1. Met sia silei pwe epwe fis, me met sia tongeni lúkúlúkú?

 SIA silei pwe ekkóch aramas repwe ú ngenikich lón ach angangen afalafal. Ena angangen ú ngeni epwe fen lapóló lón ekkan rán epwe feito. (Tan. 11:44; 2 Tim. 3:12; Pwär. 16:21) Iwe nge, sia tongeni lúkúlúk pwe Jiowa epwe fangoto ewe álillis mi lamot ngenikich. Pwata sia silei ena? Fansoun meinisin, Jiowa a kan álisi néún kewe chón angang le apwénúetá met a ereniir ar repwe féri ese lifilifil ifa úkúkún weiresin. Áwewe chék, iei sipwele pwóróusfengen wóón met a fis ngeni ewe soufós Isikiel, ewe mi afalafal ngeni ekkewe chón Jus mi eoló lón Papilon.

2. Met Jiowa a apasa usun ekkewe aramas Isikiel a afalafal ngeniir, me met sipwele káé lón ei lesen? (Isikiel 2:3-6)

² Met sókkun aramas ekkewe Isikiel a afalafal ngeniir? Jiowa a erá pwe iir aramas mi “lamalamtekia,” “tipepöchökül,” me ra ‘ü ngeni.’ Ra efeiengaw usun irá félúfél me usun scorpion. Ina popun Jiowa a ereni Isikiel fán fite: “Kosap niueitiir”! (Álleani Isikiel 2:3-6.) Isikiel a tufichin apwénúetá wisan le afalafal pokiten a (1) titiiló me ren Jiowa, (2) péchékkúletá ren án Kot we ngún mi fel, me (3) péchékkúletá ren alon Kot. Ifa usun ekkena úlúngát mettóch ra álisi Isikiel? Me ifa usun ra pwal álisikich lón ei fansoun?

3. Ifa ewe itiitin kapas eli a apéchékkúla Isikiel, me ifa usun Jiowa a alúkúlúkú ngeni pwe epwe álisi?

³ Jiowa a ereni Isikiel: “Üpwe tinukela.” (Is. 2:3, 4) Ese mwáál, Isikiel a péchékkúletá ren ena itiitin kapas. Pwata? Neman a chemeni pwe Jiowa a pwal ereni Moses me Aisea ekkena kapas atun a filiretá ar repwe Néún soufós. (Eks.  3:10; Ais. 6:8) Isikiel a pwal silei usun án Jiowa álisi ekkena rúúemén soufós le apwénúetá wiser mi weires. Ina minne, atun Jiowa a ereni Isikiel fán ruu: “Üpwe tinukela,” a wor popun mi múrinné án ena soufós epwe lúkúlúk wóón an álillis. Pwal och, fán chómmóng Isikiel a makkeei ei itiitin kapas: “Ewe Samol mi Lapalap a kapas ngeniei.” (Is. 3:16; 6:1) Iwe, Isikiel a fókkun lúkúlúk pwe i a titiiló me ren Jiowa. Semen Isikiel we i emén souasor, iwe ese mwáál a kan áiti ngeni pwe Jiowa a kan alúkúlúkú ngeni néún kewe soufós pwe epwe álisiir. Áwewe chék, Jiowa a ereni Isaak, Jakop, me Jeremaia: “Ngang üa etuk.”​—Ken. 26:24; 28:15; Jer. 1:8.

4. Ifa ewe itiitin kapas eli a apéchékkúla Isikiel?

⁴ Met meefien lape ngeni ekkewe chón Israel ren án Isikiel afalafal? Jiowa a apasa: “Chon Israel resap mochen aüselingok, pun resap pwal mochen aüselingaei.” (Is. 3:7) Ar rese mochen etiwa Isikiel, a wewe ngeni ar rese etiwa Jiowa. Ekkena itiitin kapas ra alúkúlúkú Isikiel pwe án ekkena aramas rese mochen etiwa, esap weween nge a sópwongaw lón wisan, wisen soufós. Jiowa a pwal alúkúlúkú Isikiel pwe atun epwe fis ewe kapwúng a esilefeili usun, aramas “repwe chök fokun mefi pwe mi wor eman soufos lefiler.” (Is. 2:5; 33:33) Ese mwáál, ekkena kapas ra apéchékkúla Isikiel le apwénúetá wisan we.

5. Me ren Aisea 44:8, met epwe apéchékkúla letipach?

⁵ A pwal péchékkúletá letipach ren ach silei pwe Jiowa a tiinikicheló pwe sipwe afalafal. I a aúcheanikich ren an eita ngenikich néún “chon pwärätä.” (Ais. 43:10) A ifa me aúchean ena wis! Jiowa a pesei Isikiel: ‘Kosap niuokus.’ Iwe, a pwal pesekich ren  an erá: “Ousap fokun niuokus.” Pwata ese wor popun ach sipwe niwokkusiti ekkewe chón ú ngenikich? Pún kich sia titiiló me ren Jiowa, usun chék Isikiel, me I epwe álisikich.​—Álleani Aisea 44:8.

6. (a) Ifa usun Jiowa a alúkúlúkú ngenikich pwe epwe álisikich? (b) Met a oururukich me apéchékkúlakich?

⁶ Jiowa a alúkúlúkú ngenikich pwe epwe álisikich. Áwewe chék, me mwen an apasa: “Ämi nei chon pwärätä,” a apasa: “Are kopwe fetal lon koluk, üpwe etuk. Are kopwe fetal lon chanpupu, öütan esap amolumuk. Nge are kopwe fetal lon ekkei, kosap kar, nge pulopulan esap kuruk.” (Ais. 43:2) Atun sia afalafal, fán chómmóng sia kúna chómmóng minen eppet mi usun éútten konik, me sóssót mi fókkun áweires mi usun ekkei. Iwe nge, ren án Jiowa álillis, sia chék sópwósópwóló le akkafalafal. (Ais. 41:13) Lap ngeni aramas lón ei fansoun, rese mochen etiwa met sia afalafala ngeniir, usun chék lón fansoun Isikiel we. Nge esap weween pwe sia sópwongaw lón ach féri wisach. Sia kúna ourur me péchékkúletáán letipach ren ach silei pwe Jiowa a pwapwa atun sia sópweló le esilefeili an kapas fán tuppwél. Ewe aposel Paulus a apasa: “Kot epwe liwini ngeni eman me eman liwinin aükükün an angang a föri.” (1 Kor. 3:8; 4:1, 2) Emén chienach fefin mi pioneer ren fansoun langattam, a apasa: “Ai silei pwe Jiowa a efeiéchú ach achocho, a atoto ngeniei pwapwa.”

7. Met meefien Isikiel atun a ekieki kúnaian we? (Ppii ewe sasing wóón péén.)

⁷ Isikiel a kúna úkúkún péchékkúlen án Kot we ngún mi fel. Kúnaian we a álisi le mirititi pwe ewe ngún mi fel a álisi ekkewe chónláng mi manaman, me amwékútú fetálin ekkewe watteen wiil, wiilen ewe woken. (Is. 1:20, 21) Met meefien Isikiel? Iei met a makkeei. “Lupwen üa küna ei, üa chapetiu lepwül.” Pokiten Isikiel a fókkun mwaar, iwe a turuló lepwúl. (Is. 1:28) Mwirin, atun a kan ekieki kúnaian na mi amwarar, ese mwáál a apéchékkúla an lúkúlúk pwe ren álillisin án Kot we ngún mi fel, a tongeni apwénúetá wisan we.

8-9. (a) Met a fis ngeni Isikiel atun Jiowa a ereni an epwe “ütä”? (b) Ifa usun Jiowa a pwal apéchékkúla Isikiel fán iten an we leenien afalafal mi áweires?

⁸ Jiowa a ereni Isikiel: “Nöün aramas, kopwe ütä pwe üpwe fos ngonuk.” Alon Jiowa na fengen me an we ngún mi fel, a apéchékkúla Isikiel le útá me lepwúl. Iei met Isikiel a erá: “Ngünün Kot a feitiu woi o aütäei.” (Is. 2:1, 2) Mwirin ena me lón unusen án Isikiel angangen afalafal, án Kot we ngún mi fel a chék ekkemmweni. (Is. 3:22; 8:1; 33:22; 37:1; 40:1) Án Kot we ngún mi fel a apéchékkúla Isikiel lón ewe wis mi kewis ngeni, ina an epwe afalafala ekkewe aramas mi “tipepöchökül o tipeweires” lón an we leenien afalafal. (Is. 3:7) Jiowa a ereni Isikiel: “Iei üpwe föri pwe pwal en kopwe tipepöchökül o tipeweires ngeniir usun chök ir. Üa föri pwe kopwe pöchökül usun chök ewe fau aüchea itan taiamon mi pöchökül seni föüchol. Kosap niuokusitiir, kosap pwal fokun niueitiir.” (Is. 3:8, 9) Usun itá Jiowa a ereni Isikiel: ‘Kosap mut ngeni tipeweiresin ekkewe aramas an epwe elichippúnguk. Ngang upwe apéchékkúlok.’

⁹ Mwirin ena, án Kot we ngún mi fel a uwealó Isikiel ngeni ikewe epwe afalafal ie. Iei met a makkeei: “Än ewe Samol mi Lapalap manaman mi pöchökül a toriei.” A lamot ngeni ena soufós eú wiik ren an epwe unusen káé me weweiti ewe pwóróus epwe esilefeili  pwe epwe tongeni afalafala fán lúkúlúk. (Is. 3:14, 15) Mwirin, Jiowa a emmwenaaló ngeni eú lemoolun chuuk ikewe an we ngún mi fel “a feitiu won” me ie. (Is. 3:23, 24) Isikiel a mmólnetá le poputááni an angangen afalafal.

10. Met sókkun álillis a lamot ngenikich pwe sipwe apwénúetá ach angangen afalafal, me pwata?

¹⁰ Met sókkun álillis a lamot ngenikich pwe sipwe apwénúetá ach angangen afalafal? Ren ach sipwe silei pélúwan, sipwe ekiekisefáli minne a fis ngeni Isikiel. Me mwen an epwe poputááni an angangen afalafal, án Kot we manaman a apéchékkúla. Lón ei fansoun sia pwal tufichin afalafal pokiten chék álillisin án Kot we ngún mi fel, usun chék Isikiel. Pwata? Pún Satan a kan maunekich pwe epwe aúkúkichetiw lón ach angangen afalafal. (Pwär. 12:17) Chómmóng aramas ra ekieki pwe Satan a fókkun péchékkúl ina popun sisap tongeni win lón ach maun ngeni. Nge ren ach angangen afalafal, sia tongeni okkufu! (Pwär. 12:9-11) Ifa usun? Atun sia fiti angangen afalafal, sia pwári pwe sise niweiti án Satan kewe minen enniw. Iteiten ach afalafal, Satan a kan lus. Iwe, met a ffat ngenikich lupwen sia tongeni sópweló le afalafal inaamwo ika chón oputach ra ú ngenikich? A ffat pwe Jiowa a apéchékkúlakich ren an we ngún mi fel me a pwapwa rech.​—Mat. 5:10-12; 1 Pet. 4:14.

11. Met án Kot we ngún mi fel epwe féri fán itach, me met sipwe féri pwe epwe chék faffang ngenikich?

¹¹ Met sia pwal káé seni ach silei ifa usun Jiowa a fang ngeni Isikiel ewe péchékkúl mi lamot ngeni pwe epwe afalafal? Án Kot we ngún mi fel a tongeni apéchékkúlakich pwe sipwe pworacho ngeni ese lifilifil osukosuk sipwe kúna lón ach angangen afalafal. (2 Kor. 4:7-9) Iwe, met sipwe féri pwe sipwe lúkúlúk pwe Kot epwe chék faffang ngenikich an we ngún mi fel? A lamot sipwe  tinikken le ióteki me lúkúlúk pwe Jiowa epwe aúseling ngenikich. Jesus a ereni néún kewe chón káé: “Oupwe tütüngor, . . . oupwe küküt, . . . oupwe fichifich.” Iwe, Jiowa epwe “fangela Ngünmifel ngeni chokewe mi tüngorei!”​—Luk. 11:9, 13; Föf. 1:14; 2:4.

12. Me ren Isikiel 2:9–3:3, ia a etto me ie ewe taropwe, me met masouan?

¹² Isikiel ese chék péchékkúletá ren án Kot we ngún mi fel nge pwal ren alon Kot. Lón kúnaien Isikiel we, a kúna efóch paw mi amwéchú eché taropwe. (Álleani Isikiel 2:9–3:3.) Ia a etto me ie ena taropwe? Met masouan? Ifa usun a apéchékkúla Isikiel? Sipwe ppii. Ena taropwe a feito seni án Kot we leenien móótun king. Ese mwáál, Jiowa a néúnéú emén me lein ekkewe fémén chónláng Isikiel a fen kúner an epwe eiti ngeni ena taropwe. (Is. 1:8; 10:7, 20) Ena taropwe a masou ren án Kot kapas. Ina eú pwóróus mi chómmóng masouan fán iten eú kapwúng Isikiel epwe atoura ngeni ekkewe chón eoló mi ú ngeni Kot. (Is. 2:7) Ena pwóróus a mak lón me lúkún ena taropwe.

13. Met Jiowa a ereni Isikiel an epwe fér ngeni ewe taropwe, me pwata a arar?

¹³ Jiowa a ereni Isikiel an epwe áni ewe taropwe pwe ‘lukan epwe masou ren.’ Ena soufós mi álleasochis, a ánaaló ena taropwe. Met weween ena? A lamot án Isikiel epwe unusen weweiti ewe pwóróus epwele esilei. A lamot an epwe lúkú ena pwóróus pwe epwe amwékútú le afalafala. Mwirin, a fis eú mettóch me ámáirú. A kúna pwe ena taropwe “a arar usun chönün chunen.” (Is. 3:3) Pwata? Me ren Isikiel pwe an tupuni Jiowa, ina eú wis mi “arar,” are apwapwa. (Kölf. 19:8-11) A kilisou ren án Jiowa etiwa an epwe néún soufós.

14. Met a álisi Isikiel le mmólnetá ngeni wisan we?

¹⁴ Mwirin, Jiowa a ereni Isikiel: “Kopwe fokun aüselinga ai kewe kapas meinisin üpwe ürenuk pwe kopwe iseis lon letipom.” (Is. 3:10) Jiowa a ereni Isikiel me ren an na kapasen emmwen an epwe chechchemeni met a makketiw lón ewe taropwe me ekilonei usun. An féri ena, a apéchékkúlaló an lúkú. Ena taropwe a pwal masou ren eú pwóróus mi chou Isikiel epwele atoura ngeni ekkewe aramas. (Is. 3:11) Atun Isikiel a unusen weweiti me lúkú ewe pwóróus seni Kot, a mmólnetá le afalafal me a sópweló tori an a áwesaaló wisan na.​—Apépé ngeni Kölfel 19:14.

15. Ren ach sipwe likiitú, met a lamot ach sipwe ‘iseis lon letipach’?

¹⁵ Ren ach sipwe likiitú lón ach angangen afalafal, a pwal lamot ach sipwe mut ngeni án Kot kapas an epwe apéchékkúla ach lúkú. A lamot ach sipwe ‘iseis lon letipach’ meinisin met Jiowa a erenikich, usun chék Isikiel. Lón ei fansoun, Jiowa a fóffós ngenikich me ren an we Kapas, ewe Paipel. Met sia tongeni féri pwe án Kot Kapas epwe sópwósópwóló le ekkemmweni ach ekiek, memmeef, me minne a amwékútúkich le féri och mettóch?

16. Met a lamot sipwe fér ngeni án Kot we Kapas, me ifa usun sipwe weweéchúti?

¹⁶ Atun sia áni och mwéngé me a tolong lón inisich, inisich epwe péchékkúleló. Me atun sia káé án Kot we Kapas me ekieki usun, ach lúkú epwe pwal péchékkúleló. Sipwe chemeni ewe lesen usun ewe taropwe. Jiowa a mochen án ‘lukach epwe masou ren’ an we Kapas, weween sipwe weweéchúti an  Kapas. Sia tongeni féri ena ren ach iótek, állea, me ekilon. Akkomw, sipwe iótek pwe sipwe ammólnatá letipach ngeni án Kot ekiek. Mwirin, álleani eú pwóróus seni Paipel. Iwe sipwe ekis kaúló, ekilon me ekiekifichi met ewe sia álleani. Met mwirilóón? Lapólóón ach ekilon, epwe pwal ina lapólóón ach weweiti án Kot Kapas, iwe epwe apéchékkúla ach lúkú.

17. Pwata a fókkun lamot ach sipwe ekilonei met sia álleani seni Paipel?

¹⁷ Pwata a fókkun lamot ach sipwe álleani ewe Paipel me ekilonei met sia álleani? Ach féri ena epwe awora ngenikich ewe péchékkúl mi lamot ren ach sipwe afalafala pwóróusen ewe Mwú lón ei fansoun, me esilei ewe pwóróusen kapwúng mi chou eli sipwe atoura ngeni aramas lón ekkan rán mwach. Pwal och, atun sia ekilonei usun napanapen Jiowa kewe mi echipwér, ach riri ngeni epwe pwal péchékkúleló. Mwirilóón, epwe nóm rech och mettóch mi fókkun “arar,” are apwapwa, weween ewe kinamween letip me ach meefi menemenéch.​—Kölf. 119:103.

18. Met aramas lón ach leenien afalafal repwe mirititi, me pwata?

¹⁸ Isikiel i emén soufós, nge kich, esap kich soufós. Iwe nge, sia úppós le sópweló le atoura ewe pwóróus Jiowa a onómu lón an we Kapas tori an epwe erá pwe a wes ach angangen afalafal. Atun epwe war ewe fansoun kapwúng, esap wor popun án aramas lón ach leenien afalafal repwe erá pwe ese toriir kapasen éúréúr, are Kot a tunereló. (Is. 3:19; 18:23) Nge repwe fen mirititi pwe ewe pwóróus sia afalafala, a feito seni Kot.

19. Met epwe apéchékkúlakich le apwénúetá wisach le afalafal?

¹⁹ Met epwe apéchékkúlakich le apwénúetá wisach le afalafal? Ekkewe úlúngát mettóch mi pwal apéchékkúla Isikiel. Sia sópweló le afalafal pokiten sia silei pwe sia titiiló me ren Jiowa, péchékkúletá ren án Kot we ngún mi fel, me péchékkúletá ren án Kot we Kapas. Ren án Jiowa álillis, sipwe apwénúetá wisach lón ewe angangen afalafal me likiitú “tori lesopolan.”​—Mat. 24:13.