1. Pwata sia silei pwe ewe angangen álisi aramas le wiliti néún Jesus chón káé, ina eú angangen amanawa aramas?

EWE angangen álisi aramas le wiliti néún Jesus chón káé, ina eú angangen amanawa aramas! Pwata sia silei ena? Lupwen Jesus a eáni ewe allúk mi mak lón Mateus 28:19, 20, NW, a erá: ‘Oupwe feiló me asukula aramas . . . pwe repwe wiliti chón tapwoto mwiri, me papataisiir.’ Ifa lamoten án emén epwe papatais? Ika sia mochen kúna manaw, mi lamot sipwe papatais. Mi lamot ekkewe chón papatais repwe lúkú pwe amanaw a chék tufich pokiten án Jesus máló fán itach me manawsefál. Esap pwata iwe ewe aposel Petrus a ereni chienan kewe Chón Kraist: “Papatais [a] amanauakemi iei . . . ren än Jesus Kraist manausefäl.” (1 Pet. 3:21) Iwe lupwen emén mineféén chón káé a papatais a tongeni eáni ewe ápilúkúlúkún manaw esemuch.

2. Me ren 2 Timoty 4:1, 2 itá met sókkun chón afalafal sipwe wiliti?

² Ren ach sipwe álisi aramas le wiliti néún Jesus chón káé, a lamot sipwe ámúrinnééló tufichich lón ach “angangen asukul.” (Álleani 2 Timoty 4:1, 2.) Pwata? Pokiten Jesus a allúkú ngenikich: ‘Oupwe feiló me asukula aramas . . . pwe repwe wiliti chón tapwoto mwiri . . . Oupwe asukuler.’ Ewe aposel Paulus a erá pwe “Kopwe likitü” lón ena angang, “are kopwe föri iei usun, kopwe püsin amanauok me chokewe mi aüselingok.” Ina popun, Paulus a erá: “Kopwe . . . tümwünü mine ka afalafal won.” (1 Tim. 4:16) Pokiten ewe angangen asukul a riri ngeni ach álisi aramas le wiliti néún Kraist chón káé, iwe sia mochen ach sipwe fókkun lipwákéch lón ena angang.

3. Met sipwe pwóróus wóón lón ei lesen usun ach káé ngeni aramas?

 ³ Sia káé ngeni fite million aramas ewe Paipel wóón unusen fénúfan. Nge usun met a mak lón ewe lesen mwen ei, sia mochen silei ifa usun sipwe tongeni álisi chómmóng me leir ar repwe wiliti néún Jesus Kraist chón káé mi papatais. Lón ei lesen, sipwe pwóróus wóón pwal nimu mettóch mi lamot emén me emén chón afalafal epwe féri ren an epwe álisi néún chón káé le feffeitá me papatais.

4. Pwata itá ewe chón afalafal esap kapas chómmóng atun a káé ngeni emén? (Pwal ppii ewe footnote.)

⁴ Sia aúcheani minne sia asukula ngeni aramas seni án Kot Kapas. Ina popun, eli sipwe mochen kapas chómmóng usun. Iwe nge, itá ewe chón emmwen esap kapas chómmóng, ese lifilifil ika a emmweni Káéén Ewe Leenien Mas, Án ewe Mwichefel Káéén Paipel, are a káé ngeni aramas lón imwer. Ren án ewe chón afalafal epwe mut ngeni ewe Paipel an epwe wisen asukula ewe chón káé, mi lamot epwe túmúnú an esap kapas chómmóng me áwewe ngeni meinisin met a silei usun eú wokisin are pwóróus. * (Joh. 16:12) Aléllééi sileom usun ewe Paipel lupwen ka kerán papatais ngeni sileom iei. Ese mwáál me lóóm ka chék weweiti ekkewe popun afalafal seni Paipel. (Ipru 6:1) Minne ka silei iei ka fen káé mwirin fite fite ier. Ina popun, kosap sótun áiti ngeni noum we minefé chón káé meinisin fán eú chék.

5. (a) Me ren 1 Tesalonika 2:13, met sia mochen án néúch we chón káé epwe weweiti seni an káé? (b) Ifa usun sipwe álisi néúch we chón káé le uwawu meefian wóón met a káé?

⁵ Sia mochen án néúch we chón káé epwe weweiti pwe minne a káé a feito seni án Kot we Kapas. (Álleani 1 Tesalonika 2:13.) Ifa usun sipwe féri ena? Pesei ewe chón káé an epwe uwawu meefian wóón minne a kákkáé. Tingorei an epwe áweweei ngonuk ekkóch ekkewe wokisin lap seni óm pwisin áweweei iteitan. Álisi an epwe kúna ifa usun ekkewe wokisin seni Paipel a weneiti pwisin manawan. Eáni ekkewe kapas eis epwe álisi le uwawu meefian me ekiekin usun ekkewe wokisin a álleani. (Luk. 10:25-28) Áwewe chék, eisini: “Ifa usun ei wokisin a álisuk le kúna eú me lein napanapen Jiowa kewe?” “Ifa usun minne ka kerán káé seni Paipel a álisuk?” “Met meefiom usun met ka kerán káé?” (SalF. 20:5) Úkúkún án emén chón káé aúcheani me apwénúetá met a silei, ina met a kon lamot lap seni úkúkún silean.

6. Pwata a éch ach sipwe uwei emén chón afalafal mi lipwákéch an epwe fitikich le káé ngeni néúch chón káé?

 ⁶ Ka fen uwei ekkóch chón afalafal mi lipwákéch ar repwe fituk le káé ngeni noum we chón káé? Ika ewer, ka tongeni eisiniir meefier usun napanapen óm emmweni ewe káé, me ika ka mut ngeni ewe Paipel an epwe wisen asukula ewe chón káé. A lamot kopwe tipetekison ika ka mochen lipwákéchúló lón óm angangen asukul. (Apépé ngeni Föför 18:24-26.) Mwirin, eisini ena chón afalafal mi lipwákéch ika ewe chón káé a liapeni met a káé. Ka pwal tongeni tingorei ika a tongeni wisen káé ngeni noum we chón káé ika kosap nóm ren eú are fitu wiik. Óm féri ena epwe efisi sópwósópwólóón ewe káé, me epwe ámmeef ngeni lamoten an káé. Kosap ekieki pwe noum chék ena chón káé me ese pwal wor emén a tongeni káé ngeni. Pún ka mochen met epwe échiti ewe chón káé pwe epwe tongeni feffeitá lón an kákkáé ewe enlet.

7. Met epwe álisi ewe chón káé le aúcheani minne a kákkáé?

⁷ A lamot ewe chón káé epwe kúna pwe ka aúcheani me lúkú áitien Paipel kewe. (1 Tes. 1:5) Iwe, ese mwáál epwe pwal pwapwaiti minne a káé. Eli ka tongeni apwóróusa ngeni ifa usun ewe Paipel a fen álisuk lón manawom. Iwe, epwe mirititi pwe ewe Paipel a pwal tongeni álisi.

8. Met ka pwal tongeni féri le álisi noum chón káé, me pwata kopwe féri?

⁸ Atun ámi káé, apwóróusa ngeni pwóróusen ekkóch chienach kewe mi fen eáni ewe esin osukosuk a pwal eáni nge ra okkufu. Ka tongeni uwei emén seni ewe mwichefel eli pwóróusan epwe álilliséch ngeni ewe chón káé. Are kopwe kútta pwóróusen manawen pwiich kewe mi apéchékkúl lón jw.org fán ewe itelap “The Bible Changes Lives.” * Ekkena esin pwóróus me video repwe álisi noum chón káé le mirititi pwe ewe Paipel a tongeni ámúrinnééló manawan.

9. Ifa usun ka tongeni pesei noum we chón káé le apwóróusa ngeni chón an famili me chienan kewe minne a káé?

⁹ Ika ewe chón káé mi pwúpwúlú, pwúlúwan we a pwal káé? Ika aapw, etiwa pwúlúwan na an epwe fiti ewe káé. Pesei noum we chón káé an epwe apwóróusa ngeni chón an famili me chienan kewe minne a káé. (Joh.  1:40-45) Ifa usun? Ka tongeni eisini: “Ifa usun kopwe áweweei ei pwóróus ngeni chón óm famili?” are “Menni wokisin kopwe néúnéú le ánnetatá ngeni chienom ena pwóróus?” Ika ka féri ena, ka ákkáiti noum chón káé an epwe wiliti emén chón afalafal. Ika a fich ngeni an epwe emén chón afalafal esaamwo papatais, iwe a tongeni poputá le fiti chón ewe mwichefel le afalafal. Ka tongeni eisini ika a silei emén mi mochen káé Paipel. Ika ena chón káé a silei, kopwe mwittir chuuri ena emén me eisini ika a mochen káé. Akkattola ngeni ewe video itelapan Met A Fiffis lón eú Káéén Paipel? *

10. Ifa usun emén chón afalafal a tongeni áppirú Paulus usun met a mak lón 1 Tesalonika 2:7, 8?

¹⁰ A lamot ekkewe chón afalafal repwe tongei me áfánni néúr kewe chón káé. Ekieki pwe ra tongeni wiliti chón ach famili lón pekin lúkú. (Álleani 1 Tesalonika 2:7, 8.) Ese mecheres ngeniir ar repwe likitaló chiechier kewe me féri chómmóng siwil lón manawer ren ar repwe angang ngeni Jiowa. A lamot sipwe álisiir le kúnékún chiechi mi múrinné me lón ewe mwichefel. Kopwe chiechi ngeni noum we chón káé esap chék atun oua káé Paipel nge lón pwal ekkóch atun. Óm kéri wóón phone, text ngeni, are áámwa a pwári pwe ka wesewesen chúngú.

11. Met sia mochen án néúch kewe chón káé repwe kúna me lón ewe mwichefel, me pwata?

¹¹ Iei met eú mwitún a apasa: “A lamot álillisin meinisin chón ewe sóópw lón kámáárin emén semirit.” Iwe sia tongeni apasa: “A lamot álillisin meinisin chón ewe mwichefel le álisi emén le wiliti néún Jesus chón káé.” Ina popun ekkewe chón afalafal mi lipwákéch ra álisi néúr kewe chón káé le sissilei pwal ekkewe ekkóch lón ewe mwichefel, iir mi tongeni álisiir le chiechiéch ngeni Jiowa. Ekkewe chón káé ra tongeni pwapwaiti ar chiechi ngeni néún Kot kewe aramas, chókkewe mi tongeni apéchékkúler lón pekin lúkú me memmeef. Sia mochen ámmeef ngeni emén me emén chón káé pwe iir ra kapachelong lón ewe mwichefel me ach famili lón pekin lúkú. Sia mochen pwe ach we tongen pwipwi epwe lukiireto. Iwe epwe mecheres an epwe úkútiw le chiechi ngeni chókkewe rese álisi le tongei Jiowa. (SalF. 13:20) Ika chienan kewe me lóóm ra oputa, iwe epwe silei pwe a tongeni kúnékún chiechian mi enlet lón án Jiowa we mwicheich.​—Mark. 10:29, 30; 1 Pet. 4:4.

12. Pwata a lamot ach sipwe fóffós ngeni néúch we chón káé usun án emén fangóló manawan me papatais?

¹² A lamot óm kopwe fóffós ngeni noum we chón káé usun lamoten án emén epwe fangóló manawan ngeni Jiowa me papatais. Ren enletin, ewe popun sia káé ngeni aramas pwe sipwe álisiir le angang ngeni Jiowa me papatais. Mwirin fitu maramen an kákkáé Paipel iteitan, nge ákkáeúin ika a fen poputá le fiffiti mwich, mi lamot an epwe weweiti pwe sia mochen álisi le wiliti emén Chón Pwáraatá Jiowa.

13. Met a lamot emén chón káé epwe féri pwe epwe tongeni papatais?

¹³ A wor fitu mettóch emén chón káé mi mochen papatais a tongeni féri. Akkomw, epwe sissilei Jiowa, tongei me lúkú i. (Joh. 3:16; 17:3) Ewe chón káé epwe ámááraatá an riri ngeni Jiowa me pwal chón ewe mwichefel. (Ipru 10:24, 25; Jas. 4:8) Iwe ló, ló, ló, ewe chón káé epwe likitaló féfférún kewe mi ngaw me aier seni an kewe tipis. (Föf. 3:19) Pwal och, an lúkú a amwékútú an epwe afalafala ewe enlet ngeni ekkewe ekkóch. (2 Kor. 4:13) Mwirin, epwe fangóló manawan ngeni Jiowa me papatais. (1 Pet. 3:21; 4:2) A ifa me apwapwaan ena rán ngeni meinisin! Lupwen ewe chón káé a akkachocho le apwénúetá eú me eú ekkena mettóch ren an epwe papatais, kopwe akkapúnga me peppesei le sópweló lón an achocho.

14. Ifa usun emén chón afalafal a tongeni etittina feffeitáán emén chón káé?

¹⁴ A lamot ach sipwe mosonottam le álisi néúch we chón káé le feffeitá le fangóló manawan me papatais. Nge a pwal lamot ach sipwe silei ika a mochen angang ngeni Jiowa Kot. Ka tongeni esilla ika ewe chón káé a achocho le álleasochisi án Jesus kewe allúk? Are a chék mochen kákkáé ekkewe pwóróus seni Paipel?

15. Ifa usun ewe chón afalafal epwe silei ika néún we chón káé a feffeitá me fich ngeni an epwe papatais?

¹⁵ Kopwe kan ekketittina feffeitáán ewe chón káé. Áwewe chék, a kan pwári meefian usun Jiowa? A kan iótek ngeni? (Kölf. 116:1, 2) A sani an ákkálleani ewe Paipel? (Kölf. 119:97) Mi kan fiffiti ekkewe mwich? (Kölf. 22:22) A fen féri ekkóch siwil lón manawan? (Kölf. 119:112) A poputá le afalafal ngeni chón an famili me chiechian kewe? (Kölf. 9:1) Lap  seni meinisin, a mochen wiliti emén Chón Pwáraatá Jiowa? (Kölf. 40:8) Ika ewe chón káé ese feffeitá lón ekkena mettóch, iwe fán súfél kopwe ppii ewe popun, me mwirin kopwe pwóróus ngeni usun fán kirekiréch fiti wenechar. *

16. Ineet atun kopwe úkútiw le káé ngeni emén?

¹⁶ Fán ekkóch kopwe etittinok ika kopwe chúen sópweló le káé ngeni emén. Pwisin eisinuk: ‘Ewe chón káé ese kan ammólnatá an káé? Ese mochen fiffiti mwich? A chúen eáni féffér mi ngaw? A chúen chóni eú lamalam chofona?’ Ika ewer, óm sópweló le káé ngeni epwe usun óm áiti emén á nge ese mochen chéchchén! Ika ewe chón káé ese wesewesen aúcheani minne a káé, me ese mochen féri siwil, iwe pwata kopwe sópweló le káé ngeni?

17. Met mi lamot meinisin chón afalafal repwe féri me ren 1 Timoty 4:16?

¹⁷ A fókkun aúchea ngenikich ach sipwe apwénúetá wisach le álisi aramas le angang ngeni Jiowa, me sia mochen álisi néúch kewe chón káé le feffeitá me papatais. Ina popun sipwe mut ngeni ewe Paipel an epwe wisen asukul, me sipwe pwári pwe sia aúcheani me lúkú minne sia asukula. Sipwe pesei ewe chón káé an epwe chiechi ngeni chón ewe mwichefel. Me sipwe fóffós usun an epwe achocho le fangóló manawan me papatais. Fán ekkóch sipwe ekketittina feffeitáán ewe chón káé. (Ppii ewe pwóór itelapan, “ Minne mi Lamot Ekkewe Chón Afalafal Repwe Féri le Álisi Néúr Kewe Chón Káé le Papatais.”) Sia pwapwa le álillis lón ei angang mi amanawa aramas! Sia mochen féri úkúkún ach tongeni le álisi néúch kewe chón káé ar repwe feffeitá me papatais.