Lón ekkewe lesen mwen ei, ra áiti ngenikich pwe ekiseló chék Kot epwele amóeló ei ótóten fénúfan mi ngaw fitifengen me an kewe osukosuk meinisin. Sia lúkúlúk pwe epwe fókkun fis ena. Pwata? Pún án Kot we Kapas, ewe Paipel, a fen pwon usun:

‘Fanüfan . . . epwe morola.’​—1 JOHANNES 2:17.

Sia tongeni lúkúlúk pwe epwe wor chókkewe repwe manawewu seni ena ótót pún ei wokisin a pwal pwonei usun:

“Iö a föri letipen Kot epwe manau tori feilfeilachök.”

Ina minne, ika sia mochen manawewu seni, mi lamot sipwe silei letipen Kot. Ren ach sipwe silei met letipen Kot, mi lamot sipwe akkomw silei i.

Jesus a apasa: “Iei manau esemüch: Ar repwe silei en, ewe eman chök Kot mi let.” (Johannes 17:3) Ren ach sipwe kúna manaw atun sópwólóón ei ótót, me manaw tori feilfeiló chék, a lamot ach sipwe silei Kot. Ese wewe ngeni ach sipwe chék silei pwe mi wor emén Kot are silei ekis chék pwóróusan. A lamot sipwe chiechi ngeni. Ika sia mochen ach chiechi epwe péchékkúl, mi lamot sipwe awora fansoun ngeni chiechiach. A pwal ina usun ren ach chiechi ngeni Kot. Ekieki ekkóch pwóróus mi enlet me aúchea sia káé seni Paipel mi álisikich le ámááraatá ach chiechi ngeni Kot.

Iteitan sia kan mwéngé mwéngé pwe sipwe manaw. Nge Jesus a apasa: “Aramas resap manau ren mongö chök, pwe ra manau ren iteiten kapas Kot a apasa.”​—Mateus 4:4.

Lón ei fansoun, sia kúna me lón ewe Paipel met Jiowa a apasa. Atun kopwe káé ena puk mi pin, kopwe silei ekkewe pwóróus mi enlet usun met Kot a féri me lóóm, met a féri lón ei fansoun, me met epwe féri lón mwachkkan.

Met ka tongeni féri ika ka mochen álleasochisi Kot, nge ka meefi pwe a weires ngonuk óm kopwe úkútiw le féri ekkewe mettóch a apasa pwe mi ngaw? Ika ina, iwe óm silei Kot a fókkun tongeni álisuk.

Ekieki pwóróusen ei fefin itan Sakura, i emén mi eáni manaw mi limengaw. Lupwen a poputá káé ewe Paipel, a káé usun án Kot we allúk an epwe ttii seni féfférún lisowumwáál. (1 Korint 6:18) Sakura a iótek ngeni Kot an epwe apéchékkúla, iwe, a tufichin úkútiw seni an féfféri ei féffér mi ngaw. Nge a chúen lamot an epwe úkkú ngeni sóssótun kewe. Iei met a apasa: “Ika a ppiitá lón ai ekiek ekkewe mettóch mi limengaw, ua pwár ngeni Jiowa lón iótek enletin meefiei pún use tongeni ú ngeniir ren pwisin ai tufich. Ewe manamanen iótek a álisiei ai upwe ririéch ngeni Jiowa.” Fite million aramas ra usun chék Sakura le poputá le silei usun Kot. I a fang ngeniir ewe péchékkúl mi lamot ngeniir pwe repwe tongeni ekkesiwili manawer me manaweni ewe manaw mi apwapwaai i.​—Filipi 4:13, Testament mi Fö.

Lapólóón óm silei Kot, pwal ina lapólóón án Kot sissileok usun emén chiechian mi aúchea. (Kalatia 4:9; Kölfel 25:14) Iwe, epwe tongeni suuk ngonuk óm kopwe manawelong lón án Kot we ótót séfé. Epwe ifa usun napanapen ena ótót mi fé? Ewe lesen mwirin ei epwe áweweei usun.