Úa uputiw lón ewe ier 1934. Semei kewe me inei ra ló seni Switzerland ngeni Timmins, eú leenien ttu féúchól fán pwúl lón Ontario, Canada. Ina epwe lón ewe ier 1939, inei we a poputá le álleani ewe Watchtower me fiti án Chón Pwáraatá Jiowa kewe mwiich. A kan uweikem me pwii kewe me fefinei wonomén. Ekiseló chék, inei we a wiliiti emén Chón Pwáraatá Jiowa.

Semei we ese pwapwa atun inei we a wiliiti emén Chón Pwáraatá, nge inei we a aúcheani ewe enlet me tipeppós le túppwél ngeni Jiowa. Inaamwo iká án ekkewe Chón Pwáraatá Jiowa angang a pinepin lón Canada lón ekkewe ier 1941 ngeni 1944, nge inei we a chék túttúppwél ngeni Jiowa. A kirekiréch me súféliti Semei we inaamwo iká a kan kapas péchékkúl ngeni. Án inei we leenien áppirú mi fókkun múrinné, a álisikem me pwii kewe me fefinei ám áúpwe pwal filaatá le angang ngeni Jiowa. Áúa fókkun pwapwa pwe mwirin ekis fansoun, a pwal ekis siwil napanapen semei we, me a poputá le pwáári kirekiréch ngenikem.

Lón August 1950, úa fiti ewe mwichelap itelapan Theocracy’s Increase, mi fis lón New York City. Mwirin ái chuuri chienach kewe Chón Kraist seni sókkopaten fénú me rong án chienach kewe mi sochungio seni Sukulen Gilead apwóróusa pwóróuseer, a fókkun chúng letipei le mochen alapaaló ái angang ngeni Jiowa! A lapóló ái mochen fiti angangen full-time. Mwirin chék ái liwiniti imwei we, úa ammasoua nei we taropween regular pioneer. Ewe keangen ofesilap lón Canada a mak ngeniei me ereniei pwe úpwe akkomw papatais. Iwe, úa papatais lón October 1, 1950. Mwirin eú maram, úa wiliiti regular pioneer, iwe ewe leeni úa akkomw kewis ngeni, ina Kapuskasing. A fókkun towaw ena leeni seni ia chón ái we famili ra nóm ie.

Lón ewe ier 1951, ewe keangen ofesilap a etiwa ekkewe Chón Pwáraatá mi sile fósun France iká  ra mochen mwékút ngeni ewe leeni ikewe aramas ra eáni fósun France ie lón Quebec. A fókkun osupwangen chón afalafal ikena ie. Úa sile fósun France me fósun Merika, ina pwata úa etiwa ena etiwetiw, iwe úa kewis ái úpwe álillis lón ewe leeni itan Rouyn. Ese wor ié úa sissilei me ikena ie. A chék nóm rei eú address ussun met úa apwóróusa me lepoputáán. Nge a fisiéch ena kókkót. Ám me Marcel áúa chiechiéchfengen, me úa pwapwa le álillis lón Quebec lón ekkewe rúáánú ier mwirin, ló, ló, ló, úa wiliiti special pioneer.

Atun úa nóm Quebec, úa fókkun pwapwa atun a toriei eú etiwetiwen fiti ewe rúwe me wonuen Sukulen Gilead lón South Lansing, New York. Úa sochungio lón February 12, 1956, me a kewis ngeniei ái úpwe álillis lón ewe leeni mi iteni iei Ghana, b lón West Africa. Me mwen ái úpwe tongeni ló ikena, a lamot ái úpwe liwiniti Canada tori an epwe wes nei kewe taropwe ren ái úpwe tongeni mwékút ngeni Ghana. Tittipei pwe úpwe chék nóm Canada eli ruu ngeni úlúngát wiik.

Ren úkúúkún fisu maram, úa witi tawen nei kewe taropwe lón Toronto. Lón ena atun, án Pwiich Cripps famili a eleenia ei lón imwer we. Me ikena ie, úa sissilei néúr we fépwúl itan Sheila. Áúa sanifengenikem. Atun ái úpwele tingor ám áúpwe pwúpwúlú, a waroto nei we visa. Ám me Sheila áúa iótek ussun me apwúngaló ái úpwe feiló Ghana. Nge áúa pwal filaatá ám áúpwe kan mammakfengen me ppii iká áúpwe tongeni pwúpwúlú lón fansoun mwem. Ese mecheres ena kefil, nge mwirin, áúa mirititi pwe áúa kefiléch.

Mwirin eú maram lón ái sái wóón train, siip, me sepelin, úa tori Accra, Ghana. Úa kewis ái úpwe emén district overseer. Ina minne, a lamot ái úpwe sái lón unusen Ghana, Ivory Coast (iei Côte d’Ivoire), me Togoland (iei Togo). Lape ngeni, úa kan wawa ewe sein ewe keangen ofesilap. Úa fókkun pwapwa le sái me chuuri chienach kewe Chón Kraist!

Atun weekend, a wor wisei lón ekkewe mwichelap. Ese wor ám Leenien Mwichelap, ina minne,  chienach kewe ra kan aúetá ekkewe imwápek seni iich mi éppwél ngeni paan núú pwe epwe échúlóói ekkewe chón fiti. Pokiten ese wor ice box lón ewe leenien mwéngé, iwe chienach kewe ra kan onómu ekkewe man mi chúen manaw ikewe mi kkan ngeniir, me nireló fán iten enen ekkewe chón fiti.

A pwal fis ekkóch mettóch mi atakirikir lón ekkena mwichelap. Fán eú, Herb Jennings, c pwal emén misineri, a eáni afalafal atun emén kou a tiweló seni me lón ewe leenien mwéngé. Ena kou a ssá lefilen ewe leeni ia ewe chón afalafal a nóm ie me ekkewe chón mwiich. Herb a kaúló le fós me ena kou a fókkun mese osukosuk. Iwe, fémén chienach mwán mi péchékkúl ra supwuri me ekisefálieló ngeni ewe leenien mwéngé, me ekkewe chón mwiich ra mwemmweir.

Lón ekkewe wiiken mwichelap, úa akkattola ngeni aramas néúch we kachito, The New World Society in Action, lón ekkewe sóópw mi kkanoto. Úa kan eitiwaatá eché mangaak mi pwech wóón ruuofóch úúr are irá me fichietá ena kachito wóón. Aramas lón ekkena sóópw ra fókkun sani! Me ren chómmóng pwe ina ewe áechéén kachito ra katol. Ra fókkun ekkepisipis atun a ffichiló wóón án aramas papatais. Ena kachito a fókkun álisi ekkewe chón katol le mirititi pwe Chón Pwáraatá ina eú mwicheich mi tipeeúfengen me ra nóm ekis meinisin.

Mwirin ruu ier lón Afrika, úa fókkun pwapwa le fiti ewe international mwichelap lón ewe 1958 lón New York City. Úa fókkun pwapwa le kúna Sheila atun a waroto me Quebec, ikewe a special pioneer ie. Áúa fen mammakfengen, nge iei áúa kúnafengenikem sefál. Iwe, iei úa tingorei ám áúpwele pwúpwúlú, me a etiwa. Úa mak ngeni Pwiich Knorr d me eisini iká Sheila a tongeni fiti Gilead me fitiei lón Afrika. Iwe a tipeeú ngeni. Sheila a waroto Ghana. Áúa pwúpwúlú lón Accra, lón October 3, 1959. Áúa meefi pwe Jiowa a enletin efeiéchúkem pokiten áúa akkomwa i lón manawem.

Lón 1961, áúa kewis le álillis Cameroon. Ekkewe Chón Kraist mwán ra ereniei ái úpwe álillis le poputááni eú mineféén keangen ofesilap, úa fókkun busy. Pokiten ngang emén minefé lón angangen túmúnún keangen ofesilap, a lamot ái úpwe  káé chómmóng mettóch. Lón ewe ier 1965, Sheila a pwopwo. Úpwe wenechar le apasa pwe a fókkun weires ám chék ekieki pwe áúpwele wiliiti sam me in. Nge atun áúa poputá le pwapwaiti wisem na minefé me akkóta ám áúpwele liwiniti Canada, a fis eú mettóch mi fókkun eletipechou.

A turu seni Sheila néúm we. Ewe tokter a erenikem pwe itá emén át néúm na. A fen mwirin 50 ier, nge áúse fókkun tongeni ménúki. Inaamwo iká áúa fókkun letipechou ren met a fis, nge áúa chék nómotiw lón wisem Cameroon, ewe áúa fókkun aúcheani.

A kan fis ngeni chienach kewe lón Cameroon riáfféúmwáál pokiten rese mochen pekini eú pekin. Lape ngeni, a weiresiló atun a kan tori fansoun úttútún president. Lón ewe May 13, 1970, a fis eú mettóch áúa fókkun áneánei an esap fis, ina pinepinen án Chón Pwáraatá Jiowa angang. Ewe mwú a angei ewe mineféén keangen ofesilap mi ling áúa kerán chék mwékút ngeni ren úkúúkún nimu maram. Lón chék úkúúkún eú wiik, meinisin ekkewe misineri, kapachelong ám me Sheila, áúa katowu seni ena fénú. A weires ám likitaaló chienach kewe pokiten áúa fókkun tongeer me áúa lólilen iká met epwe fis ngeniir lón ekkan rán.

Áúa nóm lón ewe keangen ofesilap lón France ren úkúúkún wonu maram. Me ikena ie úa sópweeló le féri úkúúkún ái tongeni le álillis lón met mi lamot ngeni chienach kewe lón Cameroon. Lón December lón ena ier, áúa kewis pwe áúpwe álillis lón ewe keangen ofesilap lón Nigeria, ewe a poputá le túmúnú ewe angang lón Cameroon. Chienach kewe lón Nigeria ra etiwaéchúkem fán tong, me áúa pwapwa le álillis ikena ren fitu ier.

Lón ewe 1973, a lamot ám áúpwe féri eú kefil mi fókkun weires. Sheila a fen likiitú fán ekkóch sókkun semmwen mi chou. Atun áúa nóm New York ren eú mwichelap, a kechiw me ereniei: “Úse chúen tongeni sópweeló le féfféri met úa féfféri iei. Lape ngeni, úa kan meefi mélúlú me semmwen.” Sheila a fen fiffitiei lón ám angang lón West Africa ren lap seni 14 ier. Úa fókkun pwapwa ren an túppwél lón an angang, nge iei a lamot ám áúpwele féri ekkóch siwil. Mwirin ám pwóróusfengen ussun ena mettóch me fókkun ikkióteki, áúa filaatá ám áúpwe liwiniti Canada, ikewe epwe tongeni angei álillis mi múrinné lón pekin sáfei. Ám likitaaló ám angangen misineri me angangen full-time, ina ewe kefil mi fókkun weires, me pwal fókkun áweiresikem lap seni ekkewe kefil áúa piin féfféri.

Mwirin ám wareiti Canada, úa kúnékún ái angang ren emén chienei seni lóóm mi kan amémé tarakú lón eú sóópw efengin Toronto. Áúa rentini eú apartment, me kamé ám ekkewe pisekin lón imw piin án aramas, pwe áúa tongeni poputááni nónnómum minefé nge esap pwal wor ám liwinimmang. Áúa mochen pwe nónnómum epwe chék menemenéch, pún áúa áneán pwe eú rán áúpwe tongeni liwiniti angangen full-time. Áúa máirú pwe áúse ekieki pwe epwe mwittir fis ám na áneán.

Úa poputá le álillis lón kaúún eú mineféén Leenien Mwichelap iteiten Ammól lón Norval,  Ontario. Ekiseló mwirin, ra ewisa ngeniei ái úpwe wisen chónemmwen lón ewe Leenien Mwichelap. Sheila a meefi péchékkúl seni an semmwen, me áúa meefi pwe a tongeni eáni ei mineféén angang. Ina minne, lón June 1974 áúa mwékút ngeni ewe apartment lón ena Leenien Mwichelap. Áúa fókkun pwapwa le eánisefáli angangen full-time!

Kilisou pwe mi chék sópwósópwoló péchékkúlen Sheila. Ruu ier mwirin, áúa pwal ketiw le eáni ewe angangen sáifetál. Áúpwe wisen chuuri ewe kinikin itan Manitoba, eú leeni lón Canada mi silleló ren an fókkun patapat. Iwe nge, áúa fókkun pwapwa lón ám chiechi ngeni pwiich kewe ikena ie mi fókkun tongekem. Áúa kúna pwe ese lifilifil ia sia angang ngeni Jiowa ie, nge ewe mi fókkun lamot, ina ach sópweeló le angang ngeni ese lifilifil ia sia nóm ie.

Mwirin fitu ier lón ám angangen sáifetál, áúa ketiw le angang lón ewe Bethel lón Canada lón ewe ier 1978. Ese pwen mwo, úa káé eú lesen mi ámmetek nge mi aúchea. Úa ketiw ái úpwe eáni eú afalafal lón fósun France lón ewe mwiich mi kkóló aúchean lón Montreal. Úkúúkún ttamen ena afalafal, eú esopw awa. Nge a eletipechou pwe ekkewe chón fiti rese pwapwaiti ái we afalafal, me emén mwán seni ewe Service Department a fénéúei ren ái we afalafal. Ren enletin, itá úpwe fen chék mirititi me lóóm met úa mirititi iei, pwe esap ngang emén mi angangéch le eáni afalafal. Nge úse etiwa ewe kapasen fén. Ám pwóróusfengen ese múrinné me úa song pún me rei a chék nefótófót wóón mwáálli me ese apúngaei. Úa mwáálliló ren ái alónga ewe kapasen fén wóón napanapen an kawor ngeniei me wóón meefiei ngeni ewe emén mi wisen fénéúei.

Mwirin fitu rán, emén mi chóni ewe Kúmiin Chón Túmúnú Keangen Ofesilap a fós ngeniei wóón ena mettóch. Úa ereni pwe úse etiwa ewe kapasen fén me úa erá pwe úa niamam. Mwirin, úa fós ngeni ewe mwán mi fénéúei. I a kirekiréch le etiwa ái kapasen omusomus. Minne a fis, a áiti ngeniei úkúúkún aúchean tipetekison me úse fókkun ménúki ena. (SalF. 16:18) Úa iótek ngeni Jiowa fán chómmóng ussun ena mettóch me úa tipeppós ái úsapw song atun emén a ngeniei kapasen fén.

Iei a lap seni 40 ier ái nóm lón ewe Bethel lón Canada me seni 1985 úa chóni ewe Kúmiin Chón Túmúnú Keangen Ofesilap. Lón February 2021, pwúlúwei we mi áchengicheng Sheila a máló. Me lúkún ái letipechou ren málóón pwúlúwei na, úa pwal fókkun weires ren apwangapwangen inisi. Nge ái angang ngeni Jiowa a efisi ái úpwe busy me meefi pwapwa, ina popun úse meefi feffeilóón ekkeei rán. (SalAf. 5:20) Inaamwo iká a chómmóng osukosuk mi fis lón manawei, nge a kon lap ekkewe mettóch mi atoto ái pwapwa. Ái akkomwa Jiowa lón manawei me ái angang ngeni full-time úkúúkún 70 ier a fókkun apwapwa. Úa iótek pwe chienach kewe alúwél me fépwúl repwe pwal sópweeló le akkomwa Jiowa, pún úa lúkúlúk pwe iir repwe pwal eáni ewe manaw mi pwapwa me feiéch, ewe sipwe chék tufichin angei iká sia angang ngeni Jiowa.