1, 2. (a) Met sókkun osukosuk chómmóng aramas ikenái ra kúkkúna, me ifa mwirilóón? (b) Ifa ewe ápilúkúlúk a mak lón Aisea 41:10, 13?

 IEI alon emén Chón Kraist fefin regular pioneer, pwúlúwan we emén mwán mi ásimaw lón ewe mwichefel: “Inaamwo ika ua fitipachei ai kewe kókkót fán iten ai fel ngeni Jiowa, nge ren fite ier ua chúen angang weires le pworacho ngeni ai kan soun aúrek. A áweiresi ai upwe annut, a kkúú péchékkúlen inisi, me féfféri ngeni ekkewe ekkóch, me fán ekkóch a efisi ai upwe mochen fangetá.”

² En mi tongeni weweiti meefien pwiich na? A elichippúng pún sia manaw lón án Satan ei fénúfan mi ngaw, iwe sia kúna watteen weires. Aúrek a chounikich are eletipechoukich, usun chék efóch angké mi amwéchú efóch mwoota pwe esap mwékútúkút. (SalF. 12:25) Met a tongeni efisi óm kopwe aúrek? Neman ka letipechou ren málóón emén attongeom, are a watte óm semmwen are ka kúna riáfféúmwáál. Are ka angang weires le atufichi óm famili lón eú leeni mi watte osukosuken moni. Ló, ló, ló, watteen óm weires a tongeni apwangapwangakóló me a pwal mwo nge tongeni péút sonuk óm pwapwa. Iwe nge, ka tongeni lúkúlúk pwe Kot mi chék mmólnetá le álisuk.​—Álleani Aisea 41:10, 13.

3, 4. (a) Ifa usun ewe Paipel a néúnéú ewe kapas “paw”? (b) Met a tongeni efisi ach sipwe eitietiw péúch?

³ Fán chómmóng ewe Paipel a néúnéú kifetin ewe inis pwe  epwe áweweei sókkopaten napanapen are féfférún emén. Áwewe chék, fán chómmóng Paipel a fós usun paw. Lupwen Paipel a apasa pwe péún emén a péchékkúleló, a tongeni wewe ngeni pwe letipen eménna a péchékkúleló me a mmólnetá le féri mettóch. (Hiop 4:3; Ais. 35:3) A pwal tongeni wewe ngeni pwe a ekiekéch me a ápilúkúlúkéch.

⁴ Fán ekkóch ewe Paipel a fós usun án emén eitietiw péún. Ena a wewe ngeni emén mi lichippúng are péút seni an ápilúkúlúk. (Jer. 6:24; Ipru 12:12) Lupwen ka meefi aúrek are pekkus are meefi pwe a apwangapwangoló óm riri ngeni Jiowa, iwe neman kopwe mochen fangetá. Ia ka tongeni angei me ie péchékkúlen letipom? Ifa usun ka tongeni angei ewe péchékkúl epwe elikiituk me atoto ngonuk pwapwa?

5. (a) Met sia tongeni meefi lupwen sia nóm lón osukosuk, nge met itá sipwe chechchemeni? (b) Met sipwele pwóróusfengen wóón?

⁵ Álleani Sefanaia 3:16, 17. Lupwen sia nóm lón osukosuk, itá sisap niwokkus me lichippúng, are eitietiw péúch. Semach we mi tong Jiowa a etiwakich ach sipwe isetá ngeni ach kewe aúrek meinisin. (1 Pet. 5:7) Jiowa a tongekich usun chék an tongei ewe mwúún Israel. A ereniir pwe péún ‘ese mochomoch, a tongeni amanaueer.’ A chék mmólnetá iteitan le amanawa néún kewe chón angang mi tuppwél. (Ais. 59:1) Lón ei lesen sipwe káé usun úlúngát pwóróus lón Paipel mi pwáraatá pwe Jiowa a mochen me a tufichin apéchékkúla néún kewe aramas pwe repwe tongeni féri letipan inaamwo ika ra nóm fán watteen weires. Sipwe ppii ifa usun ekkeei pwóróus ra tongeni apéchékkúlok.

6, 7. Met sia tongeni káé seni án chón Israel win lón ar maunfengen me chón Amalek?

⁶ Ekiseló mwirin án ekkewe chón Israel ngaseló seni ar fétek lón Isip, chón Amalek ra mauner. Moses a ereni ewe mwán mi pwora itan Josua an epwe emmweni Israel lón maun. Iwe mwirin, Moses a ereni Aaron me Hur ar repwe fiti le feitá wóón eú chuuk, ikewe ia ra tongeni kúna ewe leeni repwe maunfengen ie. Itá ekkena úlúmén mwán ra sú seni ewe maun pokiten ra niwokkus? Aapw!

⁷ Moses a fiti eú kókkót mi awinna ekkewe chón Israel lón ar we maun ngeni chón Amalek. A kamwéchúnnúk wokun Kot we me a eitietá péún fán láng. Lupwen Moses a féri ena, Jiowa a apéchékkúla ekkewe chón Israel lón ar fiu ngeni chón Amalek. Iwe nge, lupwen a mélúlúló péún Moses kewe, a poputá le eitiiretiw, iwe ekkewe chón Amalek ra poputá le win. Aaron me Hur ra mwittir álisi Moses. “Ra angei eföü fau o amotätiu Moses won. Nge Aaron me Hur ra amwöchätä pöün, eman epek pwal eman epek. Iei usun pöün Moses ra itifochetä tori akkar a tuputiu.” Iwe, ren péún Kot mi manaman, ekkewe chón Israel ra win.​—Eks. 17:8-13.

8. (a) Met Asa a féri lupwen ekkewe chón Itiopia ra mochen maun ngeni chón Juta? (b) Ifa usun sipwe áppirú Asa?

⁸ Jiowa a pwal mmólnetá le áeá péchékkúlen péún le álisi néún kewe aramas lón fansoun King Asa we. Ewe Paipel a fós usun chómmóng mwichen soufiu, nge ewe mi watte seniir meinisin, ina án ewe re Itiopia itan Sera, a wor néún 1,000,000 soufiu mi angangéch. Chóchóón ewe mwichen soufiun Itiopia a watte, arapakkan fán ruu seni néún Asa kewe soufiu. Iwe met, Asa mi meefi aúrek, niwokkus, are lichippúng? A itá mut ngeni péún ar repwe ititiw? Aapw! Mwittir chék Asa a tingor án Jiowa álillis.  Me ren aramas, usun esap tufich ar repwe win lón ar maun ngeni chón Itiopia. “Nge mettoch meinisin ra tufich ngeni Kot.” (Mat. 19:26) Kot a áeá watteen an péchékkúl me a álisi Asa le “akufu ekewe sounfiun Itiopia.” I ewe emén “lelukan a chök unus ngeni ewe Samol mi Lapalap lon ränin manauan meinisin.”​—2 Kron. 14:8-13; 1 King 15:14.

9. (a) Met Nehemia a kúna lupwen a ló Jerusalem, me met a meefi? (b) Ifa usun Kot a pélúweni án Nehemia iótek?

⁹ Met Nehemia a kúna lupwen a ló Jerusalem? A kúna pwe ekkewe chón oput seni ekkewe fénúen ekis ra eniwokkusu ekkewe chón Jus, ina popun ra kaúló lón ar angangen aúetá ewe tittin Jerusalem. Ewe telinimw ese túmún, me ekkewe chón Jus ra lichippúng. Met Nehemia a meefi? Itá a pwal meefi lichippúng me eitietiw péún kewe? Aapw! Nehemia a lúkúlúk wóón Jiowa fansoun meinisin usun chék Moses, Asa, me pwal ekkóch néún Jiowa kewe chón angang mi tuppwél. Iwe, lón pwal ena atun, Nehemia a tingor án Jiowa álillis, me Jiowa a pélúweni an iótek. Kot a áeá an “manaman mi lapalap” me péún mi “pöchökül” le apéchékkúla ekkewe chón Jus. (Álleani Nehemia 1:10; 2:17-20; 6:9.) Ka lúkú pwe Jiowa a kan áeá an “manaman mi lapalap” me péún mi “pöchökül” le álisi néún kewe chón angang lón ei fansoun?

10, 11. (a) Met Satan a sótun féri pwe sipwe eitietiw péúch? (b) Met Jiowa a áeá pwe epwe apéchékkúlakich? (c) Ifa usun án Jiowa káit a fen álisuk?

¹⁰ Sia fókkun silei pwe ewe Tefil esap tongeni eitietiw péún kewe. Epwe sópweló an maunekich me achocho le eppeti ach kewe angang Chón Kraist. A áeá kapas chofona me minen eniwokkus seni ekkewe mwú, néúwisin lamalam, me chón rikiló seni lamalam mi enlet. Met Satan a achocho ngeni? A mochen ach sipwe úkútiw le afalafalafeili kapas allimen ewe Mwú. Nge Jiowa a tongeni me a mochen álisikich, a awora ngenikich an we manaman mi fel pwe epwe apéchékkúlakich. (1 Kron. 29:12) A fókkun lamot ach sipwe tingorei Kot an we manaman mi fel pwe sipwe tongeni ú ngeni Satan me an ei fénúfan mi ngaw. (Kölf. 18:39; 1 Kor. 10:13) Sia pwal kilisou ren ewe álillis sia angei seni án Kot we Kapas. Pwal ekieki ekkewe chómmóngun mettóch sia káé seni néúch kewe puk iteiten maram. Masouen Sekaraia 8:9, 13 (álleani) a katowu atun fférsefálin ewe imwenfel lón Jerusalem, nge minne a mak lón a tongeni álisikich ikenái.

¹¹ Jiowa a pwal apéchékkúlakich ren ewe káit sia angei seni ach kewe mwich, mwichelap, me pwal ekkewe sókkopaten sukulen Paipel. Ena káit a tongeni álisikich le angang ngeni Kot ren ekkewe popun mi pwúng, isetiw met sia mochen achocho ngeni, me apwénúetá wisach kewe Chón Kraist. (Kölf. 119:32) Ka mwétéres le angei péchékkúl seni minne Jiowa a ákkáiti ngenikich?

12. Met mi lamot sipwe féri pwe sipwe péchékkúl?

¹² Jiowa a álisi néún kewe aramas le okkufu ekkewe chón Amalek me chón Itiopia, me a apéchékkúla Nehemia me ekkewe chón Jus pwe repwe áwesaaló ewe tittin Jerusalem. Pwal ina chék usun, Kot epwe ngenikich péchékkúl pwe sipwe tongeni sópweló ach angangen afalafal inaamwo ika sia kúna sóssót seni pwisin ach aúrek, koput, me tanechepwakin aramas. (1 Pet. 5:10) Sap minne Jiowa epwe féri eú manaman pwe epwe amóeló ach kewe osukosuk. Nge mi lamot sipwe pwal pwisin féri ekkóch mettóch. Mi lamot sipwe álleani án Kot we  Kapas iteiten rán, ammólnatá minne sipwe káé lón mwich me fitiir iteiten wiik, akkachocho lón ach pwisin káé Paipel are famili fel, me lúkúlúk wóón Jiowa lón iótek. Sisap mut ngeni och mettóch an epwe erikikich seni ekkewe mettóch Jiowa a awora pwe epwe apéchékkúlakich. Ika ka meefi pwe poum kewe ra ititiw are apwangapwangoló lón eú me lein ekkena mettóch, tingor án Kot álillis. Mwirin ppii ifa usun án Kot we manaman mi fel “a angang lomi,” me “afisätä ämi mochen me ämi tufichin apwönüetä letipan.” (Fil. 2:13) Iwe nge, en mi pwal tongeni apéchékkúla péún ekkewe ekkóch?

13, 14. (a) Ifa usun emén pwiich a angei péchékkúl lupwen pwúlúwan we a máló? (b) Ifa usun sia tongeni apéchékkúlaló ekkewe ekkóch?

¹³ Jiowa a awora ngenikich ewe mwicheichen pwipwi wóón unusen fénúfan mi tongeni apéchékkúlakich. Aposel Paulus a apasa: “Oupwe apöchökülätä pöümi me pwäsukumi kana mi apwangapwang. Oupwe awenechara ekewe al oupwe fetal won.” (Ipru 12:12, 13) Chómmóng me lein ekkewe popun Chón Kraist ra angei ena esin álillis seni chiener kewe chón lúkú. A pwal ina usun ikenái. Áwewe chék, iei alon emén pwiich Chón Kraist mwán mwirin málóón pwúlúwan we me an pwal kúna ekkóch mettóch mi eletipechowu i: “Ua mirititi pwe sise tongeni filatá met sókkun sóssót epwe torikich, ineet epwe torikich, are fán fite. Ewe mettóch iótek me pwisin káé Paipel, ra usun eú life jacket mi álisiei ai usap kokoló lemataw. Me ewe álillis seni pwii kewe Chón Kraist a fókkun oururuei. Ua mirititi lamoten ai upwe ámááraatá ewe sókkun riri mi péchékkúl ngeni Jiowa me mwen an epwe ppiitá mettóch mi áweires.”

¹⁴ Aaron me Hur ra apéchékkúlatá péún Moses kewe ren ar amwéchúretá atun án Israel maun ngeni chón Amalek. Lón ei fansoun, sia pwal tongeni kútta alen ach sipwe álisi ekkewe ekkóch. Ekkóch pwiich kewe ra riáfféú pokiten ar chinnap, apwangapwangen inisiir, oput seni chón ar famili, tipitipingaw, are málóón emén attongeer. Sia pwal tongeni apéchékkúla ekkewe kúkkún me sáráfé pún fán chómmóng ra kúna sóssótun ar repwe féri mettóch mi ngaw are kútta itetekiar lón ei fénúfan. (1 Tes. 3:1-3; 5:11, 14) Ppii ifa usun ka tongeni pwáraatá óm enletin áfánni ekkewe ekkóch lón Leenien Mwich, atun oua afalafal, mwéngéfengen, are fósfengen wóón phone.

15. Ifa usun kapas múrinné a tongeni álisi pwiich kewe?

¹⁵ Mwirin án Asa okkufu ewe watteen mwichen soufiun Itiopia, ewe soufós Asaria a apéchékkúla i me néún kewe aramas ren an erá: “Nge ämi oupwe tipepwora, nge ousap apwangapwang, pun epwe wor liwinin ämi angang.” (2 Kron. 15:7) Ena mettóch a amwékútú Asa an epwe féri siwil pwe epwe apéchékkúlasefáli ewe fel mi enlet. Pwal ina chék usun, óm kewe kapas mi múrinné a tongeni apéchékkúla ekkewe ekkóch me álisiir le sópweló ar angang ngeni Jiowa. (SalF. 15:23) Kopwe pwal chechchemeni pwe ka aúfichietá chón óm we mwichefel lupwen ka eáni memmeef mi apéchékkúl atun mwich.

16. Ifa usun ekkewe mwán mi ásimaw ra áppirú Nehemia? Apwóróusa ifa usun ka kúna álillis seni pwiich kewe.

¹⁶ Ren án Jiowa álillis, péún Nehemia me ekkewe chón Jus ra péchékkúleló. Ra áwesaaló ewe tittin Jerusalem lón chék 52 rán! (Ne. 2:18; 6:15, 16) Nehemia ese chék kakkatol ekkewe ekkóch lupwen ra férsefáli tittin Jerusalem, nge i pwisin a  pwal álillis lón. (Ne. 5:16) Pwal ina chék usun ren chómmóng mwán mi ásimaw, ra áppirú Nehemia lupwen ra álillis lón kaútáán are elimelimen me túmúnún ekkewe Leenien Mwich. Ekkena mwán mi tong ra pwal ápéchékkúla pwiir kewe mi aúrek ren ar ló chuuriir lón imwer me fitiir lón ewe angangen afalafal.​—Álleani Aisea 35:3, 4.

17, 18. Met sia tongeni lúkúlúk wóón lupwen sia nóm lón osukosuk are aúrek?

¹⁷ Ach angangfengen me pwiich kewe a apéchékkúlaló ach tipeeúfengen. A pwal álisatá péchékkúlen ewe ririin pwipwi lefilach me apéchékkúla ach lúkúlúk wóón ekkewe feiéch án Kot we Mwú epwe aworato ekiseló chék. Lupwen sia apéchékkúla péún ekkewe ekkóch, sia álisiir pwe repwe likiitú lón fansoun mi áweires me ar repwe eáni ápilúkúlúkéch fán iten mwachkkan. Pwal och, ach álisi ekkewe ekkóch a pwal apéchékkúlaló péúch kewe me álisikich le nefotofot wóón met epwe fis lón mwachkkan.

¹⁸ Ach ekieki ifa usun Jiowa a fen álisi me túmúnú néún kewe chón angang mi tuppwél lóóm, a apéchékkúlaló ach lúkú me lúkúlúk wóón i. Ina minne, lupwen ka nóm lón osukosuk me aúrek, “kosap aitietiu poum”! Kopwe lúkúlúk pwe ika ka tingor án Jiowa álillis, péún kewe mi manaman repwe apéchékkúlok me emmwenuk ngeni ekkewe feiéch repwele feito.​—Kölf. 73:23, 24.