1. Ikkefa ekkóch me lein ekkewe mettóch Jises a féri fán itach?

 ESE WOR emén aramas mi kon fangafangéch lap seni Jises. Lupwen Jises a nóm wóón ei fénúfan, a kan áeá an manaman le álisi aramas. (Luk 9:​12-17) A fang ewe liffang mi fókkun múrinné seni meinisin, ina an fangoló manawan fán itach. (Jon 15:13) Seni ewe atun Jises a manawsefál, a sópweeló le fangafangéch. Ussun met Jises a fen pwonei, i a tingorei Jiowa an epwe ngenikich an we ngún mi fel pwe epwe asukulakich me oururukich. (Jon 14:​16, 17; 16:13) Lón ach kewe mwiich, Jises a pwal sópweeló le elipwákéchúkich pwe sipwe pwal álisi aramas wóón unusen fénúfan ar repwe wiliiti néún chón káé.—Mat. 28:​18-20.

2. Ié ekkewe mwán “iir liffang” Efisus 4:​7, 8 a fós ussun?

² A pwal wor eú liffang Jises a fang ngenikich. Ewe aposel Paul a erá pwe mwirin án Jises feitá láng, a fang ekkewe mwán “iir liffang.” (Álleani Efisus 4:​7, 8.) Paul a áweweei pwe Jises a fang ekkena mwán pwe repwe álisi chón ekkewe mwichefel lón sókkopaten napanap. (Efi. 1:​22, 23; 4:​11-13) Lón ei fansoun, ekkewe chónálillisin mwichefel, mwán mi ásimaw, me chónemmwen mi wisen sáifetál ra kapachelong lein ekkena mwán “iir liffang.” a Ewer, ekkena mwán rese unuséch, ina popun ra mwámmwáálliló. (Jem. 3:2) Nge ach Samol Jises Kraist a néúnéú iir le álisikich. Iir liffangach me ren.

3. Áweweei ifa ussun kich meinisin sia tongeni álisaatá ewe angang ekkewe mwán “iir liffang” ra féri.

³ Jises a ewisa ngeni ekkena mwán “iir liffang” ar repwe apéchékkúla chón ewe mwichefel. (Efi. 4:12) Nge kich meinisin sia tongeni álisiir pwe repwe apwénúetá ena angang mi aúchea. Ekieki ei kapas áwewe: Ekkóch me leich sia wesewesen fiti angangen aúetá eú Leenien Mwiich. Nge ekkóch leich sia álisaatá ena  angang ren ach awora mwéngé, awora ekkóch pisek, are álillis lón pwal ekkóch mettóch. Pwal ina ussun, kich meinisin sia tongeni álisaatá ekkewe chónálillisin mwichefel, mwán mi ásimaw, me chónemmwen mi wisen sáifetál ren met sia apasa me féri. Iei sipwele ppii ifa ussun sia kúna feiéch seni ar angang weires me ifa ussun sia tongeni pwáári ach kilisou ngeniir me Jises, ewe mi awora ngenikich ekkena mwán “iir liffang.”

EKKEWE CHÓNÁLILLISIN MWICHEFEL RA ÁLILLIS

4. Lón fansoun ekkewe aposel, ikkefa ekkóch ekkewe angang chónálillisin mwichefel ra féri?

⁴ Lón fansoun ekkewe aposel, ekkóch ekkewe mwán ra kewis ar repwe chónálillisin mwichefel. (1 Tim. 3:8) Ussun iir ekkewe ra wisen “álisi aramas,” ewe Paul a fós ussun. (1 Kor. 12:28) A ffat pwe ekkena chónálillisin mwichefel ra wisen féri ekkewe angang mi lamot pwe ekkewe mwán mi ásimaw repwe tongeni nefótófót wóón ar asukula me túmúnú chón mwichefel. Áwewe chék, eli ekkewe chónálillisin mwichefel ra wisen álillis le kapiini ekkewe Taropwe mi Pin are kamé ekkewe mettóch ra kan áeá lón ar angangen kapi.

5. Ikkefa ekkóch ekkewe angang chónálillisin mwichefel ra féri lón ei fansoun?

⁵ Ekieki ekkóch ekkewe mettóch mi aúchea ekkewe chónálillisin mwichefel ra féri lón óm we mwichefel. (1 Pit. 4:10) Eli repwe kewis ar repwe wisen túmúnú monien ewe mwichefel are ekkewe territory, chumong ekkewe puk, wisen ettiki ekkewe pisekin audio me video, wisen chón etiwetiw, are álillis lón túmúnún ewe Leenien Mwiich. Ekkena angang meinisin ra lamot pwe ewe mwichefel epwe kókkótéch. (1 Kor. 14:40) Pwal och, ekkóch ekkewe chónálillisin mwichefel ra eáni kinikin lón ewe Manawach me Ach Angangen Afalafal Mwiich me eáni afalafal fán iten meinisin. Eli emén chónálillisin mwichefel epwe pwal kewis an epwe álisi ewe chón emmweni eú kúmiin afalafal. Fán ekkóch, ekkewe chónálillisin mwichefel mi lipwákéch ra fiti ekkewe mwán mi ásimaw le ló apéchékkúla emén chón mwichefel.

6. Ikkefa ekkóch popun sia aúcheani néúch kewe chónálillisin mwichefel mi angang weires?

⁶ Ifa ussun chón ewe mwichefel ra kúna feiéch seni án ekkewe chónálillisin mwichefel angang? Iei alon Beberly, b seni Bolivia: “Kilisou ngeni néúm kewe chónálillisin mwichefel pún úá unusen pwapwaiti ekkewe mwiich.” A pwal erá: “Pokiten ar angang, úa tongeni kél, uwawu meefiei, aúseling ngeni ekkewe afalafal, me káé seni ekkewe video me sasing. Ra túmúnú chón mwiich me pwal ekkewe mi fiti wóón Zoom. Sárin ekkewe mwiich, ra emmweni ewe angangen elimelim, álillis lón túmúnún ekkewe monien asor, me túmúnú pwe epwe chék wokkor néúch kewe puk. Úa fókkun kilisou ngeniir!” Iei alon Leslie, seni Colombia pwúlúwan we emén mwán mi ásimaw: “A lamot ngeni pwúlúwei we án ekkewe chónálillisin mwichefel álillis. Iká esap pwúnúúr, epwe fen kon chómmóngoló án pwúlúwei we angang, ina minne úa fókkun kilisou ren ar tinikken me tipemecheres le álillis.” Ese mwáál, a pwal ina ussun meefiom.—1 Tim. 3:13.

7. Ifa ussun sia tongeni pwáári ach kilisou ngeni ekkewe chónálillisin mwichefel? (Pwal ppii ewe sasing.)

⁷ Inaamwo iká sia kilisou ren néúch kewe chónálillisin mwichefel, nge Paipel a pwal pesei ngenikich ach sipwe ereniir ach kilisou. (Kol. 3:15) Iei met emén mwán mi ásimaw lón Finland itan Krzysztof a féri pwe epwe pwáári an kilisou, “Úa tiinaaló eché postcard are text mi masou ren eú wokisin me affata ifa ussun ewe chónálillisin mwichefel a apéchékkúlaei are pwata úa kilisou ren ewe angang a féri.” Pascal me Jael, seni New Caledonia ra kan ióteki  ekkewe chónálillisin mwichefel. Pascal a apasa, “Kukkuto chék, áúa kan ióteki néúm kewe chónálillisin mwichefel, kilisou ngeni Jiowa fán iter me tingorei an epwe nónnóm rer me álisiir.” Jiowa a aúseling ngeni ekkena esin iótek, me unusen ewe mwichefel ra kúna feiéch.—2 Kor. 1:11.

EKKEWE MWÁN MI ÁSIMAW “MI ANGANG WEIRES FÁN ITEMI”

8. Pwata Paul a erá pwe chienan kewe mwán mi ásimaw ra “angang weires”? (1 Tesalonika 5:​12, 13)

⁸ Ekkewe mwán mi ásimaw lón fansoun ekkewe aposel ra angang weires fán iten ewe mwichefel. (Álleani 1 Tesalonika 5:​12, 13; 1 Tim. 5:17) Iir ra ‘emmweni’ ewe mwichefel ren ar féri ekkewe mwiich me féri ekkewe kefil fán iten ewe mwichefel. Ra pwal ‘fénéú’ pwiir kewe fán tong pwe epwe chék péppéchékkúl ar lúkú. (1 Tes. 2:​11, 12; 2 Tim. 4:2) Ewer, ekkena mwán ra pwal angang weires le awora osupwangen ar kewe famili me apéchékkúla ar riri ngeni Jiowa.—1 Tim. 3:​2, 4; Tait. 1:​6-9.

9. Ikkefa ekkóch angang ekkewe mwán mi ásimaw ra eáni lón ei fansoun?

⁹ A chómmóng met ekkewe mwán mi ásimaw lón ei fansoun ra kan eáni angang. Iir chón afalafala ewe kapas allim. (2 Tim. 4:5) Ra tinikken le emmweni ewe angangen afalafal, akkóta ena angang lón ach kewe territory, me áiti ngenikich ifa ussun sipwe lipwákéch le afalafala me asukula aramas. Iir ra pwal eáni angangen soukapwúng fán úméúméch me rese aapaap. Atun emén Chón Kraist a féri eú tipis mi chou, ra achocho le álisi an epwe ririéchsefál ngeni Jiowa. Nge ra pwal túmúnúéchú liméchún ewe mwichefel. (1 Kor. 5:​12, 13; Kal. 6:1) Nge ra ákkáeúin silleló ren wiser we chón masen siip. (1 Pit. 5:​1-3) Ra eáni ar kewe afalafal mi mmólnéch mi lóngólóng wóón Paipel, achocho le sissilei meinisin chón ewe mwichefel, me ló chuuri emén lón ewe mwichefel me apéchékkúla. Ekkóch mwán mi ásimaw ra pwal álillis lón angangen kaútáán me túmúnún ekkewe Leenien Mwiich, akkóta ekkewe mwichelap, me álillis lón ewe Hospital Liaison Committee me ewe Patient Visitation Group. Nge a pwal wor ekkóch angang ra féri me lúkún ekkena. Ekkena mwán mi ásimaw ra fókkun angang weires fán itach!

10. Ikkefa ekkóch popun sia aúcheani ekkewe mwán mi ásimaw mi angang weires?

¹⁰ Jiowa a osuni pwe ekkewe chón masen siip repwe túmúnúéchúkich me sisap “chüen niuokus ika rükö.” (Jer. 23:4) Johanna, emén chienach fefin seni Finland, a kúna pwúngún ekkena kapas atun a úri inan we eú semmwen mi chou. A apasa: “Inaamwo iká a weires ái úpwe ereni emén ussun meefiei, nge emén mwán mi ásimaw úse kon sissilei a mosonottam ngeniei, iótek fán itei, me alúkúlúkú ngeniei án Jiowa tong. Úse chemeni met ekkewe a wesewesen apasa, nge úa chemeni pwe úse chúen meefi lólilen. Úa lúkú pwe Jiowa a tiinaato átena an epwe álisiei lón ena fansoun a fókkun lamot ngeniei álillis.” Ifa ussun ekkewe mwán mi ásimaw lón óm we mwichefel ra álisuk?

11. Ifa ussun sia tongeni pwáári ach kilisou ngeni ekkewe mwán mi ásimaw? (Pwal ppii ewe sasing.)

¹¹ Jiowa a mochen ach sipwe pwáári ach kilisou ngeni ekkewe mwán mi ásimaw “pokiten ar angang.” (1 Tes. 5:​12, 13) Henrietta, i pwal seni Finland, a apasa: “Ekkewe mwán mi ásimaw ra tipemecheres le álisi ekkewe ekkóch, nge esap weween pwe a wor watteen ar fansoun me péchékkúl, are ese wor osukosuk ra kúna lón manawer. Fán ekkóch úa chék ereniir: ‘Ke silei met? En emén mwán mi ásimaw mi fókkun múrinné. Úa mochen óm kopwe silei ena.’” Emén fefin seni Türkiye c itan Sera a apasa: “A lamot ngeni ekkewe mwán mi ásimaw kapasen apéchékkúl pwe repwe sópwósópwoló  lón ar angang. Ina minne sia tongeni mak ngeniir taropwe, etiwer ach sipwe mwéngéfengen, are fitiir lón ewe angangen afalafal.” Mi wor emén mwán mi ásimaw ka kon aúcheani an angang? Kútta alen óm kopwe pwáári óm kilisou ngeni.—1 Kor. 16:18.

CHÓNEMMWEN MI WISEN SÁIFETÁL LE APÉCHÉKKÚLAKICH

12. Ifa ewe kókkót mi apéchékkúla ekkewe mwichefel lón fansoun ekkewe aposel? (1 Tesalonika 2:​7, 8)

¹² Kraist Jises a pwal ewisa ngeni ekkóch mwán ar repwe álisi ewe mwichefel lón pwal eú napanap. Fán an emmwen, ekkewe mwán mi ásimaw lón Jerusalem ra tiinaaló Paul, Parnapas, me pwal ekkewe ekkóch pwe repwe wisen sáifetál. (Féf. 11:22) Pwata? Ren pwal chék ewe popun ekkewe chónálillisin mwichefel me mwán mi ásimaw ra kewis ngeni, ina ar repwe apéchékkúla ekkewe mwichefel. (Féf. 15:​40, 41) Ekkena mwán ra pennúkúóló kinamweer me pwal mwo nge atolonga manawer lón feiengaw fán iten ar repwe asukula me apéchékkúla ekkewe ekkóch.—Álleani 1 Tesalonika 2:​7, 8.

13. Ikkefa ekkóch angang ekkewe chónemmwen mi wisen sáifetál ra eáni?

¹³ Ekkewe chónemmwen mi wisen sáifetál ra kan sái fán chómmóng. Ekkóch leir ra sái fitepúkú mwail pwe repwe chuuri ekkewe mwichefel. Iteiten wiik, emén chónemmwen mi wisen sáifetál a kan eáni fitu afalafal, ló chuuri emén chón mwichefel pwe epwe apéchékkúla, emmweni ekkewe mwichen pioneer, mwichen mwán mi ásimaw, me ekkewe mwiich fán iten angangen afalafal. A ammólnatá ekkewe afalafal me akkóta ekkewe mwichelap. A emmweni ekkewe sukulen pioneer, me akkóta eú mwiich mi aúchea fán iten ekkewe pioneer lón eú circuit. A pwal wor ekkóch angang mi aúchea epwe féri, nge fán ekkóch ekkena  angang ewe keangen ofesilap a ewisa ngeni, ra atapwalapwal.

14. Ikkefa ekkóch popun pwata sia aúcheani néúch kewe chónemmwen mi wisen sáifetál mi angang weires?

¹⁴ Ifa ussun ekkewe mwichefel ra kúna feiéch seni án ekkewe chónemmwen mi wisen sáifetál angang mi aúchea? Emén Chón Kraist mwán lón Türkiye a apasa: “Iteiten ar etto chuurikem a apéchékkúlaei ái úpwe alapaaló ái fansoun le álisi chienei kewe Chón Kraist. Úa sissilei chómmóng chónemmwen mi wisen sáifetál nge ese wor emén leir a ámmeef ngeniei pwe a kon busy are ese mochen fós ngeniei.” Johanna, ewe sia fen fós ussun, a fiti emén chónemmwen mi wisen sáifetál le afalafal, nge ese wor emén ra fós ngeni. Neminna a apasa, “Iwe nge, úse tongeni ménúkaaló ena rán. Pwii kewe rúúemén ra kerán chék mwékút seni imwem we, me úa fókkun pwosiitiir. Ewe chónemmwen mi wisen sáifetál a apéchékkúlaei me álisiei le weweiti pwe ach towaufesen lón án Jiowa angang, epwe chék temporary, nge lón ewe ótót séfé esap wor muchúlóón ach sipwe kúnafengenikich.” Chómmóng me leich sia pwal aúcheani ekkewe chónemmwen mi wisen sáifetál me napanapen ar álisikich.—Féf. 20:37–21:1.

15. (a) Me ren 3 Jon 5-8, ifa ussun sia tongeni pwáári ach kilisou ren ekkewe chónemmwen mi wisen sáifetál? (Pwal ppii ewe sasing.) (b) Pwata a lamot ach sipwe pwáári ach kilisou ren pwúlúwen ekkewe mwán mi wor wiser lón ewe mwichefel, me ifa ussun sipwe féri ena? (Ppii ewe pwóór “ Chemeni Pwúlúwer Kewe.”)

¹⁵ Ewe aposel Jon a pesei Kaius an epwe awasélaéchú chienan kewe chón lúkú mi etto chuuriir, me atun repwele ló, epwe “álisiir lón ewe napanap mi fich me ren Kot.” (Álleani 3 Jon 5-8.) Eú alen ach sipwe féri ena, ina ren ach sipwe etiwa ewe chónemmwen mi wisen sáifetál ach sipwe mwéngéfengen. Pwal och, sipwe álisaatá ewe kókkótun angangen afalafal atun a chuuri ach mwichefel. Leslie, ewe sia fen fós ussun, a pwáári an kilisou lón pwal ekkóch napanap. A apasa: “Úa iótek pwe Jiowa epwe fang  ngeniir met ra osupwangan.” A pwal apasa: “Ám me pwúlúwei we, áúa pwal mak ngeniir taropwe me ereniir úkúúkún watteen ám kúna álilliséchún ar etto chuurikem.” Chemeni pwe ekkewe chónemmwen mi wisen sáifetál, iir ussun chék kich. Fán ekkóch, a úriir semmwen, ra aúrek, pwal mwo nge letipechou. Eli óm kapas fán kirekiréch are óm awora ekis liffang, ina pélúwen án noum we chónemmwen mi wisen sáifetál iótekin tingoren álillis!—SalF. 12:25.

A LAMOT NGENIKICH EKKEWE MWÁN IIR USSUN “LIFFANG”

16. Me ren Än Salomon Fos 3:​27, ikkefa ekkewe kapas eis ekkewe Chón Kraist mwán ra tongeni eisini pwisin iir?

¹⁶ Wóón unusen fénúfan, a lamot ngenikich chómmóng Chón Kraist mwán pwe repwe angang fán iten ekkewe mwichefel. Iká en emén Chón Kraist mwán mi papatais, “ka tufich ngeni” óm kopwe álillis? (Álleani Än Salomon Fos 3:27.) Ka tipemecheres óm kopwe achocho pwe kopwe fich ngeni emén chónálillisin mwichefel? Iká ka fen emén chónálillisin mwichefel, ka tongeni achocho óm kopwe emén mwán mi ásimaw? d Ka tongeni ekkesiwili nónnómun manawom pwe kopwe tongeni apply fán iten ewe Sukulen Chón Afalafala ewe Mwú? Ena sukul epwe elipwákéchuk pwe epwe lapóló án Jises néúnéú en. Iká ka meefi pwe kese fich ngeni ekkena mettóch, iwe kopwe iótek ngeni Jiowa. Tingorei an epwe álisuk ren an we ngún mi fel pwe kopwe tongeni féri ese lifilifil angang epwe kewis ngonuk.—Luk 11:13; Féf. 20:28.

17. Met ekkewe mwán “iir liffang” ra pwáári ussun ach we King, Kraist Jises?

¹⁷ Ekkewe mwán Jises a seikiiretá ussun “iir liffang,” ra pwáári pwe i a kan ekkemmwenikich lón ekkeei ránin lesópwólóón. (Mat. 28:20) Kese kilisou pwe a wor emén néúch King mi tong me kisáséú, mi silei met mi lamot ngenikich me fang ngenikich ekkewe Chón Kraist mwán ar repwe álisikich? Iká ina, iwe kopwe kútta alen óm kopwe pwáári óm kilisou ren ekkena mwán mi angang weires. Kosap pwal ménúki le kilisou ngeni Jiowa pokiten i ewe a fang ngenikich “meinisin sókkun liffang mi múrinné me meinisin sókkun liffang mi unuséch.”—Jem. 1:17.