1-2. (a) Ikkefa ekkewe mettóch eli néún Jiowa kewe aramas ra tipemwárámwáreiti? (b) Met sipwele káé lón ei lesen?

 ARAMAS meinisin, watte are kúkkún, a wor ar tipemwárámwár a fán ekkóch. Áwewe chék, anchangei emén chón afalafal sáráfé eli a ekieki iká Jiowa mi enletin tongei. Eli a tipemwárámwár iká epwe papatais. Are, ekieki ussun emén Chón Kraist mwán mi mwukóló, mi filaatá lesáráféén an epwe akkomwa an angang ngeni Jiowa lap seni an epwe eáni eú angangen moni. Nge iei a mwukóló, me a wor ekis chék néúr moni mi atufichi osupwangen an we famili. Iwe eli a ekieki iká mi pwúng met a eáni kefil lesáráféén. Anchangei emén chinnap fefin ese kon chúen péchékkúl, eli a meefi letipengaw pokiten ese chúen tongeni féri met a tongeni féri lóóm. En mi fen piin eisinuk ekkeei esin kapas eis: ‘Jiowa mi wesewesen kúnaei? Mi wor aúchean minne úa pennúkúóló fán iten Jiowa? Úa chúen tongeni féri ekkewe angang fán iten Jiowa?’

² Iká sise pélúweni ekkena esin kapas eis, iwe ra tongeni efisi an epwe apwangapwangoló ach lúkú Jiowa, pwal mwo nge úkútiw le angang ngeni. Lón ei lesen, sipwe káé ekkewe kapasen emmwen mi tongeni álisikich iká sia tipemwárámwár (1) iká Jiowa mi tongekich, (2) iká mi pwúng ekkewe kefil sia eáni lóóm, are (3) iká sia chúen tongeni féri ekkewe angang fán iten Jiowa.

MINNE A TONGENI ÁLISIKICH IKÁ SIA TIPEMWÁRÁMWÁR

3. Met sia tongeni féri pwe sipwe tongeni okkufu ach tipemwárámwár?

³ Eú alen ach sipwe tongeni okkufu ach tipemwárámwár,  ina ach seppiti án Kot we Kapas me kútta pélúwen ach kewe kapas eis seni. Iká sia féri ena, ach lúkú Jiowa me ach riri ngeni epwe péchékkúleló, me sipwe tongeni “úppós lón ewe lúkú.”—1 Kor. 16:13.

4. Ifa ussun sipwe “etittinafichi mettóch meinisin”? (1 Tesalonika 5:21)

⁴ Álleani 1 Tesalonika 5:21. Ewe Paipel a pesekich ach sipwe “etittinafichi mettóch meinisin.” Ifa ussun sia tongeni féri ena? Sipwe chekifichi iká mi enlet met sia eáni lúkú ren ach apépé ngeni met ewe Paipel a apasa. Áwewe chék, ekieki ewe sáráfé mi ekieki pwe ese aúchea me ren Kot. Epwe chék lúkúoló pwe a pwúng an na ekiek? Aapw, itá epwe “etittinafichi mettóch meinisin” ren an káé ewe Paipel pwe epwe silei met meefien Jiowa ussun.

5. Ifa ussun sia tongeni kúna met Jiowa a pélúwen ngeni ach kewe kapas eis?

⁵ Atun sia álleani án Kot we Kapas, sia “rong” án Jiowa fós ngenikich. Nge ese naf ach sipwe chék álleani ewe Paipel iká sia mochen silei meefien Jiowa ussun ach kapas eis. A lamot ach sipwe kútta me káé ekkewe wokisin epwe álisikich le pélúweni ach kapas eis. A lamot ach sipwe research lón néúch kewe puk. (SalF. 2:​3-6) Sia tongeni iótek ngeni Jiowa me tingorei an álillis pwe sipwe kúna pélúwen ach kewe kapas eis. Mwirin, sia tongeni kútta ekkewe kapasen emmwen me pwóróus mi weneiti met ewe sia eáni osukosuk. Eli epwe pwal álilliséch iká sipwe álleani pwóróusen ekkewe aramas lón Paipel iir mi pwal eáni ewe esin osukosuk sia eáni.

6. Ifa ussun ach kewe mwiich ra tongeni álisikich le okkufu tipemwárámwár?

⁶ Sia pwal rong án Jiowa fós ngenikich me lón ach kewe mwiich. Iká sia kan fiffiti mwiich iteitan, sia tongeni róng och pwóróus seni eú afalafal are seni án emén memmeef mi álisikich le okkufu ach tipemwárámwár. (SalF. 27:17) Iei sipwele ppii ekkewe mettóch mi tongeni álisikich le okkufu ach tipemwárámwár.

IKÁ KA TIPEMWÁRÁMWÁREITI ÁN JIOWA TONGEEK

7. Eli ifa ewe kapas eis ekkóch ra ekieki?

⁷ Ka fen ekieki, ‘Jiowa mi wesewesen kúnaei?’ Iká ka meefi pwe ese wor aúcheaóm, eli kopwe ekieki pwe ese fókkun tufich óm kopwe chiechi ngeni ewe Chón Féraatá unuselapen láng me fénúfan. Eli King Tafit a pwal eáni ena esin ekiek. A mwaar ren an silei pwe Jiowa a pwal mwo nge áfánni aramas, me a erá: “Ai Samol mi Lapalap, met aüchean aramas pwe ka chüngüw, nge met aüchean nöün aramas pwe ka ekieki usun?” (Kölf. 144:3) Ia sia tongeni kúna me ie pélúwen ena kapas eis?

8. Me ren 1 Samuel 16:​6, 7, 10-12, met Jiowa a nennengeni wóón aramas?

⁸ Ewe Paipel a áiti ngenikich pwe Jiowa mi kúna chókkewe mi meefi pwe iir rese aúchea me ren ekkewe ekkóch. Áwewe chék, Jiowa a tiinaaló Samuel ngeni imwen Jesi pwe epwe epiti emén me lein néún kewe pwe epwe emén kingen Israel. Jesi a kéri fúmén me lein néún kewe wanimén át pwe Samuel epwe kúner, nge ese kéri Tafit, ewe setupwutur. b Iwe nge, Jiowa a filaatá Tafit. (Álleani 1 Samuel 16:​6, 7, 10-12.) Jiowa a kúna wesewesen ié Tafit. A silei pwe Tafit emén alúwél mi fókkun tongei i.

9. Pwata ka tongeni lúkúlúk pwe Jiowa mi áfánnuk? (Pwal ppii ewe sasing.)

⁹ Ekieki ifa ussun Jiowa a fen pwáári  ngonuk pwe a áfánnuk. A fang ngonuk kapasen emmwen mi fókkun maséch ngeni óm we osukosuk. (Kölf. 32:8) Ena mettóch a ánneta pwe a silefichi óm na osukosuk. (Kölf. 139:1) Iká ka apwénúetá án Jiowa kapasen emmwen me kúna pwe mi álisuk, iwe kopwe lúkúlúk pwe Jiowa mi áfánnuk. (1 Kron. 28:9; Féf. 17:​26, 27) Jiowa mi kúna óm achocho. A kúna napanapom kewe mi múrinné me mochen chiechi ngonuk. (Jer. 17:10) Me epwe fókkun pwapwa iká kopwe mochen chiechi ngeni.—1 Jon 4:19.

IKÁ KA TIPEMWÁRÁMWÁREITI ÓM KEWE KEFIL LÓÓM

10. Ikkefa ekkewe kapas eis eli sipwe eisini pwisinkich iká sia ekieki ussun ekkewe kefil sia eáni lóóm?

¹⁰ Fán ekkóch, eli ekkóch ra ekieki ussun ekkewe kefil ra eáni lóóm me ekieki iká mi pwúng met ra filaatá. Eli ra likitaaló ar angang mi watte peioffun are filaatá ar resap poputááni eú business pwe repwe unusen angang ngeni Jiowa. Nge eli a fen fis ena fite fite ier a ló. Nge iei, eli ra kúna ekkóch táppiir kewe mi feffeitá lón pekin moni, iwe eli repwe ekieki: ‘Mi wor lamoten minne úa pennúkú fán iten Jiowa? Are, itá úpwe fen alapaaló ái angang pwe epwe watteeló nei moni?’

11. Pwata ewe soumakken Kölfel 73 a letipengaw?

¹¹ Iká ka pwal eáni ekkena esin kapas eis, katol met ewe Paipel a apasa ussun meefien ewe soumakken Kölfel 73. Átena a kúna ekkewe aramas rese angang ngeni Jiowa nge ra pwapwaiti péchékkúlen inisiir, wéúúr, me manawer mi ussun itá nge ese wor ar aúrek. (Kölf. 73:​3-5, 12) Atun a kakkatol chókkana me kúna pwe ussun itá mi sópwéch manawer, a meefi pwe an we achocho le angang ngeni Jiowa ese wor lamotan. ‘Iteiten rän a küna riaföü’ ren ena ekiek mi eletipengaw.  (Kölf. 73:​13, 14) Ifa ussun a okkufu ena esin memmeef ese pwúng?

12. Me ren Kölfel 73:​16-18, ifa ussun ewe soumakken ei wokisin a okkufu an we osukosuk?

¹² Álleani Kölfel 73:​16-18. Ewe soumakken kélfel a feiló lón án Jiowa we imwenfel. Me ikena ie, a tongeni eáni ekiek mi múrinné. A esilla pwe inaamwo iká manawen ekkewe ekkóch ussun a núkúnúkéch, nge ese wor ar ápilúkúlúk fán iten mwachkkan. Iwe, ese chúen letipengaw me a lúkúlúk pwe an akkomwa Jiowa lón manawan, ina ewe kefil mi fókkun múrinné seni meinisin a filaatá. Ina minne, a tipeppós an epwe chék sópweeló le angang ngeni Jiowa.—Kölf. 73:​23-28.

13. Met ka tongeni féri iká ka niamam ren ekkewe kefil ka eáni lóóm? (Pwal ppii ewe sasing.)

¹³ Ka pwal tongeni okkufu óm ekiek ese pwúng, ussun chék ewe soumakken kélfel. Ifa ussun? Chechchemeni ekkewe mettóch mi múrinné a nóm reom, kapachelong ekkewe feiéch seni Jiowa, me kopwe chemeni pwe chókkewe rese angang ngeni ese nóm rer an álillis. Lape ngeni, chókkewe rese angang ngeni Jiowa ra ekieki pwe ar eáni eú angangen moni mi múrinné, ina ewe mi kon aúchea pokiten ese wor met ra ápilúkúlúkú fán iten mwachkkan. Iwe nge, Jiowa a pwon ngonuk pwe epwe ngonuk chómmóng mettóch mi amwarar lón mwachkkan. (Kölf. 145:16) Pwal och, ekieki ei: En mi tongeni wesewesen silei epwe fet manawom iei iká ka eáni och kefil mi sókko seni met ka eáni? Nge iei eú mettóch mi ffat: Chókkewe mi eáni kefil mi lóngólóng wóón ar tong ngeni Jiowa me tongei chón óruur kewe, resap fókkun tongeni osupwang ren och mettóch mi enletin múrinné.

 IKÁ KA TIPEMWÁRÁMWÁR IKÁ KOPWE CHÚEN TONGENI FÉRI EKKEWE ANGANG FÁN ITEN JIOWA

14. Pwata ekkóch ra tongeni ekieki pwe ese wor aúchear, ifa ewe kapas eis eli ra ekieki?

¹⁴ Ekkóch me lein néún Jiowa kewe aramas rese chúen tufichin féri met ra mochen féri pún ra chinnapeló, semmwen, are tter inisiir. Ina minne, eli repwe meefi pwe ese chúen wor aúchear me ren Jiowa. Eli repwe ekieki, ‘Ngang mi chúen tongeni féri ekkewe angang fán iten Jiowa?’

15. Met ewe soumakken Kölfel 71 a lúkúlúk wóón?

¹⁵ Ewe soumakken Kölfel 71 a pwal eáni ena esin memmeef. Iei an iótek: “Kosap likitieila iei, lupwen üa apwangapwang.” (Kölf. 71:​9, 18) Iwe nge, ena soumakken kélfel a fókkun lúkúlúk pwe iká epwe chék sópweeló an angang ngeni Jiowa fán túppwél, i epwe emmweni me álisi. Ena soumakken kélfel a silei pwe Jiowa a pwapwa ren chókkewe mi angang ngeni úkúúkún ar tufich inaamwo iká a apwangapwang inisiir.—Kölf. 37:​23-25.

16. Ifa ussun Jiowa a tongeni néúnéú ekkewe chinnap? (Kölfel 92:​12-15)

¹⁶ Iká en emén chinnap, ekieki met meefien Jiowa ussum. I a tongeni álisuk lón óm angang ngeni fán túppwél inaamwo iká mi apwangapwang inisum. (Álleani Kölfel 92:​12-15.) Kopwe fen nefótófót wóón ekkewe mettóch ka tongeni féri, nge esap wóón ekkewe kese chúen tongeni féri. Áwewe chék, ekkewe ekkóch ra tongeni péchékkúletá ren óm leenien áppirú me óm áfánniir. Ka tongeni ereniir ifa ussun Jiowa a álisuk ren fite fite ier, me áiti ngeniir úkúúkún péchékkúlen óm ápilúkúlúk wóón pwénútáán an kewe oesini. Pwal och, chechchemeni pwe óm ióteki ekkewe ekkóch seni enletin letipom, a fókkun tongeni álisiir. (1 Pit. 3:12) Ese lifilifil  nónnómun manawach, nge oukich meinisin a wor met sia tongeni fang ngeni Jiowa me ekkewe ekkóch.

17. Pwata sisap apépééi kich ngeni ekkewe ekkóch?

¹⁷ Iká ka meefi lichippúng ren óm kese chúen tongeni alapaaló óm angang ngeni Jiowa, kopwe lúkúlúk pwe Jiowa a fókkun aúcheani ese lifilifil met ka tongeni féri. Ese mwáál kopwe mochen sótun apépééi met ka tongeni féri ngeni met ekkewe ekkóch ra tongeni féri. Otur sonuk ena esin mochen! Pwata? Pún Jiowa ese kan apépéfengeni ekkewe ekkóch. (Kal. 6:4) Áwewe chék, Meri a liffang ngeni Jises eú lémmis mi mémmóng. (Jon 12:​3-5) Nge ewe fefin mi má seni pwúlúwan, a asor lón ewe imwenfel rúúeféú féúkúkkúnún senis mi fókkun kisikis aúchean. (Luk 21:​1-4) Iwe nge, Jises ese apépéfengeni ekkena rúúemén fefin. Nge a kúna pwe ekkena rúúemén fefin ra pwáári ar lúkú. I a áppirúfichi Seman we, Jiowa. Ina minne, ka tongeni lúkúlúk pwe Jiowa a kúna meinisin met ka féri pokiten ka lúkú i me tongei i, me a fókkun aúcheani met ka tongeni féri inaamwo iká ka meefi pwe a fókkun kúkkún.

18. Met epwe álisikich le okkufu tipemwárámwár? (Pwal ppii ewe pwóór “ Án Jiowa Kapas A Tongeni Álisuk le Okkufu Óm Tipemwárámwár.”)

¹⁸ Kich meinisin a kan wor ach tipemwárámwár fán ekkóch. Iwe nge, sia fen káé pwe ewe Paipel a tongeni álisikich le okkufu ena memmeef. Ina minne, kopwe achocho le angang wóón óm kana tipemwárámwár, iwe mwirin kopwe meefi lúkúlúk. Jiowa a fókkun sileéchuk. A aúcheani met ka pennúkúóló me epwe fókkun apwénúetá an pwon pwe epwe efeiéchuk. Kopwe lúkúlúk pwe Jiowa a tongei me áfánni meinisin néún kewe chón angang mi túppwél.