1. Ifa ewe weires Joas, Usaia, me Josaia ra kúna?

 ANCHANGEI pwe ka wiliiti kingen néún Kot kewe aramas atun ka chék kúkkún are sáráfé! Ifa ussun kopwe áeá óm manaman me nemenem? Ewe Paipel a pwóróus ussun ekkóch kúkkún me sáráfé ra wiliiti kingen Juta. Áwewe chék, Joas a chék 7 ierin, Usaia a 16, me Josaia a 8. Ekieki weiresiir! Inaamwo iká ese mecheres ngeniir, nge Jiowa me ekkewe ekkóch ra álisiir le féri chómmóng mettóch mi múrinné.

2. Pwata a múrinné ach sipwe káéfichi pwóróusen Joas, Usaia, me Josaia?

² Esap kich king iká kiwin, nge sia tongeni káé chómmóng seni pwóróusen ekkena úlúmén king lón Paipel. Ra eáni kefil mi múrinné, nge ra pwal kefilingaw. Seni pwóróuseer sipwele káé lamoten ach sipwe kefiléch chiechiach, sipwe chék tittipetekison, me akkachocho le ririéch ngeni Jiowa.

3. Ifa ussun King Joas a álleasochisi án ewe Souasor mi Lapalap Jehoiata emmwen?

³ Áppirú án Joas eáni kefil mi múrinné. Atun King Joas a chúen kúkkún, a féri eú kefil mi múrinné. Pokiten ese chúen wor seman, a álleasochisi án ewe Souasor mi Lapalap Jehoiata emmwen. Ena souasor a emmweni Joas ussun itá nge pwisin néún. Iwe, Joas a filaatá le angang ngeni Jiowa me álisi aramas ar repwe pwal fel ngeni. A pwal mwo nge akkóta fférsefálin án Jiowa we imwenfel.—2 Kron. 24:​1, 2, 4, 13, 14.

4. Ifa ussun sia feiéch ren ach álleasochisi án Jiowa kewe allúk? (Än Salomon Fos 2:​1, 10-12)

⁴ A eú liffang mi aúchea iká emén a fen ákkáiti ngonuk óm kopwe tongei Jiowa me álleasochisi an kewe allúk. (Álleani Än Salomon Fos 2:​1, 10-12.) A chómmóng alen án ekkewe  sam me in ra tongeni asukula néúr kewe. Áwewe chék ren Katya, seman we a kan álisi le eáni kefil mi múrinné. Iteiten rán atun seman na a uwei ngeni sukul, a pwóróus ngeni wóón ewe lesenin rán. Katya a erá: “Ekkena esin pwóppwóróusfengen a álisiei le féri minne mi pwúng atun a ppiitá osukosuk lón ena rán.” Nge met iká án semom kewe me inom allúk mi lóngólóng wóón Paipel ussun itá a eppetuk le féri met ka mochen? Met a tongeni álisuk le etiwa ar kana emmwen? Emén Chón Kraist fefin itan Anastasia a chemeni án seman kewe me inan awora fansoun le áwewe ngeni popun ra féri ekkóch allúk. A erá: “Ena mettóch a álisiei le weweiti pwe rese féri ekkena allúk ar repwe nemeniei, nge fen minen túmún ngeniei pwe ra tongeei.”

5. Epwe ifa meefien Jiowa me semom kewe inom ren minne ka filaatá le féri? (Än Salomon Fos 22:6; 23:​15, 24, 25)

⁵ Atun ka apwénúetá ekkewe kapasen emmwen seni Paipel, kopwe apwapwaai semom kewe me inom. Nge lap seni meinisin, kopwe apwapwaai Jiowa me óm riri ngeni epwe péchékkúleló. (Álleani Än Salomon Fos 22:6; 23:​15, 24, 25.) Ikkena ekkewe popun mi éch óm kopwe áppirú án Joas leenien áppirú atun a chúen kúkkún.

6. Án ié emmwen Joas a poputá le aúselinga, me met mwirilóón? (2 Kronika 24:​17, 18)

⁶ Káé seni án Joas kefilingaw. Mwirin málóón Jehoiata, Joas a filaatá le chiechi ngeni aramas mi ngaw. (Álleani 2 Kronika 24:​17, 18.) A filaatá le aúselinga ekkewe samolun Juta chókkewe rese tongei Jiowa. Ese mwáál kopwe tipeeú ngeni pwe Joas itá epwe ttii seni ekkena aramas mi ngaw. (SalF. 1:10) Iwe nge, a fen aúseling ngeni ar emmwen mi ngaw. Pwal mwo nge atun tettelin pwiin we itan Sekaraia a sótun áwena, i a fen efisi ninniilóón. (2 Kron. 24:​20, 21; Mat. 23:35) A ifa me watteen kirikiringawan! Me akkomwan, Joas emén king mi túppwél, nge a eletipechou pwe a wiliiti emén chón rikiló me chón nimanaw. Iwe mwirin, néún kewe chón angang ra pwisin nieló. (2 Kron. 24:​22-25) Epwele ifa me échún manawan iká a sópweeló le aúselinga Jiowa me chókkewe ra tongei Jiowa! Ifa ewe lesen ka káé seni ei pwóróus?

7. Itá ié kewe kopwe filiir pwe chiechiom? (Pwal ppii ewe sasing.)

⁷ Pwóróusen án Joas kefilingaw a áiti ngenikich lamoten ach sipwe fili ekkewe sókkun chiechi repwe álisikich, chókkewe iir mi tongei Jiowa me mochen apwapwaai. Sia tongeni chiechi ngeni chókkewe mi watte ieriir  senikich are fen kúkkún senikich. Chemeni pwe a mmen watte sókkofesenin ierin Joas me chiechian we Jehoiata. Atun ka filaatá chiechiom, kopwe pwisin eisinuk: ‘Chiechiei kewe ra álisiei le apéchékkúla ái lúkú Jiowa? Ra álisiei le apwénúetá án Kot kewe allúk? Ra fós ussun Jiowa me met ra káé seni Paipel? Ra súféliti án Kot kewe allúk? Ra ereniei met chék úa mochen rongorong are ra pwal pwora le áwenaei atun úa mwáálliló?’ (SalF. 27:​5, 6, 17) Ren enletin, chiechiom kewe rese tongei Jiowa resap tongeni álisuk. Nge iká a wor chiechiom iir mi tongei Jiowa, iwe kopwe fitipacheer pún ra fókkun tongeni álisuk!—SalF. 13:20.

8. Met a lamot sipwe ekieki iká sia áeá social media?

⁸ A éch ach áeá social media wóón Internet ren ach sipwe chiechi ngeni chón ach famili me chiechiach kewe. Iwe nge, chómmóng aramas ra áeá social media pwe minen eingeing, ren ar post sasingiir me videon met ra mééni are met ra féri. Iká ka áeá sócial media, pwisin eisinuk: ‘Itá úa áeá social media ren án aramas repwe ingeitiei? Úa mochen apéchékkúla ekkewe ekkóch are fen pwisin átekiaeitá? Úa mut ngeni ekkewe aramas wóón social media ar repwe angawaaló ái fós, ái ekiek, me féfféri?’ Pwiich Nathan Knorr, chón ewe Mwichen Soupwúngúpwúng me lóóm, a awora ei kapasen fén: “Kosap kon ekieki óm kopwe apwapwaai aramas pún mwirilóón kese apwapwaai emén. Nge kopwe fen apwapwaai Jiowa, iwe mwirilóón kopwe apwapwaai chókkewe mi tongei.”

9. Met Jiowa a álisi Usaia le féri? (2 Kronika 26:​1-5)

⁹ Áppirú án Usaia eáni kefil mi múrinné. King Usaia emén mi tipetekison lesáráféén. A káé an epwe “niuokusiti Kot.” A manaw lón úkúúkún 68 ier, nge lape ngeni ránin manawan Jiowa a efeiéchú. (Álleani 2 Kronika 26:​1-5.) Usaia a okkufu chómmóng chón koputer kewe me a féri pwe Jerusalem epwe fókkun túmún. (2 Kron. 26:​6-15) Ese mwáál Usaia a pwapwa ren meinisin met Kot a álisi le féri.—SalAf. 3:​12, 13.

10. Met a fis ngeni Usaia?

¹⁰ Káé seni án Usaia kefilingaw. King Usaia a fen éérenaaló án aramas álleasochisi minne a apasa. Itá ena mettóch a efisi an epwe ekieki pwe a tongeni féri met chék a mochen? Iwe, eú rán Usaia a filaatá an epwe tolong lón án Jiowa we imwenfel, me a lamalamtekia ren an féri eú mettóch ese mumu ngeni ekkewe king ar repwe féri, ina an keni appach mi pwokkus wóón ewe róngen asor. (2 Kron. 26:​16-18) Ewe Souasor mi Lapalap Asaria a sótun áwena, nge a fen fókkun song. Mi elichippúng pún Usaia ese amwéchú an túppwél ngeni Jiowa me a kúna kapwúng ren an úri rupun pwétúr. (2 Kron. 26:​19-21) Epwele ifa me múrinnéén manawan iká a chék tittipetekison!

11. Met a tongeni álisikich ach sipwe chék tittipetekison? (Pwal ppii ewe sasing.)

¹¹ Atun a watteeló án Usaia manaman, a ménúki pwe a pop seni Jiowa wéún me an manaman. Ifa ewe lesen? Sipwe pwisin ákkáchema ngenikich pwe feiéchúch kewe meinisin ra pop seni Jiowa. Ese wor popun sipwe eingeing wóón minne sia fen féri, nge itá sipwe chék elingaaló Jiowa ewe a atufichikich le féri ekkena mettóch. b (1 Kor. 4:7) Mi lamot sipwe tipetekison le mirititi pwe sise unuséch me a lamot ngenikich emirit. Iei met emén pwiich ina epwe 60 ierin a makkeei: “Úa káé  ái úsapw lichippúng are song iká aramas ra eppiietá och mettóch úa mwáálliló wóón. Fán ekkóch iká úa mwáálliló me kúna kapwúng, úa chék achocho le pwáátásefál me akkachocho sefál.” Ren enletin iká sia niwokkusiti Jiowa me chék tittipetekison, iwe sipwe wesen pwapwa.—SalF. 22:4.

12. Ifa ussun Josaia a kútta Jiowa lesáráféén? (2 Kronika 34:​1-3)

¹² Áppirú án Josaia eáni kefil mi múrinné. Josaia a emén teenage lupwen a poputá le kútta Jiowa. A mochen silei ussun Jiowa me féri letipan. Iwe nge, ese mecheres manawen ei king mi chék kúkkún. A lamot epwe penaatá ewe fel mi enlet lón ewe atun fel ngeni kot chofona a chéúfetál. Nge ina met Josaia a féri! Mwen an 20 ierin, a fen poputá le amóeló fel ngeni kot chofona me lón ewe fénú.—Álleani 2 Kronika 34:​1-3.

13. Met weween me reom óm fangoló manawom ngeni Jiowa?

¹³ Ikáámwo en mi chék kúkkún, ka tongeni filaatá le áppirú Josaia ren óm kútta Jiowa me káé napanapan kewe mi echipwér. Ena mettóch epwe amwékútuk le fangoló manawom ngeni. Ifa ussun óm fangoló manawom epwe pwá lón manawom iteiten rán? Iei alon Luke, emén a papatais atun a 14 ierin: “Seni ei atun, úpwe akkakkomwa ái angang ngeni Jiowa lón manawei, me achocho le apwapwaai.” (Mark. 12:30) A ifa me watteen feiéchum iká a pwal ina tipom!

14. Apwóróusa ifa ussun ekkóch sáráfé ra áppirú King Josaia.

¹⁴ Ikkefa ekkewe weires ekkewe chón angang ngeni Jiowa iir mi chék kúkkún ra tongeni kúna? Johan, emén mi papatais atun a 12 ierin a apwóróusa án chienan kewe chón sukul ekkechchimwa an epwe sótuni vaping. Ren án Johan epwe péchékkúl le pépéén seni vaping, a ákkáchema ngeni pwisin pwe ena mettóch a tongeni efeiengawa inisin me atai an riri ngeni Jiowa. Rachel, emén mi papatais atun a 14 ierin, a apwóróusa met a álisi le likiitú fán ekkewe weires a kúkkúna lón sukul. A erá: “Úa sótun kútta och mettóch úa káé lón sukul epwe áchchema ngeniei ussun ewe Paipel me Jiowa. Áwewe chék, ái lesen ussun uruwoon aramas epwe áchchema  ngeniei eú pwóróus are oesini seni Paipel. Are ái pwóróusfengen me chienei kewe a tongeni áchchema ngeniei eú wokisin mi álilliséch úa tongeni áiti ngeni emén.” Ekkewe weires ka kúna eli epwe sókko seni met King Josaia a kúna, nge ka pwal tongeni pwáári óm túppwél me mirit ussun chék i. Óm likiitú fán sóssót me lekúkkúnum are lesáráféóm epwe ammólnaketá le pworacho ngeni ekkewe weires kopwe kúna lón mwach.

15. Met a álisi Josaia an epwe angang ngeni Jiowa fán túppwél? (2 Kronika 34:​14, 18-21)

¹⁵ Lupwen a 26 ierin King Josaia, a poputááni angangen fférsefálin ewe imwenfel. Atun ra féri ena angang, ra kúna “ewe puken allük än ewe Samol mi Lapalap, ekewe allük Kot a ngeni Moses.” Atun ewe king a rongorong minne ena puk a apasa, a mwittir féri ekkesiwil pwe epwe apwénúetá minne a mak lón. (Álleani 2 Kronika 34:​14, 18-21.) Ka mochen álleani Paipel iteitan? Nge iká ka fen féfféri ena, iwe ka sani óm ákkállea? Ka kan makkeei are chechchemeni ekkewe wokisin epwe tongeni álisuk lón pwisin manawom? Luke, ewe sia fen pwóróusan me mwan, a kan makkeetiw lón néún puk ekkewe pwóróus a sani. Óm lúkú óm pwal féri ena epwe álisuk le chechchemeni ekkewe pwóróus are ekkewe wokisin ka sani? Lapólóón óm sile me aúcheani ewe Paipel, pwal ina lapólóón óm mochen angang ngeni Jiowa. Epwe pwal achchúngú letipom óm kopwe apwénúetá án Kot we Kapas, ussun chék King Josaia.

16. Ifa ewe féffér mi mwáál Josaia a féri, me ifa ewe lesen fán itach?

¹⁶ Káé seni án Josaia kefilingaw. Atun a ina epwe 39 ierin Josaia, a féri och mettóch mi mwáál mi eselipa málóón. A lúkúlúk wóón pwisin i nge ese fen tingor án Jiowa emmwen. (2 Kron. 35:​20-25) Iei ewe lesen sia tongeni káé seni. Ese lifilifil úkúúkún ierich are úkúúkún ttamen ach sia fen kákkáé ewe Paipel, nge a lamot sipwe chék kúkkútta Jiowa. A wewe ngeni ach sipwe tittingorei  lón iótek an epwe emmwenikich, kákkáé an we Kapas, me akkaúseling ngeni án ekkewe Chón Kraist mi ásimaw kapasen fén. Iká ina, epwe túmúnúkich seni ach féri féffér mi mwáál, me epwe lapóló ach pwapwa.—Jas. 1:25.

17. Met sia tongeni apasa ussun pwóróusen ekkewe úlúmén kingen Juta?

¹⁷ Ka tongeni féri chómmóng mettóch mi amwarar lekúkkúnum are lesáráféóm. Pwóróusen Joas, Usaia, me Josaia a áiti ngenikich pwe ekkewe kúkkún me sáráfé ra tongeni eáni kefil mi múrinné me apwapwaai Jiowa lón manawer. Pwúngún ekkena king ra pwal mwáálliló me a atoto ngeniir feiengaw. Nge sia tongeni áppirú ar kewe féffér mi múrinné me túmúnú ach sisap áppirú ar kewe féffér mi mwáál. Iwe, sia tongeni eáni ewe sókkun manaw mi pwapwa.

18. Pwóróusen ié kewe seni Paipel mi áiti ngonuk pwe ka tongeni eáni eú manaw mi pwapwa? (Pwal ppii ewe sasing.)

¹⁸ Ewe Paipel a masou ren pwóróusen ekkewe kúkkún me sáráfé iir mi riri ngeni Jiowa, apwapwaai, me eáni eú sókkun manaw mi pwapwa. Tafit emén me leir. Atun a chúen kúkkún a filaatá le chiechi ngeni Kot nge mwirin a wiliiti emén king mi túppwél. Pwúngún pwe fán ekkóch a mwáálliló nge me ren Kot i emén mi túppwél. (1 King 3:6; 9:​4, 5; 14:8) Iká ka káé pwóróusen manawen Tafit, an leenien áppirú a tongeni apéchékkúlok le angang ngeni Kot fán túppwél. Are ka tongeni káéfichi pwóróusen Mark are Timoty. Ra poputá le angang ngeni Jiowa lesáráféér me apwapwaai Kot lón unusen manawer, me ra eáni ewe sókkun manaw mi pwapwa.

19. Met sókkun manaw ka tongeni eáni?

¹⁹ Ewe sókkun manaw kopwe eáni lón fansoun mwach epwe lóngólóng wóón ifa ussun ka áeá manawom iei. Iká ka lúkúlúk wóón Jiowa nge esap wóón pwisin óm sile, i epwe álisuk le eáni ekkewe kefil mi múrinné. (SalF. 20:24) Ka tongeni eáni eú sókkun manaw mi pwapwa. Chemeni pwe Jiowa a aúcheani minne ka féri fán itan. Ese pwal wor och mettóch mi fókkun múrinné me lúkún ach áeá manawach le angang ngeni Jiowa, Semach we mi tong.