1-2. (a) Met ekkewe sounemenemen fénúfan repwe esile ngeni aramas ekiseló chék? (b) Ikkefa ekkewe kapas eis mi lamot sipwe silei pélúwer?

ANCHANGEI pwe ekkewe sounemenemen fénúfan ra kerán chék esilei ewe esilesil Paipel a fen oesini usun pwe “mettoch meinisin a kinamwe o nükünüköch.” Neman repwe esika pwe a fókkun kinamwe ei fénúfan. Ra mochen ach sipwe ekieki pwe ra tongeni pwákini án ei fénúfan kewe osukosuk meinisin. Nge rese fókkun tongeni eppeti met epwele fis mwirin! Pwata? Me ren án Paipel oesini pwe “feiengau epwe müttir toriir . . . nge esap wor eman aramas epwe tongeni sü seni.”​—1 Tes. 5:3.

² A wor ekkeei kapas eis mi lamot sipwe silei pélúwer: Met epwe fis atun ewe riáfféú mi lapalap? Met Jiowa a mochen ach sipwe féri lón ena atun? Ifa usun sipwe ammólnakichetá iei pwe sipwe akkamwéchú ach tuppwél atun ewe riáfféú mi lapalap?​—Mat. 24:21.

3. Ifa usun Kot epwe ataieló “Papilon mi lapalap” me ren Pwärätä 17:5, 15-18?

³ Álleani Pwärätä 17:5, 15-18. “Papilon mi lapalap” epwe taló! Ei lesen a fen apasa pwe ekkewe sounemenemen fénúfan rese fókkun tongeni eppeti met epwe fis lón ena atun. Pwata? Pokiten “Kot [epwe] atolonga lon letiper pwe repwe apwönüetä an ekiek.” Ifa an na ekiek? An epwe ataieló ewe mwicheichen lamalam chofona wóón unusen fénúfan kapachelong  ekkewe tipitipin lamalamen Chón Kraist. Kot epwe atolonga an ekiek lón letipen “engol mächän” ewe “manmwacho mi par.” Ekkena engol mechá ra liosuetá meinisin ekkewe mwú mi álisatá ena “manmwacho,” ewe United Nations. (Pwär. 17:3, 11-13; 18:8) Lupwen ekkena mwúún aramas repwe maunei lamalam chofona, epwe esissillatá poputáán ewe riáfféú mi lapalap. Epwe mwittir fis ena me epwe fókkun eniweniw me epwe kkúú chón fénúfan meinisin.

4. (a) Met ekkewe mwúún fénúfan neman repwe apasa ren ewe popun ra maunei lamalam chofona? (b) Met chókkewe mi piin fiti ekkewe lamalam neman repwe féri?

⁴ Sise silei met popun ekkewe mwúún fénúfan repwe apasa pwe ra maunei Papilon mi Lapalap. Neman repwe apasa pwe lamalamen fénúfan iir minen eppet fán iten kinamwe, me ra kan soun angolong lón politics. Are repwe tongeni apasa pwe a fókkun chómmóng wéún me pisekin ekkena mwicheichen lamalam. (Pwär. 18:3, 7) Lupwen ekkewe mwúún fénúfan repwe maunei lamalam chofona, usun itá resap pwal nieló emén me emén chón ekkena lamalam. Nge repwe chék amóeló ekkewe mwicheichen lamalam. Lupwen ekkena mwicheichen lamalam repwe móróló, chókkewe mi piin fitiir repwe mirititi pwe néúr kewe néúwisin lamalam ra fen elichippúngúr, me neman repwe atowauereló seni ekkena lamalam.

5. Met Jiowa a pwonei usun ewe riáfféú mi lapalap, me pwata?

⁵ Ewe Paipel ese apasa epwe ifa ttamen katalóón Papilon mi Lapalap, nge sia silei pwe esap fókkun ttam. (Pwär. 18:10, 21) Jiowa a pwonei pwe epwe “amochomocha ekewe rän,” ránin ewe riáfféú mi lapalap pwe “chokewe a filiiretä” fitifengen me ewe lamalam mi enlet resap móló. (Mark. 13:19, 20) Nge met Jiowa a mochen ach sipwe féri atunen poputáán ewe riáfféú mi lapalap tori ewe maunen Armaketon?

6. Pwata ese chék naf ach sipwe towu seni lamalam chofona?

⁶ Jiowa a mochen án néún kewe chón angang repwe atowauereló seni Papilon mi  Lapalap, usun met ewe lesen mwen ei a fen pwóróus usun. Iwe nge, mi wor met sipwe pwal féri me lúkún ach towu seni lamalam chofona. Mi lamot sipwe tipeppós le penaatá lamalam mi enlet, án Jiowa we fel mi enlet. Sipwe ppii ruu alen ach sipwe tongeni féri ena.

7. (a) Ifa usun sipwe tittipeppós le álleasochisi án Jiowa kewe allúk mi pwúng? (b) Ifa usun Ipru 10:24, 25 a menlapei lamoten ach mwichfengen, ákkáeúin lón ach ei fansoun?

⁷ Áeúin, mi lamot sipwe tittipeppós le álleasochisi án Jiowa kewe allúk mi pwúng. Sisap fókkun etiwa án chón ei fénúfan féffér mi limengaw. Áwewe chék, sise tipeeú ngeni sókkun féfférún sikepwach meinisin, kapachelong án mwán me mwán are fefin me fefin pwúpwúlúfengen me pwal féfférúr kewe. (Mat. 19:4, 5; Rom 1:26, 27) Oruuan, mi lamot sipwe sópweló le fiti chienach kewe Chón Kraist le fel ngeni Kot. Sia féri ena ese lifilifil ia sia nóm ie, lón ach kewe Leenien Mwich are lón imwen pwiich kewe are pwal mwo nge lemonomon ika mi lamot. Sisap fókkun úkútiw le fiffiti mwich ese lifilifil met epwe fis. Ren enletin, a fen kon lamot ach sipwe mwichfengen ákkáeúin pokiten “sia silei pwe Ränin ach Samol a arapoto.”​—Álleani Ipru 10:24, 25.

8. Ifa usun ewe pwóróus sipwe esilefetálei epwe tongeni siwil lón mwachkkan?

⁸ Atun ewe riáfféú mi lapalap, ese mwáál epwe siwil masouen ewe pwóróus sipwe esilefetálei. Lón ei fansoun, sia afalafala ewe kapas allim usun án Kot we Mwú, me sia achocho le álisi aramas ar repwe wiliti néún Jesus chón káé. Nge lón ena atun, neman sipwe afalafala eú pwóróus mi fókkun chou me tuwenewen. Ewe Paipel a erá pwe ena pwóróus epwe chék usun útten faú mi féúwatte. (Pwär. 16:21) Neman sipwe esilei pwe án Satan ei ótót epwele kataló. Sipwap silei epwe met sókkun pwóróus sipwe afalafala me ifa usun sipwe afalafala. Itá sipwe esilei ena pwóróus lón ekkewe esin napanapen afalafal sia piin féfféri lap seni ipúkú ier? Are sipwe féri ena angang lón pwal ekkóch napanap? Sise silei, sipwap ppii. Nge ese lifilifil ifa usun sipwe féri ena angang, nge usun itá kich sipwe wisen afalafalafeili án Jiowa pwóróusen kapwúng fán pwora!​—Is. 2:3-5.

9. Eli met ekkewe mwúún fénúfan repwe féri ren ewe pwóróus sia esilefetálei, nge met sia tongeni lúkúlúkú?

⁹ Ese mwáál, ewe pwóróus sipwe esilefetálei epwe efisi án mwúún fénúfan sótun unusen aúkatiw ach angangen afalafal. Mi lamot sipwe lúkúlúk wóón án Jiowa álillis, usun chék ach lúkúlúk wóón an álillis lón ach angangen afalafal lón ei fansoun. Sia tongeni lúkúlúk pwe ach we Kot epwe apéchékkúlakich le apwénúetá letipan.​—Mik. 3:8.

10. Met lape ngeni aramasen fénúfan repwe féri lupwen ra kúna met epwe fis atun ewe riáfféú mi lapalap usun met Lukas 21:25-28 a apasa?

¹⁰ Álleani Lukas 21:25-28. Atun ewe riáfféú mi lapalap, aramas repwe rúké atun repwe kúna tatakkisin mettóch meinisin, ekkewe mettóch tittiper pwe repwe nóm tori feilfeiló wóón ei fénúfan. Repwe kúna “watten riaföü” me repwe niwokkus me ekieki pwe repwele ninniiló lón ena fansoun mi kon eriáfféú lap seni meinisin lón uruwo. (Sef. 1:14, 15) Lón ena atun, ese mwáál nónnómun manaw epwe weiresiló pwal mwo nge fán iten néún Jiowa kewe aramas. Pokiten sia apposa letipach ach sisap angolong lón mwékútúkútún fénúfan, neman sipwe kúna weires. Epwe tongeni fis an epwe péút senikich mettóchuch kewe mi lamot ngeni manawach.

11. (a) Pwata aramas repwe ánna Chón Pwáraatá Jiowa? (b) Pwata ese wor popun ach sipwe niwokkusiti warotoon ewe riáfféú mi lapalap?

 ¹¹ Lón ena atun, ekkewe aramas a fen kataló ar lamalam, ese mwáál repwe song pokiten a chúen nónnóm án Chón Pwáraatá Jiowa lamalam. Sia tongeni anchangei án ekkena aramas achéúfetálei úkúkún ar song, neman wóón ewe Internet. Ekkewe mwúún fénúfan me néúr we sounemenem Satan repwe oputakich pún ach we chék lamalam ese kataló. Esap pwénútá tiper le amóeló lamalam meinisin wóón unusen fénúfan. Iwe, repwe ánnakich. Lón ena atun, mwúún fénúfan repwe wiliti ewe Kok seni Makok. * Repwe mwichfengen pwe repwe maunei néún Jiowa kewe aramas ren unusen ar péchékkúl. (Is. 38:2, 14-16) Neman sia tongeni poputá le lólilen ren met epwe fis atun ewe riáfféú mi lapalap, ákkáeúin pokiten sise silei tichikin met epwe fis lón ena atun. Iwe nge, iei ewe mettóch sia fókkun silei: Ese wor popun ach sipwe niwokkusiti warotoon ewe riáfféú mi lapalap. Jiowa epwe awora ngenikich emmwen pwe sipwe kúna manaw. (Kölf. 34:19) Sipwe tongeni ‘ütä o awenatä mökürach’ pokiten sia silei pwe ach “küna manau a arapoto.” *

12. Ifa usun “ewe chon angang mi allükülük o tipachem” a fen akkammólnakichetá ren met epwe fis lón mwachkkan?

¹² “Ewe chon angang mi allükülük o tipachem” a fen akkammólnakichetá le akkamwéchú ach tuppwél atun epwe fis ewe riáfféú mi lapalap. (Mat. 24:45) A fis ena lón chómmóng napanap, áwewe chék, ach kewe mwichelap lón ekkewe ier 2016, 2017 me 2018. Ekkena mwichelap mi fich lón ach ei fansoun ra fókkun apéchékkúla ekkewe napanap mi lamot ach sipwe eáni lón ach feffeil ngeni ránin Jiowa we. Sipwe enniwili ekkena napanap.

13. Ifa usun sipwe tongeni alapaaló ach tuppwél ngeni Jiowa, me pwata a lamot ach sipwe féri ena iei?

¹³ Tuppwél: Itelapen ewe mwichelap lón ewe 2016 “Akkamwéchú Tuppwél Ngeni Jiowa!” Ena mwichelap a áiti ngenikich pwe ika a péchékkúl ach riri ngeni Jiowa, iwe sipwe tuppwél ngeni. A áchema ngenikich pwe sia tongeni arap ngeni Jiowa ren ach iótek seni enletin letipach me tinikken le káé an we Kapas. Ach féri ena epwe apéchékkúlakich le pworacho ngeni pwal mwo nge ekkewe watteen sóssót. Lón ei fansoun sia fetál ngeni katalóón án Satan ei ótót, epwe tongeni lapóló sóssótun ach tuppwél ngeni Kot me an we Mwú. Ese mwáál, aramas repwe sópweló le turunufasekich. (2 Pet. 3:3, 4) Epwe ákkáeúin fis ena, pokiten sise angolong lón mwékútúkútún án Satan ei fénúfan. Mi lamot sipwe alapaaló ach tuppwél iei pwe sipwe tongeni akkamwéchú ach tuppwél atun ewe riáfféú mi lapalap.

14. (a) Ifa ewe siwil epwe fis ren chókkewe mi wisen emmwen wóón fénúfan? (b) Pwata a lamot ach sipwe tuppwél lón ena atun?

¹⁴ Atun ewe riáfféú mi lapalap, epwe fis och siwil ren ié kewe repwe wisen emmwen wóón fénúfan. Epwe tori ewe atun Kot epwe ochufengeni meinisin ekkewe mi kepit mi chúen nóm wóón fénúfan me epwe uweireló láng  pwe repwe fiti Jesus lón ewe maunen Armaketon. (Mat. 24:31; Pwär. 2:26, 27) Weween pwe ewe Mwichen Soupwúngúpwúng esap chúen nóm rech wóón fénúfan lón ena atun. Iwe nge, ewe mwich mi fókkun chóchó epwe chúen kókkótéch. Ekkewe Chón Kraist mwán mi ásimaw mi lipwákéch me lein ekkewe ekkóch siip repwe wisen emmwen. Mi lamot sipwe pwári ach tuppwél ren ach álleasochisi pwiich kana me fiti ar emmwen mi feito seni Kot. Ach kúna manaw a lóngólóng wóón ena!

15. Ifa usun sipwe alapaaló ach likiitú, me pwata a lamot ach sipwe féri ena iei?

¹⁵ Likiitú: Itelapen ewe mwichelap lón ewe 2017, “Sisap Fangetá!” Ena mwichelap a álisikich le apéchékkúla ach tufichin likiitú fán sóssót. Sia káé pwe ach likiitú ese lóngólóng wóón nónnóméchún manawach. Sia tongeni alapaaló ach likiitú ren ach lúkúlúk wóón Jiowa. (Rom 12:12) Sisap ménúki án Jesus ei pwon: “Iö epwe likitü tori lesopolan epwe küna manau.” (Mat. 24:13) Ena pwon a wewe ngeni pwe mi lamot ach sipwe akkamwéchú ach tuppwél fán sókkopaten weires sia kúna. Ach likiitú fán eú me eú sóssót sia kúna iei, a apéchékkúlakicheló me mwen poputáán ewe riáfféú mi lapalap.

16. Ifa lóngólóngun ach tipepwora, me ifa usun sipwe alapaaló ach tipepwora iei?

¹⁶ Tipepwora: Itelapen ewe mwichelap lón ewe 2018, “Sipwe Tipepwora!” Ena mwichelap a áchema ngenikich pwe ach tipepwora ese lóngólóng wóón pwisin ach tufich. Lupwen sia likiitú, tipepwora mi enlet a pop seni ach lúkúlúk wóón Jiowa. Ifa usun sipwe alapaaló ach lúkúlúk wóón i? Ren ach álleani an we Kapas iteiten rán me ekilonei usun án Jiowa amanawa néún kewe aramas me lóóm. (Kölf. 68:20; 2 Pet. 2:9) Lupwen mwúún aramas repwe maunekich atun ewe riáfféú mi lapalap, mi lamot sipwe tipepwora me fókkun lúkúlúk wóón Jiowa. (Kölf. 112:7, 8; Ipru 13:6) Ika sipwe lúkúlúk wóón Jiowa iei, iwe sipwe tipepwora atun Kok epwe maunekich. *

17. Pwata ese wor popun ach sipwe niwokkus ren warotoon ewe Armaketon? (Ppii ewe sasing wóón péén.)

¹⁷ Ewe lesen mwen ei a fen apasa pwe lape  ngenikich sia fen manaw atun ei ránin lesópwólóón. Nge sia pwal ápilúkúlúkú ach sipwe kúna manaw lón ewe riáfféú mi lapalap. Ewe maunen Armaketon epwe unusen ataieló ótóten ei fénúfan. Iwe nge, ese wor popun ach sipwe niwokkus. Pwata? Pokiten epwe ina án Kot maun. (SalF. 1:33; Is. 38:18-20; Sek. 14:3) Lupwen Jiowa epwe ereni Jesus an epwe poputá le maun, Jesus epwe emmweni néún Kot kewe mwichen soufiu ngeni ena maun. Ekkewe mi kepit mi fen manawsefál me chómmóng chónláng repwe eti le maun. Iir meinisin repwe maunei Satan, néún kewe chónláng mi ngaw, me néúr kewe mwichen soufiu wóón fénúfan.​—Tan. 12:1; Pwär. 6:2; 17:14.

18. (a) Met Jiowa a alúkúlúkú ngenikich? (b) Ifa usun Pwärätä 7:9, 13-17 a alúkúlúkúkich usun mwachkkan?

¹⁸ Iei án Jiowa alúkúlúk ngenikich: “Esap wor och pisekin maun epwe tongeni afeiengauok.” (Ais. 54:17) Néún Jiowa kewe aramas mi tuppwél, iir “eu mwich mi fokun chocho” repwe kúna manaw me “towu seni ewe riaföü mi lapalap.” Mwirin repwe sópweló le angang ngeni Kot. (Álleani Pwärätä 7:9, 13-17.) Ewe Paipel a ngenikich chómmóng popun ach sipwe lúkúlúkú pwe sipwe kúna manaw lón mwachkkan! Sia silei pwe “ewe Samol mi Lapalap a tümwünü chokewe mi allükülük.” (Kölf. 31:23) Meinisin chókkewe mi tongei me mwareiti Jiowa repwe pwapwa le kúna an ánnetatá pinin itan we mi pin.​—Is. 38:23.

19. Ifa ewe ápilúkúlúk mi amwarar sia ápilúkúlúkú ekiseló chék?

¹⁹ Ekieki epwe ifa usun kapasen 2 Timoty 3:2-5 ika sia áweweei napanapen aramas lón ewe ótót sefé ikewe esap chúen wor etipetipaen Satan ie. (Ppii ewe pwóór “ Napanapen Aramas lón Ei Fansoun.”) Iei alon Pwiich George Gangas, ewe mi piin chóni ewe Mwichen Soupwúngúpwúng: “Epwele ia me múrinnéén ei fénúfan lupwen aramas meinisin repwe chón fel ngeni Jiowa! Ekiseló chék kopwe kúna feiéchún óm kopwe manaw lón ewe ótót sefé. Kopwe manaw tori feilfeiló usun chék manawen Jiowa. Sipwe kúna manaw esemuch.” A ifa me amwararen ena ápilúkúlúk!