1. Ifa usun án emén katowu a áweiresi chókkewe mi tongei i?

A FEN wor emén en mi fókkun tongei a katowu seni ewe mwichefel? Ena a fókkun tongeni ámeteki letipom! Iei alon emén Chón Kraist fefin itan Hilda: “Lupwen pwúlúwei we mi tuppwél a máló mwirin 41 ierin ám pwúpwúlú, tittipei pwe ina ewe mettóch mi kon ssenúk áweiresin mi tongeni fis lón manawei. * Nge lupwen nei we át a likitaló ewe mwichefel, pwúlúwan we, me néún kewe, fen ina ewe mi kon áweires ngeniei seni meinisin.”

2-3. Me ren Kölfel 78:40, 41, met meefien Jiowa atun néún kewe chón angang ra likitaló i?

² Ekieki úkúkún weiresin Jiowa lupwen ekkóch ekkewe chónláng, chón an we famili, ra álleasolap ngeni! (Jut. 6) Pwal anchangei metekin letipan an kúna án néún kewe aramas mi áchengicheng me ren, ekkewe chón Israel, ú ngeni i fán chómmóng. (Álleani Kölfel 78:40, 41.) Kopwe lúkúlúk pwe Semach we mi tong lón láng a pwal meefi weires atun emén en mi fókkun tongei a likitaló i. I a weweiti ewe weires ka meefi. I epwe úméúméch le awora ngonuk ewe ourur me álillis mi lamot ngonuk.

³ Lón ei lesen, sipwe pwóróus wóón met sia tongeni féri pwe sipwe kúna án Jiowa álillis atun emén kich mi fókkun tongei a katowu. Sipwe pwal pwóróus wóón ifa usun sia tongeni álisi ekkewe ekkóch lón ewe mwichefel ika a wor chón ar famili a katowu. Nge akkomwan, sipwe pwóróus wóón eú mettóch mi lamot sipwe oturawu seni ekiekich.

4. Met chómmóng sam me in ra meefi lupwen emén néúr a likitaló Jiowa?

⁴ Lupwen emén kúkkún are sáráfé a likitaló Jiowa, ekkewe  sam me in ra kan ekieki ika mi wor met rese féri lón ar álisi néúr we pwe epwe likiitú lón an angang ngeni Jiowa? Iei alon emén Chón Kraist mwán itan Luke mwirin katowuun néún we át: “Ua tipi ngeniei pwe tipisi. Ua pwal mwo nge eáni ttan mi eniwokkus usun. Fán ekkóch ua kan kechiw me a metek letipei.” Emén Chón Kraist fefin itan Elizabeth mi kúna ena pwal esin osukosuk, a erá: “Ngang emén inelap, neman ua mwáálliló ren chómmóng mettóch. Ua meefi pwe ese naf met ua áiti ngeni nei we át pwe epwe tongei Jiowa.”

5. Epwe tipisin ié án emén úkútiw le angang ngeni Jiowa?

⁵ A lamot sipwe chemeni pwe Jiowa a fang ngeni emén me emén kich ewe liffangen pwúngún filatá. Weween sia tongeni filatá ika sipwe álleasochisi i are sisap. Ekkóch kúkkún are sáráfé semer kewe me iner rese isetiw mwer eú leenien áppirú mi múrinné, ra filatá ar repwe angang ngeni Jiowa me tuppwél ngeni. Ekkewe ekkóch semer me iner mi achocho le áiti ngeniir ar repwe tongei Jiowa, mwirin och fansoun ra likitaló Jiowa. Ina minne, emén me emén kich a lamot sipwe pwisin filatá ika sipwe angang ngeni Jiowa are sisap. (Jos. 24:15) Iwe, ámi kana sam me in mi meefi letipechou pokiten án néúmi úkútiw seni ar angang ngeni Jiowa, ousap ekieki pwe ena tipisimi.

6. Met emén kúkkún are sáráfé a tongeni meefi atun seman are inan a úkútiw le angang ngeni Kot?

⁶ Fán ekkóch, ewe sam are ewe in a úkútiw le angang ngeni Jiowa me pwal mwo nge likitaló an famili. (Kölf. 27:10) Ei a fókkun tongeni áweires ngeni ekkewe kúkkún are sáráfé mi tongei me súféliti semer me iner. Iei alon Esther, seman we a katowu: “Fán chómmóng ua kechiw pún ua mirititi pwe i ese chék likitaló ewe enlet, nge a filatá an epwe pwal likitaló Jiowa. Ua mmen tongei semei we ina popun atun a katowu, ua kan lólilen ren péchékkúlen inisin me nónnómun. A pwal mwo nge úriiei watteen niwokkus, iwe ua semmwen.”

7. Met meefien Jiowa ren emén kúkkún are sáráfé seman are inan mi katowu?

⁷ Ámi kana kúkkún me sáráfé, ika sememi are inemi a fen katowu, aua mmen tongekemi! Oupwe lúkúlúk pwe Jiowa a pwal fókkun weweiti ewe úkúkún weires oua meefi. I a tongekemi me aúcheani ámi tuppwél, me ina met ám chiechiemi keei aua pwal meefi. Oupwe pwal chemeni pwe esap tipisimi met sememi are inemi a filatá. Usun met sia fen fósun me mwan, Jiowa a fang ngeni meinisin aramas ewe tufichin pwúkún filatá. Me emén me emén mi fen fangóló manawan me papatais “epwe püsin mwärei wosan wosochou.”​—Kal. 6:5.

8. Met chón ewe famili mi tuppwél ra tongeni féri atun ra witiwiti án ewe emén ra fókkun tongei liwiniti Jiowa? (Pwal ppii ewe pwóór “ Liwiniti Jiowa.”)

⁸ Lupwen emén en mi fókkun tongei a likitaló Jiowa, a pwúkún nóm reom ewe mochen pwe eú rán epwe liwiniti I. Nge ren mwo iei, met ka tongeni féri? Achocho úkúkún óm tufich le apéchékkúla óm lúkú. Ika ka féri ena, kopwe isetiw eú leenien áppirú mi múrinné ngeni chón óm we famili me pwal mwo nge ewe mi katowu. Kopwe pwal tongeni angei ewe péchékkúl mi lamot ngonuk óm kopwe likiitú ngeni ewe weires ka meefi. Iwe, met ka tongeni féri pwe epwe chék péppéchékkúl óm lúkú?

9. Ifa usun ka tongeni angei álillis seni Jiowa? (Pwal ppii ewe pwóór “ Wokisin mi Tongeni Oururuk ika Emén En mi Fókkun Tongei A Likitaló Jiowa.”)

⁹ Achocho úkúkún óm tufich le apéchékkúla óm lúkú. A fókkun lamot óm kopwe sópweló le apéchékkúla pwisin en me pwal chón óm we famili. Ifa usun kopwe féri ena? Kútta álillis seni Jiowa ren óm achocho le ákkálleani an we Kapas, me ekilon wóón me pwal fiffiti ach kewe mwich. Iei alon Joanna, pwiin we me seman we ra likitaló ewe enlet: “A kisikisiló ai aúrek atun ua álleani pwóróusen ekkewe aramas lón Paipel ren choweán Apikael, Ester, Hiop, Josef, me Jesus. Pwóróuseer a apéchékkúlaei me álisiei le eáni ekiek mi múrinné mi ekinamweeló ewe metek ua meefi. Ua pwal aúseling ngeni néúch kewe original song mi fókkun apéchékkúlaei.”

10. Met sia káé seni Kölfel 32:6-8 ren ifa usun sipwe likiitú ngeni ach meefi watteen weires?

¹⁰ Isetá ngeni Jiowa minne ka aúreki. Lupwen ka meefi watteen weires, kosap úkútiw le iótek ngeni i. Tingormau ngeni ach we Kot mi tong an epwe álisuk le eáni an ekiek me “aiti ngonuk ewe al kopwe fetal won o emwenuk.” (Álleani Kölfel 32:6-8.) Ewer, ese mwáál epwe fókkun áweires ngonuk óm kopwe ereni Jiowa met ka wesewesen meefi. Nge Jiowa a wesewesen weweiti metekin letipom. I a fókkun tongeok me a mochen óm kopwe iinaawu ngeni masouen letipom.​—Eks. 34:6; Kölf. 62:7, 8.

11. Me ren Ipru 12:11, pwata a lamot ach sipwe lúkúlúk wóón án Jiowa angangen apwúng mi fis fán tong? (Pwal ppii ewe pwóór “ Ewe Kókkótun Katowu​—Án Jiowa Angangen Apwúng mi Fis fán Tong.”)

¹¹ Álisatá met ekkewe mwán mi ásimaw ra apwúngaló. Ewe angangen katowu ina kinikinin án Jiowa kókkót. An apwúng mi fis fán tong, ina ewe álillis mi fókkun múrinné fán  iten meinisin, kapachelong ewe mi katowu. (Álleani Ipru 12:11.) Ekkóch me lón ewe mwichefel neman repwe apasa pwe ese pwúng án ekkewe mwán mi ásimaw apwúngaló le atowu emén. Nge chemeni pwe ekkena esin aramas, lap ngeni rese mochen pwári mwáállin ewe emén mi féri och tipis. Sise silei unusen minne a fis. Ina minne, a eú alen tipachem ach sipwe lúkúlúk pwe ekkewe mwán mi ásimaw mi wisen eáni apwúng wóón eú osukosuk ra fókkun túmúnúfichi le fiti met Paipel a apasa me eáni án Jiowa apwúng.​—2 Kron. 19:6.

12. Ikkefa ekkewe feiéch ekkóch ra kúna pokiten ar álisatá án Jiowa kókkótun apwúng?

¹² Óm álisatá met ekkewe mwán mi ásimaw ra apwúngaló usun katowuun emén en mi fókkun tongei, neman ka álisi i an epwe liwiniti Jiowa. Iei alon Elizabeth, ewe sia fen fós usun me mwan: “A mmen fókkun áweires ám ausap chiechi ngeni néúm we át mi watte. Nge mwirin an liwiniti Jiowa, a erá pwe mi fichiiti an epwe katowu. Mwirin och fansoun, a apasa pwe a káé chómmóng lesen mi múrinné. Ua fókkun aúcheani án Jiowa angangen kapwúng.” Pwúlúwan we itan Mark, a pwal apasa: “Mwirin och fansoun, néúm we át a ereniei pwe eú me lein ewe popun a mochen liwinsefál pún aua apwénúetá met mi lamot aupwe féri. Ua fókkun kilisou pwe Jiowa a álisikem le álleasochis.”

13. Met a tongeni álisuk le likiitú ngeni metekin letipom?

¹³ Fós ngeni chiechiom kewe mi weweiti minne ka meefi. Chiechi ngeni ekkewe Chón Kraist mi ásimaw mi tongeni álisuk óm kopwe eáni ekiek mi pwúng. (SalF. 12:25; 17:17) Iei alon Joanna, ewe sia fen fós usun me mwan: “Seni lón letipei, ua meefi pwe ua chék ákkáláemén. Nge ai fóffós ngeni chiechi kewe ua lúkúlúkúr, a álilliséch ngeniei.” Nge met kopwe féri ika ekkóch lón ewe mwichefel ra apasa ngonuk ekkóch mettóch mi fen alapaaló metekin letipom?

14. Pwata a lamot ach sipwe “songomangfengen o amusamusfengen”?

¹⁴ Kopwe mosonottam ngeni pwiium kewe Chón Kraist. Kosap ekieki pwe aramas meinisin repwe apasa minne mi pwúng fansoun meinisin. (Jas. 3:2) Oukich meinisin sise unuséch, ina popun kosap máirú ika ekkóch rese silei met repwe apasa ngonuk are fen apasa och mettóch mi ámetekuk. Chemeni án aposel Paulus ei pesepes: “Oupwe songomangfengen o amusamusfengen are eman a chou ngeni eman.” (Kol. 3:13) Iei alon emén Chón Kraist fefin, néún we a katowu: “Jiowa a álisiei ai upwe omusaaló tipisin pwii kewe mi achocho le apéchékkúlaei, nge ra fen ámetekiei.” Met chón ewe mwichefel ra tongeni féri pwe repwe álisi chón ewe famili mi tuppwél?

15. Met sia tongeni féri le álisi chón eú famili emén iir mi fókkun tongei a kerán katowu?

¹⁵ Kopwe kirekiréch ngeni chón ewe famili mi tuppwél me chiechi ngeniir. Emén Chón Kraist fefin itan Miriam, a erá pwe a lólilen an epwe ló fiti mwich mwirin katowuun mwongean we, iei alon: “Ua niwokkus ren met aramas  repwe apasa. Nge a wor chómmóng chiechiei kewe ra pwal meefi weires ren katowuun mwongeei we, iir rese song are apasa och mettóch mi ngaw fán ásengesin mwongeei we. Ua mmen kilisou ngeniir pún use chék áláeménúló lón ai ei weires.” Iei met pwal emén Chón Kraist fefin a apasa: “Mwirin án néúm we át katowu, chiechiei kewe mi áchengicheng ra etto oururukem. Ekkóch leir ra erá pwe rese silei met repwe apasa. Ekkóch ra fitiei le kechiw me pwal ekkóch ra mak ngeniei taropwe mi apéchékkúl. Minne ra féri a fókkun álilliséch ngeniei!”

16. Ifa usun chón ewe mwichefel ra tongeni akkawora álillis?

¹⁶ Sópweló le ákkálisi chón ewe famili mi tuppwél. A ákkáeúin lamot ngeniir lón ei fansoun óm tong me kapasen apéchékkúl. (Ipru 10:24, 25) Fán ekkóch familien ewe mi katowu ra kúna pwe ekkóch chón ewe mwichefel rese chúen fóffós ngeniir, usun itá nge pwal iir ra katowu. Sise fókkun mochen an epwe ina usun meefier! A kon lamot kapasen apúnga me apéchékkúl ngeni ekkewe kúkkún are sáráfé iner are semer mi katowu. Iei alon Maria, pwúlúwan we a katowu me ló seni an famili: “Ekkóch me lein chiechiei kewe ra etto ngeni imwei we me kuk enem mwéngé me álisiei le káé ngeni nei kewe. Ra pwal meefi ewe metek ua meefi me etiei le kechiw. Lupwen aramas ra apasa minne mi mwáál fán itei, iir ra wisen fósetá. Ra fókkun apéchékkúlaei!”​—Rom 12:13, 15.

17. Ifa usun ekkewe mwán mi ásimaw ra tongeni oururu chókkewe mi meefi weires?

¹⁷ Ámi kana mwán mi ásimaw, áeá ewe fansoun mi suuk ngenikemi le apéchékkúla chón ewe famili mi tuppwél. A nóm remi ewe wis mi aúchea ámi oupwe oururu pwiimi kewe Chón Kraist, iir kewe mi wor emén lón ar famili a likitaló Jiowa. (1 Tes. 5:14) Ren ámi oupwe apéchékkúler, fós ngeniir mwen me mwirin ach kewe mwich. Chuuriir lón imwer kewe me etiir le iótek. Fitiir lón ewe angangen afalafal, are etiwer fán ekkóch ar repwe fiti ámi famili fel. A lamot ekkewe mwán mi ásimaw repwe túmúnú chókkewe mi meefi weires me úméúméch ngeniir me tongeer.​—1 Tes. 2:7, 8.

18. Me ren 2 Petrus 3:9, met Kot a mochen chókkewe mi úkútiw le angang ngeni repwe féri?

¹⁸ Jiowa ese “mochen pwe eman epwe pöütmwälila, nge a fen mochen pwe meinisin repwe ekieksefäl.” (Álleani 2 Petrus 3:9.) Ikaamwo emén a féri eú tipis mi chou, manawan a chúen aúchea me ren Kot. Chechchemeni pwe Jiowa a fen ménatiw eú watteen liwin fán iten aramas tipis, ina manawen Néún we mi áchengicheng. Fán tong, Jiowa a kúkkútta ifa usun epwe álisi ekkena esin aramas pwe repwe liwiniti. I a fókkun lúkúlúk pwe repwe féri ena, usun met sia kúna seni án Jesus we kapas áwewe usun ewe nau mi mwálecheló. (Luk. 15:11-32) Chómmóng chókkewe mi fen likitaló ewe enlet, ra liwiniti Semer we mi tong lón láng. Me chón ewe mwichefel ra fókkun pwapwa le etiwasefáliir. Elizabeth, ewe sia fen fós usun me mwan, a meefi ena esin pwapwa atun néún we át a liwinsefál. A erá: “Ua fókkun kilisou ngeni chókkewe mi pesengenikem ám ausap fangetá wóón ám ápilúkúlúk.”

19. Pwata sia tongeni lúkúlúk wóón Jiowa fansoun meinisin?

¹⁹ Sia tongeni lúkúlúk wóón Jiowa fansoun meinisin. I esap tongeni ngenikich kapasen éúréúr epwe atolongakich lón feiengaw. I emén Sam mi kisáseú me úméúméch mi fókkun tongei meinisin chókkewe mi tongei i me fel ngeni. Kopwe lúkúlúk pwe Jiowa esap fókkun likitukoló atun ka nóm lón weires. (Ipru 13:5, 6) Mark, ewe sia fen fós usun me mwan, a apasa: “Jiowa ese fókkun tongeni likitikicheló. I ese fókkun towaw senikich atun sia nóm lón weires.” Jiowa epwe sópweló le fang ngonuk ewe “tufich mi somwola.” (2 Kor. 4:7) Enlet, en ka fókkun tongeni akkamwéchú óm tuppwél me ápilúkúlúk inaamwo ika emén en mi fókkun tongei a likitaló Jiowa.