ATUN ewe Oruuen Maunen Fénúfan, iei met emén soufiun Nazi a ereni fitemén Chón Pwáraatá Jiowa fán an song: “Ika emén me leimi ese mochen maun ngeni France are England, iwe ámi meinisin oupwe máló!” Inaamwo ika a wor fitemén soufiun Nazi ra útá únúkkúr fán néúr pistor, nge ese wor emén me lein chienach kana ra fangetá. A ifa me pworaar! Minne ra féri, a pwári meefien Chón Pwáraatá Jiowa ei usun maun: Sise fókkun fiti ekkewe maun mi fis wóón ei fénúfan. Sise peni epek lón osukosuken ekkewe mwúún fénúfan, inaamwo ika aramas ra erá pwe repwe nikicheló ika sise fiti maun.

1. NÉÚN KOT KEWE ARAMAS IIR SENI EÚ CHÉK MWÚ

Me lóóm, Jiowa a filatá eú chék mwú an epwe néún, ina ewe mwúún Israel. A kér ngeniir “nei aramas.” (Eks. 19:5) Jiowa a pwal ngeniir pwisin fénúer. Iwe atun i a allúkú ngeniir ar repwe ló maun ngeni ekkewe mwú únúkkúr, esap weween pwe ra maunei are nieló chókkewe mi pwal fel ngeni. a

Lón ei fansoun, chókkewe mi fel ngeni Jiowa ra feito seni “sokopaten mwich, ainang, mwü me kapas meinisin.” (Pwär. 7:9) Ika néún Kot kewe aramas ra fiti maun, ra tongeni fiu ngeni are pwal  mwo nge nieló chiener kewe iir mi pwal fel ngeni Jiowa.

2. JIOWA A ALLÚKÚ NGENI EKKEWE CHÓN ISRAEL AR REPWE MAUN

Me lóóm, Jiowa a filatá ineet me pwata a lamot án ekkewe chón Israel repwe ló maun. Áwewe chék, a ereni ekkewe chón Israel ar repwe maunei ekkewe chón Kanaan, iir mi iteféúló lón ar fel ngeni ekkewe chónláng mi ngaw, féri féfférún lisowumwáál mi ssenúk, me eáni asor semirit. Jiowa a ereni ekkewe chón Israel ar repwe arosaló ekkewe aramas mi féfféri ekkena mettóch mi ngaw lón ewe Fénúen Pwon, pwe rete pwal áppirúúr. (Lif. 18:24, 25) Mwirin án ekkewe chón Israel tolong lón ewe Fénúen Pwon, fán ekkóch, Kot a mut ngeniir ar repwe túmúnú fénúer we ren ar maun ngeni chón oputer kewe. (2 Sam. 5:17-25) Iwe nge, esap fán eú án Jiowa mut ngeniir ar repwe pwisin filatá ika repwe maun. Ika ra féri ena, repwe chék fókkun sópwongaw.​—Num. 14:41-45; 2 Kron. 35:20-24.

Lón ei fansoun, Jiowa ese kan ereni aramas ar repwe maun. Mwúún aramas ra chék maun pwe repwe apwénúetá mocheniir, nge esap fán iten Kot. Eli ra maun wóón fénú, moni, are ra mochen án aramas repwe fitiir lón ar ekiek epwe chééché lón pekin politics. Nge ifa usun ren chókkewe mi erá pwe ra maun fán iten Kot pwe repwe túmúnú ar lamalam are nieló chón oputa Kot? Jiowa epwe túmúnú chókkewe mi fel ngeni lón enlet me nieló chón oputa i lón ewe maun epwe fis lón mwachkkan, ina ewe maunen Armaketon. (Pwär. 16:14, 16) Jesus chék me ekkewe chónláng, iir néún Kot kewe soufiu repwe wisen maun lón ena maun, nge esap chókkewe mi fel ngeni i wóón fénúfan.​—Pwär. 19:11-15.

3. EKKEWE CHÓN ISRAEL RA AMANAWA CHÓKKEWE MI PWÁRI AR LÚKÚ JIOWA

Me lóóm, fán chómmóng ekkewe soufiun Israel ra úméúméch ngeni chókkewe mi lúkú Kot, nge ra nieló chókkewe Jiowa a apwúngaló pwe repwe ninniiló. Áwewe chék ren ekkeei ruu pwóróus. Inaamwo ika Jiowa a allúkú pwe Jeriko  epwe kataló, nge ekkewe chón Israel ra amanawa Rahap me chón leimwan pokiten an lúkú. (Jos. 2:9-16; 6:16, 17) Lón pwal eú atun, meinisin ekkewe chón Kipeon ra kúna manaw pokiten a watte ar niwokkus Kot.​—Jos. 9:3-9, 17-19.

Lón ei fansoun, ekkewe soufiu rese ekieki ika ra nieló chókkewe mi wor ar lúkú Kot, are pwal mwo nge ekkewe esap iir soufiu.

4. A LAMOT ÁN EKKEWE CHÓN ISRAEL REPWE ÁLLEASOCHISI ÁN KOT KEWE ALLÚK USUN MAUN

Me lóóm, Jiowa a allúkú ngeni ekkewe soufiun Israel ar repwe maun alóngólóng wóón an kewe emmwen. Áwewe chék, fán ekkóch Kot a ereniir ar repwe akkomw eáni “eu pwonen kinamwe” ngeni chón oputer kewe. (Tut. 20:10) Jiowa a pwal allúkú ngeni ekkewe soufiu ar repwe limeliméch me álleasochisi an kewe allúk usun manaw mi liméch. (Tut. 23:9-14) Fán chómmóng, ekkewe mwichen soufiu seni ekkewe mwú únúkkúr ra kan reipei ekkewe fefin seni ekkewe telinimw ra okkufuur, nge Jiowa a allúkú ngeni ekkewe soufiun Israel ar resap féri ena. Me emén soufiun Israel epwe chék tongeni pwúlúweni emén fefin mi eoló eú maram mwirin ar okkufu telinimwan.​—Tut. 21:10-13.

Lón ei fansoun, chómmóng fénú ra sainei taropween etipeeú mi aúkúkú ar angangen maun. Inaamwo ika ekkena etipeeú ra ffér pwe epwe túmúnú chókkewe esap iir soufiu, nge fán chómmóng ekkewe mwú ra atai ena etipeeú.

5. KOT A MAUN FÁN ITEN NÉÚN KEWE ARAMAS

Me lóóm, Jiowa a wisen maun fán iten ekkewe chón Israel, me fán chómmóng a féri manaman pwe repwe tongeni win lón maun. Áwewe chék, ifa usun Jiowa a álisi ekkewe chón Israel le okkufu ewe telinimw Jeriko? Fán emmwenian, atun ekkewe chón Israel ra ‘leüömong le arükak, ewe tit a turutiu,’ iwe a ámecheresi ar repwe tééki ena telinimw. (Jos. 6:20) Me ifa usun ra win lón ar maun ngeni ekkewe chón Amor? “Ewe Samol mi Lapalap a apüngätiu ütten fau mi watte wor seni läng . . . Iwe, a wor chomong mi mäla pokiten ewe ütten fau, lap seni chokewe ekewe re Israel ra nirela ren ketilas.”​—Jos. 10:6-11.

CHÓN KRAIST MI ENLET RA ACHOCHO LE KINAMWEFENGEN ME ARAMAS

Sia fen káé pwe nónnómuch lón ach ei fansoun a wesewesen sókko seni nónnómun ekkewe chón Israel lóóm. Iwe nge, esap chék ikkena ekkewe popun sise fiti maun. A wor pwal ekkóch popun. Áwewe chék, Kot a oesini pwe lón ekkewe ránin lesópwólóón, chókkewe mi káit me ren I resap “chüen kaiö maun,” me resap pwal mwo ngeni fiti maun. (Ais. 2:2-4) Pwal och, Kraist a erá pwe néún kewe chón káé rese “pop seni ei fanüfan,” weween resap peni epek lón osukosuken ekkewe mwúún fénúfan.​—Joh. 15:19.

Kraist a pese ngeni néún kewe chón káé pwal och mettóch ar repwe féri. A ereniir ar resap eáni ekkewe napanap epwe emmweni ngeniir tipengaw, song, me maun. (Mat. 5:21, 22) Pwal och, a ereniir ar repwe “afisätä kinamwe” me tongei chón oputer.​—Mat. 5:9, 44.

Nge ifa usun sia tongeni apwénúetá ena? A ffat pwe saminne si mochen fiti maun, nge met, a wor emén lón ewe mwichefel sia oputa? Sipwe achocho le péútaaló ena esin memmeef mi nóm rech.​—Jas. 4:1, 11.

Sise angolong lón án chón fénúfan kewe maun. Nge sia fen achocho le eáni kinamwe me tong lefilach. (Joh. 13:34, 35) Amwo sipwe úppós lón ach sisap peni eú pekin, nge sipwe ésúkúsúkú ewe atun Jiowa epwe arosaló maun tori feilfeiló.​—Kölf. 46:9.