1. Ifa ewe pwóróus mi lamot Jesus a fós usun lón ewe sáingoon pwinin an nóm ren néún kewe chón káé?

LÓN ewe sáingoon pwinin án Jesus nóm ren néún kewe chón káé mwen an epwele máló, a féúni ewe kapas chen arapakkan fán 30. A ereni néún kewe chón káé pwe a lamot ar repwe ‘echenifengeniir.’ (Joh. 15:12, 17) Ar tong epwe fókkun amwarar iwe aramas repwe kúna me silei pwe iir ekkewe Chón Kraist mi enlet. (Joh. 13:34, 35) Ewe tong Jesus a fós usun esap chék ina och memmeef, nge a wor manamanan me ina eú napanap mi pennúkú pwisin mochenin. Jesus a erá: “Esap wor eman a eäni chen mi lapalap seni ei chen, are eman a pölükü manauan fän iten chiechian kana. Iwe, ämi chiechiei kana, are oupwe apwönüetä mine üa allük ngenikemi.”​—Joh. 15:13, 14.

2. (a) Met néún Kot kewe chón angang ra silleló ren lón ei fansoun? (b) Ikkefa ekkewe kapas eis sipwe pélúweniir lón ei lesen?

² Néún Jiowa kewe chón angang lón ei fansoun ra silleló ren ar eáni ewe tong mi enlet mi pennúkú pwisin mochenin, me ar enletin tipeeúfengen. (1 Joh. 3:10, 11) Wóón unusen fénúfan  ra pwal enletin tongefengeniir, ese lifilifil ika iir chón menni fénú are einang, ewe fós ra eáni, are ifa usun ra mámmááritá. Pwata a kon lamot tong lón ei fansoun? Ifa usun Jiowa me Jesus ra aúfichikichetá ren tong? Me ifa usun sia tongeni pwári ena tong lón ach oururu me apéchékkúla ekkewe ekkóch?​—1 Kor. 8:1.

3. Ifa usun ekkeei “fansoun weires” a kkúú aramas?

³ Sia nóm lón ei “fansoun weires,” me manaw a “chök masou ren angang me weires.” (2 Tim. 3:1-5; Kölf. 90:10) Chómmóng aramas ra fókkun meefi riáfféú me ra chék mochen fangetá. Lap seni 800,000 aramas ra pwisin nireló iteiten ier, weween pwe emén aramas a má iteiten 40 seken. A elichippúng pún pwal mwo nge ekkóch pwiich kewe ra meefi ekkena esin memmeef me ra pwisin nireló.

4. Ié kewe me lón ewe Paipel ra meefi pwe ra mochen máló?

⁴ Lón fansoun lóóm, ekkóch néún Kot kewe chón angang mi tuppwél ra fókkun riáfféú pokiten ar kewe osukosuk, iwe ra chék mochen máló. Áwewe chék, Hiop a kúna ena esin riáfféú ina popun a apasa: “Üa anioputa manauei, üsap chüen mochen manau.” (Hiop 7:16; 14:13) Sona a fókkun lichippúng iwe a apasa: “Ai Samol mi Lapalap, üa fokun tüngor ngonuk pwe kopwe angei seniei manauei, pun üa efich ai üpwe mäla mwen ai üpwe manau.” (Sona 4:3) Ewe soufós Elias a fókkun ápilúkúlúkúngaw me apasa: “Ai Samol mi Lapalap, a kon naf ngeniei ai weires, kopwe angei seniei manauei.” (1 King 19:4) Nge Jiowa a tongei néún kana chón angang mi tuppwél, me a mochen ar repwe manaw. Ese apwúngúúr pokiten ra eáni ekkena esin memmeef. Nge a fen álisiir le apéchékkúlasefáli ar mochen le manaw pwe repwe tongeni sópweló le akkangang ngeni I fán tuppwél.

5. Pwata a wesewesen lamot ngeni pwiich kewe ar repwe meefi ach tongeer lón ei fansoun?

⁵ Ikenái, chómmóng pwiich kewe ra nóm fán watteen osukosuk me a lamot ngeniir ar repwe meefi ach tongeer. Ekkóch me leir ra kúna esiit are riáfféúmwáál. Ekkóch ra likiitú fán án chiener kewe chón angang mesáániir me uwofós usur. Are ra fókkun mélúlú pokiten ra kan angang fite fite awa are a fókkun áweires ar angang. Pwal ekkewe ekkóch a chou ar osukosuken famili. Neman pwúlúwer kewe esap iir chón angang ngeni Jiowa, iwe ra soun esiiter. Fán ekkena sókkopaten weires, chómmóng ra meefi pwe ese chúen wor ar péchékkúl, me ra mwo nge poputá le tipemwaramwareiti pwisin aúchear. Ié a tongeni álisiir?

6. Ifa usun án Jiowa tong a apéchékkúla néún kewe chón angang?

⁶ Jiowa a alúkúlúkú néún kewe chón angang pwe a tongeer iei me epwe pwal tongeer tori feilfeiló chék. Anchangei meefien ekkewe chón Israel lupwen Jiowa a ereniir: “Pokiten om aüchea me om itetekia me rei, pwal pokiten ai echenuk,” me a pwal erá: “Kosap niuokus, pun ngang üpwe etuk.” (Ais. 43:4, 5) Sia silei pwe Jiowa a aúcheani emén me emén leich. * Ewe Paipel a pwonei: “A wor an manamanen amanaua aramas. Epwe meseik reöm fän pwapwa.”—Sef. 3:16, 17.

7. Ifa usun án Jiowa tong a usun chék án emén inelap tong mi oupwu néún? (Ppii ewe sasing lepoputáán ei lesen.)

 ⁷ Jiowa a pwonei pwe epwe apéchékkúla me oururu néún kewe aramas ese lifilifil met sókkun osukosuk ra nóm fan. A apasa: “Oupwe ne ussun emon semirit inan mi oupu o a uwei non poun o tumunuöchu non an tongei. Upwe chȧchȧri kemi non Jerusalem ussun chok emon inenap a chȧchȧri noun.” (Ais. 66:12, 13, Kapasen God) Ekieki án emén ménúkol meefi núkúnúkéch lupwen inan we a ekii are urumwot ngeni! Jiowa a fókkun tongeok me a mochen pwe kopwe meefi núkúnúkéch. Kosap tipemwaramwareiti án Jiowa fókkun aúcheanuk.—Jer. 31:3.

8, 9. Ifa usun án Jesus tong a apéchékkúlakich?

⁸ Iei pwal eú popun sia silei pwe Jiowa a tongekich: “Kot a echeni chon fanüfan, pwe a fangala Nöün Aleman, pwe meinisin mi lükü i resap pöütmwälila, pwe repwe eäni manau esemüch.” (Joh. 3:16) Án Jesus asor a pwáraatá pwe i a pwal tongekich, me ena tong a apéchékkúlakich. Ewe Paipel a apasa pwe pwal mwo nge “osukosuk, are weires” esap tongeni “aimwükich seni än Kraist we chen.”—Rom 8:35, 38, 39.

⁹ Fán ekkóch sia nóm fán ekkewe osukosuk mi apwangapwangakich lón pekin inis me memmeef are a angei senikich ach pwapwa lón ach angang ngeni Jiowa. Nge ach chechchemeni úkúkún án Kraist tongekich a tongeni elikiitúkich. (Álleani 2 Korint 5:14, 15.) Án Jesus tong a apéchékkúlakich ach sipwe chúen mochen manaw me angang ngeni Jiowa. A tongeni álisikich ach sisap fangetá fán sókkopaten sóssót, áwewe chék ren lichippúng, aúrek, riáfféúmwáál are feiengaw watte.

10, 11. Wisen ié an epwe apéchékkúla pwiich kewe mi letipechou? Áweweei.

¹⁰ Jiowa a pwal áeá ewe mwichefel pwe epwe aúfichikichetá ren an tong. Lupwen sia tongei pwiich kewe, sia ánnetatá ach tongei Jiowa. Sia féri úkúkún ach tufich le álisi pwiich kewe le mirititi pwe iir mi aúchea, me Jiowa a tongeer. (1 Joh. 4:19-21) Aposel Paulus a makkeei: “Oupwe apöchökülafengenikemi o alilisfengen lefilemi, usun oua fen föri iei.” (1 Tes. 5:11) Esap chék ekkewe mwán mi ásimaw ra tongeni féri ena. Emén me emén kich sia tongeni áppirú Jiowa me Jesus ren ach oururu pwiich kewe.​—Álleani Rom 15:1, 2.

¹¹ Neman a wor ekkóch lón ewe mwichefel a lululó ar meefi letipechou are aúrek, iwe a lamot ngeniir álillisin tokter are sáfei. (Luk. 5:31) Ekkewe mwán mi ásimaw me ekkóch chón ewe mwichefel ra mirititi pwe esap iir tokter, nge a mmen lamot ewe álillis me ourur ra tongeni awora. Meinisin lón ewe mwichefel ra tongeni ‘apöchöküla letipen chon niuokus, alisi ekewe chon apwangapwang, pwal mosonotam ngeni aramas meinisin.’ (1 Tes. 5:14) Sia mochen achocho le weweiti meefien pwiich kewe. Mi lamot sipwe mosonottam me fós ngeniir fán ewe napanap epwe oururuur lupwen ra lichippúng. Ka achocho le apéchékkúla ekkewe ekkóch? Met ka tongeni féri pwe epwe pwal échúló óm oururu me apéchékkúla pwiich kewe?

12. Apwóróusa pwóróusen emén mi péchékkúletá ren án an we mwichefel pwári tong ngeni.

¹² Iei alon emén chienach fefin lón Iurop: “Fán ekkóch ua ekieki ai upwe pwisin nieiló, nge mi wor eú kúmiin aramas ra kan álisiei. Ai we mwichefel a fen seláni manawei. Pwii  kewe ra fókkun apéchékkúlaei me tongeei fansoun meinisin. Inaamwo ika fitemén chék ra silei ai semmwen ren lululóón ai meefi letipechou, nge ewe mwichefel a chék mmólnetá le álillis iteitan. Mi wor eú pean pwúpwúlú usun iir semei me inei lón pekin lúkú. Ra túmúnúéchúei, me ra mmólnetá le álisiei fansoun meinisin, lerán me lepwin.” Pwúngún pwe sap minne meinisin epwe léllé úkúkún ewe álillis ra tongeni awora. Nge kich meinisin sia tongeni awora watteen álillis ngeni pwiich kewe. *

13. Met a lamot sipwe féri ren ach sipwe oururu ekkewe ekkóch?

¹³ Kopwe aúselingéch. (Jas. 1:19) Sia pwári tong lupwen sia aúseling me achocho le weweiti meefien emén. Eáni kapas eis mi ésúfél pwe epwe tongeni álisuk le weweiti meefian. Epwe tongeni esilla ika ka wesewesen mochen álillis, pwal mwo nge seni wówóón wóón mesom. Atun a fós, kopwe mosonottam me mut ngeni an epwe uwawu meefian nge kosap atai an fós. Ika ka aúselingéch, ka tongeni wewefichiti me a tongeni álisi le lúkúlúk wóóm. Mwirin epwe mecheres ngeni an epwe aúseling ngonuk lupwen ka sótun álisi. Lupwen ka enletin tongei aramas, iwe óm tong a fókkun tongeni oururuur.

14. Pwata sipwe túmúnú ach sisap esiita ekkewe ekkóch?

¹⁴ Kosap esiit. Epwe fen lapóló án emén meefi letipechou ika a meefi pwe sia esiita. Iwe mwirin, epwe tongeni fókkun weires ach sipwe álisi. “Mi wor aramas ra fos, nge resap ekieki och. Ekei sokun fos ra akinasa aramas, usun efoch ketilas a akinasa eman. Nge än ekewe chon tipachem kapas ra atoto pöchökül.” (SalF. 12:18) Inaamwo ika sise ekiekin ekinása letipen emén mi letipechou ren ach fós, nge sia chúen tongeni ámeteki letipan ika sise túmúnúéchú ach kapas. Ren ach sipwe alúkúlúkú pwiich we, a lamot sipwe pwári ngeni pwe sia enletin mochen weweiti an weires.​—Mat. 7:12.

15. Ifa ewe minen álillis mi aúchea sia tongeni néúnéú ren ach sipwe oururu ekkewe ekkóch?

¹⁵ Néúnéú án Kot we Kapas le oururu aramas. (Álleani Rom 15:4, 5.) Ewe Paipel a feito seni ewe “Kot, i popun ach likitü me ach küna pöchökülen letipach,” ina popun sise máirú pwe sia kúna watteen ourur seni an kewe kapas. A pwal wor rech ewe Watchtower Online Library lón fósun Chuuk, Watch Tower Publications Index me ewe Research Guide for Jehovah’s Witnesses lón fósun Merika. Ika sia néúnéú ekkena minen álillis, iwe sipwe kúna ekkewe wokisin me puk sia tongeni néúnéú le oururu me apéchékkúla pwiich kewe.

16. Menni napanap a tongeni álisikich le apéchékkúla emén mi letipechou?

¹⁶ Kopwe úméúméch me tipepwetete. Jiowa i “ewe Sam mi eäni tong me ewe Kot mi echipakich lon mettoch meinisin,” me a “ümöümöch o lukpwetete” ngeni néún kewe chón angang. (Álleani 2 Korint 1:3-6; Luk. 1:78; Rom 15:13) Paulus a isetiw eú leenien áppirú mi múrinné pokiten a áppirú Jiowa. A makkeei: “Aia tipepwetete lupwen aia nonom remi, usun eman in a tümwünü püsin nöün kana. Iwe, pokiten aia fokun tongekemi,  aia pwal pwapwa le fang ngenikemi sap chök ewe Pworausen Manau seni Kot, nge pwal püsin manauem, pun aia fokun echenikemi.” (1 Tes. 2:7, 8) Lupwen sia úméúméch usun Jiowa, iwe sia tongeni awora ewe sókkun ourur pwiich we a tingor lón an iótek!

17. Ifa ewe ekiek mi pwúng usun pwiich kewe epwe álisikich le apéchékkúler?

¹⁷ Kosap ekieki pwe pwiium kewe Chón Kraist iir mi unuséch. Kopwe eáni ekiek mi pwúng me itepék me rúúepek usun pwiium kewe. Ika ka ekieki pwe iir mi unuséch iwe kopwe lichippúng. (SalAf. 7:21, 22) Chechchemeni pwe Jiowa a itepék me rúúepek lón an ekiek usuch. Ina minne mi lamot sipwe mosonottamfengen. (Ef. 4:2, 32) Sise mochen ámmeef ngeniir pwe ese naf ar achocho are alélléér ngeni pwal ekkewe ekkóch. Nge sipwe fen apéchékkúler me apúnger ren ar kewe féffér mi múrinné. Ena mettóch a tongeni álisiir le meefi pwapwa lón ar angang ngeni Jiowa.​—Kal. 6:4.

18. Pwata sia mochen sipwe aúfichietá ekkewe ekkóch ren tong?

¹⁸ Jiowa a aúcheani meinisin néún kewe chón angang, me Jesus a pwal aúcheaniir. (Kal. 2:20) Sia fókkun tongei pwiich kewe, ina popun mi lamot sipwe kirekiréch ngeniir. Sipwe “fokun achocho ngeni mine epwe afisätä kinamwe o alilisfengen le apöchökülafengenikich lefilach.” (Rom 14:19) Sia mwétéresiti manawach lón ewe Paratis ikewe ese wor popun án emén epwe letipechou me ie! Esap chúen wor samau me maun. Aramas resap chúen máló pokiten álemwiriach we tipis, esap chúen wor riáfféúmwáál, osukosuken famili, are elichippúngún manawach. Lesópwólóón ewe engeréú ier, aramas meinisin repwe unuséch. Jiowa epwe mwuuti chókkewe mi amwéchú ar tuppwél lón ewe sáingoon sóssót, me repwe eáni ewe “ngasala me ling” pwe ra wiliti néún Kot wóón fénúfan. (Rom 8:21) Ina minne kich meinisin sipwe pwáraatá ewe sókkun tong mi aúfichikichetá me sipwe álillisfengen le kúna manaw lón án Kot we ótót sefé mi amwarar.