A mecheres ach sipwe meefi pwe sia choutiw atun emén chiechiach a riáfféú ren osukosuken lón tupwuan. Nge sia tongeni pwári ach tongei ren ach álisi an epwe likiitú fán an na osukosuk. Ifa usun?

“Müttir ngeni rong.”—JAMES 1:19.

Eú mettóch mi fókkun álilliséch ka tongeni féri pwe kopwe álisi chiechiom, ina ren óm aúseling ngeni atun a mochen fós. Kosap ekieki pwe mi lamot kopwe pélúweni meinisin met a apasa. Ámmeef ngeni pwe ka aúseling ngeni me ka tongei. Achocho le weweiti meefian, me kosap esiita. Chemeni pwe eli epwe apasa och mettóch esap turun tipan an epwe apasawu nge mwirin a niamam ren.—Hiop 6:2, 3.

‘Oupwe apöchöküla letipan.’—1 TESALONIKA 5:14.

Chiechiom we eli epwe aúrek, are eli epwe weires ren an meefi pwe ese wor lamotan. Óm alúkúlúkú ngeni pwe ka tongei, a tongeni oururu me apéchékkúla letipan inaamwo ika kese silei met kopwe apasa ngeni.

“Eman chiechiach a tongeekich fansoun meinisin.”—ÄN SALOMON FOS 17:17.

Awora álillis mi álilliséch. Kosap chék féraaló pwe ka silei ifa usun kopwe álisi chienom we, nge kopwe fen eis met ka tongeni féri fán itan. Ika a weires ngeni an epwe erenuk met a osupwangan, kopwe ereni ekkóch mettóch mi álilliséch oua tongeni fférfengeni, áwewe chék oua tongeni ló fetál. Are ka tongeni ereni pwe kopwe álisi le  shopping, elimelim, are ataweei ekkóch angang.—Kalatia 6:2.

‘Oupwe mosonotam.’—1 TESALONIKA 5:14.

Eli esap iteitan chienom we epwe mochen fós. Alúkúlúkú ngeni pwe ka mochen aúseling ngeni ineet chék a mochen fós. Pokiten án chienom na semmwen, eli epwe apasa are féri och mettóch kopwe letipengaw ren. Eli epwe atai met oua eáni kókkót me eli epwe nisossong. Kopwe mosonottam me weweiti chienom na atun ka awora álillis mi lamot ngeni.—Än Salomon Fos 18:24.

“Ua nochchei ai upwe emén chiechian mi tongeni fóffós ngeni. Inaamwo ika use tongeni ataweei an we osukosuk, nge ua kan achocho le aúseling ngeni meefian. Fán ekkóch, an wor emén chón aúseling ngeni meefian, ina chék met a lamot pwe epwe meefi kinamwe.”—Farrah, a emén mi wor chienan mi weires ren watteen aúrek me letipechou mi efisi an esap mochen mwéngé.

“Emén me lein chiechiei kewe, a mmen kirekiréch me apéchékkúlaei. A etiwaei ngeni imwan we pwe aupwe mwéngé. A mmen tongeei me ámecheresi ai upwe pwáraawu meefiei. Ina met a fókkun apéchékkúlaei!”—Ha-eun, emén mi riáfféú ren watteen letipechou.

“Mosonottam a fókkun aúchea. Atun pwúlúwei we a féri met mi asonga ei, ua áchchema ngeniei pwe a féri ena pokiten an we semmwen. Ina met a álisiei ai usap song, nge upwe alapaaló ai kirekiréch ngeni.”—Jacob, pwúlúwan we a weires ren watteen letipechou.

“Pwúlúwei we a fókkun álilliséch ngeniei me oururuei. Atun ua kokotiw fán aúrek, ese fókkun eriániei le féri och mettóch use mochen féri. Fán ekkóch, epwe wewe ngeni pwe ese tongeni féri met a fókkun sani le féri. Neminna a fókkun aúchea me rei pokiten a fókkun kirekiréch ngeniei me ese achéchééi pwisin i.”—Enrico, emén mi riáfféú ren watteen aúrek.