Atun sia ammólnatá le káé, sia tongeni eisini pwisinkich, ‘Met úa ekiekin káé seni ei pwóróus?’ Iwe nge, mi lamot sipwe túmúnú pwe minne sia ekiekin káé esap eppetikich le kúna met Jiowa a ekiekin asukula ngenikich. Ifa ussun sia tongeni silei met Jiowa a mochen asukula ngenikich?

Kopwe tingor tipáchem lón óm iótek. Tingorei Jiowa an epwe álisuk le weweiti met a mochen óm kopwe káé iei. (Jem. 1:5) Kosap menemenéch ren met ekkewe ka fen weweiti.—SalF. 3:​5, 6.

Kopwe mut ngeni manamanen án Kot we Kapas an epwe angang wóóm. “Án Kot kapas a manaw.” (Ipru 4:12) Ina minne, iteiten ach álleani ewe Paipel, a tongeni áiti ngenikich och mineféén pwóróus me angang lón manawach lón sókkopaten napanap. Nge epwe chék fis ena iká sia mirititi pwe mi lamot ngenikich ach sipwe silei met Kot a áiti ngenikich.

Kopwe aúcheani meinisin met Jiowa a áeá le asukulok. Ekkewe mwéngéén ngún mi kawor seni Jiowa a ussun chék “eu kametip.” (Ais. 25:6) Kopwe álleani pwal mwo nge ekkewe pwóróus ka ekieki pwe kese saniir. Óm féri ena, ka mut ngeni Jiowa an epwe álisuk óm kopwe wiliiti emén aramas mi múrinné, me kopwe wesewesen pwapwaiti óm káé!