengawa ekkewe ekkóch nge ra omusaaló tipisich. Sia fókkun kilisou ren ar tong me kirekiréch! (Álleani Än Salomon Afalafal 7:21, 22.) Sia kilisou pwe fán kirekiréch, Kraist a etipeeúfengeni meinisin chón fel mi enlet. (Kol. 3:15) Kich meinisin sia taitap lón ach tongei ewe emén chék Kot, ewe pwóróus sia afalafala, me ekkewe osukosuk sia kúkkúna. Ika sia pwári tong, kirekiréch me omusomusfengen lefilach, iwe epwe lapóló tipeeú lón ewe mwichefel me sia tongeni nefotofot wóón ewe win.

10, 11. (a) Pwata a efeiengaw ewe napanap lólówó? (b) Ifa usun sipwe túmúnú pwe lólówó ete eppetikich le angei ewe win?

¹⁰ Lólówó a tongeni eppetikich le angei ewe win. Ekkóch pwóróus lón Paipel ra pwári úkúkún efeiengawen ewe mettóch lólówó. Áwewe chék, Kain a poputá le lólówóiti Epel, iwe a nieló. Kora, Tatan me Apiram ra lólówóiti Moses me ú ngeni. King Saul a lólówóiti Tafit me sótun nieló. A fókkun pwúng alon án Kot Kapas: “Ia a wor ie lolowo me ekieki chök en me püsin an, ikenan a pwal wor kotongau me sokun föför mi ngau meinisin.”​—Jas. 3:16.

¹¹ Ika sia achocho le enletin eáni tong me kirekiréch, iwe sisap mwittir meefi lólówó. Án Kot we Kapas a erá: “Chen a mosonotam o kirikiröch, chen esap lolowo.” (1 Kor. 13:4) Mi lamot sipwe eáni án Jiowa ekiek  ren ach sipwe túmúnú pwe site eáni ena napanap lólówó. Mi lamot sipwe ekieki pwe pwiich kewe iir kifetin eú chék inis, weween ewe mwichefel. Paipel a erá: “Are eu kifet a iteüöch, ekewe lusun kifet meinisin ra eti lon an pwapwa.” (1 Kor. 12:16-18, 26) Ika a fis ngeni emén lein pwiich kewe och mettóch mi múrinné, iwe sipwe eti lón an pwapwa, nge sisap fen lólówóiti. Ekieki usun án Jonatan néún King Saul we leenien áppirú mi múrinné. Jonatan ese lólówóiti Tafit lupwen a kefilitá an epwe wisen king nge esap fen i. A mwo nge apéchékkúla Tafit me álisi. (1 Sam. 23:16-18) Sia tongeni áppirú Jonatan ren an pwári tong me kirekiréch?

12. Ifa ewe kapasen fén seni Paipel epwe tongeni álisi óm famili le angei ewe win?

¹² Lupwen emén me emén lón ach we famili a apwénúetá ekkewe kapasen emmwen lón Paipel, iwe ach we famili epwe kinamwe me pwapwa me sipwe angei ewe win. Paulus a eáni ei kapasen fén mi múrinné fán iten famili: “Ämi fefin kana, oupwe aleasochis ngeni pwülüemi, pun iei met oupwe föri lon ämi souläng. Ämi mwän kana, oupwe echeni pwülüemi, nge ousap pöchökül ngeniir. Ämi nau kana, oupwe aleasochisi sememi me inemi lon mettoch meinisin, pun iei met Kot a pwapwa ren. Ämi sam me in kana, ousap asonga nöümi kana ren ämi apwüngüchouur, pwe resap apilükingau.” (Kol. 3:18-21) Ka tongeni kúna ifa usun ena kapasen fén a tongeni álisi óm famili?

13. Ifa usun emén Chón Kraist fefin epwe álisi pwúlúwan we le mochen angang ngeni Jiowa?

¹³ Eli en emén Chón Kraist fefin nge pwúlúwom we esap emén chón angang ngeni Jiowa. Iwe met kopwe féri ika ka meefi pwe ese éch féfférún pwúlúwom we ngonuk? Neman  kopwe song ngeni me ánini ngeni, nge itá óm féri ena epwe ámúrinnééló nónnómumi? Inaamwo ika ka win lón ámi we ánini, nge itá epwe amwékútú an epwe mochen angang ngeni Jiowa? Ese mwáál ese tongeni. Nge ika ka súféliti wisan we mékúren famili, iwe ka tongeni álisatá kinamween ámi famili me elingaaló Jiowa. Óm leenien áppirú mi múrinné a pwal mwo nge tongeni amwékútú pwúlúwom we an epwe mochen angang ngeni Jiowa, iwe ámi me rúúemén oua tongeni angei ewe win.​—Álleani 1 Petrus 3:1, 2.

14. Met mi lamot emén Chón Kraist mwán epwe féri ika pwúlúwan we ese súféliti?

¹⁴ Eli en emén Chón Kraist mwán nge pwúlúwom we ese fituk le angang ngeni Jiowa. Iwe met kopwe féri ika ese súfélituk? Ika kopwe sótun ámmeef ngeni pwe en emén boss ren óm chúwérúwér ngeni, iwe itá epwe súfélituk mwirin óm féri ngeni ena? Aapw! Kot a mochen óm kopwe emén mwán pwúpwúlú mi sile tong me áppirú Jesus. (Ef. 5:23) Jesus, i mékúren ewe mwichefel, a mosonottam me pwári tong fansoun meinisin. (Luk. 9:46-48) Ika ka áppirú Jesus, iwe ló, ló, ló neman pwúlúwom we epwe pwal mochen angang ngeni Jiowa.

15. Ifa usun emén Chón Kraist mwán a tongeni pwár ngeni pwúlúwan we pwe a tongei?

¹⁵ Jiowa a éúréúra ekkewe mwán pwúpwúlú, a erá: “Oupwe echeni pwülüemi, nge ousap pöchökül ngeniir.” (Kol. 3:19) Emén mwán pwúpwúlú mi tong a súféliti pwúlúwan we. Ifa usun? A aúseling ngeni meefian me ereni pwe a aúcheani minne a apasa. (1 Pet. 3:7) Inaamwo ika ewe mwán ese tongeni apwénúetá meinisin minne ewe fefin a kan apasa, nge an aúseling ngeni epwe álisi le féri kefil mi múrinné. (SalF. 15:22) Emén mwán pwúpwúlú mi tong ese eriáni pwúlúwan we an epwe súféliti. Nge a  achocho le féri met epwe fich ngeni án pwúlúwan we epwe súféliti ren. Lupwen ewe mwán pwúpwúlú a tongei pwúlúwan we me néúr kewe, iwe repwe pwapwa lón ar angang ngeni Jiowa me repwe angei ewe win, weween ewe manaw.

16, 17. Ika en emén teenage, ifa usun kopwe túmúnú pwe kosap mwittir song ren semom kewe me inom?

¹⁶ Eli en emén teenage, me ka meefi pwe semom kewe me inom Chón Kraist rese weweiti meefiom me ra kon tichik. Ena mettóch eli epwe fókkun asongok, iwe epwe efisi óm tipemwaramwar le mochen angang ngeni Jiowa. Nge ika ka likitaló Jiowa, iwe kopwe mirititi pwe ese wor emén lón án Satan ei ótót epwe pwár ngonuk ewe aúkúkún tong ka kúna seni semom kewe me inom me chiechiom kewe lón ewe mwichefel.

¹⁷ Ekieki usun ei mettóch: Ika semom kewe me inom rese mwo nge apwúnguk fán eú, iwe ifa usun kopwe silei ika ra wesewesen tongeok? (Ipru 12:8) Pwúngún pwe rese unuséch, ina popun napanapen ar emirituk neman epwe eletipengawók. Nge kosap nefotofot wóón ena. Nge kopwe fen achocho le weweiti popun ar féri are erenuk ekkóch mettóch. Kopwe chék mosonoson me kosap mwittir song. Án Kot we Kapas a apasa: “Eman mi mang le fos a wor an silelap, nge eman mi mosonotam i eman mi weweöch.” (SalF. 17:27) Achocho ngeni óm kopwe emén mi ásimaw mi kan etiwa kapasen fén me káé seni, ese lifilifil napanapen án emén fénok. (SalF. 1:8) Kosap ménúki pwe an wor semach me inach mi tongei Jiowa, ina eú liffang mi aúchea. Ra mochen álisuk le kúna manaw esemuch.

18. Pwata ka tipeppós le nefotofot wóón ewe win?

¹⁸ Ese lifilifil ika sia eáni ápilúkúlúkún manaw lón láng are lón paratis wóón fénúfan, nge emén me emén leich sia mwétéresiti amwararen mwachkkan. Mi enlet ach ápilúkúlúk. A lóngólóng wóón án ewe Chón Fératá unuselapen láng me fénúfan pwon, ewe mi apasa: “Än chon fanüfan silei ewe Samol mi Lapalap epwe alolol.” (Ais. 11:9) Ekiseló chék chón fénúfan meinisin repwe káit me ren Kot. Ina ewe feiéch ese lamotongaw ach achocho le angei. Ina minne, kopwe chechchemeni iteitan met Jiowa a fen pwon ngonuk me kosap mut ngeni och mettóch an epwe eppetuk le angei ewe win!