IKA a má sonuk emén attongeom, neman epwe pwal sókkopat sókkun memmeef kopwe meefi, eli ka letipeta, tipitipingaw, me sokkuk. Neman ka pwal song, mengiringir, me niwokkus, pwal mwo nge ekieki ika mi fen chúen lamot óm kopwe manaw.

Kopwe lúkú pwe letipeta esap ina esissillen apwangapwang. A chék pwári úkúkún óm tongei attongeom we. Iwe nge itá mi tufich óm kopwe mwar ngase seni óm chúúpwúl?

Lupwen ka nóm lón letipeta, usun itá ese wor lemuchún óm riáfféú, nge ka tongeni kúna oururun letipom seni ekkeei kapasen emmwen:

MUT NGENI FANSOUN EPWE ECHIKARA ÓM LETIPETA

Ese léllé án emén me emén letipeta me úkúkún fansoun ar nóm fán letipeta. Nge, án emén kechiw a tongeni angasa an riáfféú. Vanessa, ewe mi fen mak alon, a erá: “Ua chék kechiw ren ai upwe ngase seni metekin letipei.” Iei alon Sofía, mi weiweitá málóón pwiin we: “A mmen ámmetek ngeniei ai upwe ekieki me meefi met ewe a fis, usun itá ámmetekin án emén ámmesaaló eú kinás mi paiking me limeti. A mmen fókkun ámmetek, use tongeni likiitú fan nge epwe efisi chikaren ewe kinás.”

PWÁRAAWU EKIEKUM ME MEEFIOM

Sia weweiti pwe fán ekkóch eli kopwe chék mochen áláeménúló. Nge ika ka féri ena, iwe usun ka chék pwisin  mwárei osom mi chou. Iei met Jared, 17 ierin, mi má seni seman we a erá: “Ua kan fós ngeni ekkewe ekkóch usun meefiei. Neman rese kon lien unusen weweiti met ua meefi, nge a éch ngeniei ai tongeni uwawu meefiei.” Janice, ewe mi mak alon lón ewe áeúin lesen, a pwal apasa: “Ai fós ngeni ekkewe ekkóch a fókkun ekinamweei. Ua meefi pwe ra weweitiei, me use chék áláemén.”

ETIWA ÁLILLIS

Iei alon emén tokter: “Fán chómmóng, án emén mi letipeta etiwa álillisin chiechian kewe me aramasan lupwen a kerán chék má seni attongean, a ámecheresi an epwe likiitú lón an riáfféú.” Ereni chiechiom kewe met ra tongeni álisuk wóón, pwe ese mwáál ra mochen álisuk nge eli rese silei met repwe féri.​—Än Salomon Fos 17:17.

ARAP NGENI KOT

Iei alon Tina: “Lupwen pwúlúwei we a má seniei ren kanser, iwe ese chúen wor ié upwe ereni ai kewe osukosuk me lólilen, ina popun ua chék ereni Kot mettóch meinisin! Iteiten lesossor ua kan tingor an álillis ren ai upwe likiitú unusen ena rán. Ese fókkun lea ngeniei án Kot álisiei.” Iei alon Tarsha, 22 ierin lupwen inan we a máló: “Ai állea Paipel iteiten rán a kan oururuei. Iwe, a wor met mi apéchékkúlaei ua tongeni ekkekieki usun.”

ANCHANGEI EWE FANSOUN MANAWSEFÁL

Pwal iei met Tina a apasa: “Me akkomwan, ewe ápilúkúlúkún manawsefál ese kan oururuei pokiten ua mochen án pwúlúwei we epwe chék nóm rei iei chék, me a lamot ngeni nei kewe át semer na pwal iei chék. Iwe nge, rúáánú ier mwirin, upwap kerán wesen aúcheani ena ápilúkúlúk. Iwe ina met a elikiitúei. Ua anchangei ai upwe kúnasefáli pwúlúwei we, me ena mettóch a atoto ngeniei kinamwe me pwapwa!”

Ese mwáál, kese tongeni mwittir ngase seni óm letipeta. Iwe nge, pwóróusen Vanessa a tongeni alúkúlúkúkich. A erá: “Ka ekieki pwe kese fókkun tongeni likiitú, nge kopwe kúna pwe ekis me ekis epwe kikkisiló óm meefi letipechou.”

Kopwe chemeni pwe ikaamwo óm pwos esap tongeni unusen móló me lón letipom, nge mi chúen lamot óm kopwe manaw. Ren án Kot álillis fán tong, ka chúen tongeni pwapwaiti ewe sókkun manaw mi wor aúchean me óm chiechi ngeni chienom kewe. Me ekiseló chék, Kot epwe amanawasefáli ekkewe mi máló. Kot a mochen óm kopwe foropacheisefál attongeom we. Iwe, metekin letipom epwe móróffóchóló!