ATUN ka mochen silei ika a kulók fite, met kopwe féri? Ese mwáál kopwe katol noum we kulók. Neman kopwe kúna pwe a eú esopw mwirin leolowas. Met kopwe ereni emén chienom ika a eisinuk, “A kulók fite?”

Ena, a lóngólóng wóón ia ka nónnóm ie. Áwewe chék, ka tongeni erá, “A 1:30” are, “A 13:30.” Lón ekkóch leeni ka pwal mwo nge tongeni erá, “A esopw ruu,” weween 30 minich mwen ruu.

Ifa usun aramas lóóm lóóm ra apasa kulók? Ra apasa lón pwal ekkóch itiitin. Ewe Tesin Ipru a néúnéú ekkewe kapas, áwewe chék ren “lesosor,” “leoloas,” me “lekuniol.” (Ken. 8:11; 19:27; Tut. 28:29; 1 King 18:26) Nge fán ekkóch ewe Paipel a néúnéú kapas mi kon tichik.

Lón Israel lóóm, a terú an wor chón mmas pwe repwe mammas, ákkáeúin lepwin. Fitepúkú ier me mwen án Jesus uputiw, ekkewe chón Israel ra kinietiw ewe pwiin lón úlúngát kinikin, ra eita ngeni mmas, pún ina ewe atun epwele ekkesiwil ewe chón mmas. (Kölf. 63:6, NW) Lón Soukapwüng 7:19, NW, a fós usun “ewe lukanapen kinikinin fansoun lepwin.” Ewe atun Jesus a uputiw, ekkewe chón Jus ra kan kini ewe pwiin lón rúáánú kinikin, usun met ekkewe chón Krik me chón Rom ra féri.

Fán chómmóng ekkewe Puken Kapas Allim ra fósun ekkeei kinikinin fansoun lepwin. Áwewe chék, “lón ewe arúáánún kinikinin fansoun lepwin,” Jesus a fetál wóón konik ngeni ewe waa ia néún kewe chón káé ra nóm ie. (Mat. 14:25, NW) Jesus a pwal apasa lón an we kapas áwewe: “Are atewe epwe feito lon aruuen kinikinen pwin, are aulungatin, o epwe kuna pwe ra usun we chok, iwe, ekkewe chon angang repwele feioch.”​—Luk. 12:38, Testament Mi Fö.

Jesus a fós usun ekkewe rúáánú kinikinin fansoun atun a ereni néún kewe chón káé ar repwe mmólnetá pún rese “silei inet samolun ewe imw epwe war, are epwe war lekuniol, are lukenipwin, are wünümweerän, are lesosor.” (Mark. 13:35) Ewe áeúin me lein ekkewe kinikinin fansoun, ina “lekuniol,” seni tuputiwen akkar ngeni ina epwe kulók tiu lepwin. Ewe oruuen kinikinin fansoun, “lukenipwin,” ina epwe seni kulók tiu lepwin ngeni lukenipwin. Ewe aúlúngátin kinikinin fansoun, ina “wünümweerän” are atun kékkéén chukó, seni lukenipwin ngeni ina epwe kulók úlúngát lesossor. Ese mwáál ina ewe atun ewe chukó a kékké lón ewe pwinin Jesus a ares. (Mark. 14:72) Ewe arúáánún kinikinin fansoun, lesossorusich, ina epwe seni kulók úlúngát lesossor ngeni tétáán akkar.

Ina minne, inaamwo ika ese wor néún ekkewe aramas lóóm kulók usun néúch kewe lón ei fansoun, nge a wor alen ar repwe erá ika a kulók fite.