1, 2. (a) Ifa ewe angang mi kon lamot lap seni meinisin lón manawen Jesus, me pwata? (b) Met a lamot sipwe féri pwe sipwe sópwéch lón ach “akangangfengen” me Kot?

JESUS KRAIST i emén chón kaú imw me mwirin a emén sense. (Mark. 6:3; Joh. 13:13) A fókkun sipeéch lón iir me ruu ekkena angang. Lón an angangen kaú, a káé ifa usun epwe áeá ekkewe pisekin táikú le ffér pisek mi álilliséch mi ffér seni émwúch. Nge lón an angangen sense, a áeá silean mi alóllóól usun án Kot we Kapas pwe epwe álisi aramas mi tekison le weweiti ewe enlet seni Paipel. (Mat. 7:28; Luk. 24:32, 45) Lupwen a 30 ierin Jesus, a úkútiw seni an angangen kaú me a wiliti emén sense pokiten a silei pwe ina ewe angang mi kon lamot seni meinisin. A erá pwe eú popun Kot a tiinaato wóón fénúfan pwe epwe afalafala kapas allimen ewe Mwúún Kot. (Mat. 20:28; Luk. 3:23; 4:43) Jesus a nefotofot wóón ewe angangen afalafala ewe kapas allim, me a mochen án ekkóch repwe pwal féri ena angang.​—Mat. 9:35-38.

² Lape ngenikich esap kich chón kaú imw, nge kich meinisin kich chón angang mi asukula aramas usun ewe kapas allim. A fókkun lamot ena angang pwe Kot a kapachelong lón. Ren enletin, sia iteni “chon angangen Kot mi akangangfengen” me i. (1 Kor. 3:9, Testament Mi Fö; 2 Kor. 6:4) Sia tipeeú ngeni ewe  soumakken kélfel ewe mi erá: “Masouen óm kapas mi chék enlet.” (Kölf. 119:159, 160, NW) Iwe án Jiowa kapas ina ewe enlet. Ina popun sia mochen túmúnú pwe sipwe “afalafala än Kot kapas mi let fän pwüng.” (Álleani 2 Timoty 2:15.) Ina minne sia achocho le lipwákéchúló lón ach néúnéú ewe Paipel, ewe iolapen minen álillis le asukula aramas usun Jiowa, Jesus, me ewe Mwúún Kot. Án Jiowa mwicheich a awora ngenikich pwal ekkóch minen álillis pwe sipwe sópwéch lón ach angangen afalafal, nge mi lamot sipwe pwal sile ifa usun sipwe néúnéú. Ekkena minen álillis ra nóm lón ach we Pwórun Asukul.

3. Met a lamot sipwe nefotofot wóón lón ach angangen afalafal, me ifa usun Föför 13:48 a álisikich le féri ena?

³ Neman ka ekieki ika pwata sia eita ngeni ena pwóór Pwórun Asukul nge esap Pwórun Afalafal. Popun pún ach “afalafal” a wewe ngeni ach esilefeili eú pwóróus, nge ach “asukul” a wewe ngeni ach áweweei ena eú pwóróus ren án emén epwe weweiti minne a rong, me mwirin epwe mwékút pwe epwe apwénúetá minne a káé. Atun ei lusun fansoun mi chék mwochomwoch me mwen talóón ei ótót, mi lamot sipwe nefotofot wóón ach poputááni chón káé me asukuler usun ewe enlet pwe repwe tongeni wiliti néún Kraist chón káé. Weween pwe mi lamot sipwe tinikken le kúkkútta chókkewe “letiper a páái ngeni ar repwe etiwa ewe enlet mi atoto manaw esemuch” me álisiir ar repwe poputá le angang ngeni Jiowa.​—Álleani Föför 13:44-47 me álleani 48 seni ewe footnote. *

4. Ifa usun sipwe tongeni silei ié kewe “letiper a páái ngeni ar repwe etiwa ewe enlet mi atoto manaw esemuch,” me ifa usun sipwe kútter?

⁴ Ifa usun sipwe tongeni silei ié kewe “letiper a páái ngeni ar repwe etiwa ewe enlet mi atoto manaw esemuch”? Mi lamot ngeni ekkewe popun Chón Kraist ar repwe afalafal, pwe ina chék alen ar repwe kúna ekkena esin aramas. Jesus a ereni néún kewe chón káé: “Lupwen oupwe tolong lon eu telinimw ika sopw, oupwe pii iön aramas mi pwapwaiti an epwe etiwakemi.” (Mat. 10:11) Mi lamot sipwe pwal féri ena lón ei fansoun. Pwúngún pwe ika aramas rese letipwenechar, ra lamalamtekia, are rese wesewesen áfánni Kot, iwe saminne sipwe ekieki pwe repwe aúseling ngeni ewe kapas allim. Sia kúkkútta chókkewe mi letipwenechar, tipetekison, me wesewesen mochen silei ewe enlet. Sia tongeni aléllééi ach angangen kúkkútta aramas ngeni án Jesus angangen kaú. Mi lamot án Jesus epwe akkomw kútta ewe sókkun irá mi fich me mwen an epwe ffér pisekin imw, féri eú asam are efóch waas are pwal ekkóch pisek. Mwirin epwe angei an we pwórun pisekin táikú, me áeá an sile le ffér pisek. A pwal ina usun lón ei fansoun, mi lamot sipwe akkomw kútta ekkewe aramas mi letipwenechar, me mwirin sia tongeni áeá ach pisekin angang me ach sile le álisiir pwe repwe tongeni wiliti néún Jesus chón káé.​—Mat. 28:19, 20.

5. Met a lamot sipwe silei usun ren ekkewe minen álillis mi nóm lón ach we Pwórun Asukul? Áweweei. (Ppii ewe sasing lepoputáán ei lesen.)

⁵ Lón eú pwórun pisekin angang, a masou ren eú me eú pisekin angang me angangan. Áwewe chék, ekieki usun án Jesus kewe pisekin táikú. A lamot ngeni Jesus pisekin angang ren choweán minen aúkúk, minen  esissil, minen pékúpék, kúpenes, minen anapanap irá, me an epwe lefeni ekkewe irá me ochufengeniir. Pwal ina chék usun lón ach we Pwórun Asukul, a wor ekkewe pisekin angang are minen álillis ren en me angangan. Iwe, sipwe ppii ifa usun áeáán ekkena minen álillis mi aúchea.

6, 7. (a) Ifa usun ka fen néúnéú ekkewe contact card? (b) Pwata sia néúnéú ekkewe taropween etiwetiw fán iten án ewe mwichefel kewe mwich?

⁶ Contact Card. Ekkena card ra chék chékúkkún, nge ra fókkun álilliséch ren án aramas repwe silei ika kich ié me emmweniir ngeni ach we website jw.org. Epwe pwal tongeni lapóló ar silei usuch me wóón ach we website, me repwe pwal mwo nge tingor ar repwe káé Paipel. Lap seni 400,000 aramas ra fen tingor ar repwe káé Paipel lupwen ra tétá wóón jw.org, me iteiten rán fitepúkú aramas ra kan tingor ar repwe káé Paipel! Ka tongeni uwei fitaché ekkena contact card, me anéúnéú atun ka fós ngeni aramas ka chuuriir lón unusen ewe rán.

⁷ Taropween Etiwetiw. Iei met a mak lón ewe taropween etiwetiw fán iten ekkewe mwich: “Ka ketiw le káé Paipel ren Chón Pwáraatá Jiowa.” Mwirin a pwal mak pwe ka tongeni káé “lón ám kewe mwich” “are ren álillisin emén.” Ina popun, ena taropween etiwetiw a affata ngeni aramas ika kich ié, me a pwal etiwa chókkewe mi meefi lamoten ar repwe chiechi ngeni Kot ar repwe káé ewe Paipel rech. (Luk. 11:28) Pwúngún pwe meinisin aramas ra ketiw ngeni ach kewe mwich ese lifilifil ika ra mochen káé Paipel are rese. Lupwen ra fiti mwich, repwe kúna met ra tongeni káé usun ewe Paipel.

8. Pwata a lamot ngeni aramas ar repwe fiti mwaren eú mwich? Apwóróusa eú pwóróus.

⁸ A lamot ach sipwe ekketiwa aramas ngeni ach kewe mwich mwaren fán eú. Pwata? Pokiten lupwen ra fiti, repwe kúna pwe Chón Pwáraatá Jiowa ra áiti ngeni aramas ewe enlet seni Paipel me álisiir le silei Kot, ina met lamalam chofona rese kan féri. (Ais. 65:13) Áwewe chék, eú pean pwúpwúlú lón Merika iter Ray me Linda ra esilla ena fitu som ier a ló. Ra lúkú Kot me mochen silefichi i. Ina minne ra akkóta ar repwe cheki meinisin ekkewe fáál lón leenier we me kútta ruu mettóch seni ewe lamalam me mwen ar repwe chóni. Áeúin, mi lamot repwe káé och lesen seni ena lamalam, me oruuan, epwe lamot pwe chón ena lamalam repwe fouteni fouten chókkewe mi erá pwe ra angang ngeni Kot. A fite ier ar féri ena pokiten a chómmóng fáál lón leenier we. Nge ra fókkun lichippúng. Rese káé och mettóch seni ar fiti ekkena sókkopaten lamalam me fouten chón ekkena lamalam a fókkun ésúfélúngaw. Mwirin ar ló ngeni ewe sáingoon imwenfel ra makkeetiw pwe repwe chuuri, Linda a ló angang, nge Ray a liwiniti imwer we. Nge atun an liwin a pásini eú Leenien Mwich. Ray a ekieki, ‘Upwele mwo tolong me ppii met a kan fis ikenan ie.’ Enlet, Ray a fókkun pwapwaiti ewe mwich! Meinisin lón ewe Leenien Mwich ra kirekiréch me chiechiéch, me ra fókkun foutéch. Ray a mwoot mwan me a pwapwaiti met a káé! A áchema ngenikich met aposel Paulus a áweweei usun emén mi kerán fiti mwich, ewe mi erá: “Enlet, Kot a nonom lefilemi!” (1 Kor. 14:23-25) Mwirin ena, Ray a fiti mwich iteiten Ráninfel me a pwal poputá le fiffiti ekkewe mwich lón weekday. Iwe Linda a pwal poputá le fiti mwich, me inaamwo  ika a fen 70 som ieriir nge ra káé Paipel me papataiseló.

9, 10. (a) Pwata a mecheres ach néúnéú ekkewe tract? (b) Áweweei ifa usun kopwe néúnéú ewe tract Met Weween Mwúún Kot?

⁹ Tract. Mi wor waliché tract lón ach we Pwórun Asukul. A mecheres ach sipwe néúnéú, me a mmen éch ren ach sipwe poputááni ach pwóróusfengen me aramas. A fen peres nimu billion som tract seni ewe atun a katowu ewe áechéén tract lón ewe 2013! Ekkena tract meinisin a chék léllé napanaper. Ina minne, ika ka fen sile néúnéún eché me leir, iwe ka tongeni néúnéú iir meinisin! Ifa usun ka tongeni néúnéú eché tract le poputá le fós ngeni emén?

¹⁰ Neman ka mochen kopwe néúnéú ewe tract Met Weween Mwúún Kot? Áiti ngeni eménnewe ewe kapas eis wóón ewe tract me eisini: “Ka fen ekieki ika met ewe Mwúún Kot? Kopwe erá pwe ina eú . . . ?” Mwirin kopwe eisini ika menni lein pélúwan kewe úlúngát epwe filatá. Kosap ereni ika pélúwan we mi pwúng are ese pwúng, nge kopwe chék suuki ewe tract lón ewe kinikin itelapan “Met Ewe Paipel A Apasa” me álleani ekkewe wokisin mi mak lón, Taniel 2:44 me Aisea 9:6. Lesópwólóón ámi pwóróusfengen, eáni ewe kapas eis wóón epekin ewe tract: “Epwe ifa nónnómun manawach fán nemenien án Kot we Mwú?” fán ewe itelap “Mettóch Kopwe Ekieki.” Ka tongeni pélúweni ena kapas eis lupwen ka liwinsefál. Lupwen oua chufengensefál, ka tongeni fós usun lesen 7 lón ewe brochure Pwóróus Allim Seni Kot!, eú me lein ekkewe minen álillis pwe sipwe poputááni káé Paipel.

11. Met popun a fen ffér néúch kewe magazine, me met mi lamot sipwe silei usur?

¹¹ Magazine. Ewe Leenien Mas me Awake! ikkena ekkewe magazine mi fókkun chéú wóón unusen fénúfan ach we mwicheich a peresei me afféúni! Pokiten aramas seni sókkopaten fénú ra álleani ekkena magazine, ekkewe menlapen pwóróus lúkúnpéér ra fen ffér pwe epwe amwasangasanga aramas seni ekis meinisin. Sipwe néúnéú ekkena magazine le álisi aramas le nefotofot wóón met mi lamot lap seni meinisin lón manawer ikenái. Nge akkomw, mi lamot sipwe silei menni magazine a fen ffér fán iten met sókkun aramas.

12. A ffér ewe Awake! fán iten ié kewe, me met popun a ffér?

¹² A ffér ewe Awake! fán iten ekkewe aramas ekis chék sileier are rese silei usun ewe Paipel. Neman rese silei áitien Chón Kraist, ese wor ar lúkúlúk wóón lamalam, are neman rese mirititi álillisin ewe Paipel lón pwisin manawer. Ewe ákkáeúin popun a ffér ewe Awake!, pwe epwe ánnetatá ngeni chón állea pwe mi wor Kot. (Rom 1:20; Ipru 11:6) A pwal ffér pwe epwe álisi chón állea le lúkú ewe Paipel pwe ina “wesewesen kapasen Kot.” (1 Tes. 2:13) Ikeei itelapen ekkewe úlúngát Awake! fán iten 2018: “The Way of Happiness,” “12 Secrets of Successful Families,” me “Help for Those Who Grieve.”

13. (a) Ewe Leenien Mas fán iten aramas meinisin, a ffér fán iten met sókkun aramas? (b) Ifa uwaéchún óm anéúnéú ena minen álillis kukkuto chék?

¹³ Ewe ákkáeúin popun an ffér Ewe Leenien Mas fán iten aramas meinisin, pwe epwe áweweei áitien ewe Paipel ngeni aramas mi fen súféliti Kot me ewe Paipel. Neman repwe silei ekkóch mettóch usun ewe Paipel nge  rese weweéchúti ewe pwóróus mi enlet lón. (Rom 10:2; 1 Tim. 2:3, 4) Ekkewe úlúché Leenien Mas fán iten 2018 ra pélúwen ekkeei kapas eis: “A Chúen Álilliséch ewe Paipel lón Ei Fansoun?,” “Met Epwe Fis lón Mwachkkan?” me “Itá Kot A Chúnguk?”

14. (a) Ekkewe faché video lón ach we Pwórun Asukul ra ffér fán iten met? (b) Mi wor pwóróusom mi múrinné atun ka akkatola ngeni aramas ekkewe video?

¹⁴ Video. Lón fansoun Jesus we, emén chón kaú imw a kan chék néúnéú ekkewe sókkun pisekin táikú ese fiti fiifi. Nge iei, a wor chómmóng pisekin táikú mi fiifi ren choweán ngerenger, kúpenes me minen amwotow. Atun sia afalafal ikenái, me lúkún ekkewe puk mi peres, a pwal kawor ekkewe video mi múrinné sia tongeni akkatola ngeni aramas. Faché me lein ekkena video ra nóm lón ach we Pwórun Asukul. Ikkeei: Pwata Kopwe Káé ewe Paipel?, Met A Fiffis lón Eú Káéén Paipel?, Met A Fiffis lón ewe Leenien Mwich?, me Jehovah’s Witnesses​—Who Are We? Ekkewe video mi mwoch, ra kis seni ruu minich me a éch ach sipwe fichiir atun ach kerán chuuri aramas. Nge ekkewe video mi ttam, sia tongeni fichiir lupwen sia liwinitiir are sia tongeni fichi ngeni chókkewe mi tawe le katol. Ekkena video a mmen éch pokiten ra tongeni amwékútú aramas le káé ewe Paipel me fiti mwich.

15. Met mwirilóón án aramas katol néúch kewe video lón pwisin ar fós? Apwóróusa ekkóch pwóróus.

¹⁵ Áwewe chék, emén Chón Kraist fefin a chuuri emén fefin seni Micronesia me eáni fósun Yap. Chienach na fefin a fichi ngeni ewe video Pwata Kopwe Káé ewe Paipel? lón fósun Yap. Atun ena fefin a katol, a erá: “Iei fósun fénúei. Use fen lúkú! Ua tongeni esilla pwe ngingiin chón fénúei we. A eáni fósun fénúei we!” Mwirin ena, ena fefin a apasa pwe epwele álleani me katol mettóch meinisin lón fósun fénúan we mi wor wóón jw.org. (Apépé ngeni Föf. 2:8, 11.) Pwal eú pwóróus, pwóróusen emén Chón Kraist fefin lón Merika nge tettelin néún we át a kan nóm lón pwal eú fénú. Chienach na fefin a tinaló ngeni eú link fán iten pwal ena esin video lón pwisin an fós. Tettelin néún na a katol ewe video, me iei met a e-mail ngeni chienach na fefin: “Ua fókkun ekieki usun ewe kinikin lón ewe video usun emén mi ngaw mi nennemeni fénúfan. Ua makkeei itei me tingor án emén epwe káé ngeniei ewe Paipel.” Ena pwóróus a mmen apwapwa ákkáeúin pokiten átena a nóm lón eú fénú ikewe ie mi pinepin ach angangen afalafal ie!

16. Áweweei popun a ffér ekkeei puk: (a) Akkaüseling ngeni Kot pwe Kopwe Küna Manau Esemuch. (b) Pwóróus Allim Seni Kot! (c) Ié Kewe Ra Féfféri Letipen Jiowa Lón Ei Fansoun?

¹⁶ Brochure. Ifa usun sia tongeni áiti ngeni emén ewe enlet nge ese kon lien sile állea are ese wor ekkewe puken álillisin Paipel lón fósun fénúan we? Sia tongeni néúnéú ewe brochure Akkaüseling ngeni Kot pwe Kopwe Küna Manau Esemuch. * Ewe brochure Pwóróus Allim Seni Kot! ina eú minen álillisin ach sipwe poputááni káéén Paipel. Ka tongeni áit ngeni emén ekkewe 14 itelap lúkúnpéén me eisini ika menni leir a sani. Mwirin oupwe poputá le káé ena lesen. Ka fen sótuni ena esin ngeni chókkewe ka kan chuchchuuriir? Ewe brochure Ié Kewe Ra Féfféri  Letipen Jiowa Lón Ei Fansoun? ina ewe éúlúchéén brochure lón ach we Pwórun Asukul, a ffér pwe epwe áiti ngeni néúch kewe chón káé usun ach we mwicheich. Ren óm kopwe silei néúnéún ena brochure ngeni emén me emén noum kewe chón káé, ppii ewe March 2017 Manawach Chón Kraist me Ach Angangen Afalafal​—Minen Káé fán Iten Mwich.

17. (a) Met popun emén epwe káé eú me eú ekkena puk? (b) Met a lamot chókkewe repwe papatais repwe féri, me pwata?

¹⁷ Puk. Lupwen ka fen poputá le káé ngeni emén eú brochure, ka tongeni siwili ngeni ewe puk Met ewe Paipel A Wesewesen Apasa? * ese lifilifil ineet ka mochen. Ena minen álillis a tongeni álisi aramas le silei ekkewe popun afalafal seni Paipel. Ika ewe chón káé a feffeitá me a áwesi ena puk, ka tongeni sópweló le káé ngeni ewe puk Oupwe Chék Nóm lón ewe Tongen Kot. * Ena minen álillis epwe áiti ngeni ewe chón káé ifa usun epwe apwénúetá ekkewe kapasen emmwen seni Paipel lón manawan iteiten rán. Chemeni pwe pwal mwo nge mwirin án emén minefé papatais, a chúen lamot an epwe sópweló an káé tori a wes ekkena ruu puk. Ena mettóch epwe álisi an epwe péchékkúl an lúkú Jiowa me akkamwéchú an tuppwél.​—Álleani Kolose 2:6, 7.

18. (a) Met 1 Timoty 4:16 a pesekich le féri lón wisach we le asukula aramas ewe enlet, me met mwirilóón? (b) Met sia achocho ngeni lón ach néúnéú ach we Pwórun Asukul?

¹⁸ Kich Chón Pwáraatá Jiowa wisach ach sipwe asukula aramas “ewe Pworausen Manau mi enlet” mi emmwen ngeniir manaw esemuch. (Kol. 1:5; álleani 1 Timoty 4:16.) Ewe Pwórun Asukul epwe álisikich le féri ena pún a masou ren sókkopaten minen álillis mi lamot. (Ppii ewe pwóór “ Pwórun Asukul.”) Sipwe néúnéú ekkena minen álillis úkúkún ach tufich. Emén me emén leich sia tongeni filatá menni minen álillis lón ewe Pwórun Asukul sipwe néúnéú me ineet sipwe néúnéú. Sipwe chemeni pwe sise kan chék achocho le anéúnéú ekkewe puk, me sise anéúnéú ngeni aramas rese pwapwaiti ewe pwóróus sia uwei ngeniir. Nge met sia achocho ngeni, ina ach sipwe álisi aramas le wiliti néún Jesus chón káé, chókkewe mi letipwenechar, tipetekison, me wesewesen mochen silei Kot, chókkewe “letiper a páái ngeni ar repwe etiwa ewe enlet mi atoto manaw esemuch.”​—Föf. 13:48, NW; Mat. 28:19, 20.