Ua uputiw lón ewe 1983. Lekúkkúni ua péchékkúl, nge atun a 10 ieri, a poputá le fókkun metek unusen inisi. Ina epwe ruu ier mwirin, ua pwáátá lón eú soran nge use tongeni mwékút. Ua resin achocho le amwékútú pechei, nge use tongeni. Iwe seni ena rán, use chúen tongeni fetál. Ai na semmwen a pwal efisi an esap chúen máár inisi. Tori iei, inisi a chúen usun inisin emén semirit.

Ua fen mwenilóng lón imwei we ren fitu maram lupwen rúúemén Chón Pwáraatá Jiowa ra wareitiei. Atun a kan wor chón etto, lape ngeni ua kan op, nge lón ena rán ua mut ngeni ekkena fefin ar repwe fós ngeniei. Atun ra fós usun ewe Paratis, a cheme ngeniei met ekkewe ua fen rong lupwen a nimu ieri. Lón ena atun, emén misineri itan Jethro, seni Suriname, a kan etto afalafal lón sópwum we fán eú iteiten maram me a káé ngeni semei we. Jethro a fókkun kirekiréch ngeniei. Ua pwal fókkun sani. Pwal och, semei kewe me inei chinnap ra kan uweiei ngeni ekkóch án ekkewe Chón Pwáraatá kewe mwich, mi fis lón sópwum we. Ina popun, lupwen Florence, emén me lein ekkena fefin mi chuuriei lón ena rán, a eisiniei ika ua pwal mochen káé Paipel, ua ereni pwe ewer.

Florence me pwúlúwan we itan Justus ra liwin, me ra káé ngeniei. Lupwen ra esilla pwe use sile állea, ra álisiei me áitiei állea. Mwirin och fansoun, ua tongeni pwisin állea. Eú rán, ena pean pwúpwúlú ra ereniei pwe ra kewis pwe repwe álillis lón Suriname. A mmen elichippúng pún ese wor ié lón Orealla a tongeni sópweló le káé ngeniei. Nge kilisou, pwe Jiowa a chék chechchemeniei.

Ekiseló mwirin, emén pioneer itan Floyd a wareiti Orealla, me a chuuriei atun a afalafal imw me imw. Lupwen a fós ngeniei usun káéén Paipel, ua emelimel. Nge a eisiniei, “Pwata ka emelimel?” Iwe ua ereni pwe ua fen káé ewe brochure Met Kot A Kutta Senikich? me poputá le káé ewe puk Sile Mi Emmwen Ngeni Manau Esemuch. * Ua áwewe ngeni pwata a kaúló ai káé. Floyd a sópweló le káé ngeniei ekkewe lusun lesen lón ewe Sile puk, nge mwirin a pwal kewis pwe epwe álillis ekis. Iwe, ese pwal chúen wor ié a káé ngeniei.

Iwe nge, lón ewe 2004, rúúemén special pioneer iter Granville me Joshua ra kewis pwe  repwe álillis lón Orealla. Ra afalafal imw me imw me ra kúnaei. Atun ra eisiniei ika ua mochen káé, ua emelimel. Ua tingorer ar repwe káé ngeniei ewe Sile puk seni me lepoputáán. Ua mochen ppii ika minne repwe áiti ngeniei epwe léllé ngeni met ekkewe chón afalafal akkomw ra áitiei. Granville a ereniei pwe a kan fiffis mwich lón ewe sóópw. Inaamwo ika use towu seni imwei we ren úkúkún engol ier, nge ua mochen fiti. Iwe Granville a pwikieitá wóón ewe wheelchair me úriei ngeni ewe Leenien Mwich.

Ló, ló, ló, Granville a pese ei ai upwe fiti ewe Sukulen Angangen Chón Kraist. A ereniei: “A wor terin inisum, nge ka tongeni fós. Eú rán kopwe eáni eú afalafal fán iten aramas meinisin. Epwe fókkun fis.” An na kapasen apéchékkúl a mmen alúkúlúkúei.

Ua poputá le fiti Granville le afalafal. Iwe nge, alen ewe sóópw a mmen kitiféúféú ngeni wái we wheelchair. Iwe ua tingorei Granville an epwe úriei wóón efóch wilparo. A mmen fókkun éch ena kókkót. Lón ewe April 2005, ua papatais. Ekiseló mwirin ena, pwiich kewe ra áiti ngeniei túmúnún néúch kewe puk fán iten ewe mwichefel me angangen túmúnún ekkewe minen nikáttik lón ewe Leenien Mwich.

Mwirin, a elichippúng pwe lón ewe 2007 semei we a máló ren an ákseten wóón mwoota. Aua fókkun letipechou. Granville a fitikem le iótek me a álleani ngenikem ekkewe wokisin mi oururukem seni Paipel. Ruu ier mwirin, aua pwal máirú ren án Granville máló ren an ákseten wóón mwoota.

Ám we kúkkúnún mwichefel a mmen chúúpwúl me ese chúen wor mwán mi ásimaw me emén chék chónálillisin mwichefel. Ua fókkun letipechou ren málóón Granville, chiechiei we mi áchengicheng. A fen tuppwél le túmúnúei lón pekin ngún me aion. Lón ewe áeúin mwich mwirin chék an máló, ua wisen álleani ekkewe parakraf fán iten ewe Káéén Leenien Mas. Ua állea tori chék parakraf ruu, nge mwirin ua poputá le kechiw nge use fókkun tongeni chipeló. Iwe ua chék tétiw me wóón ewe stage.

Ua poputá le pwapwasefál atun ekkóch Chón Kraist mwán seni pwal eú mwichefel ra etto álisikem lón Orealla. Pwal och, ewe keangen ofesilap a tiinaato emén special pioneer itan Kojo. Ua fókkun pwapwa pwe inei we me pwii we kúkkún ra poputá le káé me ra papatais. Mwirin, lón ewe March 2015, ua wiliti emén chónálillisin mwichefel. Mwirin och fansoun, ua eáni ai we áeúin afalafal fán iten aramas meinisin. Lón ena rán, ua chemesefáli fán pwapwa me kechiwen kilisou ren met ewe Granville a ereniei fitu ier ra ló: “Eú rán kopwe eáni eú afalafal fán iten aramas meinisin. Epwe fókkun fis.”

Seni ekkewe prokram wóón JW Broadcasting^® ua silei usun pwóróusen pwiich kewe manawer mi pwal usun nónnómun manawei. Inaamwo ika a wor ar semmwen, nge ra tongeni féri chómmóng mettóch me ra pwapwa. Ua pwal tongeni chúen féri ekkóch mettóch. Ua mochen fang ngeni Jiowa úkúkún ai tufich. Ina popun ua poputá le regular pioneer. Mwirin, a fis och mettóch mi fókkun apwapwa! Lón ewe September 2019, ua wiliti emén mwán mi ásimaw lón ewe mwichefel mi wor ina epwe 40 chón afalafal lón.

Ua fókkun kilisou ngeni chienach kewe Chón Kraist mi áchengicheng mi káé ngeniei me álisiei le angang ngeni Jiowa. Nge lap seni meinisin ua fókkun kilisou ngeni Jiowa pwe a chék chechchemeniei.