1. Met Jiowa a mut ngenikich ach sipwe féri?

JIOWA a mut ngenikich ach sipwe filatá ifa usun sipwe manaweni manawach. A áiti ngenikich ifa usun sipwe féri ekkewe kefil mi múrinné, me álisikich ach sipwe sópwéch lupwen sia féri ekkewe kefil epwe apwapwaai I. (Kölf. 119:173) Lapólóón ach apwénúetá ekkewe kapasen emmwen seni án Kot we Kapas mi etipachem, epwe pwal ina angangéchúlóóch le féri kefil mi múrinné.​—Ipru 5:14.

2. Ifa ewe weires sia tongeni kúna mwirin ach féri eú kefil?

² Iwe nge, inaamwo ika sia féri ekkewe kefil mi múrinné, nge epwe tongeni weires ngenikich ach sipwe áwesi met sia fen poputá le féri. Áwewe chék, ekieki ekkeei pwóróus: Emén Chón Kraist alúwél a filatá le álleani unusen ewe Paipel. Ren fitu wiik, a álleani ewe Paipel, nge mwirin, ese chúen sópweló le féri ren och popun. Pwal eú, emén Chón Kraist fefin a filatá an epwe regular pioneer nge a chék akkachopwa le filatá menni maram epwe poputá lón. Pwal och, chón ewe kúmiin mwán mi ásimaw ra filatá pwe repwe alapaaló ar fansoun le chuuri me apéchékkúla chón ar we mwichefel, nge mwirin fitu maram resaamwo poputá le féri. Mi sókkofesen met a fis lón ekkena úlúngát pwóróus, nge ra chék léllé wóón eú mettóch. Ekkena aramas ra féri ekkewe kefil nge rese apwénúetá minne ra filatá le féri. Ekkewe popun Chón Kraist lón Korint ra kúna pwal ena esin weires. Sipwe pwóróus wóón met sia tongeni káé seniir.

3. Met ekkewe chón Korint ra apwúngaló le féri, nge met a fis?

³ Lón ina epwe ewe ier 55, ekkewe chón Korint ra apwúngaló och mettóch mi lamot. Ra rong pwe pwiir kewe lón Jerusalem me Jutea ra fókkun osupwang me ra nóm fán weires, me chón ekkewe ekkóch mwichefel ra ikkioni monien álillis fán ásengesiir. Pokiten ekkewe chón Korint ra kirekiréch me kisáseú, ra apwúngaló ar repwe pwal awora ar álillis me eisini aposel Paulus met ra tongeni féri. Paulus a mak ngeni ena mwichefel pwe epwe  ereniir met repwe féri, me a pwal filatá Titus an epwe wisen álisiir lón ewe angangen ioifengenin ewe monien álillis. (1 Kor. 16:1; 2 Kor. 8:6) Nge mwirin fitu maram, Paulus a rong pwe ekkewe chón Korint resaamwo ammólnatá ar monien álillis usun met ra fen apwúngaló. Iwe pokiten akkachopwaar, iwe neman ar liffang esap tongeni fitilong lón án ekkewe pwal ekkóch mwichefel monien álillis ekkewe chón kúné repwele uwei ngeni Jerusalem.​—2 Kor. 9:4, 5.

4. Ifa án Paulus kapasen pesepes ngeni ekkewe chón Korint me ren 2 Korint 8:7, 10, 11?

⁴ Ekkewe chón Korint ra féri eú kefil mi múrinné, me Paulus a apúnger pokiten a péchékkúl ar lúkú, me ra mochen kisáseú. Nge a pwal peseer ar repwe áwesaaló minne ra fen poputááni. (Álleani 2 Korint 8:7, 10, 11.) Minne a fis ngeniir a áiti ngenikich pwe a pwal mwo nge tongeni weires ngeni ekkewe Chón Kraist mi tuppwél ar repwe apwénúetá met ra filatá le féri.

5. Ikkefa ekkewe kapas eis sipwele pélúweniir?

⁵ Neman a pwal weires ngenikich le apwénúetá minne sia fen filatá le féri usun chék ekkewe chón Korint. Pwata? Pokiten sise unuséch, neman sia chék akkachopwa le féri mettóch. Are ppiitáán och mettóch mi weiweitá epwe áweiresikich le apwénúetá met sia fen apasa sipwe féri. (SalAf. 9:11; Rom 7:18) Met sipwe féri ika a lamot ach sipwe ekiekisefáli eú kefil sia fen féri lóóm, nge iei a lamot epwe wor ekkesiwil? Me ifa usun sipwe túmúnú pwe sipwe áwesaaló minne sia fen poputááni?

6. Ineet atun eli epwe lamot ach sipwe ekkesiwili met sia fen filatá le féri?

⁶ A wor ekkóch kefil mi aúchea sia fen fériir, sisap fókkun tongeni atai. Áwewe chék, sia chék unusen fitipachei ach kefil le angang ngeni Jiowa, me sia pwal tipeppós ach sipwe tuppwél ngeni pwúlúwach. (Mat. 16:24; 19:6) Iwe nge, ekkóch kefil sia fen féri, eli epwe lamot ach sipwe ekkesiwili. Pwata? Pokiten nónnómun manawach a kan siwil. Iwe, met a tongeni álisikich le féri ekkewe kefil mi fókkun múrinné?

7. Met itá sipwe tingorei Kot lón iótek, me pwata?

⁷ Iótek fán iten tipachem. Jiowa a emmweni James an epwe makkeei ei: “Are eman leimi a osun tipachem, epwe tüngor ngeni Kot, iwe, i epwe fang ngeni, pun Kot a fangafangöch ngeni aramas meinisin.” (Jas. 1:5) Kich meinisin sia “osun tipachem” lón ekkóch mettóch. Ina minne, kopwe lúkúlúk wóón Jiowa atun kopwe féri eú kefil, are atun ka ekiekin siwili eú kefil ka fen féri. Iwe, Jiowa epwe álisuk le féri kefil mi múrinné.

8. Ifa usun sipwe kútta pwóróus are féri research me mwen ach sipwe féri kefil?

⁸ Achocho research wóón. Kútta álillis seni án Kot we Kapas, álleani néúch kewe puk seni án Jiowa we mwicheich, me fós ngeni chókkewe ka lúkúlúk wóór. (SalF. 20:18) Mi lamot ena esin research me mwen óm kopwe féri kefil wóón óm ekiekin siwili óm angangen moni, mwékút ngeni pwal eú leeni, are filatá menni sókkun sukul kopwe fiti epwe álisuk le atufichi manawom me óm angang ngeni Jiowa.

9. Ifa usun ach wenechar ngeni pwisinkich epwe álisikich?

⁹ Etittina ewe popun ka féri ewe kefil. Jiowa a áfánni ewe popun sia filatá le féri och mettóch. (SalF. 16:2) A mochen ach sipwe wenechar wóón mettóch meinisin. Ina minne, lupwen sia féri ekkewe kefil, sia pwal mochen sipwe wenechar ngeni pwisinkich, me pwal ngeni ekkewe ekkóch ren ewe popun sia féri mettóch. Ika sise unusen wenechar, epwe tongeni weires ngenikich ach sipwe apwénúetá met sia filatá le féri. Áwewe chék, emén alúwél Chón Kraist a filatá an epwe regular pioneer. Iwe nge, mwirin och fansoun, a weires ngeni an epwe tikeri néún awa, me ese kon lien pwapwa lón an angang. Neman, akkomwan a ekieki pwe a pioneer pokiten a mochen apwapwaai Jiowa. Nge neman ren  enletin, a pioneer pokiten a mochen apwapwaai seman kewe me inan, are pwal emén.

10. Met a lamot ren ach sipwe féri siwil lón manawach?

¹⁰ Ekieki usun emén chón káé Paipel mi filatá an epwe úkútiw le ún suupwa. Iwe, a éch pwe mwirin eú ika ruu wiik ese ún suupwa, inaamwo ika a weires ngeni. Nge mwirin ena, a pwal ún sefál. Nge ló, ló, ló, a pworacho ngeni an ún suupwa! An tong ngeni Jiowa me an mochen apwapwaai I a álisi.​—Kol. 1:10; 3:23.

11. Pwata a lamot ach sipwe tichiki met sia mochen achocho ngeni?

¹¹ Kopwe tichik. Ika ka tichiki met kopwe achocho ngeni, iwe epwe mecheresiló óm kopwe tikeri. Áwewe chék, neman ka fen filatá le alapaaló óm fansoun le állea Paipel. Nge ika kese féri eú schedule mi tichik, neman epwe weires óm kopwe apwénúetá. * Are neman ekkewe mwán mi ásimaw lón eú mwichefel ra apwúngaló ar repwe alapaaló ar fansoun le chuuri me apéchékkúla chón ar we mwichefel. Nge mwirin och fansoun, resaamwo apwénúetá met ra apwúngaló. Ren ar repwe sópwéch, ra tongeni pwisin eisiniir ekkeei esin kapas eis: “Aua fen makkeetiw iten pwiich kewe repwe fókkun kúna feiéch seni ám chuuriir? Aua fen aotaló ránin me kulókun ám aupwe chuuriir?”

12. Eli met a lamot ach sipwe féri, me pwata?

¹² Eáni ekiek mi pwúng me itepék me rúúepek. Ese wor emén a wor an fansoun, tufich me péchékkúl le féri meinisin met a mochen féri. Ina popun, sipwe eáni ekiek mi pwúng me itepék me rúúepek. Lupwen ka mirititi pwe kese chúen tongeni féri minne ka filatá, iwe neman a lamot kopwe féri ekkesiwil. (SalAf. 3:6) Nge, sipwe erá pwe ka fen ekiekisefáli ewe kefil, mwirin ka fen féri ekkesiwil wóón, me iei ka meefi pwe ka tongeni apwénúetá. Iwe nengeni ekkeei nimu mettóch ka tongeni féri epwe álisuk le áwesaaló minne ka fen poputááni.

13. Ifa usun kopwe tongeni angei ewe péchékkúl mi lamot ngonuk pwe kopwe apwénúetá minne ka fen filatá?

¹³ Iótek fán iten péchékkúl pwe kopwe tongeni mwékút. Kot a tongeni ngonuk ewe ‘tufich’ pwe kopwe apwénúetá minne ka fen filatá le féri. (Fil. 2:13) Ina minne, tingorei Jiowa an we ngún mi fel pwe epwe fang ngonuk ewe péchékkúl mi lamot. Kopwe ikkiótek inaamwo ika ka meefi pwe Kot esaamwo pélúweni óm iótek. Jesus a erá: “Oupwe tütüngor, iwe, oupwe angei [ewe ngún mi fel.]”​—Luk. 11:9, 13.

14. Ifa usun ewe emmwen mi mak lón Än Salomon Fos 21:5 a tongeni álisuk le apwénúetá minne ka fen filatá le féri?

¹⁴ Féri eú kókkót. (Álleani Än Salomon Fos 21:5.) Ren óm kopwe áwesaaló eú angang ka fen poputááni, mi lamot kopwe féri eú kókkót. Nge mwirin, mi pwal lamot óm kopwe fiti ena kókkót. Pwal ina chék usun, lupwen ka fén féri eú kefil, makkeetiw mettóch meinisin mi lamot kopwe féri pwe epwe pwénútá óm kefil. Lupwen kopwe féri eú angang mi watte, kopwe kinikisietiw ena angang lón fitu kinikinin angang mi mecheres. Iwe, iteiten ka áwesi eú me eú ekkena angang mi mecheres, kopwe mwittir kúna úkúkún óm feffeitá. Paulus a pesei ekkewe chón Korint ar repwe isoni ekis moni “iteiten räninfel” fán iten ewe monien álillis, lap seni ar repwe witi an epwe wareitiir iwe repwap kerán ioni unusen ewe monien álillis. (1 Kor. 16:2) Óm kinikisietiw ekkewe angang watte lón fitu kinikinin angang, epwe pwal álisuk óm kosap meefi pwe ese ki reom ewe angang.

15. Mwirin óm féri ewe kókkót, met ka tongeni féri?

¹⁵ Ika ka makkeetiw met ka ekiekin féri, epwe mecheres óm kopwe apwénúretá. (1 Kor. 14:40)  Áwewe chék, a wor eú éúréúr fán iten chón ewe kúmiin mwán mi ásimaw ar repwe filatá emén me leir epwe wisen makkeei meinisin met ewe kúmi a fen apwúngaló, ié epwe wisen apwénúretá, me ineet itá repwe áwesaaló. Epwe mecheres ngeni ekkewe mwán mi ásimaw ar repwe apwénúetá minne ra apwúngaló ika ra fiti ena kapasen éúréúr. (1 Kor. 9:26) Ka pwal tongeni féri ena esin ren óm kewe angang iteiten rán. Áwewe chék, ka tongeni makkeetiw met a lamot kopwe féri lón eú me eú rán, me fiti tettelin met kopwe akkomwen féri. Ika ka féri ena, epwe mecheresiló óm kopwe áwesi met ka fen poputááni me kopwe féri chómmóng mettóch.

16. Met mi lamot kopwe pwal féri pwe kopwe apwénúetá minne ka fen filatá, me ifa usun Rom 12:11 a áiti ngenikich ena?

¹⁶ Achocho. A lamot achocho ren óm kopwe fiti minne ka fen akkóta me áwesaaló met ka fen poputááni. (Álleani Rom 12:11.) Paulus a ereni Timoty an epwe “likitü” le feffeitá lón an angangen Chón Kraist me lón an wiliti emén sense mi lipwákéch. Ena kapasen fén a weneiti pwal ekkóch mettóch sia achocho ngeni lón ach angang ngeni Kot.​—1 Tim. 4:13, 16.

17. Ifa usun Efisos 5:15, 16 a tongeni álisikich le apwénúetá met sia ekiekin féri?

¹⁷ Áeáfichi óm fansoun. (Álleani Efisos 5:15, 16.) Filatá ineet atun kopwe apwénúetá minne ka fen apasa kopwe féri, me kosap siwili. Kosap eáni ewe ekiek pwe kopwap chék poputá le angang wóón atun a unusen échúló nónnómum. Pún neman esap fókkun fis pwe nónnómuch epwe unusen múrinné. (SalAf. 11:4) Kopwe túmúnúéch pwe ekkewe mettóch mi lamot kisikis rete angealó óm fansoun me péchékkúl le féri ekkewe mettóch mi fókkun lamot. (Fil. 1:10) Ika mi tufich, filatá eú atun aramas resap tongeni atai óm fansoun angang. Ereni ekkewe ekkóch pwe a lamot ngonuk fansoun le nefótófót wóón óm angang. Ppii ika ka tongeni offeló noum we phone me kopwap online are cheki óm kewe e-mail mwirin. *

18-19. Met a tongeni álisuk le akkachocho le apwénúetá minne ka fen filatá le féri inaamwo ika a weires?

¹⁸ Nefótófót wóón mwirilóón óm angang. Mwirilóón óm angang, a usun chék óm tikeri ewe leeni ka achocho le sái ngeni. Ika ka wesewesen mochen tikeri ena leeni, iwe kopwe chék sópweló lón óm sái, inaamwo ika ka kúna pwe a lamot óm kopwe siwili me fetál wóón pwal efóch al pwe kopwe tikeri ena leeni. Pwal ina chék usun, ika sia nefótófót wóón mwirilóón ekkewe kefil sia fen féri, iwe sisap mwittir fangetá ika a wor eppet are ika mi lamot epwe wor ekkesiwil lón minne sia filatá.​—Kal. 6:9.

¹⁹ A tongeni áweires ach féri ekkewe kefil mi múrinné me apwénúretá. Nge Jiowa a tongeni ngonuk ewe tipachem me péchékkúl mi lamot pwe kopwe tongeni áwesi minne ka fen poputááni.