1. Ikkefa ekkewe mettóch mi amwarar repwe fis atun án Jesus Nemenem Úkúkún Engeréú Ier?

 ATUN epwe poputá manawsefálin aramas wóón fénúfan atun án Kraist Nemenem Úkúkún Engeréú Ier, epwe ina eú fansoun mi fókkun apwapwa. Kich meinisin sia mochen kúnasefáli attongeach kewe iir mi máló. A pwal ina usun meefien Jiowa. (Hiop 14:15) Anchangei úkúkún pwapwaan meinisin wóón fénúfan atun attongeer kewe repwe manawsefál. Usun met sia fen káé lón ewe lesen mwen ei pwe “ekkewe mi pung,” chókkewe iter mi makkelong lón ewe puken iten chón manaw, repwe “manausefäl o küna manau.” (Föf. 24:15, Testament mi Fö; Joh. 5:29) Eli chómmóng me lein attongeach kewe repwe manawsefál ekiseló chék mwirin ewe Armaketon. b Pwal och, “ekkewe rese pung,” weween chókkewe rese tufichin silei Jiowa are angang ngeni fán tuppwél mwen ar máló, “repwe manausefäl o küna apwüng.”

2-3. (a) Me ren Aisea 11:9, 10, ifa ewe angangen asukul mi fókkun lapalap esaamwo fis fán eú? (b) Met sipwe káé lón ei lesen?

 ² A lamot án meinisin chókkewe mi manawsefál repwe káé. (Ais. 26:9; 61:11) Ina popun epwe fis eú angangen asukul mi lapalap esaamwo fis fán eú. (Álleani Aisea 11:9, 10.) Pwata? A lamot án ekkewe rese pwúng mi manawsefál repwe káé usun Jesus Kraist, kókkótun án Kot we Mwú, ewe méén kepich, aúchean iten Jiowa we, me ewe popun i chék a wor an pwúúng le nemenem. A pwal lamot án ekkewe mi pwúng repwe káé met Jiowa a akkasukula ngeni néún kewe aramas usun an kókkót fán iten fénúfan. Ekkóch me lein chókkana mi tuppwél, ra máló me mwen wesin ewe Paipel. A chómmóng met ekkewe rese pwúng me ekkewe mi pwúng repwe káé.

³ Lón ei lesen, sipwe pélúweni ekkeei kapas eis: Epwe ifa kókkótun ewe angangen asukul mi lapalap? Met epwe fis ngeni iten aramas ika ra etiwa ena angangen asukul are rese etiwa? A mmen aúchea ngenikich pélúwen ekkena kapas eis. Sipwele káé usun ekkóch oesini mi amwarar mi mak lón Taniel me Pwärätä pwe epwe álisikich le affata ach weweiti met epwe fis atun ekkewe mi máló repwe manawsefál. Sipwe akkomw káé met ewe mi amwarar Taniel 12:1, 2 a oesini usun.

4-5. Met Taniel 12:1 a áiti ngenikich usun ewe fansoun sópwólóón?

⁴ Álleani Taniel 12:1. Ewe puken Taniel a pwári tettelin ekkewe mettóch mi amwarar repwele fis atun ewe fansoun sópwólóón. Áwewe chék, Taniel 12:1 a áiti ngenikich pwe Mikael, ina i Jesus Kraist, a “peni” néún Kot kewe aramas. Ena kinikin lón ena oesini, a poputá le pwénúetá lón ewe 1914 atun Jesus a seikitá an epwe King lón án Kot we Mwú lón láng.

⁵ Iwe nge, emén chónláng a pwal ereni Taniel pwe Jesus epwe “war” atun “eu fansoun riaföü esamwo fis seni me lom, lupwen mwü rekärän poputä tori ei fansoun.” Ena “fansoun riaföü,” ina ewe riáfféú mi lapalap Mateus 24:21 a fós usun. Jesus epwe war are mwékút le peni néún Kot kewe aramas lesópwólóón ena fansoun riáfféú mi lapalap, weween atun ewe Armaketon. Ewe puken Pwärätä a erá pwe chókkana, iir chón “eu mwich mi fokun chocho mi towu seni ewe riaföü mi lapalap.”​—Pwär. 7:9, 14.

6. Met epwe fis atun ewe mwich mi fókkun chóchó repwe kúna manaw mwirin ewe riáfféú mi lapalap? Áweweei. (Pwal ppii ewe lesen lón ei puk itelapan “Kapas Eis Seni Chón Állea” mi fós usun ewe manawsefál wóón fénúfan.)

⁶ Álleani Taniel 12:2. Met epwe fis mwirin án ewe mwich mi fókkun chóchó repwe kúna manaw atun ewe fansoun riáfféú? Me mwan, sia ekieki pwe Taniel 12:2 a weneiti manawsefálin chókkewe repwe feitá láng are lapólóón ewe angangen afalafal mwirin án ekkewe chón oputakich aúkatiw lón ewe 1918. c Iwe nge, iei sia weweiti pwe ena oesini a weneiti manawsefálin ekkewe mi máló epwe fis lón ewe ótót séfé. Pwata sia erá ena? Hiop 17:16 a pwal néúnéú ei itiitin kapas “ewe pwül moromor,” nge a wewe ngeni ei itiitin kapas “ewe lenien sotup.” Pokiten ena, iwe sia tongeni erá pwe Taniel 12:2 a fós usun eú manawsefál wóón fénúfan epwe fis mwirin muchúlóón ekkewe ránin lesópwólóón me mwirin ewe maunen Armaketon.

7. (a) Ifa usun ekkóch repwe manawsefál nge “repwe eäni manau esemüch”? (b) Pwata ina eú “manausefäl . . . mi fokun mürina”?

 ⁷ Nge met weween án Taniel 12:2 erá pwe ekkóch repwe manawsefál nge “repwe eäni manau esemüch”? Weween pwe chókkewe mi manawsefál me káé usun Jiowa, are sópweló le kákkáé usun i, me álleasochisiir me Jesus atun ewe 1,000 ier, repwe eáni manaw esemuch. (Joh. 17:3) Ina ewe “manausefäl . . . mi fokun mürina” seni ewe manawsefál mi fis ngeni ekkóch aramas me lóóm. (Ipru 11:35) Pwata? Pún chókkewe mi manawsefál me lóóm, ra pwal málósefál.

8. Ifa usun ekkóch repwe manawsefál nge “repwe eäni itengau me säw esemüch”?

⁸ Esap meinisin ekkewe repwe manawsefál repwe mochen káé seni Jiowa. Án Taniel we oesini a erá pwe ekkóch repwe manawsefál, nge “repwe eäni itengau me säw esemüch.” Pokiten ra pwári pwe ra álleasolap, iwe esap makkelong iter lón ewe puken iten chón manaw me resap eáni ewe manaw esemuch. Nge repwe fen kúna “säw esemüch,” are máfóchófóch. Iwe, Taniel 12:2 a fós usun met epwele wesen fis ngeni meinisin mi manawsefál alóngólóng wóón met ra féri mwirin ar manawsefál. d (Pwär. 20:12) Ekkóch me leir repwe eáni manaw esemuch, nge ekkóch resap.

9-10. Met epwe pwal fis mwirin ewe riáfféú mi lapalap, me ié kewe “repwe meriweriw usun meriweriwen läng”?

⁹ Álleani Taniel 12:3. Met epwe pwal fis mwirin warotoon ewe “fansoun riaföü”? Me lúkún met a fis lón Taniel 12:2, wokisin úlúngát a fós usun eú mettóch epwe fis mwirin ewe riáfféú mi lapalap.

¹⁰ Ié kewe “repwe meriweriw usun meriweriwen läng”? Mateus 13:43 a álisikich le silei ié kana ena wokisin a fós usur ren an erá: “Mürin ekewe chon pwüng repwe tittin usun akkar lon Mwün Semer.” Lón epwipwiin ena pwóróus, Jesus a fós usun “ekewe aramas ir chon ewe Mwün Kot,” weween pwiin kewe mi kepit repwe eti le nemenem lón ewe Mwú lón láng. (Mat. 13:38) Iwe, a ffat pwe Taniel 12:3 a fós usun ekkewe mi kepit me ewe angang repwe féri atun án Jesus Nemenem Úkúkún Engeréú Ier.

11-12. Ifa ewe angang ekkewe 144,000 repwe féri atun ekkewe 1,000 ier?

¹¹ Ifa usun ekkewe mi kepit repwe álisi ‘chomong aramas ar repwe föri mine a pwüng’? Ekkewe mi kepit repwe angangfengen me Jesus Kraist le emmweni eú kókkótun asukul epwe fis wóón fénúfan atun ewe 1,000 ier. Ekkewe 144,000 resap chék wiseni ewe wis king, nge repwe pwal souasor. (Pwär. 1:6; 5:10; 20:6) Iwe, repwe álillis le “apöchöküla chon ekewe mwü,” weween ekis me ekis repwe álisi aramas ar repwe unuséch sefál. (Pwär. 22:1, 2; Is. 47:12) Ekkena mettóch repwe fókkun atoto pwapwa ngeni ekkewe mi kepit!

¹² Ié kewe repwe kapachelong lein ekkewe “chomong aramas” mi féri minne mi pwúng? Ekkewe mi manawsefál me pwal chókkewe mi manawewu seni lón ewe Armaketon, fengen me néúr kewe mi uputiw lón ewe ótót séfé. Me mwen muchúlóón ewe 1,000 ier, meinisin mi nóm wóón fénúfan repwe unuséchúló. Iwe, ineet epwe makkeffóch iter wóón peen lón ewe puken iten chón manaw nge esap chúen wóón piin?

13-14. Met a lamot án meinisin mi unuséch wóón fénúfan repwe pwári me mwen ar repwe tongeni eáni manaw esemuch?

¹³ A lamot sipwe chemeni pwe ikaamwo emén a unuséch, nge saminne a wewe ngeni an epwe eáni manaw esemuch. Ekieki pwóróusen Atam me Efa. Iir mi unuséch, nge a lamot repwe pwári ar álleasochis ngeni Jiowa Kot me mwen an epwe fang ngeniir manaw esemuch. Nge a elichippúng pún rese álleasochisi.​—Rom 5:12.

¹⁴ Epwe ifa nónnómun aramas wóón fénúfan me mwen muchúlóón ewe 1,000 ier? Meinisin repwe unuséch. Itá meinisin chókkana repwe peni án Kot nemenem tori feilfeiló? Are, ekkóch me leir resap tuppwél usun Atam me Efa, inaamwo ika ra unuséch? A lamot repwe pélú ekkena esin kapas eis, nge ifa usun?

15-16. (a) Ineet epwe suuk ngeni aramas meinisin ar repwe tongeni pwári ar tuppwél ngeni Jiowa? (b) Epwe met mwirilóón ewe sáingoon sóssót?

¹⁵ Satan epwe kalapus úkúkún 1,000 ier. Lón ena atun, esap tongeni otupu aramas. Iwe nge, lesópwólóón ewe 1,000 ier, Satan epwe musowu. Epwe achocho le sótun otupu aramas mi unuséch. Atun ena fansoun sóssót, epwe suuk ngeni aramas meinisin mi unuséch wóón fénúfan ar repwe pwári  ika ra enletin súféliti iten Kot we me peni an nemenem. (Pwär. 20:7-10) Minne ra féri lón ena fansoun epwe ina lóngólóngun án iter epwe makkeffóch lón ewe puken iten chón manaw.

¹⁶ Ewe Paipel a affata ngenikich pwe ekkóch aramas resap tuppwél usun Atam me Efa, me repwe ú ngeni án Jiowa nemenem. Met epwe fis ngeniir? Pwärätä 20:15 a erá: “Iö esap mak itan lon ewe puken iten chon manau a koturulong lon ewe nomun ekkei.” Ewer, chókkana mi ú ngeni Kot repwe ninniiló tori feilfeiló. Nge lape ngeni ekkewe aramas mi unuséch repwe pásini ena sáingoon sóssót. Lón ena fansoun, iter epwe makkeffóch lón ewe puken iten chón manaw.

17. Met emén chónláng a ereni Taniel an epwe fis lón ach ei fansoun? (Taniel 12:4, 8-10)

¹⁷ A mmen apwapwa ach ekieki met epwe fis lón fansoun mwach! Iwe nge, emén chónláng a pwal ereni Taniel ekkóch pwóróus mi aúchea usun ach ei fansoun, ewe “fansoun sopolan.” (Álleani Taniel 12:4, 8-10; 2 Tim. 3:1-5) Ena chónláng a ereni Taniel pwe án aramas weweiti ewe pwóróus mi enlet “epwe lapala.” Ewer, néún Kot kewe aramas  repwe weweéchúti ekkewe oesini lón makkeien Taniel we puk. Ena chónláng a pwal erá pwe lón ei fansoun “ekewe chon föföringau repwe föri mine a ngau. Esap wor eman leir epwe wewe.”

18. Met epwe fis ngeni ekkewe mi ngaw ekiseló chék?

¹⁸ Lón ach ei fansoun, usun itá nge ekkewe aramas mi ngaw rese angei kapwúngún ar féffér mi ngaw. (Mal. 3:14, 15) Nge ekiseló chék, Jesus epwe apwúngú chókkewe mi usun siike, me epwe áimuniir seni néún kewe aramas iir mi usun siip. (Mat. 25:31-33) Ekkewe mi ngaw resap kúna manaw mwirin ewe riáfféú mi lapalap, me resap manawsefál lón ewe ótót séfé. Esap mak iter lón ewe “puken achechem” Malakai 3:16 a fós usun.

19. Met a lamot ach sipwe féri lón ei fansoun, me pwata? (Malakai 3:16-18)

¹⁹ Iei ewe fansoun mi lamot ach sipwe ánnetatá pwe sise nóm lein ekkewe aramas mi ngaw. (Álleani Malakai 3:16-18.) Jiowa a emwichafengeni chókkewe a kér ngeniir “nei aramas,” weween chókkewe mi fókkun aúchea me ren. Sia fókkun mochen nóm leir.

20. Ifa án Jiowa we sáingoon pwon ngeni Taniel, me pwata ka mwétéresiti pwénútáán ena pwon?

²⁰ Sia nóm lón ei fansoun mi ammwétéres. Nge ekiseló chék epwe fis ekkewe mettóch mi kon fen lap seni ena. Sipwe kúna ninniilóón aramas mi ngaw me talóón minne mi ngaw meinisin. Mwirin, sipwe kúna pwénútáán án Jiowa ei pwon ngeni Taniel: “Kopwe . . . manausefälitä, pwe kopwe angei wisom lesopolan fansoun.” (Tan. 12:13) Ka mwétéresiti ewe rán atun Taniel me attongeach kewe repwe “manausefälitä”? Ika ewer, iwe kopwe fókkun achocho le akkamwéchú óm tuppwél ngeni Jiowa, me ka tongeni lúkúlúk pwe itom epwe makkeffóch lón néún Jiowa we puken iten chón manaw.