1, 2. Met néún Jiowa kewe chón angang ra fiffiu ngeni?

 MEINISIN néún Kot chón angang mi tuppwél ra achocho fán weires lón ar féri minne mi pwúng, seni fansoun Epel ngeni lón ei fansoun. Aposel Paulus a ereni ekkewe Chón Kraist chón Ipru pwe lón ar achocho le angei án Kot chen me an feiéch iir ra ‘küna chomong sokun riaföü, nge resap kuf lon ekewe weires ra tolong lon.’ (Ipru 10:32-34) Paulus a alélléfengeni án ekkewe Chón Kraist angang weires lón ar féri minne mi pwúng me angangen chókkewe mi fiti án ekkewe chón Krik urumwot, áwewe chék ren ssá, simmwo, me boxing. (Ipru 12:1, 4) Lón ei fansoun sia fiti ewe kitir fán iten manaw, me mi wor ekkewe chón oputakich mi mochen erikikich me efisi an epwe péút senikich ach pwapwa iei me ach kewe feiéch lón mwachkkan.

² Ewe fiu, are “maun,” mi áweires seni meinisin sia fiti, ina ach fiu ngeni Satan me an ei fénúfan. (Ef. 6:12) A fókkun lamot ach sipwe fiffiu ngeni etipetipaen ei fénúfan, an ekiek, féffér mi ngaw áwewe chék ren féfférún sikepwach, úkkún  suupwa, únnúpuch, are úkkún sáfei mi efeiengaw. Mi lamot sipwe pwal akkachocho le fiffiu ngeni ach lichippúng me ach kewe pwisin apwangapwang.​—2 Kor. 10:3-6; Kol. 3:5-9.

3. Ifa usun Kot a áiti ngenikich ach sipwe fiffiu ngeni chón oputakich?

³ Mi wesewesen tufich án emén epwe win lón an fiu ngeni ekkena mettóch mi péchékkúl manamanan? Ewer, nge epwe weires! Paulus a erá pwe i a usun emén chón boxing lupwen a apasa: “Üa wewe ngeni eman chon köfön esap chök köfön chöü.” (1 Kor. 9:26) A lamot sipwe fiffiu ngeni chón koputach kewe usun chék emén chón boxing. Jiowa a álisikich me áiti ngenikich ifa usun sipwe féri ena. A áiti ngenikich me lón ewe Paipel. A pwal álisikich me ren néúch kewe puk mi lóngólóng wóón Paipel, án Chón Kraist kewe mwich, me mwichelap. Ka alamota meinisin ekkewe káit mi kawor ngonuk? Ika kese, iwe kese unusen fiu ngeni chón koputóm, ka usun emén chón boxing mi chék kéffél chéú.

4. Ifa usun sipwe túmúnúkich pwe sisap kkuf ren minne mi ngaw?

⁴ Mi lamot sipwe mammasa fansoun meinisin. Pwata? Ekkewe chón oputakich repwe tongeni maunekich lón ewe fansoun sise fen ekieki are lón fansoun sia apwangapwang. Ewe Paipel a éúréúrakich me apéchékkúlakich lupwen a apasa: “Kosap mwüt ngeni ngau epwe akufuk, nge kopwe akufu met mi ngau ren om föföröch.” (Rom 12:21) Ika sia fiffiu ngeni minne mi ngaw, sia tongeni win! Iwe nge, ika sia túmúnúngaw me sia úkútiw lón ach fiu, Satan me an ei fénúfan, me ach kewe apwangapwang ra tongeni okkufukich. Ina popun sisap fangetá. Sisap lichippúng me eitietiw péúch!​—1 Pet. 5:9.

5. (a) Met a lamot sipwe chechchemeni ika sia mochen kúna án Kot chen me an feiéch? (b) Menni pwóróus lón Paipel sipwele pwóróus usun?

⁵ Ren ach sipwe win lón ach fiu, mi lamot sipwe chechchemeni ewe popun sia achocho fán weires. Popun pún sia mochen kúna án Kot chen me an feiéch. Ipru 11:6 (Testament Mi Fö) a apasa: “Are emon mi mochen arap ngeni Kot, epwe fakkun luku pwe a wor Kot, o a liwini ngeni ir ekkewe mi kukutta i.” Ach kúkkútta Jiowa a wewe ngeni pwe mi lamot sipwe fókkun angang weires pwe sipwe tongeni kúna chen me ren. (Föf. 15:17) Lón Paipel mi wor chómmóng pwóróus usun mwán me fefin iir mi féri ena mettóch. Jakop, Rahel, Josef, me Paulus, iir meinisin ra kúna lón manawer mettóch mi áweires ngeni letiper me pwal inisiir. Nge ra sópwéch. Minne a fis ngeniir a pwáraatá pwe ika sia achocho le angang weires, sia pwal tongeni kúna án Jiowa feiéch. Sipwe ppii ifa usun.

6. Met a álisi Jakop le likiitú, me ifa usun a kúna feiéch? (Ppii ewe sasing lepoputáán ei lesen.)

⁶ Ewe mwán mi tuppwél Jakop a angang weires me likiitú pokiten a tongei Jiowa me aúcheani an riri ngeni. A unusen lúkú án Jiowa pwon pwe epwe efeiéchú mwirimwirin kewe. (Ken. 28:3, 4) Lupwen Jakop a arapakkan 100 ierin, a mwo nge aúlap ngeni emén chónláng pwe epwe angei och feiéch seni Kot. (Álleani Keneses 32:24-28.) Itá a naf pwisin péchékkúlen Jakop le aúlap ngeni ena chónláng mi manaman? Aapw! Nge a fókkun úppós letipan me a ánnetatá pwe epwe fókkun angang weires pwe epwe angei feiéch! Jiowa a efeiéchú án Jakop likiitú me a eita ngeni i Israel, weween “Emén mi Fiu Ngeni Kot, are Emén Ese Fangetá Wóón Kot.” Jakop  a angei minne kich sia pwal kúkkútta, ina án Jiowa chen me an feiéch.

7. (a) Met a elichippúngú letipen Rahel? (b) Met Rahel a féri, me ifa usun a kúna feiéch?

⁷ Rahel, pwúlúwen Jakop we mi áchengicheng, a pwal mwétéres le kúna ifa usun Jiowa epwe apwénúetá an we pwon ngeni pwúlúwan na. Nge mi wor eú osukosuk. Esaamwo wor néún Rahel. Lón ena fansoun, ina eú mettóch mi eriáfféú ngeni ekkewe fefin. Ifa usun Rahel a likiitú fán ena mettóch mi elichippúngú letipan? I ese fangetá wóón an ápilúkúlúk. A chék akkachocho le ikkiótek ngeni Jiowa. Jiowa a rongorong án Rahel kewe iótek, me Rahel a meefi pwe a kúna feiéch lupwen a wor néún. Ina popun a apasa: “Fän pöchökül üa aülap . . . , nge üa akufu.”​—Ken. 30:8, 20-24.

8. Met sókkun weires Josef a kúna lón manawan, me ifa usun a isetiw eú leenien áppirú mi múrinné fán itach?

⁸ Ese mwáál án Jakop me Rahel leenien áppirú mi múrinné a kkúú néúr we itan Josef me a álisi i lupwen a nóm lón weires. Lupwen a 17 ierin Josef, manawan a unusen siwil. Pwiin kewe mi lólówóiti, ra améméló i pwe epwe emén slave. Mwirin, a kalapus ren fite ier lón Isip inaamwo ika ese wor tipisin. (Ken. 37:23-28; 39:7-9, 20, 21) Nge Josef ese lichippúng are song me ese sótun liwini ngeni chókkewe mi kirikiringaw ngeni liwinin ar féffér. Pwata? Pokiten Josef a aúcheani an riri ngeni Jiowa me a unusen nefotofot wóón ena. (Lif. 19:18; Rom 12:17-21) Án Josef leenien áppirú a tongeni álisikich. Inaamwo ika mi ngaw nónnómun manawach lekúkkúnúch, are a fókkun attong manawach iei, nge mi lamot sipwe sópweló lón ach fiffiu ngeni ekkena mettóch me sisap fangetá. Lupwen sia féri ena, sia tongeni lúkúlúk pwe Jiowa epwe efeiéchúkich.​—Álleani Keneses 39:21-23.

9. Ifa usun sipwe áppirú Jakop, Rahel, me Josef?

⁹ Lón ei fansoun, sia pwal tongeni kúna weires mi lamot sipwe likiitú ngeni. Neman sia kúna riáfféú pokiten féfférún emén ese pwúng, aapaap, esiit, are lólówó. Nge sisap lichippúng, sipwe fen chechchemeni met a álisi Jakop, Rahel, me Josef le sópweló ar akkangang ngeni Jiowa fán pwapwa. Kot a apéchékkúler me efeiéchúúr pokiten ra fókkun aúcheani ar riri ngeni i. Ra sópweló lón ar achocho me féri ekkewe mettóch mi tipeeú ngeni minne ra eáni iótek. Pokiten sia nónnóm lón ekkewe ránin lesópwólóón, a lamot ach ápilúkúlúk fán iten mwachkkan epwe péchékkúl! Kopwe angang weires fán iten án Jiowa chen?

10, 11. (a) Pwata sipwe fókkun angang weires fán iten án Kot feiéch? (b) Met epwe tongeni álisikich le féri kefil mi pwúng?

¹⁰ Ikkefa ekkóch popun neman epwe lamot ngenikich ach sipwe fókkun angang weires pwe sipwe angei án Kot feiéch? Eú popun, kich aramas sise unuséch, iwe neman sipwe weires le fiffiu ngeni och mochenich mi ngaw. Ekkóch ra fiffiu ngeni ar repwe tongeni eáni ekiek mi pwúng usun ar angangen afalafal, me ekkóch ra achocho le pworacho ngeni osukosuken péchékkúlen inisiir are ar meefi tipitipingaw. Nge ren pwal ekkóch mi weires ngeniir ar repwe omusaaló tipisin chókkewe mi ekinása letiper. Ese lifilifil ifa úkúkún ttamen ach angang ngeni Jiowa, mi lamot kich meinisin sipwe fiffiu ngeni ekkewe mettóch mi áweiresikich lón ach angang ngeni Kot, ewe emén mi efeiéchú chón tuppwél ngeni.

 ¹¹ Pwúngún, epwe fókkun tongeni weires ngeni emén Chón Kraist an epwe féri kefil mi pwúng, ákkáeúin lupwen sia fiu ngeni ach kewe mochen mi ngaw. (Jer. 17:9) Ika a pwal ina usun met ka meefi, kopwe iótek ngeni Jiowa me tingor an we manaman mi fel. Iótek me án Kot we manaman ra tongeni apéchékkúlok le féri minne mi pwúng, iwe, ka tongeni kúna feiéch seni Kot. Kopwe apposa letipom le manaweni ewe manaw mi tipeeú ngeni met ka eáni iótek. Achocho le álleani ewe Paipel iteiten rán, me awora fansoun fán iten óm pwisin káé me famili fel.​—Álleani Kölfel 119:32.

12, 13. Ifa usun rúúemén Chón Kraist ra kúna álillis ar repwe tongeni nemeni ar mocheniaingaw?

¹² A wor chómmóng pwóróus mi pwáraatá ifa usun án Kot we Kapas, an we manaman mi fel, me néúch kewe puk ra fen álisi pwiich kewe le pworacho ngeni mocheniaingaw. Emén teenage a álleani ewe lesen itelapan “How Can You Resist Wrong Desires?” (Ifa Usun Ka Tongeni Ú Ngeni Mocheniaingaw?) lón ewe Awake! minen December 8, 2003. Iei meefian: “Ua fiffiu ngeni ai upwe tongeni nemeni ai ekiek ese pwúng. Lupwen ua álleani lón ewe lesen pwe ‘ren chómmóng aramas, a mmen weires ewe fiu ar repwe pworacho ngeni mocheniaingaw,’ iwe a ámmeef ngeniei pwe ngang chón ewe mwichen pwipwi. Ua meefi pwe use chék áláemén.” Ei alúwél a pwal kúna álillis seni ewe lesen mi fós usun ekiekin Kot usun án emén ekkesiwili minne mi fich ngeni pwúkún inisin, itelapan “Alternative Life-Styles​—Does God  Approve?” lón ewe Awake! minen October 8, 2003. Lón ena lesen, a kúna pwe ren ekkóch ra kan fiffiu iteiten fansoun pwe repwe féri minne mi pwúng, usun chék ‘efoch fölun ira lon fituker.’ (2 Kor. 12:7, TF) Nge lón ar fiffiu ar repwe akkamwéchú ar féffér mi liméch, ra eáni ápilúkúlúkéch. A apasa: “Ren ena popun, ua meefi pwe ua tongeni akkamwéchú ai tuppwél rán me rán. Ua fókkun kilisou ngeni Jiowa ren an áeá an we mwicheich le álisikich iteiten rán pwe sisap kkuf ren ei ótót mi ngaw.”

¹³ Nengeni pwal pwóróusen emén pwiich fefin lón Merika. A makkeei: “Ua mochen kilisou ngenikemi ren ámi akkawora ngenikem mwéngé lón pekin lúkú mi lamot ngenikem me lón ewe fansoun mi fich ngenikem. Fán chómmóng ua meefi pwe ekkeei lesen ra chék mak fán ásengesi. Ren fite ier, ua fen fiffiu ngeni och mocheni mi péchékkúl, ai mocheniaiti och mettóch Jiowa a oput. Fán ekkóch, ua chék mochen fangetá. Ua silei pwe Jiowa emén mi úméúméch me tipemecheres le omusaaló tipisin aramas, nge pokiten seni lealóllóólun letipei use oputa ai we mocheniaingaw, iwe ua meefi pwe use tongeni angei án Kot álillis. Ei fiffiu ua nónnóm lón a fen kkúú meinisin kinikinin manawei. . . . Mwirin ai álleani ewe lesen itelapan ‘Ka Lelukeni “eu Leluk mi Silei” Jiowa?’ lón Ewe Leenien Mas minen March 1, 2013 ua wenewenen meefi pwe Jiowa a mochen álisiei.”

14. (a) Met Paulus a meefi usun an fiu le féri minne mi pwúng? (b) Ifa usun sipwe tongeni win lón ach fiu ngeni ach apwangapwang?

¹⁴ Álleani Rom 7:21-25. Paulus pwisin a silei úkúkún weiresin án emén epwe fiu ngeni an kewe mocheniaingaw me an apwangapwang. Iwe nge, i a fókkun silei pwe a tongeni win lón ena fiu ika epwe iótek ngeni Jiowa, lúkúlúk wóón an álillis, me eáni lúkúlúk wóón án Jesus we asor. Nge kich? Itá kich mi tongeni win lón ach fiffiu ngeni ach kewe apwangapwang? Ewer, ika sia áppirú Paulus le unusen lúkúlúk wóón Jiowa, nge esap wóón pwisin ach péchékkúl, me eáni lúkúlúk wóón ewe méén kepich.

15. Ifa usun Jiowa a tongeni álisikich ach sipwe akkamwéchú ach tuppwél me likiitú fán sóssót?

¹⁵ Fán ekkóch Kot a tongeni mut ngenikich ach sipwe pwáraatá ngeni i úkúkún ach lólileniesini och mettóch. Áwewe chék, ika kich are emén lón ach famili a samau watte are kúna pwúngúngaw, met sipwe féri? Ika sia unusen lúkúlúk wóón Jiowa, sipwe tingormaú ngeni an epwe ngenikich ewe péchékkúl epwe álisikich le akkamwéchú ach tuppwél, ach pwapwa, me ach ririéch ngeni. (Fil. 4:13, TF) Án ekkewe chómmóng Chón Kraist leenien áppirú seni lóóm tori lón ei fansoun, a pwáraatá pwe iótek a tongeni apéchékkúlakich me ngenikich pwora pwe sipwe likiitú.

16, 17. Met ka tipeppós le féri?

¹⁶ Ewe Tefil epwe fókkun pwapwa an a kúna pwe ka lichippúng are fangetá me eitietiw poum. Ina popun, kopwe apposa letipom le “amochu minne mi murinno.” (1 Tes. 5:21) Ka tongeni win lón óm fiu ngeni Satan, an ei fénúfan mi ngaw, me mocheniaingaw! Ka tongeni win ika ka unusen lúkúlúk pwe Kot epwe apéchékkúlok me álisuk.​—2 Kor. 4:7-9; Kal. 6:9.

¹⁷ Ina minne sópweló lón óm fiffiu fán iten minne mi pwúng. Sópweló óm akkangang weires. Sópweló óm akkachocho. Kosap fangetá. Ka fókkun tongeni lúkúlúk pwe Jiowa epwe ‘ninätiu wom chomong sokun feiöch mi somwola.’​—Mal. 3:10.