1, 2. (a) Ifa sókkofesenin Jiowa seni ekkewe aramas mi wor maner ren féfférúr ngeni ekkewe ekkóch? (b) Met sipwe káé lón ei lesen?

FÁN CHÓMMÓNG ekkewe aramas mi wor maner ra nemeni ekkewe ekkóch are pwal mwo nge eriáfféúr. (Mat. 20:25; SalAf. 8:9) Esap fókkun ina usun Jiowa! Inaamwo ika I Ewe mi Unusen Manaman lón unuselapen láng me fénúfan, nge a fókkun ekieki aramas rese unuséch. A kirekiréch me áfánni meefiach me met mi lamot ngenikich. A chemeni pwe sise unuséch me a silei ach kewe apwangapwang, ina popun ese kan erenikich ach sipwe féri met sise tufichin féri.​—Kölf. 103:13, 14.

² Sia káé seni Paipel usun án Jiowa ekieki meefien néún kewe aramas. Sipwe pwóróus usun úlúngát mettóch: Áeúin, án Jiowa kirekiréch le álisi ewe kúkkún át Samuel le atoura ngeni Eli, ewe Souasor mi Lap ewe kapasen kapwúng. Oruuan, án Jiowa mosonottam ngeni Moses lupwen a meefi pwe ese tufich an epwe emmwenawu ewe mwúún Israel  seni Isip. Me aúlúngátin, án Jiowa ekieki meefien ekkewe chón Israel atun ra towu seni Isip. Met sia tongeni káé usun Jiowa seni ekkena pwóróus, me ifa usun sipwe áppirú?

3. Ifa ewe mettóch mi amwarar a fis ngeni Samuel lón eú pwinin, me ifa ewe kapas eis sia tongeni eáni? (Ppii ewe sasing lepoputáán ei lesen.)

³ Samuel a poputá le angang lón ewe imwenfel mangaku lupwen a chúen chék kúkkún. (1 Sam. 3:1) Lón eú pwinin, lupwen Samuel a fen annut, a fis och mettóch mi fókkun amwarar. * (Álleani 1 Samuel 3:2-10.) A rongorong án emén kéri itan. Tittipan pwe ewe chinnap itan Eli, ewe Souasor mi Lap a kéri. Ina popun, Samuel a pwáátá me ssáló ren Eli me ereni: “Ngang iei, en ka kökköriei.” Nge Eli a ereni: “Ngang üsap köruk.” Nge lupwen a pwal fissefál fán ruu, Eli a mirititi pwe Kot ewe a kékkéri Samuel. Iwe, Eli a ereni Samuel met epwe apasa ika a pwal fissefál, iwe Samuel a álleasochis. Pwata Jiowa ese ereni Samuel me lepoputáán pwe I ewe a kékkéri? Ewe Paipel ese apasa. Nge neman Jiowa a féri ena pokiten a ekieki meefien Samuel.

4, 5. (a) Met Samuel a féri lupwen Jiowa a ewisa ngeni an epwe uwei eú pwóróus ngeni Eli? (b) Met ei pwóróus a áiti ngenikich usun Jiowa?

⁴ Álleani 1 Samuel 3:11-18. Án Jiowa Allúk a allúkú ngeni ekkewe semirit ar repwe súféliti ekkewe chinnap, ákkáeúin chókkewe mi wor ar nemenem. (Eks. 22:28; Lif. 19:32) Ina popun, ese mwáál a weires ngeni emén kúkkún át usun chék Samuel an epwe chuuri Eli lesossor, me atoura ngeni fán pwora án Kot we kapasen kapwúng mi chou. Ewe Paipel a erenikich pwe Samuel a “niuokus le apworausa ngeni Eli künan.” Iwe nge, Kot a affata ngeni Eli pwe I ewe a kékkéri Samuel. Ina popun, Eli a ereni Samuel an esap túkúmi och seni met Kot a ereni. Samuel a álleasochisi Eli me “a apworausa ngeni meinisin.”

⁵ Ena kapasen kapwúng ese kon lien ámáirú ngeni Eli, pokiten “eman aramasen Kot” a fen pwári ngeni pwal ena esin kapasen kapwúng. (1 Sam. 2:27-36) Iwe, unusen ekkeei pwóróus ra áiti ngenikich usun án Jiowa áfánni meefien aramas me an tipachem.

6. Ikkefa ekkewe lesen sia tongeni káé seni napanapen án Kot álisi Samuel?

⁶ En emén kúkkún are sáráfé? Ika ina, pwóróusen ewe kúkkún át Samuel a áiti ngenikich pwe Jiowa a weweiti óm kewe memmeef me osukosuk. Neman ka nisássáw me a weires ngonuk óm kopwe afalafal ngeni ekkewe watte are óm kopwe sókkóló seni pilóóm kewe. Ka tongeni lúkúlúk pwe Jiowa a mochen álisuk. Ina minne, iótek me uwawu meefiom ngeni. (Kölf. 62:8) Ekilonei pwóróusen ekkewe kúkkún lón Paipel usun chék Samuel. Me fós ngeni pwiium kewe Chón Kraist, ekkewe mi watte sonuk  are táppumw kewe, chókkewe ra fen pworacho ngeni ekkewe esin osukosuk ka pwal kúna. Neman repwe apwóróusa ngonuk ekkewe atun Jiowa a álisiir neman lón ekkewe napanap rese pwal ekieki.

7, 8. Ifa usun Jiowa a pwáraatá pwe a fókkun áfánni meefien Moses?

⁷ Lupwen a 80 ierin Moses, Jiowa a ewisa ngeni eú wis mi fókkun weires, ina an epwe angasaaló mwúún Israel seni ar fétek lón Isip. (Eks. 3:10) Ese mwáál a fókkun ámáirú ngeni Moses ena wis pún a fen emén chón masen siip lón Mitian ren úkúkún 40 ier. Moses a erá: “Ngang iö pwe üpwe tongeni feila ren Farao o emwenawu ekewe aramasen Israel seni lon Isip?” Nge Jiowa a alúkúlúkú ngeni Moses me apasa: “Ngang üpwe etuk.” (Eks. 3:11, 12) Jiowa a pwal pwonei ngeni Moses pwe ekkewe souakkomwen Israel “repwe aüselinga.” Nge Moses a chúen erá: “Nge ika resap mochen lüküei, resap pwal aüselinga aloi?” (Eks. 3:18; 4:1) Ren enletin, Moses a apasa pwe Jiowa a tongeni mwáálliló! Nge Jiowa a mosonottam ngeni Moses. A pwal mwo nge atufichi Moses an epwe féri ekkewe manaman. Ren enletin, Moses i ewe ákkáeménún aramas mi mak lón Paipel pwe a nóm ren ena sókkun manaman.​—Eks. 4:2-9, 21.

⁸ Nge Moses a chúen kúnetipingen. A erá pwe a lipwákingaw le fós. Ina minne Kot a ereni: “Ngang üpwe alisuk le kapas o aiti ngonuk mine kopwe eäni fos.” Iwe, itá Moses a núkúnúkéch ren ena? Aapw, a tingorei Kot an epwe chék tiinaaló pwal emén! Iwe mwirin, Jiowa a song ngeni Moses. Nge a chúen áfánni meefien Moses me tiinaaló Aaron pwe epwe wisen kapas fán ásengesin Moses.​—Eks. 4:10-16.

9. Ifa usun án Jiowa mosonottam me kirekiréch a álisi Moses le wiliti emén souemmwen mi múrinné?

⁹ Met ena pwóróus a áiti ngenikich usun Jiowa? Pokiten Jiowa I Ewe mi Unusen  Manaman, a tongeni áeá an manaman le eniwokkusu Moses me eriáni an epwe álleasochis. Nge Jiowa a fen mosonottam ngeni me kirekiréch, me a alúkúlúkú néún na chón angang mi tipetekison pwe epwe eti. Iwe a sópwéch? Ewer! Moses a wiliti emén souemmwen mi fókkun múrinné mi emmweni néún Kot aramas. A achocho an epwe mosonoson me ekieki meefien ekkewe ekkóch, usun chék féfférún Jiowa ngeni.​—Num. 12:3.

10. Ifa usun sipwe feiéch lupwen sia ekieki meefien aramas usun chék Jiowa?

¹⁰ Ikkefa ekkewe lesen fán itach lón ei fansoun? Ika en emén mwán pwúpwúlú, emén sam are in, are emén mwán mi ásimaw, weween pwe ekkóch ra nóm fán óm nemenem. Iwe ren ena, a fókkun lamot óm kopwe áppirú Jiowa ren óm kopwe kirekiréch, mosonottam me ekieki meefien pwúlúwom we, noum kewe, me chón ewe mwichefel. (Kol. 3:19-21; 1 Pet. 5:1-3) Ika ka áppirú Jiowa Kot me Jesus Kraist, ewe Moses mi Lap, iwe epwe mecheres ngeni aramas ar repwe etto reom me fós ngonuk me kopwe apéchékkúler. (Mat. 11:28, 29) Kopwe pwal isetiw eú leenien áppirú mi múrinné fán iter.​—Ipru 13:7.

11, 12. Met Jiowa a féri pwe ekkewe chón Israel repwe meefi núkúnúkéch me kinamwe lupwen a emmweniirewu seni Isip?

¹¹ Neman a wor lap seni úlúngát million chón Israel ra towu seni Isip lón ewe ier 1513 mwen Kraist. A kapachelong leir ekkewe semirit, chinnap, me neman ekkóch me leir ra samau are a wor teriir. Ena mwich mi watte ra osupwangen néúr Souemmwen mi tongeer me weweitiir. Jiowa ena nge a néúnéú Moses an epwe emmweniir. Pokiten ena, ekkewe chón Israel ra meefi núkúnúkéch atun ra ló seni leenier na, ewe chék leeni ra silei usun.​—Kölf. 78:52, 53.

¹² Met Jiowa a féri pwe néún kewe aramas repwe meefi kinamwe? A akkóta ewe mwúún Israel lón “tettelin en me an cho” lupwen ra towu seni Isip. (Eks. 6:26) Pokiten ena kókkótéch, ra kúna pwe Kot a wesewesen nemeni mettóch meinisin. Jiowa a pwal emmweniir ren “eu kuchu” lerán, nge lepwin a emmweniir ren “ekkei mi saramaram” pwe epwe áchema ngeniir pwe I a nónnóm rer, emmweniir me túmúnúúr. (Kölf. 78:14) A fókkun lamot ngeni ewe mwúún Israel ar repwe meefi ena alúkúlúk seni Kot pokiten ren minne epwele fis ekiseló chék.

13, 14. (a) Ifa usun Jiowa a túmúnú ekkewe chón Israel lón ewe Setipar? (b) Ifa usun Jiowa a pwáraatá pwe a fókkun manaman lap seni ekkewe chón Isip?

 ¹³ Álleani Ekistos 14:19-22. Anchangei pwe en emén lein ekkewe chón Israel. Oua mwéchúló. Ekkewe mwichen soufiun Isip ra nóm lúkúsékúrúmi, me ewe Setipar a nóm mwemi. Mwirin Kot a mwékút. Ewe úrekúchú mi akkomw nóm mwemi, a mwékút ngeni lúkúsékúrúmi, lefilemi me ekkewe chón Isip. Iwe iei, ewe mwicheichen chón Isip ra nóm lón kiroch, nge ámi we mwichen chón Israel oua fókkun saram! Mwirin ka kúna án Moses eitieló péún wóón ewe sáát, iwe enienin étiw mi fókkun péchékkúl a eniito, iwe ewe léllé a kinikinfesen me efisi aler mi chémmóng. Fán kókkótéch, en me óm we famili, néúmi kewe man, ámi meinisin chón Israel oua fetál lukanapen ewe sáát wóón pwás. Ka fókkun máirú pún ewe pwúl ese pwakak are mitimit. A mecheres óm kopwe fetál wóón pokiten a pwásápwás me péchékkúl. Pokiten ena, pwal mwo nge ekkewe mi mmang le fetál ra tikeló epekin ewe sáát.

¹⁴ Álleani Ekistos 14:23, 26-30. Atun a fiffis ekkena mettóch, Farao, ewe mi lamalamtekia me miritingaw, a poputá le tapwekemi me chienom kewe chón Israel. Mwirin Moses a eitielósefál péún we wóón ewe sáát, iwe ewe léllé lón a liwinfengen wóón Farao me néún kewe mwichen soufiu. Ese wor emén me leir a manaw!​—Eks. 15:8-10.

15. Met ei pwóróus a áiti ngonuk usun Jiowa?

¹⁵ Ena pwóróus a áiti ngenikich pwal och  mettóch usun Jiowa. I emén Kot mi kókkótéch, me ena napanap a álisikich le meefi núkúnúkéch me kinamwe. (1 Kor. 14:33) Emén chón masen siip a tongei me túmúnú néún kewe siip, iwe a pwal ina usun Jiowa a tongei me túmúnú néún kewe aramas lón sókkopaten napanap. A énúkúnúkéchúúr me túmúnúúr seni chón oputer. Ena mettóch a fókkun alúkúlúkúkich me oururukich lón ei fansoun sia fetál ngeni sópwólóón ei ótót.​—SalF. 1:33.

16. Ifa usun sia tongeni kúna feiéch seni ach káésefál napanapen án Jiowa amanawa ekkewe chón Israel?

¹⁶ Ikenái, Jiowa a chúen tongei an we mwicheichen aramas. A álisiir le akkamwéchú ar ririéch ngeni me túmúnúúr seni chón oputer. Me epwe sópwósópwóló an féri ena atun ewe riáfféú mi lapalap epwele fis. (Pwär. 7:9, 10) Ina minne, ese lifilifil ika néún Kot kewe aramas iir kúkkún are chinnap, iir mi péchékkúl are ter, nge resap rúké are niwokkus atun ewe riáfféú mi lapalap. * Ren enletin repwe fen péchékkúleló! Repwe chemeni alon Jesus keei: “Oupwe ütä o awenatä möküremi, pun ämi küna manau a arapoto.” (Luk. 21:28) Repwe lúkúlúk wóón Jiowa pwe epwe túmúnúúr pwal mwo nge atun Kok, ewe mwichen mwúún aramas mi péchékkúl lap seni Farao epwe mauner. (Is. 38:2, 14-16) Pwata? Pokiten ra silei pwe Jiowa ese siwil. Epwe pwárisefál pwe i emén Chón Amanaw mi tong mi túmúnú néún kewe aramas.​—Ais. 26:3, 20.

17. (a) Ifa usun sipwe kúna feiéch lupwen sia káé pwóróusen án Jiowa túmúnú néún kewe aramas? (b) Met sipwe káé lón en lesen mwirin ei?

¹⁷ Lón ei lesen, sia fen káé ekkóch pwóróus ren ifa usun Jiowa a ekieki meefien néún kewe aramas me kirekiréch ngeniir lupwen a emmweniir me amanawer. Lupwen ka ekilonei ekkena esin pwóróus, kopwe achocho le kútta ekkewe mineféén tichikin pwóróus usun Jiowa kesaamwo fen silei me lóóm. Lupwen a lapóló óm sile usun napanapen Jiowa kewe mi amwarar, óm tong me lúkú epwe péchékkúleló. Lón en lesen mwirin ei, sipwe káé ifa usun sipwe tongeni áppirú Jiowa ren ach sipwe ekieki meefien chón ach famili, chón ewe mwichefel, me aramas sia chuuriir lón ach afalafal.