Ekkóch liffang ra aúchea pokiten ewe emén a wisen liffang ngenikich i emén mi tekia are emén sia fókkun súféliti. Inaamwo ika ekkóch liffang rese méwatte nge sia chúen aúcheaniir pokiten liffangach me ren emén chón ach famili mi áchengicheng me rech are seni chiechiach sia lúkúlúk wóón. Ina usun meefien Jordan usun án Russell liffang, ewe sia fen pwóróus usun lón ewe lesen me mwan. Nge ifa usun ei pwóróus a weneiti ewe liffangen méén kepich?

Áeúin, ewe Paipel a apasa pwe “Kot a . . . tinato Nöün Aleman lon fanüfan, pwe kich sipwe manau ren.” (1 Johannes 4:9) Esap ina ewe popun pwe ei liffang a wesewesen aúchea? Ese wor án emén nemenem epwe lap seni án Kot. Iei met emén soumakken kélfel chón Ipru a erá usun Kot: “En ewe mi iteni Samol mi Lapalap [“Jiowa,” NW], en chök Ewe mi Unusen Tekia won unusen fanüfan.” (Kölfel 83:18) Ese wor epwe ngenikich eú liffang epwe lap seni Jiowa.

Oruuan, Kot ‘Semelapach.’ (Aisea 63:16) Ifa usun? A ngenikich manaw. Pwal och a tuppwél le túttúmúnúkich usun emén sam mi tuppwél le túttúmúnú néún kewe. Iei alon Kot ngeni néún kewe aramas me lóóm: “Ifa usun, Israel esap nei mwän mi achengicheng? . . . Iei mine lelukei a positi i, üpwe fokun eäni ümöümöch ngeni.” (Jeremaia 31:20) A pwal ina usun meefien Kot ngeni néún kewe mi fel ngeni ikenái. Esap chék i ewe Chón Fératá mi unusen manaman nge pwal i Semach me Chiechiach mi tuppwél. Esap pwe ena mettóch a áiti ngenikich pwe liffang meinisin mi feito seni a kon aúchea?

Ekkóch liffang ra aúchea pokiten ra feito seni enletin letipen emén nge esap chék pokiten ina wisan. Emén mi wesewesen fangafangéch ese pwal ekieki pwe epwe angei liwinin an kirekiréch.

Kot a fangóló Néún we fán ásengesich pokiten a tongekich. Paipel a erá: “Iwe, Kot a pwäri an echenikich ren an tinato Nöün Aleman.” Met popun an a féri? “Pwe kich sipwe manau ren.” (1 Johannes 4:9) Itá wisen Kot an epwe féri ena? Aapw! Ewe méén kepich Kraist a watiw, ina pwápwálóón án Kot “ümöümöch” mi somwoló.​—Rom 3:24.

Pwata án Kot liffang ina pwápwálóón an “ümöümöch” mi somwoló? Ewe Paipel a áweweei: “Kot a pwäri ngenikich ükükün an echenikich, pwe lupwen sia chüen nonom lon tipis, Kraist a mäla fänäsengesich.” (Rom 5:8) Tong mi somwoló ina met a amwékútú Kot an epwe álisi aramas mi apwangapwang, osupwangen álillis me tipis. Nge sanne a fich ngenikich ena tong me sise pwal fókkun tongeni liiwini. Pún an na liffang ina eú pwáratáán tong ese wor táppin lón uruwo.

Ekkóch liffang ra aúchea pokiten watteen minne ewe chón liffang a pennúkúóló fán iten epwe awora ewe liffang. Ika emén aramas a tipemecheres le fangóló mettóch a fókkun echeni pwe epwe ngenikich, iwe ena liffang a fókkun aúchea me rech pokiten minne a pennúkúóló.

Kot “a fangala Nöün Aleman.” (Johannes 3:16) Ese wor emén mi aúchea a ngenikich epwe usun aúchean néún we áláemén. Lón ekkewe fansoun lóóm, lóóm sise tongeni álleaniir atun Kot a fératá unusen láng me fénúfan, Jesus a fiti le angang. Iwe, i “popun an [Kot] pwapwa iteiten rän.” (Än Salomon Fos 8:30) I, Néún we mi “achengicheng” me ‘a lapalapeni lapalapan.’ (Kolose 1:13-15) Ese pwal wor och riri mi fókkun núkúchar epwe usun ewe riri lefilen Jiowa me Jesus.

Nge Kot ese mwo nge “amwöchü püsin Nöün” we. (Rom 8:32) Jiowa a ngenikich minne mi kon fókkun múrinné. Ese wor och mi kon lululó aúchean, Jiowa a pennúkúóló epwe usun an liffangeló Néún we.

Ekkóch liffang ra aúchea pokiten ra eppinesa eú watteen osupwang a pwal mwo nge atapwal. Áwewe chék, esap pwe ka fókkun kilisou ngeni emén a pwisin mééni óm kopwe sáfei pwe kese tongeni mééni pún ka fókkun osupwang nge a fókkun lamot fán iten kosap máló? Esap pwe ka fókkun aúcheani ena liffang?

“Usun chok ren Atam aramas meinisin ra malo, iei usun pwal lon Kraist aramas meinisin repwe kuna manau.” (1 Korint 15:22, TF) Pokiten kich mwirimwirin Atam, meinisin kich sia “malo,” sise tongeni sú seni riáfféún samau me máló are ach sipwe chásefál ngeni Kot me ngaseló seni ach memmeefin tipis ngeni. Pokiten kich aramas mi osupwang, sise tongeni efisi ach sipwe “manau” are án emén epwe manaw. A ffat alon Paipel ei: “Ellet esap wor eman a tongeni isetiu penmanauen pwin ika ngeni Kot liwinin manauan. Pun liwinin manauen eman aramas a men mömong. Esap fokun naf an epwe möni manauan.” (Kölfel 49:7, 8) Sia fókkun osupwangen álillis pokiten sise tongeni ménatiw liwinin manawach. Ika ese wor epwe álisikich, sia fókkun osupwang.

Ren watteen án Jiowa tong, a isetiw ewe “sáfei” sia osupwangan pwe sipwe kúna manaw ren, pokiten Jesus “meinisin repwe kuna manau.” Ifa usun ewe méén kepich a apwénúetá ei? “Chaan Jesus Nöün we a limetikich seni ach tipis meinisin.” Ewer, ach eáni lúkúlúk wóón chchaan Jesus we a suuki ngenikich ewe asamen musolóón tipis me manaw esemuch.  (1 Johannes 1:7; 5:13) Ifa usun ewe méén kepich epwe efeiéchú attongeach kewe? “Pun usun chök mäla a pop seni eman aramas, pwal ina chök usun ewe manausefäl seni mäla a pop seni eman aramas [Jesus].”​—1 Korint 15:21. *

Ese fókkun wor emén mi tekia a eáni liffang epwe usun tekian Kot are emén mi fókkun tong epwe usun watteen án Kot tong mi pwáló ren ewe méén kepich Jesus a eáni. Ese wor lélléén me watteen met emén a pennúkúóló fán itach epwe léllé ngeni minne Jiowa Kot a pennúkúóló. Me ese pwal wor eú liffang a eppinesa ewe watteen osupwang epwe usun ewe asor a angasakich seni tipis me máló. Ewer, ese pwal wor eú liffang epwe akkarap ngeni wachemwuken méén ewe méén kepich mi lululó aúchean.