Ese wor emén aramas mi nóm ren wesewesen sasingin Jesus. Esap fán eú án Jesus epwe móót are útá pwe emén epwe chúngaani are fala liosun. Iwe nge, chómmóng chón ffal me chúnga ra chúen féfféri liosun Jesus seni lóóm tori ikenái.

Pwúngún pwe ekkena chón ffal me chúnga rese silei ifan wesewesen mesemesen Jesus me napanapen inisin. Napanapen ar féri ewe lios epwe alóngólóng wóón eéreni, lúkúen lamalam, me met mochenin chókkewe mi chumong. Iwe nge, ekkewe mettóch ra chúngaani are fala ra tongeni etipetipa me pwal mwo nge atopwaaló ekiekin aramas usun Jesus me áitian kewe.

Ekkóch ekkena chón ffal me chúnga ra féri liosun Jesus nge a nikin apwangapwang, ttam mékúran me umukúkkún enisan, are nikinikin attong. Lón pwal ekkóch lios, Jesus a usun emén chónláng, wor kukkumwos asen mékúran, are nikinikin ese chúngú aramas. Met, mi pwúng ekkena mettóch ra anapanapa ngeni Jesus? Ifa usun sipwe silei? Eú alen ach sipwe silei, sipwe etittina ekkewe pwóróus lón Paipel mi tongeni álisikich le weweiti ika epwe ifa mesemesan me napanapen inisin. Ra pwal tongeni álisikich le eáni ekiek pwúng usun i.

Ikkena ekkewe kapas Jesus a erá lón an we iótek lón ewe atun a papatais. (Ipru 10:5; Mateus 3:13-17) Ifa napanapen ena inis Kot a ngeni? Ina epwe 30 ier me mwen ena atun, ewe chónláng Kapriel a ereni Maria: “Kopwe pwopwo o nöüni eman ät, . . . epwe iteni Nöün Kot.” (Lukas 1:31, 35) Iwe Jesus i emén mwán mi unuséch, usun chék Atam lón ewe atun a kerán fférútá. (Lukas 3:38; 1 Korint 15:45) Ese mwáál Jesus emén mwán mi napanapéch, me neman a mwiri inan na Maria, ewe fin Jus.

A wor enisen Jesus pún ina eérenien ekkewe chón Jus nge mi sókkóló seni eérenien chón Rom. Enis ina esissillen aúchea me ésúfél. Rese ttam me ra mmen torotoréch. Jesus a túmúnú are ángerengeraéchú enisan, me a ffich mékúran. Chókkewe chék mi kefililó pwe iir Nasir, áwewe chék ren Samson, iir rese kan fichi mékúrer.​—Numperis 6:5; Soukapwüng 13:5.

Lap ngeni lón ekkewe 30 ier, Jesus i emén chón táikú, a féri an angang inaamwo ika ese néúnéú ekkewe pisekin angang aramas ra néúnéú ikenái. (Markus 6:3) Iwe ese mwáál a fókkun péchékkúl inisin. Lón ewe atun a kerán poputááni an angangen afalafal ese wor emén a álisi le “cheela ekewe sip me ekewe kow meinisin seni lon ewe imwenfel. A atoropasa ekewe föün moni o akulätä ekewe chepel än ekewe chon akasiwili moni.” (Johannes 2:14-17) Ena esin angang a chék fichiiti emén mwán mi péchékkúl. Jesus a áeá inisin we Kot a ngeni le apwénúetá ei angang a ewisa ngeni: “Üpwe fokun afalafala ewe Pworausen Manau usun Mwün Kot lon pwal ekoch telinimw, pun iei popun Kot a tinieito.” (Lukas 4:43) A lamot ngeni watteen péchékkúl pwe epwe tongeni fetál lón unusen Palestine me esilefeili ei pwóróus.

Án Jesus kirekiréch mi pwá lón napanapan me wowoon, ese mwáál ina met a efisi án ekkewe “mi weiresikis o uwochou” repwe efich an ei kapasen etiwetiw. (Mateus 11:28-30) An tong me kirekiréch a anúkúnúkú an we pwon usun an epwe apéchékkúlatá chókkewe mi mochen káé seni i. Pwal mwo ekkewe kúkkún ra mochen nóm ren Jesus, iei met Paipel a erá: “Jesus a romi ekewe semirit.”​—Markus 10:13-16.

 Ikaamwo Jesus a kúna watteen riáfféú me mwen epwe máló, nge sap minne a chék wololilen iteitan. Áwewe chék, lón eú apwapwaan apwúpwúlú lón Kana i a álillis ren an ewili ewe konik ngeni wain mi múrinné. (Johannes 2:1-11) Lón pwal ekkóch fansoun mwéngéfengen, a eáni káit aramas rese tongeni ménúki.​—Mateus 9:9-13; Johannes 12:1-8.

Nge lap seni meinisin, án Jesus afalafal a atufichi ekkewe chón aúseling ngeni ar repwe eáni ewe ápilúkúlúkún manaw esemuch. (Johannes 11:25, 26; 17:3) Lupwen 70 me lein néún kewe chón káé ra ereni pwóróusen ar angangen afalafal, a ereniir: “Oupwe pwapwa pwe itemi a mak lon läng” me i a “uren pwapwa.”​—Lukas 10:20, 21.

Ekkewe néúwisin lamalam lón fansoun Jesus we ra átekiatáái ar nemenem me efisi án aramas repwe ingeitiir. (Numperis 15:38-40; Mateus 23:5-7) Jesus a sókko seniir pún a ereni néún kewe aposel ar resap “nemenem won aramas.” (Lukas 22:25, 26) Jesus a éúréúrer, a erá: “Oupwe afälikemi ren ekewe Sensen Allük ra sani ar fetalfeil fän üfer mi langatam, ra pwal sani än aramas repwe kapong ngeniir fän menin lon ekewe lenien amömö.”​—Markus 12:38.

Nge Jesus ese usur, pún atun a nóm lein aramas a usun chék ekkena aramas, me fán ekkóch rese silleni. (Johannes 7:10, 11) Pwal mwo me lein néún kewe 11 aposel mi tuppwél, ese wor och napanapen inisin epwe asokkaaló i seniir. Jutas ewe chón afangemá, a kisi Jesus pwe ina “eu asisil” mi ánneta ngeni ewe mwichen chón oputa Jesus pwe i ena.​—Markus 14:44, 45.

Ikaamwo ese chómmóng pwóróus mi tichiki napanapen inisin Jesus, nge a ffat pwe minne aramas ra kan chúngaani me falei esap ina mesemesen me napanapen inisin Jesus. Iwe nge, ewe a kon lamot seni met wesewesen mesemesan me napanapen inisin, ina ach ekiek usun i lón ei fansoun.

Jesus a máló me peias lón chék pwal ena ránin a apasawu ekkena kapas. (Johannes 14:19) A fangóló manawan “fänäsengesin chomong aramas pwe möön manauer.” (Mateus 20:28) Mwirin úlúngát rán, Kot a amanawasefálietá lón “pekin ngun” me a “föri pwe a pwä ngeni” ekkóch néún kewe chón káé. (1 Petrus 3:18, Testament Mi Fö; Föför 10:40) Mi fet mesemesen Jesus me napanapen inisin atun a pwá ngeniir? Ese mwáál a ekis sókko seni me mwan pwe iwe néún kewe mwo chón káé rese mwittir esilla. Atun Maria Maktalene a kúna, a ekieki pwe i emén chón atake me atun pwal rúúemén néún kewe chón káé ra kúna me wóón ewe al ngeni Emaus me rer nge emén chék chón fetál.​—Lukas 24:13-18; Johannes 20:1, 14, 15.

Lón ei fansoun, itá epwe ifa ach ekiek usun mesemesen Jesus me napanapen inisin? Wone ier mwirin málóón Jesus, ewe mi áchengicheng aposel Johannes a kúna Jesus me lón kúnaan. I ese kúna an echinimá me wóón ewe iráán ninni. Nge a fen kúna “ewe King mi tekia seni ekewe king meinisin, me ewe Samol mi lap seni ekewe samol meinisin,” ewe Kingen án Kot we Mwú, ewe epwele okkufaaló koputen Kot kewe, ikkena iir ekkewe chónláng mi ngaw me aramas mi ngaw me epwe atoto ngeni aramas feiéch fóchófóch.​—Pwärätä 19:16; 21:3, 4.