Iei alon Paulus lón 1 Korint 15:8: “Iwe, amüchülan a pwal pwä ngeniei, inamwo ika üa wewe ngeni eman aramas mi uputiu lon fansoun esap pwüng ngeni.” Me lóóm, sia erá pwe Paulus a fós usun minne a fis ngeni atun a kúna Jesus lón lingan lón láng. An kúna Jesus lón lingan lón láng, usun itá Kot a efeiéchú ren an uputiw are manawsefál lón ngún, nge úrúrún ena sókkun manawsefál itá esap mwo fis lón ena fansoun nge epwap fis fite fitepúkú ier mwirin. Iwe nge, mwirin án ach we mwicheich káéfichi ei wokisin, ra kúna pwe a lamot an epwe wor ekkesiwil lón áweween ei wokisin.

Pwúngún pwe lón ena wokisin Paulus a fós usun ewe atun a wiliti emén Chón Kraist. Nge met weween alon na lupwen a erá “üa wewe ngeni eman aramas mi uputiu lon fansoun esap pwüng ngeni”? Ikeei met a tongeni wewe ngeni:

An wiliti emén Chón Kraist a mwittir me arúkééi. Fán chómmóng, a kan ámáirú án emén oupwatiw emén ménúkol nge esaamwo tori maraman. Atun Saul (ewe a iteni Paulus mwirin) a sái ngeni Tamaskus a ekiekin eriáfféú ekkewe Chón Kraist ikena ie, nge ese fen tepereni pwe epwe kúna Jesus ewe mi manawsefál lón eú lángipwi. Esap chék Paulus a máirú ren an wiliti emén Chón Kraist, nge pwal ekkewe ekkóch Chón Kraist, chókkewe a ekiekin eriáfféúr lón ena telinimw. Pwal och, minne a fis ngeni a pwal áweires pún a chunuló mesan ren ekis fansoun.​—Föf. 9:1-9, 17-19.

A wiliti emén Chón Kraist lón “fansoun esap pwüng ngeni.” Iei afféún ena wokisin me ren ewe Jerusalem Bible: “Usun itá ese wor emén a ekieki pwe ngang upwe uputiw.” Atun Paulus a wiliti emén Chón Kraist, Jesus a fen liwinsefálitá láng. Iwe, ese kúna Jesus atun a manawsefál me mwen an feitá láng. Nge chókkewe Paulus a fós usur lón ekkewe wokisin mwen wokisin 8, iir mi fen kúna Jesus. (1 Kor. 15:4-8) Án Jesus pwá ngeni Paulus lón eú lángipwi a atufichi Paulus an epwe kúna Jesus mwirin an manawsefál, inaamwo ika usun itá nge ina ewe “fansoun esap pwüng ngeni.”

A fós usun pwisin i fán tipetekison. Me ren ekkóch soukáé, ewe itiitin kapas Paulus a néúnéú lón ena wokisin usun a nikinikin etipetekisonatiw pwisin i. Ika ina met Paulus a ekieki lupwen a makkeei ena wokisin, iwe a affata pwe me ren ese fich ngeni an epwe emén aposel. Ren enletin, Paulus a pwal sópweló le apasa: “Pun ngang üa kis seni ekewe soukünö meinisin, esap fich ngeniei ai üpwe iteni eman soukünö, pun üa ariaföüü chon ewe mwichefelin Kot. Nge ren än Kot ümöümöch üa wilila o wiliti eman soukünö.”​—1 Kor. 15:9, 10.

Ina minne, eli Paulus a fós usun ámáirúún án Jesus pwá ngeni, are an wiliti emén Chón Kraist lón fansoun usun itá ese pwúng me ren, are an meefi pwe ese fich ngeni an epwe kúna eú lángipwi mi amwarar. Ese lifilifil met wesewesen weween alon Paulus na, nge a ffat pwe a aúcheani minne a fis ngeni. A ánnetatá pwe Jesus a wesewesen manawsefál seni máló. Ina popun, sise máirú ren án Paulus fós usun fán chómmóng minne a fis ngeni atun a afalafal usun án Jesus manawsefál.​—Föf. 22:6-11; 26:13-18.