1-2. (a) Ikkefa ekkewe kapas eis sipwe pwóróusfengen wóór? (b) Met a áiti ngenikich pwe Jiowa a fókkun mochen álisikich?

 JIOWA a tongeni álisikich le likiitú fán ekkewe osukosuk sia kúkkúna lón manawach me álisikich le kúna pwapwa lón ach angang ngeni. Ifa usun a álisikich? Me ifa usun sipwe unusen kúna feiéch seni ena álillis Jiowa a awora? Epwe pélú ekkena kapas eis me lón ei lesen. Iwe nge, me mwen ach sipwe etittina pélúwer, sipwe mwo ppii ei kapas eis mi riri ngeniir: Jiowa a enletin mochen álisikich?

² Eú kapas ewe aposel Paulus a néúnéú lón néún we taropwe ngeni ekkewe chón Ipru, a tongeni álisikich le kúna pélúwen ena kapas eis. Iei met Paulus a makkeei: “Ewe Samol i ai Soualilis, üsap fokun niuokus, met aramas repwe tongeni föri ngeniei?” (Ipru 13:6) Eú puken áweween Paipel a apasa pwe ewe kapas “Soualilis” lón ena wokisin, a wewe ngeni emén mi ssá pwe epwe cheri emén mi sién álillis. Anchangei án Jiowa cheri emén mi nóm lón osukosuk pwe epwe seláni. Ese mwáál, kopwe tipeeú ngeni pwe ena mettóch a menlapei án Jiowa fókkun mochen an epwe ach Souálillis. Ren án Jiowa álillis, sia tongeni likiitú fán pwapwa atun sia nóm lón weires.

3. Ikkefa ekkewe úlúngát minen álillis Jiowa a áeá le álisikich pwe sipwe likiitú fán pwapwa atun sia nóm lón weires?

³ Ikkefa ekkóch alen án Jiowa álisikich le likiitú fán pwapwa atun sia nóm lón weires? Ren ach sipwe pélúweni ena kapas eis, sipwe ppii ekkóch wokisin lón ewe puken Aisea. Pwata? Pún chómmóng me lein ekkewe oesini Jiowa a pwári ngeni Aisea, ra weneiti néún kewe chón angang lón ei fansoun. Pwal och, fán chómmóng Aisea a áweweei usun Jiowa ren an néúnéú ekkewe kapas mi mecheres ach sipwe weweiti. Áwewe  chék, Aisea a néúnéú lón sópwun 30 ekkewe kapas áwewe mi múrinné usun án Jiowa álisi néún kewe aramas. A makkeei pwe Jiowa a álisikich ren an (1) aúselingéch ngeni ach kewe iótek me pélúweniir, (2) awora ngenikich kapasen emmwen, me (3) efeiéchúkich lón ei fansoun me lón fansoun mwach. Sipwe pwóróus wóón ekkena úlúngát minen álillis Jiowa a álisikich lón.

4. (a) Met Jiowa a apasa usun ekkewe chón Jus lón fansoun Aisea we, me met a mut ngeniir mwirin ekis fansoun? (b) Met Jiowa a awora ngeni chókkewe mi tuppwél? (Aisea 30:18, 19)

⁴ Lón ekkewe kapas lepoputáán Aisea sópwun 30, Jiowa a áweweei ekkewe chón Jus ngeni nau mi lúkúmach iir mi “chök alapala ar tipis.” A pwal apasa: “Ir eu täppin aramas mi ü ngeniei, . . . resap mochen aüselinga kapasen amirit me rei ngang ewe Samol mi Lapalap.” (Ais. 30:1, 9) Pokiten ekkena aramas rese mochen aúseling, iwe Aisea a oesini pwe Jiowa epwe mut ngeniir ar repwe kúna riáfféú. (Ais. 30:5, 17; Jer. 25:8-11) Me ina met a fis, ra eoló Papilon. Iwe nge, mi wor chókkewe iir mi tuppwél me lein ekkena chón Jus, me Aisea a uwei ngeniir eú pwóróus mi awora ngeniir ápilúkúlúk. A ereniir pwe eú rán, Jiowa epwe mut ngeniir ar repwe liwin me nómsefál Jerusalem. (Álleani Aisea 30:18, álleani wokisin 19 seni footnote.) b Me ina met a wesewesen fis. Jiowa a angasereló seni Papilon. Iwe nge mwirin fitu ier, Jiowa epwap angasereló. Ewe wokisin mi erá “ewe Samol mi Lapalap a witiwiti chök an epwe kirikiröch ngenikemi,” a áiti ngenikich pwe a pwal ekis ttam me mwirin án ekkewe mi tuppwél repwe ngaseló. Ren enletin, ekkewe chón Jus ra eoló Papilon ren úkúkún 70 ier me mwen an epwe mumu ngeni ekkóch me leir ar repwe liwiniti Jerusalem. (Ais. 10:21; Jer. 29:10) Lupwen ekkewe chón Israel ra eoló Papilon, ra kechiw pokiten ra fókkun letipechou, nge lupwen ra liwiniti pwúkútáán fénúer, ra kechiw pokiten ra fókkun pwapwa.

5. Ifa ewe kapasen alúkúlúk Aisea 30:19 a awora ngenikich?

⁵ Lón ei fansoun sia tongeni kúna ourur seni ekkeei kapas: “I epwe fókkun úméúméch ngonuk lupwen a rong óm sién álillis.” (Ais. 30:19, NW) Aisea a alúkúlúkúkich pwe Jiowa epwe aúselingéch ngenikich atun sia sié ngeni, me I epwe mwittir pélúweni ach kewe iótek. Aisea a pwal apasa: “Epwe mwittir pélúwenuk lupwen a rong óm sié.” Ekkena kapas mi alúkúlúk, ra áchchema ngenikich pwe Semach we Jiowa a fókkun mochen álisi chókkewe mi kútta álillis seni. Ach silei ena, a álisikich le likiitú fán pwapwa.

6. Ifa usun alon Aisea kewe ra pwári pwe Jiowa a aúseling ngeni án emén me emén néún kewe chón angang iótek?

⁶ Met ena wokisin a pwal áiti ngenikich usun ach kewe iótek? Jiowa a aúselingaéchú án emén me emén kich iótek. Pwata sia tongeni erá ena? Lepoputáán Aisea sópwun 30, a néúnéú ekkewe kapas mi weneiti lap seni emén pún Jiowa a fós ngeni néún mwichen aramas. Iwe nge, lón wokisin 19 a néúnéú ekkewe kapas mi weneiti emén chék. Iei met Aisea a makkeei: “En kosap fókkun kechiw,” “I epwe fókkun úméúméch ngonuk,” “epwe mwittir pélúwenuk.” Pokiten Jiowa, i Semach mi tong, iwe esap tongeni ereni néún át are nengngin mi letipechou, “Kopwe apworaók usun chék pwiim nan are mongeom nan.” I a tongei emén me emén kich me a áteneki ach kewe iótek.​—Kölf. 116:1; Ais. 57:15.

7. Ifa usun Aisea me Jesus ra menlapei ngenikich lamoten ach sipwe sópweló le tittingor?

 ⁷ Atun sia iótek ngeni Jiowa me ereni och mettóch mi aosukosukakich, i epwe mwittir pélúwenikich eli ren an fang ngenikich ewe péchékkúl mi lamot pwe sipwe tongeni likiitú ngeni. Me ika ese tawe ach we osukosuk lón ewe atun sia mochen, iwe eli a lamot ach sipwe tittingor an epwe fang ngenikich péchékkúl pwe sipwe likiitú ngeni. I a mochen ach sipwe féri ena. Ina met sia kúna seni alon Aisea ei: “Ousap pwal mwüt ngeni Kot pwe epwe asösö.” (Ais. 62:7) Met weween ena? A lamot ach sipwe sópweló le tittingor ngeni Jiowa lón ach kewe iótek usun itá nge sise mochen an epwe asésé. Alon Aisea na a áchchema ngenikich án Jesus ei kapas áwewe usun iótek lón Lukas 11:8-10, 13. Jesus a pesekich ach sipwe sópweló le ikkiótek me “tütüngor” ewe ngún mi fel. Sia pwal tongeni tingorei Jiowa an epwe awora ngenikich emmwen pwe sipwe tongeni kefiléch.

8. Ifa usun Aisea 30:20, 21, a pwénúetá me lóóm?

⁸ Álleani Aisea 30:20, 21. Atun soufiun Papilon ra rongeló Jerusalem ren úkúkún eú esopw ier, ekkewe riáfféú aramas ra kúkkúna a usun mwéngé me konik me rer pwe ra kúkkúna iteitan. Nge, lón wokisin 20 me 21, Jiowa a pwonei ngeni ekkena chón Jus pwe ika repwe aier me siwili féfférúr, iwe I epwe selániir. Aisea a eita ngeni Jiowa néúr “Soukait,” are Chón Asukul mi Lapalap, me a pwonei pwe I epwe áiti ngeniir ifa usun epwe ketiw ar fel ngeni. A pwénúetá ena atun ekkena chón Jus ra ngas seni ar eoló. Jiowa a pwári pwe i néúr Chón Asukul mi Lapalap, me pokiten a emmweniir, iwe ra sópwéch le eliwinisefáli ewe fel mi enlet. Sia fókkun pwapwa lón ei fansoun pún Jiowa i néúch Chón Asukul mi Lapalap.

9. Ifa eú alen án Jiowa emmwenikich lón ei fansoun?

⁹ Lón ekkena wokisin, Aisea a apasa pwe sia usun chón sukul mi káit me ren Jiowa lón ruu mettóch. Áeúin, Aisea a erá: “Ämi Soukait esap chüen op senikemi, pwe mesemi repwe küna.” Lón ena áwewe, Aisea a apasa pwe ena Soukáit a útá mwen néún kewe chón sukul. Sia feiéch lón ei fansoun ren án Jiowa asukulakich. Ifa usun a asukulakich? A féri ena ren an áeá an we mwicheich. A ifa me kilisouch ren fataffatéchún ekkewe emmwen sia angei seni ena mwicheich! Ekkewe kapasen emmwen sia angei seni ach kewe mwich, mwichelap, néúch kewe puk me álillis seni Paipel, broadcasting, me pwal ekkóch mettóch, ra  álisikich le likiitú fán pwapwa atun fansoun weires.

10. Ifa usun sia rong méngúngúún Kot seni me ‘lükün sökürüch’?

¹⁰ Aisea a fós usun ewe oruuen mettóch Jiowa a áeá le asukulakich ren an erá: “Selingemi repwe rongorong me lükün sökürümi.” Ena soufós a áweweei pwe Jiowa a usun emén chón asukul mi áteneki néún kewe chón sukul, me a nóm lúkúsékúrúr me ereniir ia repwe pwer ie me emmweniir. Lón ei fansoun, sia rong méngúngúún Kot seni me lúkúsékúrúch. Ifa usun? Án Kot kapas a fen makketiw lón ewe Paipel seni chék me lóóm. Ina popun, atun sia állea Paipel, usun itá sia rong méngúngúún Kot seni me lúkúsékúrúch.​—Ais. 51:4.

11. Ikkefa ekkewe mettóch mi lamot sipwe féri pwe sipwe likiitú fán pwapwa, me pwata?

¹¹ Ifa usun sia tongeni unusen kúna álillis seni án Jiowa emmwen mi kawor me ren an we mwicheich me an we Kapas? Ikkeei ruu mettóch Aisea a fós usur. Áeúin, “iei ewe al.” Oruuan, “oupwe aleni.” (Ais. 30:21) Ese chék naf ach sipwe silei “ewe al.” A pwal lamot ach sipwe “aleni.” Án Jiowa we Kapas, me minne an we mwicheich a eáni áwewe usun, ra áiti ngenikich met Jiowa a mochen ach sipwe féri. Sia pwal káé ifa usun sipwe apwénúetá minne sia káé. Ren ach sipwe likiitú fán pwapwa lón ach angang ngeni Jiowa, a lamot ach sipwe féri ekkena ruu mettóch. Ach káé me apwénúetá met sia káé, ina chék alen án Jiowa epwe efeiéchúkich.

12. Me ren Aisea 30:23-26, ifa usun Jiowa a efeiéchú néún kewe aramas?

¹² Álleani Aisea 30:23-26. Ifa usun ena oesini a pwénúetá atun ekkewe chón Jus ra liwiniti Israel mwirin ar eoló Papilon? Jiowa a fang ngeniir chómmóng mettóch mi álisiir lón pekin aion me lón pekin ngún. Jiowa a efeiéchú néún kewe aramas ren an fang ngeniir chómmóng mwéngé. Nge lap seni ena, a fang ngeniir mettóch meinisin mi lamot pwe repwe ririéch ngeni me poputá le fel ngeni sefál lón ewe napanap mi pwúng. Ekkewe feiéch lón pekin ngún mi toriir lón ena atun, a fókkun chómmóng lap seni me mwan. Wokisin 26 a áiti ngenikich pwe Jiowa a alapaaló ar weweiti an we Kapas. (Ais. 60:2) Ekkena feiéch me ren Jiowa, ra álisiir ar repwe sópweló le angang ngeni fán pwapwa me tipepwora pokiten “pwapwan letiper.”​—Ais. 65:14.

13. Ifa usun ewe oesini usun fférsefálin ewe fel mi enlet a pwéppwénútá lón ei fansoun?

¹³ Ewe oesini usun fférsefálin fel mi enlet a  weneitikich lón ei fansoun? Ewer! Ifa usun? Seni ewe ier 1919, a wor fite million aramas ra fen ngas seni ar fétek lón Papilon mi Lapalap, ewe mwicheichen lamalam chofona wóón fénúfan. Kot a fen emmweniir ngeni eú leeni mi múrinné seni ewe Fénúen Pwon fán iten chón Israel. A emmweniirelong lón ewe paratis lón pekin ngún. (Ais. 51:3; 66:8) Met weween ena paratis lón pekin ngún?

14. Met weween ewe paratis lón pekin ngún, me ié kewe ra nóm ie lón ach ei fansoun? (Ppii ewe Áweween Kapas.)

¹⁴ Seni ewe ier 1919, ekkewe mi kepit ra pwapwa le nóm lón ewe paratis lón pekin ngún. c Chókkewe mi eáni ewe ápilúkúlúkún manaw wóón fénúfan, iir ekkewe ‘ekoch sip,’ ra pwal tolong lón ena fénú lón pekin ngún me ra pwapwaiti ekkewe chómmóng feiéch Jiowa a awora.​—Joh. 10:16; Ais. 25:6; 65:13.

15. Ia a nóm ie ewe paratis lón pekin ngún?

¹⁵ Lón ei fansoun, ia a nóm ie ewe fénú are paratis lón pekin ngún? Ekkewe chón fel ngeni Jiowa, ra nóm ekis meinisin wóón fénúfan. Iwe, ewe paratis lón pekin ngún ra nóm lón, a pwal nóm ekis meinisin wóón fénúfan. Ina pwata, lón ei fansoun ese lifilifil ia sia nóm ie wóón ei fénúfan, nge sia tongeni kapachelong lón ena paratis lón pekin ngún ika sia kan ákkálisatá ewe fel mi enlet.

16. Ifa usun sia tongeni sópweló le kúna lingen ewe paratis lón pekin ngún?

¹⁶ Ren ach sipwe chék nónnóm lón ewe paratis lón pekin ngún, a lamot ach sipwe pwal sópweló le aúcheani ewe mwichefelin Chón Kraist wóón unusen fénúfan. Ifa usun sipwe féri ena? Ren ach nefótófót wóón lingéchún chókkewe mi nónnóm lón nge esap wóón apwangapwanger kewe. (Joh. 17:20, 21) Pwata a lamot ena? Ekieki ei kapas áwewe. Sia kan ésúkúsúkú ach sipwe kúna sókkopaten irá lón eú wollap mi lingéch. Pwal ina usun lón ei fansoun, lón ach kewe mwichefel a wor sókkopaten aramas mi usun chék ekkena irá. (Ais. 44:4; 61:3) A lamot ach sipwe sópweló le nefótófót wóón lingen unusen ena wollap, nge esap wóón tikitikipwúlún emén me emén chókkewe  mi usun ekkena irá. Sisap mut ngeni pwisin ach apwangapwang are apwangapwangen chón ewe mwichefel an epwe erikikich seni lingéchún tipeeúin ach we mwichefelin Chón Kraist wóón unusen fénúfan.

17. Met emén me emén kich sia tongeni féri pwe sipwe álisatá tipeeúin ewe mwichefel?

¹⁷ Met emén me emén kich sia tongeni féri pwe sipwe álisatá tipeeúin ewe mwichefel? Sipwe efisi kinamwe. (Mat. 5:9; Rom 12:18) Iteiten ach achocho le efisi kinamwe lefilach me chón lón ewe mwichefel, sia álisatá lingéchún ewe paratis lón pekin ngún. Sipwe chemeni pwe Jiowa a emmwenaato emén me emén chón lón ena paratis lón pekin ngún ngeni ewe fel mi limeliméch. (Joh. 6:44) Anchangei úkúkún pwapwaan Jiowa lupwen a kúna angang weiresich le alapaaló ewe kinamwe me tipeeú lein néún kewe chón angang, chókkewe mi aúchea me ren!​—Ais. 26:3; Akai 2:7.

18. Met a lamot sipwe kan ekkekilonei usun, me pwata?

¹⁸ Jiowa a fang ngeni néún kewe chón angang chómmóng mettóch mi múrinné. Iwe, ifa usun sia tongeni unusen feiéch seniir? Sia tongeni ekilonei usun met sia káé seni án Kot we Kapas me néúch kewe puk me minen álillisin Paipel. Ach eáni ena esin káé me ekilon epwe álisikich le ámááraatá napanapach kewe napanapen Chón Kraist mi amwékútúkich le pwári ewe tongen pwipwi mi pwichikkar lefilach lón ewe mwichefel. (Rom 12:10) Atun sia ekilonei ekkewe feiéch sia kúna lón ei fansoun, epwe péchékkúleló ach riri ngeni Jiowa. Me atun sia ekilonei ekkewe feiéch Jiowa a pwonei an epwe ngenikich lón mwachkkan, ach ápilúkúlúkún angang ngeni tori feilfeiló epwe fókkun núkúchar. Ekkena mettóch meinisin repwe alapaaló ach pwapwa lón ach angang ngeni Jiowa lón ei fansoun.

19. (a) Me ren Aisea 30:18, met sia tongeni lúkúlúkú? (b) Met epwe álisikich le likiitú fán pwapwa?

¹⁹ Jiowa a “molotä” an epwe asopwaló ei ótót mi ngaw. (Ais. 30:18) Sia silei pwe Jiowa i emén “Kot mi unusen pwüng,” me esap mut ngeni án Satan ei ótót epwe sópwósópwóló lap seni úkúkún an fansoun. (Ais. 25:9) Sia mosonottam le witi warotoon án Jiowa na ránin amanaw. Nge ren mwo iei, sipwe tipeppós le aúcheani ach tufichin iótek, káé án Kot we Kapas, apwénúetá met sia káé, me ekilonei ekkewe feiéch sia kúna lón ei fansoun me lón mwachkkan. Atun sia féri ena, Jiowa epwe álisikich le likiitú fán pwapwa lón ach fel ngeni.