1. Met a alúkúlúkú ngonuk pwe án Kot we Kapas a manaman? (Ppii ewe sasing lepoputáán ei lesen.)

 NÉÚN Jiowa kewe aramas ra lúkúlúkú pwe an kapas are an pwóróus fán iten aramas “a manau o manaman.” (Ipru 4:12) Sia fen kúna manamanen ewe Paipel lón pwisin manawach me pwal ngeni manawen ekkewe ekkóch. Me mwen ach wiliti Chón Pwáraatá Jiowa, ekkóch me leich, kich chón solá, umwesimwesin sáfei mi efeiengaw are féri lisowumwáál. Pwal ekkóch mi iteféúló are wéúéch ra chúen meefi pwe a péén manawer. (SalAf. 2:3-11) A apwapwa pwe chómmóng me lein chókkewe mi ápilúkúlúkúngaw me mwanecheló, iei ra meefi pwe a wor aúchean manawer me ra ápilúkúlúkéch. Lón Ewe Leenien Mas sia fen álleani me pwapwaiti ekkena esin chómmóng pwóróus lón ewe lesen itelapan, “Ewe Paipel A Siwili Manawen Aramas” lón néúch kewe puk. Pwal mwo nge mwirin án aramas wiliti Chón Kraist, a chúen lamot ar repwe akkapéchékkúla ar riri ngeni Jiowa ren álillisin ewe Paipel.

2. Ifa usun manamanen án Kot we Kapas a álisi ekkewe aramas lón fansoun ekkewe aposel?

² Ese ámáirú pwe chómmóng ra féri watteen siwil lón manawer  lupwen ra silei ewe enlet. Pwiich kewe mi ápilúkúlúkún manaw lón láng lón fansoun ekkewe aposel ra féri ekkena esin siwil. (Álleani 1 Korint 6:9-11.) Lupwen Paulus a fós usun chókkewe resap mwúúni ewe mwúún láng, a pwal erá: “Ekoch me leimi ra föri ekei sokun föför me lom.” Án Kot we kapas me an we manaman mi fel a álisi ekkena aramas ar repwe siwil. Pwal mwo nge mwirin ar wiliti Chón Kraist, ekkóch me leir ra féri tipis mi chou mi kkúú ar riri ngeni Jiowa. Áwewe chék, ewe Paipel a fós usun lamoten án emén pwiich mwán mi kepit epwe katowu seni ewe mwichefel. Mwirin a ekkesiwil pwe a tongeni chónisefál ewe mwichefelin Chón Kraist. (1 Kor. 5:1-5; 2 Kor. 2:5-8) A mmen apéchékkúlakich án pwiich kewe tongeni féri chómmóng siwil lón manawer ren manamanen án Kot we Kapas.

3. Met sipwe pwóróus usun lón ei lesen?

³ Án Kot we Kapas a fókkun manaman. Pokiten Jiowa a awora ngenikich an we Kapas, iwe mi lamot sipwe fókkun alamotaéchú. (2 Tim. 2:15) Ei lesen epwe pwóróus usun met sia tongeni féri pwe sipwe alamota manamanen ewe Paipel (1) lón pwisin manawach, (2) lón ach angangen afalafal, me (3) atun asukul lón ewe mwichefel. Minne sipwe káé lón ei lesen epwe álisikich le pwáraatá ach tong me kilisou ngeni Semach we lón láng, ewe mi áiti ngenikich minne sipwe feiéch ren.​—Ais. 48:17.

4. (a) Met sipwe tongeni féri pwe án Kot we Kapas epwe achchúngú letipach? (b) Met ka kan féri pwe kopwe awora fansoun le álleani ewe Paipel?

⁴ Ren ach sipwe mut ngeni án Kot we Kapas epwe achchúngú letipach, mi lamot sipwe álleani iteitan. Mi lamot sipwe achocho le álleani iteiten rán. (Jos. 1:8) Lape ngenikich a fókkun chómmóng ach angang, nge mi lamot sisap mut ngeni och mettóch, kapachelong ach angang me wisach kewe, epwe aúkúkicheló seni ach álleani ewe Paipel. (Álleani Efisos 5:15, 16.) Neman sipwe awora fansoun lesossorusich, lerán, are lepwin. Sia tipeeú ngeni makkeien ewe soumakken kélfel mi erá: “Üa fokun aücheani om allük, üa ekinlonei fansoun meinisin.”​—Kölf. 119:97.

5, 6. (a) Pwata a lamot ach sipwe ekilon? (b) Ifa usun sipwe ekilon pwe epwe álilliséch ngenikich? (c) Ifa usun óm álleani ewe Paipel me óm ekilonei a fen álisuk?

⁵ Iwe nge, ese naf ach sipwe chék álleani ewe Paipel. Mi lamot sipwe ekilonei are ekiekifichi minne sia álleani. (Kölf. 1:1-3) Sipwe tongeni apwénúetá lón manawach án Paipel kapasen emmwen mi tipachem atun chék sia ekilonei. Ina minne, ese lifilifil ika sia álleani ewe Paipel seni eú puk are wóón néúch we mechá, nge sia mochen mut ngeni án Kot we Kapas epwe siwili manawach me amwékútúkich.

⁶ Ifa usun sipwe ekilon pwe epwe álilliséch ngenikich? Lupwen sia álleani ewe Paipel,  mi lamot sipwe mwo ekis kaúló me pwisin eisinikich: ‘Met ei pwóróus a áiti ngeniei usun Jiowa? Ifa usun ai apwénúetá ei pwóróus lón manawei? Met sókkun siwil a chúen lamot upwe féri?’ Lupwen sia ekilonei án Kot we Kapas me iótek usun minne sia álleani, iwe sia mochen apwénúetá. Iwe mwirin, sia tongeni kúna manamanen ewe Paipel lón manawach.​—2 Kor. 10:4, 5.

7. Ifa usun sipwe néúnéú ewe Paipel lón ach angangen afalafal?

⁷ A lamot sipwe néúnéú án Kot we Kapas fán chómmóng lupwen sia afalafal me asukula aramas. Emén pwiich mwán a erá: “Ika oua angangfengen me Jiowa le afalafal imw me imw, kopwe wisen fós iteitan are kopwe mut ngeni an epwe wisen fós?” Lupwen sia álleani ngeni emén ewe Paipel, sia mut ngeni Jiowa an epwe wisen fós ngeni. A fókkun watte manamanen eú wokisin sia filiéchú lap seni eú mettóch sia tongeni pwisin apasa. (1 Tes. 2:13) Atun ka afalafal, ka kan achocho le álleani ngeni aramas ewe Paipel úkúkún óm tongeni?

8. Pwata mi lamot ach sisap chék álleani ekkewe wokisin lupwen sia afalafal ngeni aramas?

⁸ Iwe nge, ese chék naf ach álleani eú wokisin seni Paipel ngeni chókkewe sia afalafaler. Lape ngeni aramas rese weweiti weween ekkewe wokisin lón ewe Paipel. Ina usun lón fansoun ekkewe aposel, me a pwal ina usun lón ei fansoun. (Rom 10:2) Mi lamot sisap mwittir ekieki pwe ewe chón imw a weweiti ewe wokisin sia álleani. Sia tongeni álisi ren ach apasasefáli ekkewe kapas mi lamot lón ena wokisin are ekkewe menlapen pwóróus, iwe mwirin sipwe áwewe ngeni weweer. Ika ina, án Kot we Kapas epwe tongeni achchúngú ekiekin me letipen aramas.​—Álleani Lukas 24:32.

9. Ifa usun sipwe tongeni álisi aramas le súféliti ewe Paipel ren met sipwe apasa me mwen ach sipwe álleani eú wokisin? Áweweei.

⁹ Minne sia apasa me mwen ach álleani eú wokisin a pwal tongeni álisi ewe chón imw le súféliti ewe Paipel. Áwewe chék, sia tongeni apasa, “Sipwe ppii met ewe Chón Férikich a apasa usun ei pwóróus.” Are ika sia fós ngeni emén esap Chón Kraist, sia tongeni apasa, “Sipwe nengeni met ekkewe Puk mi Pin ra erenikich.” Ika sia chuuri emén ese áfánni lamalam, sia tongeni eisini, “Ka fen rongorong ei mwitún minen lóóm?” Ika sia chemeni pwe mi pwisin wor án emén me emén aramas ekiek me sókkóló nónnómur, iwe sia tongeni féri úkúkún ach tufich pwe repwe pwapwaiti met sipwe apasa ngeniir me lepoputáán.​—1 Kor. 9:22, 23.

10. (a) Ifa pwóróusen emén pwiich mwán? (b) Ifa usun ka kúna manamanen án Kot we Kapas lón óm angangen afalafal?

¹⁰ Chómmóng ra kúna pwe ar néúnéú án Kot we Kapas a fókkun tongeni achchúngú letipen chókkewe ra afalafaler. Áwewe chék, emén pwiich mwán a chuuri emén chinnap mwán mi kan álleani néúch kewe puk ren fite ier. Eú rán, pwiich na ese chék likiti ngeni ewe mineféén Leenien Mas, nge a filatá an epwe pwal álleani ngeni eú wokisin. A  álleani 2 Korint 1:3, 4, ewe mi erá: “Ewe Sam mi eäni tong me ewe Kot mi echipakich lon mettoch meinisin. A akachipakich lon ach riaföü meinisin.” Ekkena kapas ra fókkun kkúú letipen ewe mwán iwe a tingorei pwiich we an epwe álleanisefál ena wokisin. Mwirin, ewe mwán a erá pwe a fókkun lamot ngeniir me pwúlúwan we oururun letiper. Ena wokisin a álisi le mochen alapaaló an silei usun ewe Paipel. Pwúngún, ach néúnéú án Kot we Kapas lón ach angangen afalafal a fókkun manaman!​—Föf. 19:20.

11. Ifa wisen pwiich kewe mi asukula ewe mwichefel?

¹¹ Sia kan pwapwaiti le fiti ach kewe mwich me mwichelap. Ewe ákkáeúin popun sia fiti, pokiten sia fel ngeni Jiowa. Sia pwal kúna feiéch seni minne sia káé seniir. Ren ena popun, a mmen watte me chou wisen pwiich kewe mwán le asukul lón ach kewe mwich. (Jas. 3:1) A lamot repwe fókkun túmúnú pwe ar asukul epwe lóngólóng wóón án Kot we Kapas. Ika ka eáni ena wis, iwe ifa usun kopwe tongeni alamota manamanen ewe Paipel an epwe tongeni achchúngú letipen ekkewe chón fiti mwich?

12. Ifa usun ewe chón afalafal lón ewe mwichefel epwe túmúnú pwe an afalafal epwe lóngólóng wóón ewe Paipel?

¹² A lamot pwe ekkewe wokisin epwe ina lóngólóngun meinisin án ekkewe mwán afalafal lón mwich. (Joh. 7:16) Ina popun, kopwe  fókkun túmúnú pwe napanapen óm eáni óm afalafal me ekkewe kapas áwewe are pwóróusen manawen aramas rete aúchea lap seni ewe Paipel. Pwal och, chemeni pwe óm álleani ekkewe wokisin ese léllé ngeni óm asukula aramas seni Paipel. Ren enletin, ika ka kon álleani chómmóng wokisin, lape ngeni aramas resap chechchemeni. Ina popun kopwe filiéchú ekkewe wokisin ka mochen néúnéú. Awora fansoun le álleaniir, áweweer, eáni kapas áwewe usur, me ppii ifa usun chón mwich repwe apwénúetáéchúúr. (Ne. 8:8) Lupwen eú afalafal a lóngólóng wóón eú outline, a lamot kopwe káéfichi ewe outline me ekkewe wokisin lón. Achocho le weweiti ifa usun ewe outline me ekkewe wokisin ra ririfengen. Mwirin, néúnéú ekkóch me lein ekkena wokisin pwe kopwe asukula ewe mwichefel usun ekkewe pwóróus ewe outline a menlapei. (Ka tongeni kúna ekkewe kapasen éúréúr mi múrinné lón ewe puk, Benefit From Theocratic Ministry School Education lesen 21 ngeni 23.) Nge met mi lamot seni meinisin, ina óm tingor án Jiowa álillis lón óm áiti ngeni ewe mwichefel an kewe pwóróus mi aúchea seni Paipel.​—Álleani Esra 7:10; Än Salomon Fos 3:13, 14.

13. (a) Ifa usun eú wokisin emén fefin Chón Kraist a rongorong lón eú mwich a achchúngú? (b) Ifa usun napanapen án pwiich kewe mwán néúnéú ewe Paipel lón ekkewe mwich a achchúnguk?

¹³ Lekúkkúnún emén pwiich fefin seni Australia, a chómmóng met mi eletipechou a  fis ngeni, me inaamwo ika fitu ier mwirin a kerán sile Jiowa, nge ese unusen tongeni lúkú pwe Jiowa a tongei. Atun eú mwich, a rongorong eú wokisin mi wesewesen achchúngú letipan. A ekilonei me kútta pwal ekkóch pwóróus mi weneiti ena wokisin, iwe a efisi an epwe pwal álleani ekkóch wokisin lón ewe Paipel. Mwirin a fókkun lúkúlúk pwe Jiowa a tongei i. * Ka fen rongorong eú wokisin lón eú mwich are mwichelap mi pwal achchúnguk?​—Ne. 8:12.

14. Ifa usun sia tongeni pwári pwe sia aúcheani án Jiowa we Kapas?

¹⁴ Esap pwe sia kilisou ngeni Jiowa ren an we Kapas ewe Paipel? A pwonei pwe epwe nómoffóch, iwe a apwénúetá an na pwon. (1 Pet. 1:24, 25) Ina popun sia mochen sipwe álleani ewe Paipel iteitan, apwénúetá lón manawach, me néúnéú le álisi ekkewe ekkóch. Atun sia féri ekkena mettóch, sia pwári pwe sia enletin aúcheani ena liffang, nge lap seni ena, sia tongei me aúcheani Jiowa Kot, ewe Sounemenemen Makkan.