1, 2. (a) Ifa usun ekkewe siwil mi weiweitá ra fis lón manawach a tongeni kkúúkich? (Ppii ewe sasing lepoputáán ei lesen.) (b) Me ren Kölfel 131, met a tongeni álisikich ach sipwe eáni kinamween letip?

ATUN Lloyd me Alexandra ra silei pwe repwele towu seni Bethel me wiliti pioneer, me akkomwan ra meefi letipechou ren ena siwil pokiten ra fen angang lón Bethel lap seni 25 ier. Lloyd a erá: “Me rei Bethel me ai angang ikena, a esissillaeitá ika ngang ié. Ua weweiti ekkewe popun a fis ena siwil, nge mwirin fitu wiik me fitu maram, fán chómmóng ua meefi péútúlóói.” Mi wor atun Lloyd a eáni ekiek mi éch usun ena siwil, nge mwirin chék a pwal letipechou.

² Fán ekkóch a kan fis ekkewe siwil lón manawach sise ekieki pwe repwe fis, iwe a tongeni fókkun efisi ach lólilen me weires. (SalF. 12:25) Met sia tongeni féri pwe sipwe chúen meefi kinamwe lupwen a weires ngenikich ach sipwe etiwa  are eérenaaló och siwil? (Álleani Kölfel 131:1-3.) Sipwe ppii ifa usun ekkóch néún Jiowa kewe chón angang lóóm me ikenái ra tongeni eáni eú letip mi kinamwe pwal mwo nge lupwen a weiweitá fisin och siwil lón manawer.

3. Ifa usun a weiweitá siwilin manawen Josef?

³ Áwewe chék, ekieki usun pwóróusen Josef. Jakop a kon sani Josef me lein meinisin néún kewe. Iwe, pwiin Josef kewe ra fókkun lólówóiti. Lupwen a 17 ierin Josef, ra améméló pwe epwe slave. (Ken. 37:2-4, 23-28) Ina epwe úkúkún 13 ier Josef a kúna riáfféú lón Isip, akkomw a emén slave, me mwirin a kalapus. Josef a fókkun towau seni seman we, ewe a fókkun tongei i. Josef a tongeni ápilúkúlúkúngaw me song pokiten met a fis ngeni, nge ese ina usun. Met a álisi?

4. (a) Met Josef a féri lupwen a nóm lón kalapus? (b) Ifa usun Jiowa a pélúweni án Josef kewe iótek?

⁴ Atun Josef a riáfféú lón kalapus, ese mwáál a ekkekieki án Jiowa ákkálisi. (Ken. 39:21; Kölf. 105:17-19) Neman a pwal ekieki usun an kewe ttan me mwan seni Kot me a meefi núkúnúkéch pwe Jiowa a nónnóm ren. (Ken. 37:5-11) Neman a iótek ngeni Jiowa fán chómmóng me uwawu ngeni meinisin masouen letipan. (Kölf. 145:18) Iwe, Jiowa a pélúweni an kewe iótek ren an apéchékkúla pwe epwe “eti i” ese lifilifil met epwe fis.​—Föf. 7:9, 10. *

5. Ifa usun “än Kot kinamwe” a tongeni etipeppósakich le akkangang ngeni Jiowa?

⁵ Ese lifilifil úkúkún weiresin nónnómuch, nge sia tongeni eáni “än Kot kinamwe” mi túmúnú ‘ekiekich’ me ekinamwekich. (Álleani Filipi 4:6, 7.) Lupwen sia meefi weires me lólilen, “än Kot kinamwe” a tongeni apéchékkúlakich ach sipwe chék sópweló le akkangang ngeni nge sisap achanú. Sipwe nengeni ekkóch pwóróusen pwiich kewe lón ei fansoun mi kúna ena esin álillis.

6, 7. Ifa usun ach kewe iótek repwe álisikich le eánisefáli eú letip mi kinamwe? Apwóróusa eú pwóróus.

⁶ Ryan me Juliette ra letipechou lupwen ra silei pwe a wes ar temporary special pioneer. Ryan a erá: “Aua mwittir iótek ngeni Jiowa usun ena mettóch. Aua silei pwe iei a suuk ngenikem ám aupwe pwári ám lúkúlúk wóón. Chómmóng chón lón ám we mwichefel, iir minefélóng lón ewe enlet, ina minne aua tingor án Jiowa álillis pwe aupwe tongeni isetiw leenien áppirú mi múrinné usun lúkú.”

⁷ Ifa usun Jiowa a pélúweni ar iótek? Ryan a erá: “Wesin chék ám iótek, a móróló ám kewe memmeef rese pwúng me ám lólilen me akkomwan. Án Kot kinamwe a túttúmúnú letipem me ekiekim. Aua mirititi pwe Jiowa a chúen tongeni néúnéú ám ika aupwe ákkeáni ekiek mi pwúng.”

8-10. (a) Ifa usun án Kot we manaman mi fel epwe álisikich lupwen sia aúrek? (b) Ifa usun Jiowa epwe álisikich lupwen sia nefotofot wóón ach angang ngeni?

⁸ Án Kot we manaman mi fel a tongeni ekinamwekich, me a tongeni áiti ngenikich  ekkewe wokisin lón Paipel repwe álisikich le mirititi met mi wesewesen lamot lón manawach. (Álleani Johannes 14:26, 27.) Nengeni met a fis ngeni Philip me Mary, eú pean pwúpwúlú chón Bethel arapakkan 25 ier. Lón chék rúáánú maram, iner kewe me rúúemén me pwal emén aramaser ra má seniir. Iwe a lamot ar repwe wisen túmúnú semen Mary we, mi úri dementia ewe semmwen mi efisi an tipeménúk.

⁹ Philip a erá: “Tittipei pwe ua fen fókkun sile likiitú, nge ese unus. Ua kúna ewe wokisin lón Kolose 1:11, seni eú lesen lón Ewe Leenien Mas. Pwúngún pwe ua likiitú nge ese wesewesen unus. A lamot ai upwe ‘unusen likiitü me engngiló fän pwapwa.’ Ena wokisin a áchema ngeniei pwe ai pwapwa ese lóngólóng wóón met a fiffis lón manawei, nge fen ren ifa usun án Kot we manaman mi fel a angang lón manawei.”

¹⁰ Pokiten Philip me Mary ra chék nefotofot wóón ar akkangang ngeni Jiowa, iwe a efeiéchúúr lón chómmóng napanap. Ekiseló mwirin ar towu seni Bethel, iir me rúúemén ra kúnékún en me néúr chón káé mi feffeitá me mochen káé lap seni fán eú lón eú wiik. Mary a erá: “Iir popun ám pwapwa me esissillen án Jiowa alúkúlúkúkem.”

11, 12. (a) Ifa usun Josef a féri eú mettóch Jiowa a tongeni efeiéchú? (b) Ifa usun Jiowa a efeiéchú Josef?

¹¹ Lupwen a chék weiweitá siwil lón manawach, neman epwe fókkun luló ach aúrek pwe ina chék met sia ekkekieki. A tongeni pwal ina usun Josef, nge a fen filatá an epwe achocho le féri úkúkún an tongeni fán weiresin nónnómun. A angang weires fán iten Potifar, a pwal angang weires lón ewe imwen fétek ese lifilifil met ewe chon nemeni ewe imwen féték a ewisa ngeni.​—Ken. 39:21-23.

¹² Eú rán, Josef a kefilitá an epwe wisen túmúnú ekkewe rúúemén chón kalapus mi piin angang lón imwen Farao we. Josef a kirekiréch ngeni ekkena mwán, me ra meefi kinamwe ren Josef me ra tongeni pwáraawu ngeni ar kewe lólilen me ar kewe ttan ra eáni lón eú chék pwiin nge a aosukosuker. (Ken. 40:5-8) Josef ese silei nge lón ena atun, ar na pwóróusfengen epwe emmweni ngeni pwisin ngaselóón mwirin och fansoun. Ruu ier mwirin, a musowu seni kalapus me a wiliti emén sounemenemen Isip mi watte manan. Farao chék ewe a  watte manan lap seni!​—Ken. 41:1, 14-16, 39-41.

13. Met sia tongeni féri pwe Jiowa epwe tongeni efeiéchúkich ese lifilifil nónnómuch?

¹³ Epwe tongeni fis ngenikich mettóch sise tongeni nemeni, usun met a fis ngeni Josef. Nge ika sia mosonottam me achocho úkúkún ach tongeni fán weiresin nónnómuch, iwe Jiowa epwe pwal efeiéchúkich. (Kölf. 37:5) Pwal mwo nge atun sia meefi rukoruk me aúrek, nge sisap “apilükingau.” (2 Kor. 4:8) Jiowa epwe nónnóm rech ákkáeúin ika sia nefotofot wóón ach angangen afalafal.

14-16. Ifa usun ewe chón afalafal Filip a chék nefotofot wóón an angangen afalafal inaamwo ika a fis siwil lón manawan?

¹⁴ Filip emén chón afalafal mi isetiw eú leenien áppirú mi múrinné ren an nefotofot wóón an angangen afalafal ese lifilifil met a fis lón manawan. Mi wor eú atun a pwapwaiti wisan minefé lón Jerusalem. (Föf. 6:1-6) Mwirin chék a siwil mettóch meinisin. Mwirin án Stefanus ninniiló, ekkewe Chón Kraist ra kúna watte riáfféúmwáál me ra sú seni Jerusalem. Pokiten Filip a chúen mochen sópweló an akkangang ngeni Jiowa, iwe a ló ngeni ewe telinimwen Samaria, ewe ia aramas ra osupwangen ar repwe rong ewe kapas allim ie.​—Mat. 10:5; Föf. 8:1, 5.

¹⁵ Filip a tipemecheres le ló ese lifilifil ia chék án Kot we manaman mi fel a emmwenaaló ie. Ina minne Jiowa a néúnéú Filip le afalafal ikewe aramas resaamwo rong ewe kapas allim ie. Chómmóng chón Jus ra meefi pwe ra tekia seni ekkewe chón Samaria iwe ra kirikiringaw ngeniir. Nge Filip ese lifilifil aramas, me a mwasangasang le esile ngeniir ewe kapas allim. Iwe ekkewe chón Samaria “ra chok tipeeufengen” le aúseling ngeni!​—Föf. 8:6-8, Testament Mi Fö.

¹⁶ Mwirin, án Kot we manaman mi fel a emmweni Filip an epwe ló afalafal lón ekkewe telinimwen Astot me Seserea, ikewe a chómmóng ekkewe chón lúkún Israel ie. (Föf. 8:39, 40) Mwirin, a pwal siwil nónnómun manawan Filip. A famili. Iwe, ese lifilifil met a fis ngeni Filip, nge a chúen akkachocho lón an angangen afalafal, me Jiowa a sópweló le efeiéchú i me an we famili.​—Föf. 21:8, 9.

17, 18. Ifa usun ach nefotofot wóón ach angangen afalafal a tongeni álisikich lupwen a fis siwil lón manawach?

 ¹⁷ Chómmóng chón angang ngeni Jiowa full-time ra apasa pwe ar nefotofot wóón ar angangen afalafal a álisiir ar repwe akkamwéchú ar pwapwa me eáni ekiek mi pwúng pwal mwo nge atun a siwil nónnómun manawer. Áwewe chék, lupwen Osborne me Polite lón South Africa ra towu seni Bethel, ra ekieki pwe epwe mecheres ar repwe kúnékún ar angang part-time me imwer. Nge Osborne a erá: “Ause mwittir kúnékún ám angang usun met aua fen ekieki.” Polite a erá: “Lón úkúkún úlúngát maram ause kúnékún ám angang me ese wor néúm moni aua isoni. Iwe a wesewesen áweires.”

¹⁸ Met a álisi Osborne me Polite lón ena fansoun mi áweires? Osborne a erá: “Ám fiti chón ewe mwichefel lón ewe angangen afalafal, a fókkun álisikem le nefotofot wóón ewe angang me eáni ekiek mi pwúng.” Ra filatá le achocho lón ewe angangen afalafal lap seni ar chék nónnóm lón imwer we me akkaúrek. Ar féri ena a atoto ngeniir watteen pwapwa! Osborne a pwal erá: “Aua kútefetál ám angang, iwe mwirin aua kúnékún.”

19-21. (a) Met epwe álisikich ach sipwe chúen eáni eú letip mi kinamwe? (b) Ifa usun sipwe feiéch lupwen sia achocho le eérenaaló ekkewe siwil mi weiweitá a fis lón manawach?

¹⁹ Sia fen kúna lón ei lesen pwe ika sia achocho le féri úkúkún ach tongeni fán weiresin nónnómuch, me unusen lúkúlúk wóón Jiowa, iwe epwe chék nóm rech kinamween letipach ese lifilifil met epwe fis. (Álleani Mika 7:7.) Iwe, mwirin och fansoun, sipwe tongeni mirititi pwe minne sia féri ren ach sipwe eérenaaló ewe siwil, a wesewesen apéchékkúla ach ririéch ngeni Jiowa. Polite a apasa pwe ar towu seni Bethel me siwilin wiser, a áiti ngeni wesewesen weween án emén lúkúlúk wóón Jiowa  fán weiresin manawan. A erá: “A péchékkúleló ai riri ngeni Jiowa.”

²⁰ Mary, ewe sia fen fós usun, a chúen túmúnú seman we mi chinnap me a pwal chúen pioneer. A erá: “Ua fen kúna pwe lupwen ua aúrek, a lamot ai upwe mwo kaúló, iótek, me mwirin ekis asésé. Ai likitalóng lepéún Jiowa mettóch meinisin, neman ina ewe watteen lesen lap seni meinisin ua káé, me epwe pwal fókkun lamot lón fansoun mwach.”

²¹ Lloyd me Alexandra ra erá pwe ekkewe siwil a fis lón manawer a sótuni ar lúkú lón ekkewe napanap rese fen ekieki. Nge ra tongeni kúna pwe ekkena sóssót a fen wesewesen álisiir. Iei, ra silei pwe a péchékkúl ar lúkú me a tongeni fis pwe oururuur lupwen ra nóm fán osukosuk. Ra pwal meefi pwe a échúló napanaper.

22. Met sia tongeni lúkúlúk wóón ika sia achocho le féri úkúkún ach tongeni ren met a fiffis ngenikich?

²² Lón ei ótót, a tongeni weiweitá siwil lón manawach. Epwe tongeni siwil wisach lón ach angang ngeni Jiowa, fis osukosuken péchékkúlen inisich, are epwe lamot ach sipwe túmúnú chón ach famili lón pwal eú napanap. Ese lifilifil met a tongeni fis, nge kopwe lúkúlúk pwe Jiowa a tongeok me epwe álisuk lón fansoun mi fich. (Ipru 4:16; 1 Pet. 5:6, 7) Nge ren mwo iei, kopwe achocho le féri úkúkún óm tongeni ren met a fiffis ngonuk. Iótek ngeni Semom we Jiowa me unusen lúkúlúk wóón. Ren ena, ese lifilifil siwil epwe fis lón manawom, nge kopwe chék eáni ewe letip mi kinamwe, ewe mi feito seni Jiowa.