1-2. Ifa usun Än Salomon Afalafal 11:6 a riri ngeni ewe angangen afalafal?

LÓN ekkóch fénú, aramas ra mmen etiwa ewe pwóróus allim. Ina met ra ésúkúsúkú! Nge lón ekkóch fénú, aramas rese kon sani le rong pwóróus usun Kot are ewe Paipel. Nge, met meefien aramas lón leeniom we usun ewe pwóróus allim? Ese lifilifil meefien aramas, nge Jiowa a mochen ach sipwe chék akkafalafal tori an erá pwe a wes.

² Jiowa a fen filatá ineet ewe angangen afalafal epwe much, iwe ewe “sopolan” epwe war. (Mat. 24:14, 36) Nge ren mwo iei, ifa usun sipwe álleasochisi ewe pesepes usun ach sipwe chék “akkangang”? *​—Álleani Än Salomon Afalafal 11:6, seni ewe footnote. *

3. Met sipwe káé lón ei lesen?

³ Lón ewe lesen mwen ei, sia fen káé rúáánú mettóch mi lamot ach sipwe féri pwe sipwe wiliti chón “attaua aramas” mi lipwákéch. (Mat. 4:19) Ei lesen epwe pwóróus wóón úlúngát mettóch sipwe tongeni féri epwe apéchékkúla ach mochen sópweló le afalafal ese lifilifil met sókkun weires sipwe kúna. Sipwe káé pwata a lamot ach sipwe (1) akakkomwa ewe angangen afalafal lón manawach, (2) mosonottam, me (3) akkapéchékkúla ach lúkú.

4. Pwata a lamot ach sipwe akakkomwa ewe angang Jiowa a ewisa ngenikich?

⁴ Jesus a ereni néún kewe chón káé epwe ifa napanapen aramas me met epwe fis atun ekkewe ránin lesópwólóón. A silei pwe ekkena mettóch ra tongeni efisi ar resap akakkomwa ewe angangen afalafal. A ereni néún kewe chón káé ar repwe “mamasa.” (Mat. 24:42) Lón ránin Noa we, a wor chómmóng mettóch a eppeti án ekkewe aramas aúselinga an we éúréúr. Ekkena esin mettóch ra pwal tongeni eppetikich lón ei fansoun. (Mat. 24:37-39; 2 Pet. 2:5) Ina popun, mi lamot ach sipwe akakkomwa ewe angang Jiowa a ewisa ngenikich.

5. Ifa usun Föför 1:6-8 a áweweei úkúkún chéúfetálin ewe angangen afalafal?

⁵ Lón ei fansoun, a mmen lamot ach sipwe akakkomwa ewe angangen afalafala pwóróusen ewe Mwú. Jesus a oesini pwe néún kewe chón káé repwe sópweló le afalafal mwirin málóón, nge ar angangen afalafal epwe lap seni minne Jesus a féri atun a nóm fénúfan. (Joh. 14:12) Mwirin málóón Jesus, ekkóch néún kewe chón káé ra liwiniti ar angangen attaw. Mwirin an manawsefál, a álisi ekkóch néún kewe chón káé le liapeni chómmóng iik ren eú manaman. Mwirin ena manaman, Jesus a menlapei ngeniir pwe ewe angangen afalafal me álisi aramas le wiliti néún chón káé, a kon lamot lap seni meinisin. (Joh. 21:15-17) Me mwen chék án Jesus epwele feitá láng, a ereni néún kewe chón káé pwe ewe angangen afalafal a poputááni, epwe chéúfetál lón Israel tori unusen fénúfan. (Álleani Föför 1:6-8.) Mwirin fitu ier, Jesus a ékúna ngeni aposel Johannes met epwele fis “lon ewe Ränin ach Samol.” * Lón ena lángipwi mi amwarar, Johannes a kúna emén chónláng mi uwei ewe “Pworausen Manau esemüch  pwe epwe arongafeili . . . ngeni sokun mwich me ainang, kapas me mwü meinisin.” (Pwär. 1:10; 14:6) A ffat pwe letipen Jiowa ach sipwe álillis lón ewe angangen afalafal wóón unusen fénúfan tori an epwe wes.

6. Ifa usun sipwe akakkomwa ewe angangen afalafal lón manawach?

⁶ Sia tongeni akakkomwa ewe angangen afalafal ika sia ekilonei usun úkúkún án Jiowa álisikich. Áwewe chék, a awora chómmóng mwéngé lón pekin ngún mi kawor lón puk me wóón computer, puk me pwóróus mi record, video, me JW Broadcasting. Ekieki ei: Ekkewe pwóróus lón ach we website a kawor lón lap seni 1,000 fósun fénú! (Mat. 24:45-47) Aramas wóón ei fénúfan ra kinikinfesen pokiten a sókkofesen ekiekiir usun politics, lamalam, me pokiten ekkóch ra wéúéch nge ekkóch ra wéúngaw. Nge lap seni 8 million néún Jiowa kewe chón angang ra enletin tipeeúfengen lón ar mwicheichen pwipwi wóón unusen fénúfan. Áwewe chék, lón Enimu, April 19, 2019, Chón Pwáraatá wóón unusen fénúfan ra tipeeúfengen lón ar katol prokramin ewe lesenin rán. Lón na pwinin, 20,919,041 ra mwichfengen pwe repwe féri Áchechchemen án Jesus máló. Atun sia ekieki feiéchúch le kúna ekkena mettóch mi amwarar me fiti ena angang, a chúng letipach le akakkomwa ewe angangen afalafal.

7. Ifa usun án Jesus leenien áppirú a álisikich le akakkomwa ewe angangen afalafal?

⁷ Sia pwal tongeni akakkomwa ewe angangen afalafal ren ach áppirú Jesus. Ese mut ngeni och mettóch an epwe eppeti le afalafala usun ewe enlet. (Joh. 18:37) Ese tupuló atun Satan a ékúna ngeni “mwün fanüfan meinisin me linger,” ese pwal tupuló atun ekkewe aramas ra mochen seikaatá pwe epwe néúr king. (Mat. 4:8, 9; Joh. 6:15) Ese tipetipeló ren mochenian pisek, are niwokkus ren koput mi lap. (Luk. 9:58; Joh. 8:59) Atun sia kúna sóssótun ach lúkú, sia tongeni nefótófót ika sia chemeni án aposel Paulus ei kapasen fén. A pesei ekkewe Chón Kraist ar repwe áppirú Jesus pwe resap “apilükingau o fangatä”!​—Ipru 12:3.

8. Met weween mosonottam, me pwata a ákkáeúin lamot lón ei fansoun?

⁸ Emén mi mosonottam a witiwit fán kinamwe tori an epwe ekkesiwil och mettóch. A lamot ach sipwe mosonottam lón ach witi wesilóón och mettóch mi ngaw, are pwénútáán eú mettóch sia wikkiti ren fansoun langattam. Ewe soufós Apakuk a wikkiti sópwólóón minne mi ngaw lón Juta. (Ap. 1:2) Néún Jesus kewe chón káé ra áneánei pwe ewe Mwúún Kot epwe “chök müttir pwäto” me selániir seni nemenemengawen mwúún Rom. (Luk. 19:11) Sia mwétéresiti ewe atun án Kot we Mwú epwe amóeló minne mi ngaw me awaraato ewe ótót sefé mi pwúng. (2 Pet. 3:13) Iwe nge, a lamot ach sipwe mosonottam le witi ewe fansoun Jiowa a fen filatá. Sipwe ppii ifa usun Jiowa a áiti ngenikich ach sipwe mosonottam.

9. Ikkefa ekkewe pwóróus mi pwári mosonottamen Jiowa?

⁹ Jiowa a isetiw ewe leenien áppirú mi unuséch lón an mosonottam. A mut ngeni Noa naféchún fansoun le falei ewe waimw me lón wisan “chon afalafala usun pwüng.” (2 Pet. 2:5; 1 Pet. 3:20) Jiowa a aúseling ngeni án Apraham kakkapas eis ngeni usun an kefil le arosaló ekkewe aramas mi ngaw lón ekkewe telinimw Sotom me Komora. (Ken. 18:20-33) Ren fansoun langattam,  Jiowa a fókkun mosonottam ngeni ekkewe chón Israel rese tuppwél. (Ne. 9:30, 31) Sia kúna án Jiowa mosonottam lón ei fansoun ren an mut ngeni chókkewe I a paniireto ar repwe “ekieksefäl.” (2 Pet. 3:9; Joh. 6:44; 1 Tim. 2:3, 4) Án Jiowa na leenien áppirú a ngenikich popun ach sipwe mosonottam lón ach sópweló le afalafala me asukula aramas. A pwal áitikich mosonottam ren eú kapas áwewe mi mak lón an we Kapas.

10. Met sia káé seni ewe pwóróus usun ewe chón atake lón James 5:7, 8?

¹⁰ Álleani James 5:7, 8. Pwóróusen ewe chón atake a áiti ngenikich ifa usun sipwe eáni mosonottam. Pwúngún, ekkóch irá, ra máárikkái. Nge lape ngeni, ekkewe irá mi wor féúr, ra mmang le máár. Ewe fansoun máárin irá lón Israel, ina epwe úkúkún wonu maram. Ewe chón atake a ffot pwikil mwirin ewe úten mwan, ina lukanapen October, me a kini uwaan lukanapen April ina ewe úten mwirin. (Mark. 4:28) Sipwe mirit ika sia áppirú mosonottamen ewe chón atake. Iwe nge, eli esap mecheres.

11. Ifa usun mosonottam epwe álisikich lón ach angangen afalafal?

¹¹ Lape ngeni, aramas tipis ra kan mochen mwittir kúna uwaan ar achocho. Nge ika sia mochen epwe uwaéch masouen ach atake, a lamot ach sipwe kan túttúmúnúéchú. Sipwe kan ttui, fótuki, ótei, me étútúi. Mi pwal lamot ach sipwe angang weires lón ach álisi aramas le wiliti néún Jesus chón káé. A lamot watteen fansoun ren ach sipwe álisiir le káé ar resap lifilifil aramas nge repwe tongeer. Ach mosonottam epwe álisikich ach sisap lichippúng atun aramas rese mochen etiwakich. Nge, lupwen ra mochen aúseling ngenikich, a chúen lamot ach sipwe mosonottam. Sise tongeni echchimwa néúch kewe chón káé ar repwe feffeitá lón ar lúkú. Fán ekkóch, pwal mwo nge néún Jesus  kewe chón káé, rese mwittir weweiti minne a áiti ngeniir. (Joh. 14:9) Sipwe chemeni pwe sia tongeni fótuki me étútúi, nge Kot a wisen ámáári.​—1 Kor. 3:6.

12. Ifa usun sipwe mosonottam atun sia afalafal ngeni chón ach famili esap iir Chón Pwáraatá Jiowa?

¹² A tongeni weires ach sipwe mosonottam atun sia afalafal ngeni chón ach famili esap iir Chón Pwáraatá Jiowa. Ewe kapasen emmwen mi mak lón Än Salomon Afalafal 3:1, 7, a tongeni álisikich. A erá: “A wor fansoun fanafanala pwal fansoun kakapas.” Ach féffér mi múrinné a tongeni amwékútú aramasach kewe le mochen etiwa ewe kapas allim. Nge mi lamot ach sipwe chék mómmólnetá le fós ngeniir usun Jiowa. (1 Pet. 3:1, 2) Lón ach afalafal fán tinikken, mi lamot sipwe mosonottam ngeni aramas meinisin kapachelong chón ach famili.

13-14. Ikkefa ekkóch leenien áppirú usun mosonottam sia tongeni áppirú?

¹³ Sia tongeni káé mosonottam seni chókkewe mi tuppwél lón fansoun lóóm me lón ach ei fansoun. Apakuk a fókkun mochen pwe minne mi ngaw epwe wesiló, nge fán lúkúlúk a erá: “Upwe töta won ai we neenien mmas mi tekia o witi.” (Ap. 2:1, Kapasen God) Ewe aposel Paulus a pwári an enletin mochen “awesala” an angangen afalafal. Nge, fán mosonottam a sópweló le unusen “pwärätä ewe Pworausen Manau.”​—Föf. 20:24.

¹⁴ Ekieki pwóróusen eú pean pwúpwúlú iir mi sochungio seni Gilead me ra titiiló pwe repwe álillis lón eú fénú mi chókúkkún Chón Pwáraatá Jiowa ie, nge lape ngeni aramas ikkena ie rese lúkú Kraist. Chókúkkún chék ra mochen káé ewe Paipel. Nge, chiener kewe le sochungio seni Gilead ra apwóróusa ngeniir usun chómmóngun chókkewe ra álisiir le wiliti Chón Pwáraatá Jiowa lón ekkewe fénú ra álillis ie. Nge ena pean pwúpwúlú ra chék akkafalafal fán mosonottam inaamwo ika lape ngeni aramas lón ar we leenien afalafal rese mochen aúseling. Iwe mwirin walu ierin ar afalafal ikewe ese kon chómmóng aramas mi etiwer ie, ra pwapwa le kúna án emén néúr chón káé kerán papatais. Met sia káé seni pwóróusen chókkewe mi tuppwél lón fansoun lóóm me lón ach ei fansoun? Chókkana ra chék tinikken le akkangang, me Jiowa a efeiéchúúr ren ar mosonottam. Amwo sipwe áppirú “chokewe mi angei mine Kot a eäni pwon ren ar lükü me mosonotam.”​—Ipru 6:10-12.

15. Ifa usun ach lúkú a apéchékkúlakich le tipeppós le afalafal?

¹⁵ Sia lúkú ewe pwóróus sia afalafala, ina popun sia pwapwa le ereni chómmóng aramas úkúkún ach tufich. Sia lúkúlúkú án Kot kewe pwon lón an we Kapas. (Kölf. 119:42; Ais. 40:8) Sia fen kúna pwénútáán án Paipel kewe oesini lón ach ei fansoun. Sia pwal kúna án aramas siwili me émúrinnéló manawer lupwen ra poputá le apwénúetá án Paipel kewe kapasen emmwen. Ena pisekin ánnet a alapaaló ach lúkú lamoten án meinisin repwe rong kapas allimen ewe Mwú.

16. Me ren Kölfel 46:1-3, ifa usun ach lúkú Jiowa me Jesus a apéchékkúlakich le tipeppós le afalafal?

¹⁶ Sia pwal lúkú Jiowa, ewe populapen ewe pwóróus sia afalafala, me ewe emén a seikaatá pwe epwe Kingen ewe Mwú, ina i Jesus. (Joh. 14:1) Ese lifilifil met epwe fis ngenikich, nge fansoun meinisin Jiowa epwe ach leenien op me ach péchékkúl. (Álleani Kölfel 46:1-3.) Pwal och, sia lúkúlúk pwe seni láng, Jesus a ekkemmweni ewe angangen  afalafal ren an áeá ewe manaman me nemenem Jiowa a fen ngeni.​—Mat. 28:18-20.

17. Apwóróusa eú pwóróus mi pwári lamoten ach sipwe sópweló le akkafalafal.

¹⁷ Lúkú a alúkúlúkúkich pwe Jiowa epwe efeiéchú ach achocho, fán ekkóch lón ewe napanap sise ekieki. (SalAf. 11:6) Áwewe chék, iteiten rán fitengeréú aramas ra kúna néúch kewe puk wóón ach kewe cart are cheepel. A álilliséch ena sókkun alen afalafal? Ewer! Ach Angangen Afalafala ewe Mwú minen November 2014, a apwóróusa pwóróusen emén chón sukulen university mi mochen makkeei eú repot usun Chón Pwáraatá Jiowa. Ese tongeni kúna eú Leenien Mwich, nge a kúna eú ach kewe chepelin puk lón an we sukul, me a pwal kúna ekkewe pwóróus fán iten an we repot. Ló, ló, ló, a papatais me iei a emén regular pioneer. Ekkena esin pwóróus a amwékútúkich le sópweló le akkafalafal pún a pwári pwe a chúen wor chókkewe mi lamot ngeniir ar repwe rong pwóróusen ewe Mwú.

18. Pwata sia lúkúlúk pwe ewe angangen afalafal epwe wes lón ewe fansoun mi fich me ren Jiowa?

¹⁸ Sia tongeni lúkúlúk pwe ewe angangen afalafal epwe wes lón ewe fansoun mi fich. Sipwe ppii met a fis lón fansoun Noa we. Jiowa a pwári pwe i ewe Sounemenemen Fansoun. Ina epwe 120 ier mwen ewe Noter, Jiowa a fen apwúngaló ineet epwe poputá ewe Noter. Fite fite ier mwirin, Jiowa a ereni Noa an epwe falei ewe waimw. Eli ren úkúkún 40 are 50 ier mwen poputáán ewe Noter, Noa a chék sópweló lón an angang weires. Inaamwo ika aramas rese aúseling ngeni, nge a chék sópweló le éúréúrer tori án Jiowa ereni an epwe uwealong ekkewe man lón ewe waimw. Iwe lón ewe fansoun mi fich, “ewe Samol mi Lapalap a apüngala ewe asam.”​—Ken. 6:3; 7:1, 2, 16.

19. Met sipwe ápilúkúlúkú ika sia chék sópweló le akkangang?

¹⁹ Ekiseló chék Jiowa epwele erenikich pwe a wes ach angangen afalafal. Epwe “apüngala ewe asam” seni án Satan ei ótót me awaraato ewe ótót sefé mi pwúng. Nge ren mwo iei, amwo sipwe áppirú Noa, Apakuk, me ekkewe ekkóch iir mi chék sópweló le akkangang. Amwo sipwe chék akakkomwa ewe angangen afalafal lón manawach, mosonottam, me akkapéchékkúla ach lúkú Jiowa me an kewe pwon.