1-2. Me ren 1 Timoty 6:20, met Kot a lúkú ngeni Timoty?

FÁN CHÓMMÓNG sia kan lúkú ngeni ekkewe ekkóch túmúnún pisekich mi aúchea. Áwewe chék, sia kan isoni néúch moni lón bank. Me sia lúkú pwe epwe núkúnúkéch me ikena me esap péútúló are esap wor epwe soláái. Ina popun sia weweiti weween án emén lúkú ngeni emén eú pisek mi aúchea.

² Álleani 1 Timoty 6:20. Aposel Paulus a áchema ngeni Timoty pwe a fen angei eú mettóch mi aúchea, ina ewe sile mi enlet usun minne Kot a tipeni fán iten aramas. Jiowa a pwal lúkú ngeni Timoty eú feiéch ren an epwe “afalafala ewe Kapasen Kot” me “föri angangen eman chon asoulängala aramas.” (2 Tim. 4:2, 5) Paulus a pesei Timoty an epwe túmúnú met ewe Kot a fen lúkú ngeni. Kot a pwal lúkú ngenikich mettóch mi aúchea, usun chék Timoty. Met ekkena? Me pwata a lamot ach sipwe túmúnú ekkena mettóch mi aúchea Jiowa a lúkú ngenikich?

3-4. Ikkefa ekkóch popun ra aúchea ekkewe pwóróus mi enlet seni Paipel?

³ Fán tong, Jiowa a fen fang ngenikich ewe sile mi pwúng usun ekkewe pwóróus mi enlet seni an we Kapas ewe Paipel. Ekkena pwóróus ra aúchea pokiten ra áiti ngenikich ifa usun sipwe ririéch ngeni Jiowa, me ra áweweei met epwe atoto pwapwa enlet lón manawach. Lupwen sia etiwa ekkena pwóróus mi enlet me apwénúretá, sia ngase seni fétekin afalafal chofona me féffér mi limengaw.​—1 Kor. 6:9-11.

⁴ Pwal eú popun ra aúchea ekkewe pwóróus mi enlet seni án Kot we Kapas, pokiten Jiowa a chék pwár ngeni chókkewe iir  mi tipetekison me “letiper a páái ngeni ar repwe etiwa ewe enlet.” (Föf. 13:48, NW) Ikkena iir chókkewe mi etiwa ewe al Jiowa a áeá le awora ekkewe pwóróus mi enlet lón ei fansoun. (Mat. 11:25; 24:45) Sise tongeni weweiti ekkena pwóróus mi enlet ren pwisin ach tufich, nge ach weweiti, ina met a fen kon aúchea seni meinisin.​—SalF. 3:13, 15.

5. Pwal met Jiowa a lúkú ngenikich ach sipwe féri?

⁵ Jiowa a pwal lúkú ngenikich ewe feiéch ach sipwe asukula ngeni aramas ewe enlet usun i me minne a tipeni. (Mat. 24:14) A fókkun aúchea ewe pwóróus sia uwei pokiten a álisi aramas le chóni án Jiowa we famili me atufichiir le kúna manaw esemuch. (1 Tim. 4:16) Ese lifilifil ika a watte are kúkkún ach álillis lón ewe angangen afalafal, nge sia álisatá ena angang mi aúchea seni meinisin mi fiffis lón ei fansoun. (1 Tim. 2:3, 4) A ifa me feiéchúch lón ach angangfengen me Kot!​—1 Kor. 3:9, NW.

6. Met a fis ngeni ekkóch rese chúen túmúnú met Kot a fen lúkú ngeniir?

⁶ Lón fansoun Timoty we, a wor ekkóch Chón Kraist rese aúcheani feiéchúr le angangfengen me Kot. Pokiten Temas a tongei fénúfan, a fangetááni feiéchún lón ar angangfengen me Paulus. (2 Tim. 4:10) Fikelus me Hermokenes ra likitaló ewe angangen afalafal ese mwáál pokiten ra niwokkus ika repwe pwal kúna ewe esin riáfféúmwáál Paulus a kúna. (2 Tim. 1:15) Himenäus, Aleksanter, me Filetus ra wiliti chón rikiló me likitaló ewe enlet. (1 Tim. 1:19, 20; 2 Tim. 2:16-18) Meinisin chókkana ra fen piin tongei Jiowa, nge ra úkútiw le aúcheani minne Kot a fen lúkú ngeniir.

7. Ikkefa án Satan kewe minen otuputup?

⁷ Ifa usun Satan a sótun efisi ach sipwe fangetááni ekkewe mettóch mi aúchea Jiowa a fen lúkú ngenikich? Sipwe ppii ekkóch án Satan minen otuputup. A áeá minen apwapwa me kunou le apéchékkúla ekkewe sókkun ekiek me féffér mi tongeni apwangapwangaaló ach kamwéchúnnúk wóón minne mi enlet. A mochen ach sipwe niwokkusiti met aramas ra apasa are ekieki usuch are ar eriáfféwúmwáálikich pwe sipwe úkútiw le afalafal. A pwal sótun etipetipakich le aúseling ngeni án ekkewe chón rikiló afalafal pwe sipwe likitaló ewe enlet.​—1 Tim. 6:20, 21.

8. Met ka káé seni pwóróusen emén chienach mwán itan Daniel?

⁸ Ika sise túmúnúéch, ekis me ekis epwe tongeni apwangapwangoló ach kamwéchúnnúk wóón ewe enlet. Nengeni pwóróusen Daniel, * emén mi fókkun sani le play video game. A  erá: “Ua poputá le play video game atun a ina epwe engol ieri. Lepoputáán ua play ekkewe game ese pwal wor ngawer. Nge ekis me ekis, ua poputá le play ekkewe game mi wor féfférún akkachofesá lón me angangen roong.” Ló, ló, ló, a kan play ren ina epwe 15 awa iteiten rán. Daniel a erá: “Ren enletin ua silei pwe ewe sókkun game ua play me ewe úkúkún fansoun ua áeá le play a atowauaeiló seni Jiowa. Iwe nge, ua pwisin otupuei le lúkú pwe ese weneitiei án Paipel kewe kapasen emmwen.” Etipetipaen minen apwapwa me kunou a tongeni apwangapwangaaló ach kamwéchúnnúk wóón ewe enlet nge sise fen mwo nge tepereni. Ika a fis ena, iwe epwe tongeni péút senikich ekkewe mettóch mi aúchea Jiowa a fen fang ngenikich.

9. Paulus a aléllééi Timoty ngeni ié, me ren 1 Timoty 1:18, 19?

⁹ Álleani 1 Timoty 1:18, 19. Paulus a aléllééi Timoty ngeni emén soufiu me a pesei an epwe “mauneni ewe maun mi öch.” Esap wesewesen ina eú maun, nge ina eú maun lón pekin lúkú. Ifa usun ekkewe Chón Kraist ra usun soufiu mi fiti maun? Ikkefa ekkewe napanap mi lamot emén soufiu Chón Kraist epwe ámááraatá? Sipwe nengeni nimu lesen sia tongeni káé seni án Paulus kapas áwewe. Ekkena lesen ra tongeni álisikich le kamwéchúnnúk wóón ewe enlet.

10. Met weween ach manaweni ewe manaw mi fich ngeni Kot, me pwata a lamot ngenikich?

¹⁰ Ámááraatá ach manaweni ewe manaw mi fich ngeni Kot. Emén soufiu mi múrinné, a tuppwél. Epwe achocho le fiu pwe epwe túmúnú emén a tongei are eú mettóch a aúcheani. Paulus a pesei Timoty an epwe ámááraatá an manaweni ewe manaw mi fich ngeni Kot, weween an tuppwél le fitipachei Kot. (1 Tim. 4:7) Lapólóón ach tongei Kot, epwe pwal ina lapólóón ach mochen kamwéchúnnúk wóón ewe enlet.​—1 Tim. 4:8-10; 6:6.

11. Pwata a lamot ach sipwe apwúngú are nemeni pwisinkich?

¹¹ Ámááraatá ewe napanap apwúngú are nemeni pwisinkich. A lamot ngeni emén soufiu an epwe apwúngú are nemeni pwisin i pwe epwe chék mommolnetá ngeni maun. Timoty a tongeni ú ngeni etipetipaen Satan pokiten a apwénúetá án Paulus kapasen pesepes ren an epwe fókkun achocho le fiu ngeni mocheniangaw, ámááraatá ekkewe napanap mi múrinné, me chiechi ngeni chienan kewe Chón Kraist. (2 Tim. 2:22) A lamot an epwe apwúngú are nemeni pwisin i ren an epwe féri ena. A pwal lamot ngenikich ena napanap pwe sipwe win lón ach fiu ngeni mocheniangaw. (Rom 7:21-25) Pwal och, a pwal lamot ach sipwe apwúngú are nemeni pwisinkich lón ach pwilitawu ekkewe napanap minen lóóm me ámááraatá ekkewe napanap mi fé. (Ef. 4:22, 24) Me eli a pwal lamot ach sipwe apwúngú are nemeni pwisinkich le ló fiti mwich inaamwo ika sia fókkun pekkus mwirin ach angang unusen rán.​—Ipru 10:24, 25.

12. Ifa usun sia tongeni sipeéchúló lón ach néúnéú ewe Paipel?

¹² A lamot ngeni emén soufiu an epwe akkasóssót an kewe pisekin maun. Ika a mochen an epwe sipeéch, iwe mi lamot an epwe kan akkasóssót iteitan. Pwal ina usun ren kich, a lamot ach sipwe sipeéch lón ach néúnéú án Kot we Kapas. (2 Tim. 2:15) Lón ach kewe mwich, sia tongeni káé ifa usun ach sipwe sipeéch. Nge ika sia mochen álisi aramas le lúkú pwe ewe enlet seni Paipel a tongeni álisiir, iwe a lamot ach sipwe kákkáé ewe Paipel iteitan. A lamot ach sipwe néúnéú án Kot we Kapas le apéchékkúla ach lúkú, weween ese chék naf ach sipwe  álleani ewe Paipel, nge a pwal lamot ach sipwe ekilonei met sia álleani me research seni néúch kewe puk pwe sipwe tongeni weweiti enletin ewe pwóróus me apwénúretá. (1 Tim. 4:13-15) Iwe sipwe tufichin néúnéú ewe Kapasen Kot le asukula aramas. Weween ese chék pwal naf ach sipwe álleani ngeniir eú wokisin. Nge mi lamot ach sipwe álisiir le weweiti me ifa usun repwe apwénúetá. Lupwen sia káé ewe Paipel iteitan, iwe sipwe lipwákéchúló le asukula ngeni aramas.​—2 Tim. 3:16, 17.

13. Me ren Ipru 5:14, pwata a lamot ach sipwe eáni mirit?

¹³ Eáni mirit. A lamot ngeni emén soufiu an epwe esilla pwe epwele fis eú feiengaw me sú seni. Pwal ina usun ren kich, a lamot ach sipwe káé le esilla eú mettóch epwele fis nge a tongeni efeiengawakich me sipwe mwittir sú seni. (SalF. 22:3; álleani Ipru 5:14.) Áwewe chék, a lamot ach sipwe kefiléch wóón ach minen apwapwa me kunou. Fán chómmóng ekkewe prokram wóón TV me kachito ra masou ren féffér mi limengaw. Kot a oput ekkena féffér me ra wesewesen atoto feiengaw. Ina popun sipwe túmúnú senikich ekkena minen apwapwa pún ekis me ekis ra tongeni angealó ach tongei Kot.​—Ef. 5:5, 6.

14. Ifa usun ewe napanap mirit a álisi Daniel?

¹⁴ Daniel ewe sia fen fósun me mwan, a poputá le esilla pwe a ngaw an play ekkewe video game mi masou ren féfférún akkachofesá me angangen roong. A research seni ewe Watchtower Library wóón ekkewe pwóróus epwe álisi lón an we osukosuk. Met mwirilóón? A úkútiw le play ekkena video game mi ngaw. Me ese pwal chúen play game ngeni chienan kewe wóón Internet. Daniel a erá: “Ua poputá le chiechi ngeni chienei kewe lón ewe mwichefel me pwal féri ekkóch mettóch lap seni ai chék play video game.” Iei Daniel a pioneer me a emén mwán mi ásimaw.

15. Pwata a mmen efeiengaw ekkewe pwóróus mi mwaken?

¹⁵ A lamot ach sipwe usun Timoty le esilla efeiengawen ekkewe pwóróus mi chofona ekkewe chón rikiló ra achéúfetálei. (1 Tim. 4:1, 7; 2 Tim. 2:16) Áwewe chék, eli repwe sótun achéúfetálei pwóróus mi mwaken usun pwiich kewe are etipemwaramwarakich usun án Jiowa we mwicheich. Ekkena esin pwóróus ra tongeni apwangapwangaaló ach lúkú. Sipwe túmúnú pwe site lúkú ekkena kapasen angngaw. Pwata? Pokiten ekkena esin  pwóróus iir efisien ‘aramas ekiekiir a fokun ngau, resap silei mine a let.’ Ra chék mochen “akanini o afitikoko won kapas.” (1 Tim. 6:4, 5) Ra mochen ach sipwe lúkú ar kapasen pweni me poputá le lúkúlúkúmmang ngeni pwiich kewe.

16. Met sókkun minen erikirik a lamot ach sipwe ttii senikich?

¹⁶ Túmúnúkich seni ekkewe mettóch epwe erikaló ekiekich. Pokiten Timoty i “eman nöün Kraist Jesus sounfiu mi allükülük,” iwe a lamot an epwe nefótófót wóón ewe angangen afalafal lap seni an chei pisek. (2 Tim. 2:3, 4) Sipwe usun Timoty le túmúnú pwe tongen pisek ete erikikich. “Pwapwan wöün fanüfan” a tongeni ammopwu ach tongei Jiowa, ach aúcheani ewe Kapasen Kot me ach mochen afalafala ngeni aramas. (Mat. 13:22) A lamot ach sipwe ámecheresi nónnómun manawach me áeá ach fansoun me péchékkúl le “kuttafichi lom an mu.”​—Mat. 6:22-25, 33, Testament Mi Fö.

17-18. Met sia tongeni féri pwe sipwe túmúnú ach riri ngeni Jiowa?

¹⁷ Mmólnetá le mwittir mwékút. A lamot ngeni emén soufiu an epwe mmólnetá me mwan wóón met epwe féri pwe epwe túmúnú pwisin i. Ren ach sipwe túmúnú ekkewe mettóch Jiowa a fen lúkú ngenikich, mi lamot sipwe mwittir mwékút ika sia kúna och feiengaw. Met a tongeni álisikich le féri ena? Mi lamot ach sipwe mmólnetá me mwan wóón met sipwe féri ika epwele fis eú feiengaw.

¹⁸ Áwewe chék, atun sia fiti eú mwich, fán chómmóng a kan esilesil ngeni chón mwich ar repwe kútta eú leenien towu mi kon kkan ngeniir me mwen poputáán ewe prokram. Pwata? Pún ika a weiweitá och osukosuk iwe repwe tongeni mwittir towu. A pwal ina usun ren kich, sia tongeni praktis me mwan wóón met sipwe féri le towu ika a mwittir ppichitá wóón ewe Internet, TV are kachito sasing mi limengaw, féfférún akkachofesá mi kon ssenúk are án ekkewe chón rikiló afalafal. Ika sia mmólnetá ngeni met epwe tongeni fis, sipwe tongeni mwittir sú seni met epwe atai ach riri ngeni Jiowa me akkamwéchú liméchúch mwen mesan.​—Kölf. 101:3; 1 Tim. 4:12.

19. Ikkefa ekkewe feiéch sipwe kúna ika sia túmúnú ekkewe mettóch mi aúchea Jiowa a fen lúkú ngenikich?

¹⁹ Mi lamot ach sipwe túmúnú ekkewe mettóch mi aúchea Jiowa a fen lúkú ngenikich, weween ekkewe pwóróus mi enlet lón ewe Paipel me wisach le asukula ngeni aramas. Atun sia féri ena, sipwe eáni eú mwelien letip mi limeliméch, eú manaw mi wor aúchean, me ewe pwapwa mi pop seni ach álisi aramas le silei Jiowa. Ren álillisin Jiowa, sipwe tufichin túmúnú met a fen lúkú ngenikich.​—1 Tim. 6:12, 19.