1-2. (a) Me ren Än Salomon Fos 16:31, itá epwe ifa ach ekiek usun ekkewe chinnap mi tuppwél? (b) Ikkefa ekkewe kapas eis sipwe pélúweniir me lón ei lesen?

EKKEWE chón etto katol ewe park ika málámál Arkansas, Merika, eli repwe kúna ekkewe taimon mi chék nómofetál lón na park. Iwe nge, ekkena taimon ra chúen tárupurupw, rese mwo echcheriw. Ina popun, chómmóng mi kúna ekkena taimon, eli resap tepereni pwe iir faú aúchea me eli resap ingeló rer.

² Chienach kewe chinnap mi tuppwél ra usun ekkena taimon mi aúchea. Án Kot we Kapas a erá pwe meten mékúrer mi uwaan a usun epa mwaramwar. (Álleani Än Salomon Fos 16:31; 20:29) Iwe nge, a tongeni mecheres ach sipwe tunaló aúchear. Ekkewe alúwél me fépwúl iir mi mirititi pwe ekkewe chinnap ra aúchea, repwe eáni eú feiéch mi aúchea mi lap seni pisek aúchea. Sipwe pélúweni ekkeei úlúngát kapas eis lón ei lesen: Pwata ra aúchea me ren Jiowa ekkewe chinnap mi tuppwél? Pwata ekkewe chinnap ra aúchea me lón án Jiowa we mwicheich? Met sia tongeni féri pwe sipwe káé seni ar leenien áppirú?

3. Me ren Kölfel 92:12-15, pwata Jiowa a aúcheani ekkewe chinnap mi tuppwél?

³ Ekkewe chinnap mi tuppwél ra aúchea me ren Jiowa Kot. A silei ika iir met sókkun aramas me lón, me a aúcheani napanaper kewe mi múrinné. A pwapwa atun ra áiti ngeni ekkewe mi kúkkún seniir sileier kewe lón ar angang ngeni ren fite, fite  ier. (Hiop 12:12; SalF. 1:1-4) Jiowa a pwal aúcheani ar likiitú. (Mal. 3:16) A wor ar kewe osukosuk lón manawer, nge ra chúen akkapéchékkúla ar lúkú Jiowa. Ar ápilúkúlúk fán iten mwachkkan a péchékkúleló lap seni ewe atun ra kerán káé ewe enlet. Me Jiowa a tongeer pokiten ra sópweló le esilefeili itan we inaamwo ika ra “chinlap.”​—Álleani Kölfel 92:12-15.

4. Met a tongeni apéchékkúla chienach kewe chinnap?

⁴ Ika ka feffetál ngeni chinnap, kopwe lúkúlúk pwe Jiowa a chemeni ewe angang ka fen féri. (Ipru 6:10) Ka fen tinikken le álisatá ewe angangen afalafal, me ina met a apwapwaai Semach we lón láng. Ka fen likiitú fán ekkewe sóssót pwal mwo nge fán ekkewe mi unusen áweires, penaatá án Paipel kewe allúk mi pwúng, apwénúetá wisom kewe mi chou lón án Jiowa we mwicheich, me ákkáiti ekkewe ekkóch. Ka fen achocho úkúkún óm tufich le eérenaaló ekkewe siwil mi fis lón án Jiowa we mwicheich. Ka fen álisi me pesei ekkewe ekkóch ar repwe angang ngeni Jiowa full-time. Jiowa Kot a fókkun tongeok ren óm tuppwél. A pwonei pwe “esap likitala nöün kewe mi allükülük.” (Kölf. 37:28) Iei an alúkúlúk ngonuk: ‘Üpwe tümwünük tori fansoun om chinlap, lupwen meten mökürom a pwechela.’ (Ais. 46:4) Ina popun, kosap ekieki pwe pokiten ka chichchinnapeló iwe kese chúen aúchea lón án Jiowa we mwicheich. Ka fókkun aúchea!

5. Met a lamot án ekkewe chinnap repwe chemeni?

⁵ A chómmóng met ekkewe chinnap ra tongeni álillis lón, lón án Jiowa we mwicheich. Inaamwo ika eli rese chúen péchékkúl iei usun me lóóm, nge a watte sileier lón ar angang ngeni Jiowa ren fite, fite ier. Jiowa a tongeni sópweló le néúnéú iir lón chómmóng mettóch usun met sipwele káé seni pwóróusen chókkewe lóóm me chienach kewe lón ei fansoun.

6-7. Apwóróusa fitu pwóróus mi pwári ifa usun Jiowa a efeiéchú ekkewe chinnap mi tuppwél le angang ngeni.

⁶ Sia tongeni kúna ekkewe pwóróus mi múrinné lón ewe Paipel, pwóróusen chókkewe iir mi tuppwél le chék akkangang ngeni Jiowa lón ar ierin chinnap. Áwewe chék,  eli a 80 ierin Moses atun a poputá le emén néún Jiowa soufós me emmweni ewe mwúún Israel. Jiowa a chúen néúnéú Taniel an epwe néún soufós eli atun a fen lap seni 90 ierin. Me ese mwáál, a fen lap seni 90 ierin aposel Johannes atun Kot a emmweni le makkeei ewe puken Pwärätä.

⁷ A chómmóng pwal ekkewe ekkóch mi tuppwél, aramas rese kon pwal sissileer, nge a tongeni mecheres ar repwe tunereló, nge Jiowa a áfánniir me a efeiéchúúr ren ar tuppwél. Áwewe chék ren emén mwán mi “pwüng o aleasochisi än Kot kewe Allük meinisin,” itan Simeon. Ekis chék pwóróusan lón ewe Paipel, nge Jiowa a sissilei me a efeiéchú ren an atufichi an epwe kúna ewe ménúkol Jesus me oesini usur me inan we. (Luk. 2:22, 25-35) Pwal ekieki usun ewe finesoufós mi má seni pwúlúwan, itan Anna. A 84 ierin, nge “esap feila seni ewe imwenfel.” Jiowa a efeiéchú pokiten a lólló iteitan ren ewe imwenfel me a mut ngeni an epwe kúna ewe ménúkol Jesus. Simeon me Anna ra aúchea me ren Jiowa.​—Luk. 2:36-38.

8-9. Met sókkun álillis ekkewe fefin mi má seniir pwúlúwer ra sópweló le féri?

⁸ A chómmóng ekkewe chinnap lón ach ei fansoun iir mi tuppwél, iir leenien áppirú mi múrinné ngeni ekkewe mi kúkkún seniir. Áwewe chék ren pwóróusen emén Chón Kraist fefin itan Lois Didur. A chék 21 ierin atun a poputá le special pioneer Canada. Mwirin, iir me pwúlúwan we John, ra fiti ewe angangen sáifetál ren fite ier. Mwirin ra angang lón ewe Bethel Canada ren lap seni 20 ier. Atun a 58 ierin Lois, iir me John ra ketiw ar repwe álillis Ukraine. Iwe met repwe féri? Itá repwe ekieki pwe ra kon chinnap pwe rese tufichin mwékút ngeni pwal eú fénú? Aapw, nge ra etiwa ena wis me a kewis ngeni John an epwe chóni ewe Kúmiin Chón Túmúnú Keangen Ofesilap. Mwirin fisu ier, John a máló nge Lois a filatá an epwe chék sópweló lón an angang Ukraine. Iei a 81 ierin Lois me a chúen sópweló le angang ngeni Jiowa fán tuppwél lón ewe Bethel Ukraine, me iir meinisin ra fókkun tongei.

⁹ A tongeni kisikisiló án aramas áfánni ekkewe fefin mi má seniir pwúlúwer usun chék Lois, esap usun ar áfánniir lemanawen pwúlúwer kewe, nge ra chúen fókkun aúchea. Jiowa a unusen aúcheani ekkena Chón Kraist fefin iir mi álisatá pwúlúwer kewe ren fite ier me iei ra sópweló le chék angang ngeni fán tuppwél. (1 Tim. 5:3) Ra pwal apéchékkúla ekkewe mi kúkkún seniir.

10. Ifa ewe leenien áppirú mi fókkun múrinné Tony a isetiw?

¹⁰ A chómmóng ekkewe chinnap mi tuppwél iir mi nóm lón ekkewe imwen túmún chinnap me iir ra pwal aúchea. Áwewe chék ren emén Chón Kraist mwán itan Tony mi nóm iei lón eú ekkena leenien túmún. A papatais me Pennsylvania, Merika lón ewe  August 1942 atun a 20 ierin. Mwirin chék an papatais, ewe mwú a allúkú an epwe fiti pekin soufiu. Pokiten ese mochen fiti, iwe a kalapus ren ruu esopw ier. Iir me pwúlúwan we Hilda, ra ámááraatá néúr kewe rúúemén lón ewe enlet. Ren fite ier, Tony a álillis lón úlúngát mwichefel ren an emén chón akkót lón ewe kúmiin mwán mi ásimaw, me ren an wisen akkóta ekkewe mwichelap. A kan féri ekkewe mwich lón eú imwen kalapus me káé ngeni ekkewe chón kalapus. Inaamwo ika a 98 ierin Tony, nge ese úkútiw le akkangang ngeni Jiowa. A chék sópweló le féri úkúkún an tufich le angang ngeni Jiowa, fengen me pwiin kewe lón an we mwichefel!

11. Ifa usun sia tongeni pwári pwe sia aúcheani chókkewe iir mi nóm lón ekkewe leenien túmún are mwenilóng lón imwer kewe?

¹¹ Ifa usun sia tongeni pwári pwe sia súféliti ekkewe chinnap iir mi nóm lón ekkewe leenien túmún chinnap are mwenilóng lón imwer kewe? Ika mi tufich, ekkewe mwán mi ásimaw ra tongeni álisiir, áwewe chék ren ar repwe fiti are aúseling ekkewe mwich me angangen afalafal. Sia tongeni pwári pwe sia áfánniir ren ach áámweer are etiwer ach sipwe video chat. Sia mochen fókkun áfánni ekkena chinnap eli iir mi nóm lón eú ekkena leenien túmún nge mi towau seni ar we mwichefel. Mi lamot ach sipwe túmúnúéch pwe site ménúkaaló ekkena chinnap. Ekkóch me leir, eli a weires ngeniir are ra ekieki pwe ese fich ar repwe apwóróusa pwóróuseer. Nge epwe fókkun apéchékkúlakich ika sia awora fansoun le kapas eis ngeniir me aúseling atun ra apwóróusa pwapwaar lón ar angang ngeni Jiowa.

12. Met sia tongeni kúna lón pwisin ach we mwichefel?

¹² Eli epwe ámáirú ngenikich le silei pwe a wor ekkewe chinnap iir mi fókkun tuppwél lón pwisin ach we mwichefel. Emén Chón Kraist fefin itan Harriette a angang ngeni Jiowa fán tuppwél ren fite fite ier lón an we mwichefel lón New Jersey, Merika. Mwirin a mwékút me ló nónnóm ren néún we nengngin. Pwiich kewe lón an we minefé mwichefel ra awora fansoun le sissilei me ra mirititi pwe a fókkun aúchea. A apéchékkúler ren pwóróusen an angangen afalafal atun a kerán silei ewe enlet lón ewe ier 1920 me fite. Lón ekkena atun a kan soun uwei efóch pirós atun a afalafal, assoun ika e ares. Ren enletin, lón 1933 a fen ares fán ruu me kalapus úkúkún eú wiik. Lón ekkena atun, pwúlúwan we esap emén Chón Pwáraatá Jiowa a álilliséch ngeni me túmúnú néúr kewe úlúmén kúkkún. Ewer, a fich ngeni ekkewe chinnap mi tuppwél usun chék Harriette ach sipwe aúcheaniir!

13. Met sia fen káé usun aúchean ekkewe chinnap lón án Jiowa we mwicheich?

¹³ Chienach kewe chinnap ra fókkun aúchea me ren Jiowa me an we mwicheich. Ra fen kúna úkúkún án Jiowa efeiéchú an we mwicheich lón chómmóng napanap me an efeiéchúúr. Ra fen káé ekkewe lesen mi aúchea seni met ekkewe ra fen mwáálliló wóór. Sipwe eáni ekiek pwe ra usun “eu lenien tipachem,” me káé seniir. (SalF. 18:4) Ika ka awora fansoun le sissileer, a tongeni péchékkúleló óm lúkú, me kopwe káé chómmóng mettóch seniir!

14. Met Tuteronomi 32:7 a pese ngeni ekkewe alúwél me fépwúl ar repwe féri?

¹⁴ Kopwe akkomw mwékút le fós ngeni ekkewe chinnap. (Álleani Tuteronomi 32:7.) Ewer, mi pwúng pwe eli a toputopuló meser, ra ipweipwemmang, me a ósókúkkúnúló ar fós, nge ra chúen tipepéchékkúl, me ra ‘iteüöch’ me ren Jiowa. (SalAf. 7:1)  Kopwe chemeni popun án Jiowa aúcheaniir. Sópweló le pwári ngeniir pwe ka súfélitiir. Kopwe usun Elisa, a péchéú le chék nónnóm ren Elias lón ewe sáingoon ránin ar nónnómfengen. Fán úlúngát, Elisa a erá: “Üsap likituk.”​—2 King 2:2, 4, 6.

15. Ikkefa ekkewe kapas eis eli sia tongeni eisini ekkewe chinnap?

¹⁵ Pwári pwe ka enletin chúngú ekkewe chinnap ren óm kapas eis ngeniir fán súfél. (SalF. 1:5; 20:5; 1 Tim. 5:1, 2) Áwewe chék ren ekkeei kapas eis: “Me lóóm met a alúkúlúkú ngonuk pwe ka fen kúna ewe enlet?” “Ifa usun minne a fis lón manawom a álisuk le ririéch ngeni Jiowa?” “Met a fen álisuk le chék pwappwapwa lón óm angang ngeni Jiowa?” (1 Tim. 6:6-8) Mwirin aúselingéch ngeniir atun ra apwóróusa pwóróuseer.

16. Ifa usun án emén chinnap me emén mi kúkkún seni pwóróusfengen a tongeni apéchékkúler?

¹⁶ Atun emén chinnap me emén mi kúkkún seni ra pwóróusfengen, ra apéchékkúlafengeniir. (Rom 1:12) Ámi kana alúwél me fépwúl, epwe lapóló ámi lúkúlúk pwe Jiowa a chúngú néún kewe chón angang mi tuppwél, nge ewe chinnap epwe meefi tongan. Epwe pwapwa le apwóróusa ngonuk ifa usun Jiowa a ekkefeiéchú.

17. Pwata sia tongeni erá pwe chienach kewe chinnap mi tuppwél ra fen lillingéchúló me ren Jiowa lón ierin ar akkangang ngeni?

¹⁷ Lape ngeni, meséchún emén, a móróló atun a chichchinnapeló, nge chókkewe iir mi tuppwél ngeni Jiowa ra fen lillingéchúló me ren lón ar akkangang ngeni lón manawer. (1 Tes. 1:2, 3) Pwata a pwúng ena? Pokiten lón ierin ar akkangang ngeni Jiowa a fen mut ngeni an we ngún mi fel an epwe anapanaper me émúrinnéreló. Lapólóón ach sissilei chienach kana chinnap mi aúchea, súfélitiir, me káé seniir, epwe pwal ina lapólóón ach aúcheaniir!

18. Met sipwe káé lón en lesen mwirin?

¹⁸ Chón ewe mwichefel repwe péchékkúleló atun ekkewe chinnap ra aúcheani ekkewe mi kúkkún seniir me atun ekkewe kúkkún ra aúcheani ekkewe chinnap. Ach en lesen mwirin, epwe áweweei ifa usun ekkewe chinnap ra tongeni pwári pwe ra aúcheani ekkewe mi kúkkún seniir lón ewe mwichefel.