1. Me mwen án aposel Piter epwele máló, met Kot a amwékútú an epwe féri?

 EWE aposel Piter a angang ngeni Jiowa fán túppwél ren fite fite ier. A fiti Jises le afalafalfetál, a poputááni ewe angangen afalafal lein ekkewe aramas esap iir chón Jus, me mwirin och fansoun a chóni ewe mwichen soupwúngúpwúng. Lesópwólóón manawan, atun a silei pwe epwele muchúló, Jiowa a ngeni pwal ekkóch angang epwe féri. Ina epwe lón ekkewe ier 62 ngeni 64, Jiowa a néúnéú i le makkeei ekkewe ruu puk lón Paipel, ewe puken 1 me 2 Petrus. A ápilúkúlúk pwe met a makkeei lón néún kana taropwe epwe álisi ekkewe Chón Kraist mwirin an máló.—2 Pet. 1:​12-15.

2. Pwata a seréch néún Piter kewe taropwe a makkeei?

² Piter a makkeei néún kewe taropwe lón ewe atun chienan kewe chón lúkú ra kúna “chomong sokun sosot.” (1 Pet. 1:6) Ekkewe aramas mi ngaw ra sótun atolonga lón ewe mwichefelin Chón Kraist afalafal chofona me féffér mi limengaw. (2 Pet. 2:​1, 2, 14) Ekiseló chék, ekkewe Chón Kraist lón Jerusalem repwe kúna “sopolan mettoch meinisin,” weween talóón ena telinimw me ewe imwenfel lón ren ekkewe soufiun Rom. (1 Pet. 4:7) Ese wor tipemwárámwár pwe néún Piter kewe taropwe ra álisi ekkewe Chón Kraist le silei met repwe féri pwe repwe tongeni likiitú fán ekkewe sóssót ra kúna me mmólnetá ngeni ekkewe epwe pwal toriir. b

3. Pwata a lamot ach sipwe káéfichi néún Piter kewe taropwe?

³ Inaamwo iká néún Piter kana taropwe a áwenewen ngeni ekkewe Chón Kraist mi manaw lón an we fansoun, nge Jiowa  a pwal apacherelong lón an we Kapas. Ina minne, kich sia tongeni kúna feiéch seni ekkena taropwe. (Rom 15:4) Ussun chék ekkena Chón Kraist, sia pwal manaw lón ei ótót mi apéchékkúla féffér mi limengaw, sia pwal kúkkúna sóssót mi áweiresi ach sipwe angang ngeni Jiowa. Pwal och, ekiseló chék epwe torikich eú riáfféú mi watte lap seni met ekkewe chón Jus ra kúna atun talóón Jerusalem me ewe imwenfel lón. Sia kúna ekkóch kapasen áchechchem mi aúchea me lón néún Piter kewe ruu taropwe. Ra tongeni álisikich le mmólnetá ngeni sópwólóón ei ótót, pworacho ngeni ach niwokkusiti aramas, me alapaaló ach fókkun tongfengen lefilach. Ekkena esin kapasen áchechchem ra pwal tongeni álisi ekkewe mwán mi ásimaw le silei ifa ussun repwe álisi chiener kewe lón ewe mwichefel ar repwe péchékkúl lón pekin ngún.

4. Me ren 2 Petrus 3:​3, 4, met a tongeni apwangapwangaaló ach lúkú?

⁴ Kich sia nóm lein aramas rese lúkú ekkewe oesini lón Paipel. Ekkewe chón ú ngenikich neman repwe esiitakich ren ach witiwiti warotoon ewe sópwólóón ren fite fite ier. Ekkóch aramas ra apasa pwe esap fókkun war. (Álleani 2 Petrus 3:​3, 4.) Iká sia rong ekkena esin pwóróus seni emén sia afalafal ngeni, emén chienach chón angang, are emén chón ach famili, a tongeni apwangapwangaaló ach lúkú. Piter a áweweei met a tongeni álisikich.

5. Met epwe álisikich le mosonottam le witiwiti muchúlóón ei ótót? (2 Petrus 3:​8, 9)

⁵ Ussun itá me ren ekkóch pwe Jiowa a mmang le amóeló ei ótót mi ngaw. Minne Piter a apasa a tongeni álisikich le witiwit fán mosonottam, pún a áchchema ngenikich pwe án Jiowa ekiek ussun fansoun a fókkun sókkóló seni án aramas ekiek. (Álleani 2 Petrus 3:​8, 9.) Me ren Jiowa, engeréú ier a wewe ngeni eú rán. I a mosonottam, ese mochen án emén epwe péútmwááliló. Nge atun epwe war ránin we, ei ótót epwe muchúló. A ifa me feiéchúch ren ach áeá ei lusun fansoun le afalafal ngeni aramas wóón unusen fénúfan.

6. Ifa ussun sipwe “witiwiti” are ekipwichi warotoon ránin Jiowa we? (2 Petrus 3:​11, 12)

⁶ Piter a pesekich ach sipwe “witiwiti” are ekipwichi warotoon ránin Jiowa we. (Álleani 2 Petrus 3:​11, 12.) Ifa ussun? Iteiten rán, sia tongeni ekieki úkúúkún múrinnéén manawach lón ewe ótót séfé. Anchangei óm ngaseri ewe ásepwál mi limeliméch, mwéngé ekkewe mwéngé mi vitamin, etiwa aramasach kewe atun ra manawsefál, me asukula ngeni chókkewe mi manaw fitengeréú ier lóóm pwénútáán ekkewe oesini. Lupwen ka ekieki ussun ekkena mettóch, epwe álisuk le mwétéres le witiwiti warotoon ena fansoun me lúkúlúk pwe a arapoto muchúlóón ei ótót. Pokiten sia “fen silei” met epwe fis lón mwachkkan, iwe sisap “tokola ren” ekkewe sense chofona.—2 Pet. 3:17.

7. Met a tongeni fis iká sia niwokkusiti aramas?

⁷ Pokiten sia silei pwe ránin Jiowa we epwele waroto ekiseló chék, sia mochen achocho úkúúkún ach tufich le áiti ngeni aramas ewe kapas allim. Nge fán ekkóch eli sipwe pireir le féri ena. Pwata? Pún sia niwokkus ren met aramas repwe ekieki ussuch me féri ngenikich. Ina met a pwal fis ngeni Piter. Lón ewe pwinin Jises a kúna kapwúng, Piter a niwokkus le apasa pwe i emén me lein néún kewe chón káé me fán fite a amam pwe ese  sissilei i. (Mat. 26:​69-75) Iwe nge, Piter a pworacho ngeni an na niwokkus me fán an lúkúlúk, iei met a makkeei mwirin: “Ousap niuokusiti aramas, ousap öürek.” (1 Pet. 3:14) Minne a apasa, a alúkúlúkú ngenikich pwe sia tongeni pworacho ngeni ach niwokkusiti aramas.  

8. Met a tongeni álisikich le pworacho ngeni ach niwokkusiti aramas? (1 Petrus 3:15)

⁸ Met a tongeni álisikich ach sipwe pworacho ngeni ach niwokkusiti aramas? Iei met Piter a apasa ngenikich: “Oupwe meniniti Kraist lon lelukemi.” (Álleani 1 Petrus 3:15.) A kapachelong ach sipwe ekilonei wisen ach we Samol me King Kraist Jises, me úkúúkún an manaman. Iká ka pireir are niwokkus atun a suuk ngonuk óm kopwe áiti ngeni emén ewe kapas allim, chechchemeni ach na King. Anchangei pwe a nemenem lón láng nge fite million chónláng ra rokopwálieló. Chemeni pwe a nóm ren “nemenem meinisin won läng me fanüfan,” me i epwe etuk “fansoun meinisin tori lesopolan fanüfan.” (Mat. 28:​18-20) Piter a pesei ngenikich ach sipwe “molotä fansoun meinisin” le penaatá ach lúkú. Ka sani le afalafal ngeni emén me lón óm leenien angang, sukul, are lón pwal eú leeni? Ekieki me mwan ineet ka tongeni féri ena, mwirin ammólnatá met kopwe apasa. Tingorei Jiowa an epwe fang ngonuk pwora, me lúkúlúk pwe i epwe álisuk le pworacho ngeni óm niwokkusiti aramas.—Föf. 4:29.

9. Lón eú atun, ifa ewe popun Piter ese pwáári tong? (Pwal ppii ewe sasing.)

⁹ Piter a káé ifa ussun epwe pwáári tong. A nóm lón ewe atun Jises a erá: “Üpwe ngenikemi eu allük mi fö: Oupwe echenifengenikemi lefilemi. Usun ngang üa echenikemi, iei usun pwal ämi oupwe echenifengenikemi.” (Joh. 13:34) Ikáámwo Piter a rong ena, nge mwirin och fansoun ese chúen mwéngé ren chienan kewe Chón Kraist esap iir chón Jus pokiten a niwokkusiti ekkewe Chón Kraist chón Jus. Ewe aposel Paul a erá pwe minne Piter a féri ina eú angangen “likatuputup.” (Kal. 2:​11-14) Piter a etiwa án Paul kapasen apwúng ngeni me a káé seni. Lón iir me ruu néún kewe taropwe, a erá pwe sisap chék meefi ach tongei pwiich kewe, nge sipwe pwal pwáári lón féffér.

10. Met epwe álisikich le pwáári “tong enlet” ngeni chiechiach kewe Chón Kraist? (1 Petrus 1:22)

¹⁰ Piter a apasa pwe sipwe pwáári “tong enlet” ngeni chiechiach kewe Chón Kraist. (Álleani 1 Petrus 1:22.) Sia tongeni féri ena iká sipwe “aleasochisi mine a let.” A kapachelong lón ena enlet ewe asukul pwe “Kot esap lifilifil aramas.” (Föf. 10:​34, 35) Sise tongeni álleasochisi án Jises na allúk ussun tong iká sia pwáári pwe sia chék tongei ekkóch chón ewe mwichefel nge esap meinisin. Ewer, eli a wor ekkóch sia kon pacheéch ngeniir lap seni ekkewe pwal ekkóch. A pwal ina ussun Jises. (Joh. 13:23; 20:2) Nge Piter a áchchema ngenikich ach sipwe achocho le tongei meinisin pwiich kewe pún iir chón lón ach we famili.—1 Pet. 2:17.

11. Met weween ach sipwe tongei ekkewe ekkóch seni ‘unusen lelukach’?

¹¹ Piter a pesekich ach sipwe ‘wesewesen echenifengenikich ren unusen lelukach.’ Ena itiitin kapas ‘wesewesen echenifengenikich,’ a wewe ngeni ach sipwe tongei emén inaamwo iká a weires ach sipwe tongei. Áwewe chék, met sipwe féri iká emén chienach Chón Kraist a asongakich are ámeteki letipach? Eli lepoputáán sia mochen eliwini ngeni met a féri ngenikich lap seni ach pwáári ach tongei. Iwe nge, Piter a káé seni Jises pwe Kot ese pwapwa ren ach liiwini ngeni emén liwinin an féffér ngenikich. (Joh. 18:​10, 11) Piter a makkeei: “Ousap liwini ngau ngeni ngau are ottek ngeni ottek, nge oupwe afeiöchüür.” (1 Pet. 3:9) Kopwe mut ngeni tong an epwe amwékútuk le pwáári kirekiréch ngeni pwal mwo nge chókkewe mi ámeteki letipom.

12. (a) Met tong epwe pwal álisikich le féri? (b) Met ka mochen achocho le féri ussun met a pwá me lón ei video Preserve the Precious Gift of Unity?

¹² Lón néún Piter we áeúin taropwe, i a néúnéú ekkewe kapas “wesewesen echenifengenikemi.” Ena esin tong are chen a “pwölüela chomong tipis,” nge esap ekis chék. (1 Pet. 4:8) Ese mwáál, Piter a chemeni ewe lesen Jises a áiti ngeni fite ier a ló ussun omusaaló tipis. Lón ena atun, Piter a lúkú pwe i mi fókkun kirekiréch lupwen a apasa pwe epwe omusaaló tipisin pwiin we “tori fán fisu.” Nge Jises a áiti ngeni pwe epwe omusaaló “tori fán 77,” weween ese wor kaúkún, iwe i a pwal áiti ngenikich pwe sipwe pwal ina ussun. (Mat. 18:​21, 22, NW) Iká ka meefi pwe a weires ngonuk óm kopwe apwénúetá ena kapasen emmwen, kosap lichippúng. Meinisin néún Jiowa kewe aramas rese unuséch, ina popun fán ekkóch a weires ar repwe omusaaló tipis. Nge ewe mettóch mi kon aúchea, ina óm kopwe féri met ka tongeni féri le omusaaló tipisin chienom we me efisi kinamwe lefilemi. c

13. Met a tongeni áweiresi án ekkewe mwán mi ásimaw repwe túmúnú chón ewe mwichefel?

¹³ Piter ese fókkun ménúkaaló minne Jises a ereni mwirin an we a manawsefál: “Kopwe tümwünü nei kewe sip.” (Joh. 21:16) Iká en emén mwán mi ásimaw, ka silei pwe ena kapasen emmwen a pwal weneituk. Iwe nge, a tongeni weires ngeni emén mwán mi ásimaw an epwe awora fansoun le apwénúetá ena wis mi aúchea. Ekkewe mwán mi ásimaw repwe akkomwa túmúnún ar kewe famili lón pekin áion, memmeef, me pekin ngún. Ra pwal wisen emmweni ewe angangen afalafal me pwal ammólnatá me eáni ekkewe kinikin lón mwiich me mwichelap. Ekkóch leir ra pwal chóni ewe Hospital Liaison Committees are ewe Local Design/Construction Department. A fókkun chómmóng án ekkewe mwán mi ásimaw angang!

14. Met a tongeni amwékútú ekkewe mwán mi ásimaw ar repwe túmúnú ekkewe siip? (1 Petrus 5:​1-4)

¹⁴ Piter a pesei chienan kewe mwán mi ásimaw ar repwe túmúnú néún Kot mwichen siip. (Álleani 1 Petrus 5:​1-4.) Iká en emén mwán mi ásimaw, áúa silei pwe ka tongei chienom kewe Chón Kraist me ka mochen túmúnúúr. Iwe nge, fán ekkóch eli ka meefi pwe ka tawengaw are fókkun mélúlú ina popun kese tongeni apwénúetá ena wis. Met ka tongeni féri? Iinaawu ngeni Jiowa met ka aúreki. Piter a makkeei: “Are eman a alisi aramas, epwe alilis lon ükükün an pöchökül Kot a ngeni.” (1 Pet. 4:11) Eli chienom kewe Chón Kraist ra pwal kúna ewe esin weires ese fókkun tongeni pwák lón ei ótót. Nge chemeni pwe Jises Kraist, “ewe Meilapen Chonmas,” a tongeni álisiir lap seni met ka tongeni féri. I a tongeni álisiir lón ei fansoun me pwal lón ewe fénúfan séfé. Kot a ereni ekkewe mwán mi ásimaw ar repwe tongei chiener kewe Chón Kraist, túmúnúúr, me isettiw “eu lenien apirü” ngeniir.

15. Ifa ussun emén mwán mi ásimaw a túmúnú chón ewe mwichefel? (Pwal ppii ewe sasing.)

¹⁵ Emén mwán mi ásimaw ren fansoun langattam itan William, a weweiti lamoten ewe angangen túmúnú chón ewe mwichefel. Atun a poputá ewe COVID-19 pandemic, i me chienan kewe mwán mi ásimaw ra achocho le pwóróus ngeni emén me emén chókkewe lón ar kewe kúmi iteiten wiik. A áweweei ewe popun, a apasa: “Chómmóng me lein chienach kewe Chón Kraist ra chék áláemén lón imwer, me ra tongeni mwittir eáni ekiek ese pwúng.”  Atun emén Chón Kraist a nóm lón osukosuk, William a aúselingéch ngeni pwe epwe silei met a osupwangan me met a eáni aúrek. Mwirin a kútta ekkewe puk me video wóón ach we website epwe tongeni néúnéú le apéchékkúla ena emén. A apasa: “A fókkun lamot ewe angangen túmún lón ei fansoun lap seni me mwan. Kich sia achocho le álisi aramas le káé ussun Jiowa, iwe a lamot ach sipwe pwal achocho le túmúnú chienach kewe Chón Kraist pwe repwe chék nónnóm lón ewe enlet.”

16. Ifa ussun sia tongeni apwénúetá ekkewe lesen sia káé seni néún Piter kewe taropwe?

¹⁶ Sia fen káé ekkóch chék lesen seni néún Piter kewe ruu taropwe. Eli ka kúna ekkóch mettóch ka mochen achocho le émúrinnéló. Áwewe chék, ka mochen alapaaló óm fansoun le ekilonei ekkewe feiéch kopwele kúna lón ewe ótót séfé? Ka fen akkóta óm kopwe afalafal lón óm leenien angang, lón sukul, are lón pwal ekkóch leeni? Ka kúna ekkóch alen óm kopwe unusen pwáári óm wesewesen tongei chienom kewe Chón Kraist? Ámi kana mwán mi ásimaw, oua úppós le túmúnú néún Jiowa kewe siip seni unusen letipemi? Óm etittinok fán wenechar a tongeni pwáári pwe mi wor ekkóch óm apwangapwang, nge kosap lichippúng. “Ewe Samol [Jises] a kirikiröch,” me i epwe álisuk. (1 Pet. 2:3) Piter a alúkúlúkúkich, a apasa: “Kot . . . epwe aunusaaló ámi káit. Epwe apposakemi, apéchékkúlakemi, me anúkúcharakemi.”—1 Pet. 5:​10, NW.

17. Met mwirilóón iká sipwe sópweeló le achocho me tipemecheres le angei káit me ren Jiowa?

¹⁷ Me mwan, Piter a meefi pwe ese fich ngeni an epwe nóm ren Jises. (Luk. 5:8) Nge ren án Jiowa me Jises álillis mi fiti tong, Piter a tapweló mwirin Kraist fán túppwél. Ina minne, Jiowa a mut ngeni Piter an epwe “tolong lon ewe Mwü esemüch än ach Samol me Chon Amanau Jesus Kraist.” (2 Pet. 1:11) A ifa me feiéchún! Iká ka pwal fókkun achocho ussun chék Piter me tipemecheres le angei káit me ren Jiowa, epwe pwal toruk ewe liffang, manaw esemuch. Kopwe kúna amanaw pokiten óm lúkú.—1 Pet. 1:9.