1. Ifa usun sia tongeni esilla emén mi alúkúlúk?

 EMÉN aramas mi alúkúlúk a achocho le apwénúetá minne a eáni pwon me a eáni kapas mi enlet. (Kölf. 15:4) Aramas ra silei pwe ra tongeni lúkúlúkú eménna. Ina met sia pwal mochen án chienach kewe Chón Kraist repwe meefi usuch. Met sipwe féri pwe repwe tongeni lúkúlúkúkich?

2. Ifa usun sipwe pwári pwe kich aramas mi alúkúlúk?

² Sise tongeni eriáni aramas ar repwe lúkúlúkúkich. Mi lamot ach sipwe pwári lón féfférúch pwe ekkewe ekkóch repwe silei pwe ra tongeni lúkúlúkúkich. Lúkúlúk a usun moni. Sia kan angang weires pwe sipwe tongeni angei, iwe nge, a mecheres an epwe péút senikich. Ren enletin, a fich ngeni Jiowa ach sipwe lúkúlúkú. Sia tongeni lúkúlúkú i fansoun meinisin pún “an kewe föför ra fis fän allükülük.” (Kölf. 33:4) I a pwal mochen ach sipwe áppirú. (Ef. 5:1) Iei sipwele pwóróusfengen wóón ekkóch pwóróusen néún Jiowa kewe chón angang mi áppirú Semer na mi tong, me ánnetatá pwe aramas ra tongeni lúkúlúkúr. Sipwe pwal ppii nimu napanap repwe álisikich ach sipwe emén mi alúkúlúk.

3-4. Ifa usun ewe soufós Taniel a pwári pwe i emén mi alúkúlúk? Ikkefa ekkewe kapas eis a lamot sipwe pwisin eisinikich?

³ Ewe soufós Taniel a isetiw leenien áppirú mi múrinné ren an emén mi alúkúlúk. Inaamwo ika a eoló Papilon, nge a sill pwe i emén mi alúkúlúk. A lapóló án aramas lúkúlúkú atun a  áweweei án ewe kingen Papilon, Nepukatnesar we ttan ren álillisin Jiowa. Lón eú atun, a lamot án Taniel epwe ereni ena king pwe Jiowa ese pwapwa ren. Emén king esap fókkun mochen rong ena esin pwóróus. Ina minne, a lamot ngeni Taniel pwora, pún Nepukatnesar i emén mi nisossong! (Tan. 2:12; 4:20-22, 25) Fite fite ier mwirin, Taniel a pwal pwári pwe i emén mi alúkúlúk atun a áweweei fán pwúng och pwóróus mi monomon mi pwá me wóón etippen imwen ewe king we lón Papilon. (Tan. 5:5, 25-29) Iwe nge mwirin och fansoun, Tarius seni Metia me néún kewe meilap ra pwal kúna pwe Taniel “a fokun tipesaram, a pwal tipachem me silelap.” Ra pwal silei pwe Taniel a “allükülük, nge esap wor mwälin ika tümwününgauan.” (Tan. 6:3, 4) Ewer, pwal mwo nge ekkewe sounemenem mi fel ngeni kot chofona ra tongeni esilla pwe ena chón fel ngeni Jiowa i emén mi alúkúlúk.

⁴ Atun sia ekilonei án Taniel leenien áppirú, sia tongeni pwisin eisinikich: ‘Ifa án chón lúkún ekiek ussui? Ua sill me ren aramas pwe ua apwénúetá pwúngún wisei, me ngang emén mi alúkúlúk?’ Pwata a lamot ach sipwe eisinikich ekkena esin kapas eis? Pún sia elingaaló Jiowa atun sia pwári pwe kich aramas mi alúkúlúk.

5. Pwata a sill pwe Hanania i emén mi alúkúlúk?

⁵ Lón ewe ier 455 mwen Kraist, mwirin án Kepina Nehemia aúsefáli tittin Jerusalem, a kútta ekkewe mwán mi alúkúlúk pwe repwe túmúnúéchú ewe telinimw. Nehemia a filatá fitemén, nge emén me leir itan Hanania,  i meilapen ewe Imwen Maun. Ewe Paipel a erá pwe Hanania i “eman mwän mi fokun allükülük, a pwal niuokusiti Kot lap seni chomong chienan kewe.” (Ne. 7:2) I a angang weires lón meinisin wisan kewe pokiten a tongei Jiowa me ese fókkun mochen eletipengawa. Ekkena mettóch ra pwal tongeni álisikich ach sipwe emén chón angang ngeni Kot mi alúkúlúk.

6. Ifa usun Tikikus a pwári pwe i emén chiechien aposel Paulus mi alúkúlúk?

⁶ Iei pwóróusen Tikikus, emén chiechien aposel Paulus mi alúkúlúk. Atun Paulus a kalapus lón imwan we, a lúkúlúk wóón Tikikus, me a erá pwe Tikikus i emén “chon angang mi allükülük.” (Ef. 6:21, 22) Paulus ese chék ewisa ngeni Tikikus an epwe uwei ngeni ekkewe Chón Kraist lón Efisos me Kolose néún kewe taropwe, nge a pwal ewisa ngeni an epwe apéchékkúler me oururuur. Pwóróusen Tikikus a áchchema ngenikich usun ekkewe mwán mi tuppwél me alúkúlúk iir mi wisen túmúnúkich lón pekin ngún lón ei fansoun.​—Kol. 4:7-9.

7. Met ka tongeni káé seni ekkewe mwán mi ásimaw me chónálillisin mwichefel usun óm kopwe emén mi alúkúlúk?

⁷ Lón ach ei fansoun, sia fókkun kilisou ren ekkewe mwán mi ásimaw me chónálillisin mwichefel mi alúkúlúk. Ra usun Taniel, Hanania, me Tikikus, le apwénúetáéchú wiser. Áwewe chék, atun sia fiti ach kewe mwich lón weekday, sia silei pwe epwe wor chón eáni ekkewe kinikin meinisin lón mwich. Ekkewe mwán mi ásimaw ra pwal kilisou ren án chókkewe mi wor ar kinikin mmólnéchútá le eáni ar kewe kinikin lón mwich! Pwal och, atun sia etiwa néúch kewe chón káé ngeni ewe mwich lón weekend, sia fókkun lúkú pwe epwe wor emén epwe wisen eáni eú afalafal. Me sia pwal silei pwe epwe chék wokkor néúch kewe puk sia tongeni néúnéú lón ewe angangen afalafal. Ekkena mwán mi tuppwél ra túmúnúéchúkich lón pekin ngún, me sia kilisou ngeni Jiowa fán iter! Iwe nge, ifa usun sia tongeni pwári pwe kich mi alúkúlúk?

8. Ifa usun sipwe pwári mirit lón ach chúngú pwóróusen chienach kewe? (Än Salomon Fos 11:13)

⁸ Sia tongei chienach kewe Chón Kraist, me sia mochen silei pwóróuseer. Iwe nge, a lamot ach sipwe túmúnú pwe site angolong lón manawer. Ekkóch lón ewe mwichefelin Chón Kraist lón fansoun ekkewe aposel, ra “luapas o fosolong lon än eman angang, ra kakapas won mettoch esap wiser pwe repwe kapas won.” (1 Tim. 5:13) Sise fókkun mochen usur. Nge ifa usun ika emén a erenikich pwóróusan me lúkú pwe sisap pwal apwóróusa ngeni emén? Áwewe chék, emén Chón Kraist fefin a erenikich pwóróusen eú an semmwen are eú sóssót a kúna, me tingorekich ach sisap pwal ereni emén. Mi lamot sipwe súféliti an na tingor. b (Álleani Än Salomon Fos 11:13.) Iei sipwele káé ekkóch atun mi lamot ach sisap pwári monomonun pwóróus.

9. Ifa usun chón ewe famili ra tongeni pwári pwe ra alúkúlúk?

⁹ Lón famili. Emén me emén chón ewe famili repwe túmúnú pwe resap pwal apwóróusa ekkóch pwóróus usun ar we famili. Áwewe chék, eli a wor eú mettóch emén Chón Kraist fefin a kan soun féri nge a atakirikir me ren pwúlúwan we. Itá átena epwe pwal apwóróusa me efisi met epwe sáw ren? Aapw! A tongei pwúlúwan na me esap fókkun mochen féri met epwe letipengaw ren. (Ef. 5:33) Ekkewe  sáráfé ra mochen ach sipwe ésúfélúr. Iwe a lamot án ekkewe sam me in repwe chemeni ena. Resap ásáwa néúr kewe ren ar pwári ngeni ekkewe ekkóch mwáálliir kewe. (Kol. 3:21) A lamot án ekkewe nau repwe mirit, me resap apwóróusa ngeni ekkewe ekkóch met a tongeni ásáwa chón ar we famili. (Tut. 5:16) Atun emén me emén chón ewe famili ra achocho le túmúnú ar resap apwóróusa ekkóch pwóróus usun ar we famili, repwe ririéchfengen lefiler.

10. Ifa usun sipwe emén chiechi mi pwári tong? (Än Salomon Fos 17:17)

¹⁰ Lón chiechi. Lón manawach epwe wor atun sipwe meefi pwe a lamot ach sipwe ereni emén chiechiach enletin meefiach. Fán ekkóch a tongeni weires. Eli sise kan eéreni le pwári ngeni emén alóllóólun meefiach, me sipwe fókkun lichippúng ika sia silei me mwirin pwe chienach na a ereni ekkewe ekkóch met sia ereni. Iwe nge, sia fókkun kilisou ren an wor chienach sia tongeni ereni meefiach me silei pwe esap ereni emén! I “chiechiach a tongeekich.”​—Álleani Än Salomon Fos 17:17.

11. (a) Ifa usun ekkewe mwán mi ásimaw me pwúlúwer kewe ra pwári pwe aramas ra tongeni lúkúlúkúr? (b) Met sia tongeni káé seni ei mwán mi ásimaw mi angang wóón och mettóch mi monomon lón ewe mwichefel, nge mwirin ese pwal ereni chón an ei famili? (Ppii ewe sasing.)

¹¹ Lón ewe mwichefel. Ekkewe mwán mi ásimaw mi sill ren ar rese apwóróusa pwóróus mi monomon, iir “eu lenien chuno seni asepwäl” me “eu lenien op” fán iten chón ewe mwichefel. (Ais. 32:2) Sia silei pwe sia tongeni ereniir ese lifilifil met, pokiten sia lúkú pwe resap pwal apwóróusa ngeni ekkewe ekkóch. Sise kan echchimwer ar repwe erenikich ekkewe mettóch itá úrúrún epwe chék monomonoló. Pwal och, sia aúcheani pwúlúwen ekkewe mwán mi ásimaw kewe pokiten rese sótun echchimwa pwúlúwer kewe ar repwe ereniir pwóróusen ekkewe ekkóch. Ren enletin fen ina eú feiéch ngeni pwúlúwen ekkewe mwán mi ásimaw kewe ar resap pwal silei pwóróusen chiener kewe Chón Kraist. Iei  alon emén pwúlúwen emén mwán mi ásimaw: “Ua kilisou ren án pwúlúwei we ese kan pwal pwári ngeniei pwóróusen chókkewe a ló apéchékkúler are pwóróusen chókkewe mi lamot ngeniir álillis lón pekin ngún, pwal mwo nge ereniei iter. Ua kilisou ren an ese pwal ereniei ekkena esin pwóróus pwe usap pwal lólilen ren ekkena osukosuk ese wor met ua tongeni ffér ngeniir. Ua tongeni chék chiechi ngeni meinisin chón ewe mwichefel fán kinamwe. Me ua lúkú pwe atun upwe ereni pwúlúwei we usun meefiei are ai kewe osukosuk, esap pwal ereni ekkewe ekkóch.” Ewer, kich meinisin sia mochen itéch ren ach alúkúlúk. Ikkefa ekkewe napanap repwe álisikich le achocho ngeni ena? Sipwe káé nimu me leir.

12. Áweweei ika pwata tong ina lóngólóngun lúkúlúk.

¹² Tong ina lóngólóngun lúkúlúk. Jesus a erá pwe ekkewe ruu allúk mi kon aúchea seni meinisin, ina ach sipwe tongei Jiowa me chón óruch kewe. (Mat. 22:37-39) Ach tongei Jiowa a amwékútúkich ach sipwe áppirú lón an alúkúlúk. Áwewe chék, ach tongei chienach kewe Chón Kraist a amwékútúkich ach sisap pwal apwóróusa ngeni emén pwóróuseer mi monomon. Sise fókkun mochen apwóróusa och mettóch epwe atolonger lón osukosuk, ásáwer, are eletipengawer.​—Joh. 15:12.

13. Ifa usun tipetekison epwe álisikich ach sipwe emén mi alúkúlúk?

¹³ Tipetekison epwe álisikich ach sipwe emén mi alúkúlúk. Emén Chón Kraist mi tipetekison ese sótun einga ekkewe ekkóch ren an mochen epwe akkomw le pwári eú pwóróus. (Fil. 2:3) Ese sótun efisi án ekkewe ekkóch repwe ekieki pwe a silei ekkewe pwóróus mi monomon ese tongeni fósur. Tipetekison epwe pwal álisikich ach sisap achéwú ekkewe pwóróus sia pwisin ekiekietá nge ewe Paipel are néúch kewe puk rese pwal fós usur.

14. Ifa usun mirit epwe álisikich ach sipwe emén mi alúkúlúk?

¹⁴ Mirit epwe álisi emén Chón Kraist le silei “fansoun fanafanala pwal fansoun kakapas.” (SalAf. 3:7) Iei eú mwuten kapas mi chéú lón ekkóch fénú, “Kapas a usun silifer, nge fanafaneló a usun kolt.” Weween a wor fansoun mi fen éch ach sipwe fanafaneló lap seni ach sipwe kapas. Ina popun a fich met ei Än Salomon Fos 11:12 a eáni éúréúr: “Eman mi mirit a fanafanala.” Áwewe chék, a wor emén mwán mi ásimaw mi lipwákéch a kan álisi ekkóch mwichefel wóón ar kewe osukosuk mi chou. Iei met emén chienan mwán mi ásimaw a erá usun: “Fán chómmóng, a kan túmúnú an esap fókkun apwóróusa ekkewe pwóróus mi monomon usun ekkewe ekkóch mwichefel.” Pokiten án ena mwán mi ásimaw mirit, iwe chienan kewe mwán mi ásimaw lón an we mwichefel ra súféliti. Ra lúkú pwe esap fókkun pwári ekkewe pwóróus mi monomon fán iten ekkewe ekkóch.

15. Áweweei ifa usun ach wenechar a tongeni efisi án ekkewe ekkóch repwe lúkú kich.

¹⁵ Wenechar ina met a pwal lamot ngenikich ika sia mochen emén mi alúkúlúk. Sia kan lúkúlúk wóón emén mi wenechar pwe sia silei pwe epwe chék kakkapas enlet. (Ef. 4:25; Ipru 13:18) Áwewe chék, ka mochen lipwákéchúló lón óm angangen asukul, ina popun ka tingorei emén an epwe aúseling óm we kinikin kopwe eáni lón mwich, me erenuk met a lamot kopwe angang wóón. Ié kopwe lúkúlúkú an epwe wenechar le erenuk met a lamot kopwe angang wóón? Kopwe fili emén epwe erenuk met chék ka sani le rong, are emén epwe kirekiréch le wenechar ngonuk? A mmen ffat pélúwan. Iei met Paipel a apasa: “A  mürina om kopwe apwüngü eman le pwäpwäla lap seni om kopwe tongei eman, nge kosap pwäri ngeni. Atongeom a ekieki om feiöch, inamwo are a akinasok.” (SalF. 27:5, 6) Inaamwo ika me mwan epwe weires óm kopwe etiwa meefien emén chienom, nge an wenechar ngonuk epwe fókkun álilliséch ngonuk ren fansoun langattam.

16. Ifa usun Än Salomon Fos 10:19 a áiti ngenikich lamoten ach sipwe nemenifichi pwisinkich?

¹⁶ Nemenifichi pwisinkich ina met a fókkun aúchea ika sia mochen án ekkewe ekkóch repwe lúkú kich. Ena napanap epwe álisikich le chék fanafaneló atun sia mochen pwári ekkewe pwóróus sia silei pwe mi lamot ach sisap akkaffat. (Álleani Än Salomon Fos 10:19.) A tongeni weires ach sipwe nemenifichi pwisinkich ika sia nóm wóón social media. Ika sise túmúnúéch sia tongeni pwári ngeni chómmóng aramas ekkewe pwóróus mi monomon nge sise tepereni. Me ika sa post och pwóróus online, iwe sise chúen tongeni nemeni met aramas repwe féri ngeni ena pwóróus, are úkúkún ewe osukosuk epwe fis seni. Ach nemenifichi pwisinkich epwe pwal álisikich le chék fanafaneló atun chón oput kich ra sótun otupukich ach sipwe pwári pwóróusen chienach kewe Chón Kraist mi tongeni atolonger lón feiengaw. A tongeni fis ena atun ekkewe polis ra chosanikich me lón ekkewe leeni mi pinepin are aúkúk ach angang ie. Lón ekkena atun me pwal lón ekkóch atun sia tongeni apwénúetá án Paipel ei kapasen emmwen mi erá sipwe ‘pinei awach.’ (Kölf. 39:1) A lamot ach sipwe alúkúlúk ngeni aramas meinisin, ese lifilifil ika chón ach famili, chiechiach, pwiich kewe Chón Kraist, are pwal ekkewe ekkóch. Me ika sia mochen ach sipwe emén mi alúkúlúk, a lamot sipwe nemenifichi pwisinkich.

17. Ifa usun sia tongeni álisatá ach lúkúlúkfengen lón ewe mwichefel?

¹⁷ Sia fókkun kilisou ren án Jiowa panikicheto ngeni eú mwicheichen pwipwi iir mi pwári tong me alúkúlúk! Kich meinisin sia achocho le féri met chienach kewe Chón Kraist repwe lúkúlúkúkich ren. Atun emén me emén kich sia achocho le pwári tong, tipetekison, mirit, wenechar, me nemenifichi pwisinkich, sia álisatá ach lúkúlúkfengen lón ewe mwichefel. A lamot ach sipwe sópweló ach achocho le pwári pwe kich mi alúkúlúk. Amwo sipwe áppirú ach we Kot, Jiowa, me sópweló le pwári pwe kich mi alúkúlúk.