1. Ineet atun a tongeni áweires ach angang ngeni Jiowa?

INEET ewe atun ka ekieki pwe epwe kon áweires óm angang ngeni Jiowa? Itá lón ewe atun a chómmóng óm osukosuk are lón ewe atun ese kon chómmóng? Atun sia kúna weires sia kan mwittir seppiti Jiowa. Nge ifa usun atun sia nóm lón kinamwe? Fán ekkóch sia ménúki úkúkún aúchean ach angang ngeni Kot? Jiowa a éúréúra ekkewe chón Israel pwe ena mettóch a tongeni fis.​—Tut. 6:10-12.

2. Ifa ewe leenien áppirú King Asa a isetiw?

² King Asa i eú leenien áppirú mi múrinné usun an mwékút fán mirit ren an unusen lúkúlúk wóón Jiowa. A angang ngeni Jiowa esap chék lón fansoun weires nge pwal lón fansoun kinamwe. Seni me lóóm, “lelukan a chök unus ngeni ewe Samol mi Lapalap.” (1 King 15:14) Asa a pwári pwe a angang ngeni Jiowa ren unusen letipan ren an ataieló fel mi chofona me lón Juta. Paipel a erá pwe “a ataela än ekewe chon ekis rongen asor me ekewe lenien fel won ekewe leni tekia, a pwal aturala ekewe ürefau mi pin o pökükisietiu ekewe uluulun.” (2 Kron. 14:3, 5) A pwal mwo nge atowu Maaka, inan we chinnap lón wisan we mi tekia lón ewe mwú. Pwata? Pún a pese ngeni aramas ar repwe fel ngeni ululun.​—1 King 15:11-13.

3. Met sipwe káé lón ei lesen?

 ³ Asa ese chék atai ekkewe ululun, nge a pwal apéchékkúla fel mi limeliméch ren an álisi ekkewe aramasen Juta le liwiniti Jiowa. Jiowa a efeiéchú Asa me ekkewe chón Israel ren eú fansoun kinamwe. * Ren úkúkún engol ier lemwúún án Asa nemenem, “ewe fanü a kinamwe.” (2 Kron. 14:1, 4, 6) Sipwe pwóróus lón ei lesen wóón ifa usun Asa a alamotaéchú ena fansoun kinamwe. Mwirin, sipwe pwóróus wóón ifa usun ekkewe popun Chón Kraist ra usun chék Asa lón ar alamotaéchú eú fansoun kinamwe. Sáingolóón, sipwe pélúweni ei kapas eis: Ika ka nóm lón eú fénú mi mwumwu ngeni Chón Pwáraatá Jiowa ar repwe fel ie, ifa usun kopwe tongeni alamotaéchú ena fansoun kinamwe?

4. Me ren 2 Kronika 14:2, 6, 7, ifa usun Asa a alamotaéchú ewe fansoun kinamwe?

⁴ Álleani 2 Kronika 14:2, 6, 7. Asa a ereni ekkewe aramas pwe Jiowa “a fang [ngeniir] kinamwe ekis meinisin.” Asa ese ekieki pwe ena fansoun kinamwe ina eú fansoun repwe chék pwapwaiti manawer lón. Nge a fen poputá le aúetá ekkewe telinimw, ttit, imw tekia me asamalap. A ereni ekkewe aramasen Juta: “Sa chüen fanüeni ewe fanü.” Met weween alon na? A wewe ngeni pwe ekkewe aramas ra tongeni chúen féri ar angangen kaú me mwékútfetál pwe ese wor chón oputer lón ena fénú epwe tongeni pineir. A pesei ekkewe aramas ar repwe alamotaéchú ar fansoun kinamwe.

5. Pwata Asa a álisatá núkúnúkéchún an we mwichen soufiu?

⁵ Asa a pwal alamotaéchú ewe fansoun  kinamwe ren an álisatá núkúnúkéchún an we mwichen soufiu. (2 Kron. 14:8) Itá weween pwe ese lúkúlúk wóón Jiowa? Ewer mi lúkúlúk wóón i. Nge, Asa a silei pwe ina wisan lón an king le anúkúnúkú néún kewe aramas usun ekkewe osukosuk epwe tongeni toriir lón fansoun mwer. Asa a silei pwe ena fansoun kinamwe chón Juta ra pwapwaiti, esap nómoffóch, nge a pwúng ena.

6. Ifa usun ekkewe popun Chón Kraist ra alamota ewe fansoun kinamwe?

⁶ Inaamwo ika fán chómmóng ekkewe popun Chón Kraist ra kúna riáfféúmwáál, nge ra pwal pwapwaiti ekkewe fansoun kinamwe. Met ra féri lón ekkena fansoun? Ekkena mwán me fefin mi tuppwél ra afalafala ewe pwóróus allim fán tinikken. Ewe pwóróus lón puken Föför a erá pwe “ra manau ren ar asamolu ach Samol.” Ra chék sópweló le afalafala ewe pwóróus allim, iwe mwirilóón ra “chochomongola.” A ffat pwe Jiowa a efeiéchú ar afalafal fán tinikken lón ekkena fansoun kinamwe.​—Föf. 9:26-31.

7-8. Met Paulus me ekkewe ekkóch ra féri atun a suuk ngeniir? Áweweei.

⁷ Ekkewe popun Chón Kraist ra afalafal iteiten fansoun a suuk ngeniir. Áwewe chék, atun aposel Paulus a mirititi pwe a tongeni afalafal ngeni chómmóng lón Efisos, a nómotiw ikena me afalafal.​—1 Kor. 16:8, 9.

⁸ Paulus me ekkewe ekkóch Chón Kraist ra pwal tongeni afalafal ngeni chómmóng lón ewe ier 49, atun ekkewe aposel me souakkomw lón Jerusalem ra ataweei ewe osukosuk usun sirkumsais. (Föf. 15:23-29) Mwirin án Paulus me ekkewe ekkóch atoura ngeni ekkewe mwichefel minne a fen pwúngúló, iir meinisin ra angang weires le “afalafala kapasen ach Samol.” (Föf. 15:30-35) Met mwirilóón? Paipel a erá pwe “chon ekewe mwichefel ra pöchökülela lon ar lükülük o chochomongola iteiten rän.”​—Föf. 16:4, 5.

9. Ifa nónnómun chómmóng fénú lón ei fansoun, me met sia tongeni pwisin eisinikich?

⁹ Lón ei fansoun, lón chómmóng fénú ese wor pinepinen ach angangen afalafal. Ka nóm lón eú me lein ekkena fénú? Ika ewer, iwe eisinuk ei kapas eis, ‘Ifa usun ua alamota ei fansoun ese pinepin?’ Lón ekkeei ránin lesópwólóón mi ámmeseik, án Jiowa we mwicheich a fen emmweni ewe sókkun angangen afalafal me asukula aramas mi chéúfetál lap seni meinisin wóón unusen fénúfan. (Mark. 13:10) A suuk ngenikich chómmóng mettóch sia tongeni féri lón ena angang!

10. Met 2 Timoty 4:2 a pese ngenikich ach sipwe féri?

¹⁰ Ifa usun ka tongeni alamota ei fansoun kinamwe? (Álleani 2 Timoty 4:2.) Pwata kese etittina nónnómum me ppii ika en are emén chón lón óm we famili a tongeni alapaaló an angangen afalafal are pwal mwo nge pioneer? Esap iei ewe fansoun ach sipwe achommongaaló wéúch are pisekich pún saminne sipwe tongeni uwei ekkena mettóch tori mwirin ewe riáfféú mi lapalap.​—SalF. 11:4; Mat. 6:31-33; 1 Joh. 2:15-17.

11. Met ekkóch ra féri le álisi chómmóng aramas úkúkún ar tufich le rong ewe pwóróus allim?

¹¹ Chómmóng chón afalafal ra káé eú mineféén fós pwe repwe tongeni álisi aramas le silei Jiowa. Án Kot we mwicheich a awora chómmóng minen álillis mi tongeni álisikich  le afalafal lón chómmóng fósun fénúfan. Áwewe chék lón ewe 2010, a kawor néúch kewe puk lón ina epwe 500 fós. Nge iei a kawor lón lap seni 1,000 fós!

12. Ifa usun aramas ra angei álillis seni ar rong pwóróusen ewe Mwú lón pwisin ar fós? Apwóróusa eú pwóróus.

¹² Met meefien aramas lupwen ra rong ewe enlet seni án Kot Kapas lón pwisin ar fós? Nengeni pwóróusen emén chienach fefin mi angei álillis seni ewe mwichelap lón summer lón Memphis, Tennessee, U.S.A. Ena mwichelap a fis lón fósun Kinyarwanda, ewe fós chón Rwanda, Congo (Kinshasa), me Uganda ra eáni. Mwirin ena mwichelap, chienach na fefin mi eáni fósun Kinyarwanda, a erá: “Epwe kerán iei ewin ai upwe unusen weweiti ewe mwichelap seni ewe atun ua mwékút ngeni Merika 17 ier a ló.” A ffat pwe a fókkun chúng letipen chienach na lupwen a rong ena prokram lón pwisin an fós. Ika a tufich ngonuk, ka tongeni káé pwal eú fós pwe kopwe álisi ekkewe ekkóch lón óm we leenien afalafal? Neman epwe fen kon éch ena pokiten lón óm we leenien afalafal a wor chókkewe iir mi fen kinamwe le fós lón pwal eú sókkun fós. Óm angang weires epwe atoto ngonuk watteen pwapwa.

13. Met pwiich kewe lón Russia ra féri atun a mwumwu ngeniir ar angangen fel?

¹³ Lón ekkóch fénú, ewe mwú a pinei án pwiich kewe angangen afalafal. Ina popun a chék aúkúk ar angangen afalafal. Áwewe chék, ekieki pwóróusen pwiich kewe lón Russia. Ra kúna riáfféúmwáál ren fite ier, nge lón March 1991 a mwumwu ngeniir me ren ewe mwú ar repwe fel ngeni Jiowa. Lón ena fansoun a wor ina epwe 16,000 chón afalafal lón Russia. Rúwe ier mwirin, a lapóló chóchóón ekkena chón afalafal wóón lap seni 160,000! A ffat pwe pwiich kana ra  alamotaéchú ewe fansoun mi suuk ngeniir ar repwe afalafal. Nge ena fansoun kinamwe ese nómoffóch. Inaamwo ika a siwil met a fis lón ena fénú, nge ra chúen fókkun tinikken lón ar angang ngeni Jiowa. Ra sópweló le angang ngeni úkúkún ar tufich.

14-15. Ifa usun Jiowa a áeá an manaman le álisi Asa?

¹⁴ Lemwúún Asa we, a much ewe fansoun kinamwe mwirin och fansoun. Eú watteen mwichen soufiu seni Itiopia, iir eú million, ra mauner. Néúr we meilap Sera, a fókkun lúkú pwe iir me néún we mwichen soufiu ra tongeni okkufu Juta. Iwe nge King Asa a lúkúlúk wóón an we Kot Jiowa, nge esap wóón chóchóón an we mwichen soufiu. Asa a iótek: “Ai Samol mi Lapalap äm we Kot, kose mochen kopwe alisikem, pun äm aia anomu äm apilükülük womw, nge aia feito pwe aipwe maun ngeni ei mwichemongun sounfiu fän itom.”​—2 Kron. 14:11.

¹⁵ Inaamwo ika chóchóón néún chón Itiopia kewe soufiu a lap seni néún Asa kewe wóón fán ruu, nge Asa a silei pwe Jiowa mi manaman me a tongeni álisi néún kewe aramas. Iwe Jiowa ese elichippúngú Asa pwe a álisi le okkufu án chón Itiopia we mwichen soufiu.​—2 Kron. 14:8-13.

16. Ifa usun sia silei pwe ewe fansoun kinamwe epwe much?

¹⁶ Sise wesewesen silei tichikin met epwe fis ngeni emén me emén kich lón mwachkkan, nge sia silei pwe ewe kinamwe néún Jiowa kewe aramas ra pwapwaiti iei, esap nómoffóch. Chemeni pwe Jesus a oesini pwe lón ekkewe ránin lesópwólóón ‘aramas meinisin repwe oputa’ néún kewe chón káé. (Mat. 24:9) Aposel Paulus a pwal apasa pwe “aramas meinisin mi mochen manaueni eu manauen souläng lon Kraist Jesus repwe tolong lon ninni.” (2 Tim. 3:12) Satan a “fokun lingeringer,” me sipwe otupu pwisinkich ika sia ekieki pwe sia tongeni opeseni an lingeringer.​—Pwär. 12:12.

17. Ifa usun sipwe kúna sóssótun ach lúkú?

¹⁷ Ekiseló chék, kich meinisin sipwe kúna sóssótun ach lúkú. Epwe fis “riaffou lapalap,  usun chok esaamo fis seni le poputan fonufan tori ikenai.” (Mat. 24:21, Testament Mi Fö) Lón ena fansoun, chón ach kewe famili neman repwe ú ngenikich me a tongeni pinepin ach angang. (Mat. 10:35, 36) Itá sipwe pwisin lúkúlúk wóón án Jiowa álillis me túmún usun chék Asa?

18. Me ren Ipru 10:38, 39, met epwe álisikich le mmólnetá ngeni muchúlóón ewe fansoun kinamwe?

¹⁸ Jiowa a fen akkammólnakichetá iei pwe ach lúkú epwe péchékkúl. A ekkemmweni “ewe chon angang mi allükülük o tipachem” le awora “mongö lon fansoun fich” mi apéchékkúlakich lón pekin ngún. (Mat. 24:45) Nge mi lamot ngeni emén me emén kich ach sipwe apéchékkúla ach lúkú Jiowa.​—Álleani Ipru 10:38, 39.

19-20. Mwirin ach álleani 1 Kronika 28:9, ikkefa ekkewe kapas eis mi lamot ach sipwe eisini pwisinkich, me pwata?

¹⁹ Mi lamot ach sipwe usun King Asa le “kútta Jiowa.” (2 Kron. 14:4, NW; 15:1, 2) Sia poputá le kútta Jiowa lupwen sia káé usun i me papatais. Sia féri úkúkún ach tufich le apéchékkúlaló ach tongei Jiowa. Ren ach sipwe silei ika sia féri ekkena mettóch, sipwe eisini pwisinkich, ‘Ua kan fiffiti ekkewe mwich?’ Lón ekkena mwich, sia angei péchékkúl le sópweló lón ach akkangang ngeni Jiowa, me sia péchékkúletá ren ach chiechi ngeni pwiich kewe. (Mat. 11:28) Sia pwal tongeni eisini pwisinkich, ‘Ua kan féfféri ai pwisin káé iteitan? Ika ka nóm ren óm famili, oua kan féfféri ámi famili fel iteiten wiik? Are ika ka áláeménúló, ka chúen féri óm famili fel? Pwal och, ka achocho le fiti ewe angangen afalafal me asukula aramas ren úkúkún óm tufich?’

²⁰ Pwata a lamot ach sipwe eisini pwisinkich ekkena kapas eis? Paipel a erá pwe Jiowa a etittina ekiekich me masouen letipach, iwe a lamot ach sipwe pwal féri ena. (Álleani 1 Kronika 28:9.) Ika sia kúna pwe mi lamot ach sipwe siwili napanapach, minne sia achocho le tikeri, are ekiekich, mi lamot ach sipwe tingorei Jiowa an epwe álisikich le féri ekkena siwil. Iei ewe fansoun ach sipwe ammólnakichetá ren ekkewe sóssót repwe torikich. Kosap mut ngeni och mettóch an epwe aúkúketiw le alamotaéchú ewe fansoun kinamwe!