LÓN eú kúkkún sóópw lón Gujarat, India, semen John we a papatais, me wiliti emén Chón Pwáraatá Jiowa ina epwe 60 ier a ló. Nge lón ena atun, John me pwiin kewe me fefinan nimmén, me iner we iir Katolik me ra fókkun achocho lón ar na lamalam. Pokiten ena, ra ú ngeni án semer na lamalam.

Eú rán, semen John we a tingorei an epwe atoura ngeni emén chienan lón ewe mwichefel eú futo. Nge lón ena sossorun, a watte kinásen aútún péún John ren an suuki eú watteen tirongkang. Iwe nge, John a chúen mochen álleasochisi seman we, iwe a otáini aútún péún we mi chúen chcha, iwe a ló atoura ewe futo.

Lupwen John a wareiti ewe imw, a ngeni pwúlúwen chienen seman we ewe futo. Neminna pwal i emén Chón Pwáraatá Jiowa. A kúna pwe mi kinás aútún péún John, me a mochen álisi. A limeti kinásan we, a angei eché pánteit, me mina ngeni. Mwirin, a féri eú kap únúmen John tea. Lón unusen ena atun, a fóffós ngeni usun ewe Paipel fán kirekiréch.

Pokiten an kirekiréch, a poputá le siwililó meefien John usun Chón Pwáraatá. Iwe a eisini usun ruu lúkú Chón Pwáraatá Jiowa me Katolik ra sókkofesen wóón. A eis ika Jesus i ewe Kot me ika mi pwúng án Chón Kraist repwe iótek ngeni Maria. Pwiich na a fen káé fósun Gujarat, iwe a tufichin pélúweni án John kana kapas eis lón pwisin an fós. A áiti ngeni pélúwan seni Paipel me a ngeni ewe puk itelapan “Ei Kapas Allim Usun Ewe Mu.”

Mwirin, lupwen John a álleani ena puk, a mirititi pwe minne a álleani ina ewe enlet. A ló ren ewe patere me eisini chék pwal ekkena ruu kapas eis. Ewe patere a fókkun song ngeni, a monei ngeni ewe Paipel, me chúwérúwér ngeni: “Ka wiliti Satan! Áiti ngeniei tefen ewe Paipel a erá pwe Jesus esap Kot. Áiti ngeniei tefen ewe Paipel a erá pwe kosap fel ngeni Maria. Áiti ngeniei!” John a rúké ren féfférún ewe patere. A ereni ewe patere pwe esap fókkun ipweri sefáli pwúlún lón eú felin Katolik. Iwe, a apwénúetá alon!

John a poputá le káé Paipel ren Chón Pwáraatá, a etiwa ewe enlet, me poputá le angang ngeni Jiowa. Ló, ló, ló, fitemén pwal chón an we famili ra angang ngeni Jiowa. Iei a fen 60 ier mwirin ena, nge lemoomool kinásen aútún péún we a chúen áchema ngeni usun ewe féfférún kirekiréch mi amwékútú le áeá unusen manawan le angang ngeni Jiowa.​—2 Kor. 6:4, 6.