Jiowa a apéchékkúla ekkena chón afalafal mi tinikken. Lón ena ier, ekkewe colporteurs, ina ekkewe pioneer ra chóchchómmóngóló seni 225 ngeni 350. Me epwe kerán ina ewe áeúin fansoun án lap seni 8,000 chón afalafal repwe waalong néúr repotun afalafal ngeni ewe ofesilap. Jiowa a wesewesen efeiéchúúr.

Lón ewe March 21, 1920, Joseph F. Rutherford, ewe mi wisen emmweni angangen ewe Chón Káé Paipel lón ena atun, a eáni ewe afalafal itelapan “Fite Million mi Manaw Iei Resap Máló.” Ekkena Chón Káé Paipel ra fókkun angang weires le etiwa aramas mi mochen aúseling ena afalafal. Ra rentini eú me lein ekkewe leenien chufengen mi watte seni meinisin lón New York City me ra eineti úkúkún 320,000 som taropween etiwetiw.

A fókkun chómmóng aramas ra etto aúseling ena afalafal. Lap seni 5,000 aramas ra nóm lón ena leenien chufengen, me lap seni 7,000 rese kuchulong. Ewe Watch Tower a erá pwe ina ewe áeúin mwich mi fókkun watte mi wesewesen oururu aramas.

Ekkewe Chón Káé Paipel ra silleló ren ar esilei pwe “fite million mi manaw iei resap máló.” Lón ena fansoun, rese unusen weweiti aúchean án pwóróusen ewe Mwú epwe esilefeil wóón unusen fénúfan. Nge ra mmen tinikken. Ida Olmstead, a poputá le fiffiti ekkewe mwich lón ewe ier 1902, a erá, “Aua silei pwe a fókkun chómmóng ekkewe feiéch mi mmólnetá fán iten aramas meinisin, me aua fókkun tinikken le esilei ena pwóróus allim ngeni chókkewe aua chuuriir lón ewe angangen afalafal.”

Ren an epwe chék wokkor mwéngé lón pekin ngún, pwiich kewe lón Bethel ra poputá le pwisin peresei ekkóch puk. Ra mééni ekkóch mwesinen peres me ra anómu lón eú imw tekia ra rentini lón 35 Myrtle Avenue, Brooklyn, New York, kkan ngeni Bethel.

Leo Pelle me Walter Kessler ra poputá le angang lón Bethel lón January 1920. Iei met Walter a chemeni: “Atun aua war, ewe chónemmwenin ewe peres a nengenikem me erenikem, ‘A wor eú esopw awa mwen mwéngéén leolowas.’ Iwe, a ewisa ngenikem ám aupwe amwékútúetá ekkóch pwórun puk seni eú ruumw fán ewe imw tekia.”

Leo a chemeni met a fis sorotáán ena rán: “Ra ewisa ngenikem ám aupwe télú etippen áeúin sássárin lón ewe imw tekia. Use kúkkúna ena sókkun  limengaw fán eú. Nge ina án ewe Samol angang, iwe ina met mi kon aúchea.”

Mwirin chék fitu wiik, ekkewe chón afalafal mi tinikken ra poputá le peresei The Watch Tower. A peres wone ngeréú kapiin The Watch Tower minen February 1, 1920 wóón ewe mwesinen peres wóón oruuen sássárin ewe imw. Nge ren ekis fansoun, ekkewe mwán ra anómu eú mwesinen peres lón ewe ruumw fán ewe imw tekia, nge ra eita ngeni ena peres “Battleship.” Lepoputáán April 14, 1920, a pwal katowu kapiin The Golden Age. Ese fókkun wor tipemwaramwar pwe Jiowa a efeiéchú achochoon ekkena chón angang mi tipemecheres.

Néún Jiowa kewe aramas mi tuppwél ra kan pwapwaiti ewe angang mi kerán poputásefál me ar chiechifengen. Iwe nge, ekkóch Chón Káé Paipel ra likitaló ewe mwicheich atun ekkewe fansoun osukosuk seni ekkewe ier 1917 ngeni 1919. Iwe met pwiich kana ra féri pwe repwe álisiir?

A wor eú lesen itelapan, “Let Us Dwell in Peace” (“Sipwe Nómfengen Fán Kinamwe”) lón The Watch Tower minen April 1, 1920. A pese ngeniir fán tong: “Aua lúkú . . . pwe meinisin chókkewe mi nóm rer án ewe Samol we ngún mi fel . . . ra tipemecheres le ménúkaaló ekkewe mettóch mi nóm lúkúsékúrúr, . . . pwe repwe nómfengen fán tipeeú me sópweló le eáni eú chék inis.”

Chómmóng me leir ra etiwa ekkena kapas mi fiti tong. Iei met eú pean pwúpwúlú ra makkeei: “A naf ngenikem ekkewe fitu ier ra ló aua mwáálliló ren ám chék nómun lamotongaw lón án ekkewe ekkóch féfféri ewe angangen [afalafal]. . . . Aua áneán pwe amwo itá ausap fókkun mwálech.” A chómmóng án ekkena chón angang mi liwinsefál angang mi mmólnetá fán iter.

Lón ewe June 21, 1920, ekkewe Chón Káé Paipel ra poputááni eú angangen campaign mi fókkun watte le eineti ewe “ZG,” ina eú puk itelapan The Finished Mystery. * Chómmóng ekkena puk ra fen iseiseló atun a pinepin ena puk lón ewe 1918.

Meinisin chón afalafal, esap chék ekkewe  pioneer, ra ketiw le fiti ewe angangen einet. Edmund Hooper a erá: “Meinisin chón afalafal mi papatais lón eú me eú mwichefel mi tongeni fiti, nge repwe fiti fán pwapwa. Epwe iei án emén me emén mwitún: ‘Eú mettóch ua féri,’ ina einetin ewe ZG.” Edmund Hooper a pwal chemeni pwe ena campaign ina ewe áeúin fansoun án chómmóng repwe afalafal imw me imw. A pwal erá: “Aua poputá le unusen mirititi met a kapachelong lón ena angang, ewe angang epwe chéúló lap seni met aua ekieki.”

Pokiten a weires pwóppwóróusfengen me ekkewe Chón Káé Paipel lón ekkóch fénú atun ewe Áeúin Maunen Fénúfan, iwe Pwiich Rutherford a mochen apéchékkúla pwiich kana me akkótasefáli ewe angangen afalafal. Iwe lón ewe August 12, 1920, i me fémén Chón Kraist mwán ra sái ngeni England me pwal chómmóng fénú ren fitu fansoun.

Atun Rutherford a tori England, ekkewe Chón Káé Paipel ra féri úlúngát mwichelap me 12 mwich fán iten aramas meinisin. Úkúkún kapachelapen chón fiti, 50,000. Iei met The Watch Tower a menlapei usun masouen án Rutherford chuuri pwiich kana lón England: “Pwiich kewe ra péchékkúletá. Ra chiechifengen me angangfengen, me ina met a apwapwaar.” Pwiich Rutherford, a pwal eáni ewe afalafal lón Paris, itelapan “Fite Million mi Manaw Iei Resap Máló.” Atun a poputá an we afalafal, ewe leenien mwich a wesewesen ur. Úlúpúkú aramas ra pwal tingor ekkóch pwóróus.

Lón ekkewe fitu wiik mwirin, Rutherford me chienan kewe ra ló ngeni Athens, Cairo, me Jerusalem. Ren ar repwe liwiniti chókkewe mi pwapwaiti ewe enlet lón ekkena leeni, Pwiich Rutherford a fératá eú leenien iseis puk lón eú sóópw itan Ramallah, kkan ngeni Jerusalem. A pwal liwiniti Iurop pwe epwe poputááni eú keangen ofesilap lón Central Europ me akkóta peresin ekkewe puk me ikkena.

Lón September 1920, ekkewe Chón Káé Paipel ra atowu The Golden Age No. 27, eú lesen mi aúchea mi pwári ewe riáfféúmwáál ekkewe Chón Káé Paipel ra kúna lón ewe 1918. Ewe mwesinen peres itan “Battleship,” sia fósun me mwan, a peresei lap seni rúáánú million kapiin ena puk lerán me lepwin.

Chón álleani ena puk ra silei seni ena puk usun pwóróusen án Emma Martin we case. Fefinach Martin i emén pioneer lón San Bernardino,  California. Lón ewe March 17, 1918, i me úlúmén mwán Chón Kraist iter, E. Hamm, E. J. Sonnenburg, me E. A. Stevens, ra fiti eú mwich án ekkewe Chón Káé Paipel.

Emén mwán mi nóm lón ena mwich, ese fiti ren an epwe káé ewe Paipel. Iei met a pwári mwirin: “Ua ló ngeni ena mwich . . . fán emmwenien ewe souallúkún mwú. Popun ai ló ikena pwe upwe kútta pisekin ánnet.” Iwe ena mwán a angei ewe “pisekin ánnet” a kúkkútta, eú kapiin ewe puk The Finished Mystery. Mwirin fitu rán, Fefinach Martin me ekkewe úlúmén mwán Chón Kraist ra ares. Ra etipisiir pwe itá nge ra atai eú allúk ren ar eineti kapiin ena puk mi pinepin.

A kapwúngúló pwe Emma me chienan kana mwán ra tipis me repwe kalapus úkúkún úlúngát ier. Fán fite ra fókkun tingorei ewe imwen kapwúng an epwe siwili pwúngúlóón ar we kapwúng, nge ese fókkun fis. Iwe lón May 17, 1920 ra kalapus. Nge ekiseló chék a fis eú siwil mi múrinné.

Lón June 20, 1920, Pwiich Rutherford a apwóróusa pwóróuseer lón eú mwichelap lón San Francisco. Ekkewe chón fiti ra fókkun máirú ren met ra féri ngeni ekkena Chón Kraist, iwe ra tinaló eché taropwe ngeni ewe presetenin Merika. Ra makkeei: “Ámi kalapusei . . . Emma Martin . . . fán ewe allúkún Espionage ese fókkun pwúng . . . Féfférún ekkewe Federal polis le. . . ssárei . . . Emma Martin . . . me mwirin tipimwáál ngeni pwe a atai allúk pwe oupwe tongeni kalapusei, me rem . . . a mmen fókkun mwáál.”

Sorotáán ena rán, President Woodrow Wilson a mwittir omusaawu Emma Martin me Pwiich Hamm, Sonnenburg, me Stevens. A wes ar kalapus mwáál.

Lemuchúlóón ewe 1920, a chómmóng popun án ekkewe Chón Káé Paipel repwe pwapwa. Ewe angang lón ewe ofesilap a sópwósópwóló le lallapóló, ekkewe Chón Kraist mi enlet ra tinikken le esilefeili pwe Mwúún Kot chék a tongeni ataweei án aramas kewe osukosuk. (Mat. 24:14) Lón ewe ier mwirin, epwe fen kon lap án ekkewe Chón Káé Paipel esilefeili ewe enlet usun ewe Mwú.