1, 2. Ifa nónnómun ekkewe chón Jus lón Jerusalem lesópwólóón án Sekaraia we efisuen lángipwi?

 LESÓPWÓLÓÓN án Sekaraia we efisuen lángipwi, a chómmóng met a ekieki usun. Ese mwáál a péchékkúletá ren án Jiowa pwon pwe epwe apwúngú ekkewe aramas mi tunosolá. Nge chómmóng ra chúen féri minne mi ngaw me otuputup me esaamwo wes ewe angangen aúsefálietá ewe imwenfel lón Jerusalem. Pwata ekkewe chón Jus ra mwittir likitaló ena angang Jiowa a ewisa ngeniir? Ra liwiniti Jerusalem ren chék ar repwe nónnóméch?

² Sekaraia a silei pwe ekkewe chón Jus mi liwiniti Jerusalem iir chón fel ngeni Jiowa. Iir ekkewe “Kot a amwökütükütü leluker” ar repwe likitaló imwer me ar kewe business lón Papilon. (Esr. 1:2, 3, 5) Ra likitaló eú leeni ra fen sissilei pwe repwe mwékút ngeni eú fénú lape ngeniir resaamwo kúkkúna.  Kaúsefálliin án Jiowa we imwenfel a fókkun lamot me rer, ina minne ra tipemecheres le uweirelóng lón feiengaw le sái 1,000 mwail lón ekkewe leeni mi panapanetá me motomotekkis.

3, 4. Ikkefa ekkewe mettóch mi áweires ekkewe chón Jus mi liwinsefál ra kúna?

³ Ekieki sáittamer seni Papilon ngeni Jerusalem. Ekkewe aramas ra tongeni ekieki me pwóróusfengen ren fite awa usun ewe leeni repwe nónnóm lón. A wor chinnap leir ra fen apwóróusa ngeniir lingéchún Jerusalem me ewe imwenfel me lóóm. (Esr. 3:12) Ika ka fitiir le sái, epwe met meefiom lupwen ka kerán kúna Jerusalem? Kopwe letipengaw lupwen kopwe kúna tatakkisin ekkewe imw me peteweliir me tatiwen tittin ewe telinimw me asamalapan kewe fengen me ekkewe imwen mas? Neman kopwe aléllééi ena ttit mi ta ngeni tittin Papilon we mi wakkatte me péchékkúl. Nge ekkewe chón Jus rese lichippúng. Pwata? Pún Jiowa a álisiir me túmúnúúr lón ar sáittam. Atun chék ra kerán wareiti Jerusalem, ra ssenatá eú roong ikewe ie ewe imwenfel a piin nóm ie me poputááni ar asor ngeni Jiowa iteiten rán. (Esr. 3:1, 2) Ra fókkun tinikken me mmólnetá le angang. Usun itá ese wor met epwe tongeni elichippúngúr.

⁴ Me lúkún án ekkewe chón Jus angangen aúsefálietá ewe imwenfel, repwe pwal aúsefálietá telinimwer kewe me imwer kewe. A lamot repwe amasoua ekkewe atake pwe repwe tongeni awora enen chón ar kewe famili. (Esr. 2:70) Usun itá a fókkun watte ar angang. Ekiseló chék chón oputer kewe ra etto me sótun aúkaló ar angang. Ar ú ngeniir a sópwósópwóló ren 15 ier, me ló, ló, ló, ekkewe chón Jus ra lichippúngúló. (Esr. 4:1-4) Pwal eú mettóch mi weires a fis lón ewe ier 522 lupwen ewe kingen Persia a allúkú pwe epwe úkútiw meinisin angangen kaú lón Jerusalem. Usun itá esap chúen fis kaúsefálliin ewe telinimw.​—Esr. 4:21-24.

5. Ifa usun Jiowa a álisi néún kewe aramas?

⁵ Jiowa a silei pwe a lamot ngeni néún kewe aramas péchékkúl me pwora. A ápwár ngeni Sekaraia an we sáingoon lángipwi pwe epwe alúkúlúkú ngeniir pwe A tongeer me aúcheani ar achocho le angang ngeni. A pwonei pwe epwe túmúnúúr ika ra liwiniti ewe angang a ewisa ngeniir. Iei met Jiowa a erá usun kaúsefálliin ewe imwenfel: “Ei epwe fis, are oupwe wesewesen aleasochis ngeni alon ewe Samol mi Lapalap ämi we Kot.”​—Sek. 6:15.

6. (a) Met a fis lepoputáán án Sekaraia we awaluen lángipwi? (Ppii ewe sasing lepoputáán ei lesen.) (b) Pwata a sókkofesen anúwen ekkewe oris?

⁶ Án Sekaraia we sáingo awaluen lángipwi, neman ina ewe a kon apéchékkúla ach lúkú lap seni meinisin. (Álleani Sekaraia 6:1-3.) Sótun anchangei minne Sekaraia a kúna. Ekkewe oris fán fófóch woken “ra feito me lefilen ruu chuk, nge ekewe chuk ra seni piras.” A sókkofesen anúwen ekkena oris, iwe a mecheres ach sipwe asókkofesenni ekkewe chón wawa. Sekaraia a eis: “Met wewen ekei woken?” (Sek. 6:4) Sia pwal mochen silei, pún ewe lángipwi a pwal weneitikich.

7, 8. (a) Met ekkewe ruu chuuk ra liosuetá? (b) Pwata ekkena chuuk ra ffér seni piras?

⁷ Lón Paipel, ekkewe chuuk ra tongeni lio suetá mwú are nemenem. Ekkewe chuuk Sekaraia a kúna ra usun ekkewe ruu chuuk sia álleani usun lón án Taniel we oesini. Eú me leir a liosuetá án Jiowa nemenem ese wor sópwólóón wóón unuselapen láng me fénúfan, nge ewe pwal eú chuuk a liosuetá ewe Mwúún Messaia, ewe Jesus a wisen Kingan. (Tan. 2:35, 45) Seni 1914, lupwen Jesus a wiliti King, ra nóm iir me ruu ekkena chuuk me ra fókkun aúchea lón pwénúetáán minne Kot a tipeni fán iten fénúfan.

⁸ Pwata ekkena chuuk ra ffér seni piras? A watte aúchean piras me a misimis. Jiowa a ereni ekkewe chón Israel ar repwe áeá piras lupwen repwe féri ewe imwenfel mangaku me pwal ewe imwenfel lón Jerusalem. (Eks. 27:1-3; 1 King 7:13-16) Án ekkewe chuuk ffér seni piras a menlapei úkúkún múrinnéén án Jiowa nemenem wóón unuselapen láng me fénúfan me án ewe Mwúún Messaia nemenem, ekkewe repwe atoto ngeni aramas núkúnúkéch me chómmóng feiéch.

9. Ié chókkewe mi wawa ekkewe woken, me met wiser?

⁹ Met weween ekkewe woken me ekkewe chón wawa? Ra liosuetá chónláng, neman iir fitu kúmien chónláng. (Álleani Sekaraia 6:5-8.) Ra “towu seni fän mesen ewe Samolun unusen fanüfan” fán eú wis mi aúchea. Ekkena chónláng ra titiiló ngeni ekkóch leeni mi fil ren ar repwe túmúnú néún Kot kewe aramas, nge ákkáeúin seni Papilon, “ewe fanü efeng.” Jiowa a áeá eú lángipwi le esilei ngeni néún kewe aramas pwe resap chúen fókkun slave sefál ngeni Papilon. Anchangei péchékkúletáán ekkewe chón aúetá ewe imwenfel lupwen ra rong ena! Ra silei pwe chón oputer kewe rese tongeni aúkúretiw.

10. Ifa usun án Sekaraia we oesini usun ekkewe woken me ekkewe chón wawa a tongeni álisikich lón ei fansoun?

¹⁰ Lón ei fansoun, Jiowa a chúen néúnéú néún kewe chónláng le túmúnú me apéchékkúla néún kewe aramas. (Mal. 3:6; Ipru 1:7, 14) Seni ewe 1919, lupwen néún Jiowa kewe aramas ra ngaseló seni ar fétek lón Papilon mi Lapalap lón kapas áwewe, chón oputer ra fókkun achocho le eppeti feffeitáán fel mi enlet. (Pwär. 18:4) Nge rese sópwéch. Pokiten ekkewe chónláng ra wisen túmúnú án Jiowa we mwicheich, iwe ese wor lamoten ach sipwe lólileniesini án néún Jiowa kewe aramas fétek sefál fán nemenien lamalam chofona. (Kölf. 34:7) Nge néún Jiowa kewe aramas wóón unusen fénúfan repwe chék sópweló le feffeitá lón pekin lúkú. Án Sekaraia we oesini a álisikich le weweiti pwe sia núkúnúkéch me nóm fán túmúnúen ekkewe ruu chuuk.

11. Pwata sisap niwokkus ren án ekkewe mwú repwe maunei néún Kot kewe aramas?

¹¹ Ekiseló chék ekkewe mwú lón án Satan ei ótót repwe ochufengeni néúr kewe mwichen soufiu me achocho le arosaló  néún Kot kewe aramas. (Is. 38:2, 10-12; Tan. 11:40, 44, 45; Pwär. 19:19) Lón án Isikiel we oesini, a erá pwe repwe usun eú mélúmél mi pwélúoló ewe fénú. Ra wawa oris me ra ssáto fán watteen ar lingeringer pwe repwe nieló néún Kot kewe aramas. (Is. 38:15, 16) * Itá sipwe niweitiir? Aapw! Néún Jiowa mwichen soufiu ra penikich. Atun ewe riáfféú mi lapalap, néún Jiowa kewe chónláng repwe túmúnú néún kewe aramas me nieló meinisin mi ú ngeni án Jiowa nemenem. (2 Tes. 1:7, 8) Epwele ia me amwararen ena rán! Nge ié epwe wisen emmweni ena mwichen soufiun láng?

12, 13. (a) Met Jiowa a ereni Sekaraia an epwe féri mwirin? (b) Ifa usun sia silei pwe ewe mwán mi iteni Palan a wewe ngeni Jesus Kraist?

¹² Sekaraia chék a kúna ekkena walu lángipwi. Nge mwirin, a féri eú mettóch aramas ra tongeni kúna me epwe apéchékkúla chókkewe mi aúsefálietá án Kot we imwenfel. (Álleani Sekaraia 6:9-12.) Úlúmén mwán ra war me Papilon, Heltai, Topia, me Jetaia. Jiowa a ereni Sekaraia an epwe ioni seniir silifer me kolt me epwe féri “epa mwärämwär” mi ling. (Sek. 6:11) Itá epwe ina mwárin ewe kepina Serupapel, ewe re Juta mwirimwirin Tafit? Aapw. Jiowa a ereni Sekaraia an epwe ámwárámwára ngeni Josua, ewe souasor  mi lap. Ese mwáál chókkewe mi kúna ena ra máirú.

¹³ Itá án ewe souasor mi lap Josua mwárámwár ena mwárámwár a wewe ngeni pwe i epwe wisen king? Aapw. Josua esap i mwirimwirin Tafit, iwe ese tongeni king. An mwárámwár ena mwárámwár ina liosun minne epwe fis ngeni ewe emén epwe wisen king me souasor tori feilfeiló chék, mi iteni Palan. Ewe Paipel a affata pwe ena Palan, are fasar, a wewe ngeni Jesus Kraist. * (Ppii ewe pwóróus fan.)​—Ais. 11:1; Mat. 2:23.

14. Met Jesus epwe féri lón wisan wisen King me Souasor mi Lap?

¹⁴ Jesus a wiseni ekkewe wis King me Souasor mi Lap. A emmweni néún Jiowa mwichen soufiun láng me a angang weires pwe néún Kot kewe aramas ra tongeni meefi núkúnúkéch lón ei fénúfan mi uren féfférún akkachofesá. (Jer. 23:5, 6) Ekiseló chék, Kraist epwe okkufu ekkewe mwú lón an penaatá án Kot nemenem me túmúnú néún Jiowa kewe aramas. (Pwär. 17:12-14; 19:11, 14, 15) Nge me mwen ena rán, a watte ewe angang Jesus ewe Palan epwe féri.

15, 16. (a) Ifa ewe angangen kaúsefál me angangen elimelim mi fis lón ei fansoun, nge ié a wisen féri ena? (b) Epwe ifa nónnómun fénúfan lesópwólóón án Kraist Nemenem Úkúkún Engeréú Ier?

¹⁵ Me lúkún án Jesus King me Souasor mi Lap, a pwal wisen “aüetä ewe Imwenfelin ewe Samol mi Lapalap.” (Álleani Sekaraia 6:13 seni ewe footnote.) * Lón ewe 1919, a féri ena angangen kaú ren an angasaaló néún Kot kewe aramas seni etipetipaen lamalam chofona, ewe Papilon mi Lapalap. Jesus a aúetásefáli ewe mwichefel me seikaatá ewe “chon angang mi allükülük o tipachem.” Ena mwichen mwán mi kepit ra wisen emmweni ewe angang mi lamot mi fiffis lón kinikinin ewe imwenfel mi lap lón pekin lúkú wóón fénúfan. (Mat. 24:45) Jesus a pwal elimelima néún Kot kewe aramas me álisiir le fel ngeni Kot fán liméch.​—Mal. 3:1-3.

¹⁶ Jesus me chienan kewe 144,000 king me souasor repwe nemenem úkúkún engeréú ier. Lón ena fansoun, repwe álisi  aramas mi tuppwél ar repwe unuséchúló. Lupwen ekkena king me souasor repwe áwesi ena angang, iwe chón fel ngeni Jiowa chék lón enlet repwe nóm wóón fénúfan. Iwe, lón ena atun fel mi enlet epwe unuséchsefál!

17. Ifa pwal eú án Jiowa alúkúlúk ngeni ekkewe chón Jus, me ifa usun ena pwóróus a achchúngúúr?

¹⁷ Ifa usun ewe pwóróus Sekaraia a uwei ngeni ekkewe chón Jus a achchúngúúr? Jiowa a fen pwonei ngeniir pwe epwe álisiir me túmúnúúr pwe repwe tongeni áwesi ewe imwenfel. Ena pwon a awora ngeniir ápilúkúlúk. Nge neman ra chúen ekieki ika ifa usun ra tongeni féri ena watteen angang nge iir mi chék chókúkkún. Iwe, Sekaraia a ereniir och mettóch epwe ataweei ar niwokkus me tipemwaramwar. Me lúkún chókkewe mi fen etto álillis, áwewe chék ren Heltai, Topia, me Jetaia, Jiowa a erá pwe epwe pwal wor chómmóng repwe “feito o alilis le aüetä Imwenfelin ewe Samol mi Lapalap.” (Álleani Sekaraia 6:15.) Ekkewe chón Jus ra lúkúlúk pwe Jiowa a álisatá ar angang. Ra liwiniti ar angangen aúetá ewe imwenfel fán pwora, inaamwo ika ewe kingen Persia a allúkú pwe resap féri. Ena allúk a usun chék eú chuuk mi watte mi eppetiir, nge mwittir chék Jiowa a ataieló. Iwe, ewe imwenfel a wesiló lón ewe ier 515 mwen Kraist. (Esr. 6:22; Sek. 4:6, 7) Iwe nge, alon Jiowa na a pwal weneiti och mettóch mi fen watte seni ena mi fiffis ikenái.

18. Ifa usun Sekaraia 6:15 a pwéppwénútá lón ei fansoun?

¹⁸ Ikenái, fite million aramas ra fel ngeni Jiowa. Ra pwapwa le fangóló ‘wöür,’ áwewe chék ren ar fansoun, péchékkúler, me pisekiir. Ar féri ena ra álisatá án Jiowa we imwenfel mi lap lón pekin lúkú. (SalF. 3:9) Me sia tongeni lúkúlúk pwe Jiowa a aúcheani ach tuppwél le álillis. Chechchemeni pwe Heltai, Topia, me Jetaia ra uweato ekkewe silifer me kolt, iwe Sekaraia a féri epa mwárámwár seniir. Ewe mwárámwár a ina “eu pisekin achem” usun ar kewe asor fán iten ewe fel mi enlet. (Sek. 6:14) Jiowa esap fókkun ménúkaaló ewe angang sia féri me ewe tong sia pwár ngeni.​—Ipru 6:10.

19. Ifa usun án Sekaraia kewe lángipwi repwe achchúngúkich?

¹⁹ Lón ekkeei ránin lesópwólóón, néún Jiowa kewe aramas ra tufichin féri eú angang mi fókkun watte. Ra tufichin féri ena pwe Jiowa a efeiéchúúr me Kraist a emmweniir. Sia pwapwa le fiti ewe mwicheich mi núkúchar, núkúnúkéch, nónnóm tori feilfeiló chék, me sia silei pwe letipen Jiowa fán iten fel mi enlet epwe pwénútá. Iwe, kopwe aúcheani leeniom lein néún Jiowa kewe aramas me ‘aleasochis ngeni alon ewe Samol mi Lapalap om we Kot.’ Iwe kopwe tongeni nóm fán túmúnúen ach we King me Souasor mi Lap me ekkewe chónláng. Féri úkúkún óm tongeni le álisatá fel mi enlet. Jiowa epwe túmúnuk lón ekkeei ránin lesópwólóón me tori feilfeiló chék!