Mi weires ngonuk óm kopwe chechchemeni minne ka kerán káé? Fán chómmóng a kan fis ngenikich meinisin ena mettóch. Met ka tongeni féri? Ekiekisefáli menlapen ekkewe mettóch ka fen káé.

Atun óm káé, kopwe ekis kaúló me ekieki minne ka kerán silei. Ppii ifa ussun ewe aposel Paul a álisi chókkewe mi káé néún we taropwe ar repwe féri ena, iei met a erá: ‘Iwe, iei menlapan.’ (Ipru 8:1) Ren ena itiitin kapas, a álisiir le weweiti weween met a apasa, me ifa ussun meinisin met a apasa ra ririfengen.

Neman kopwe áimuoló engol minich mwirim óm káé pwe kopwe áeá le ekieki ekkewe menlapen pwóróus seni met ka káé. Iká kese tongeni chechchemeni, katólsefál ekkewe itelap kisikis are ekkewe áeúin sentence lón iteiten parakraf pwe epwe álisuk le chemeni. Iká ka káé och pwóróus minefé, kopwe sótun áweweei lón pwisin óm kapas. Lupwen ka ekiekisefáli minne ka káé, epwele mecheres óm kopwe chechchemeniir. Epwe pwal lapóló óm weweiti ifa ussun ka tongeni apwénúetá lón manawom.