Mi Tufich Ach Sipwe Pwapwa Pwal Mwo Nge Iei
EPWE war ewe rán lupwen aramas resap chúen semmwen, chinnapeló me máló. Ka tongeni eáni ena esin manaw! Nge ikenái aramas meinisin ra nóm fán watteen osukosuk me weires. Mei wor met epwe tongeni álisuk? Ewe Paipel a tongeni álisuk óm kopwe kúna pwapwa me menemenéch pwal mwo nge iei. Sipwe ppii ekkóch weires sia kúkkúna lón manawach me ifa usun Paipel a tongeni álisikich.
MEMMEEFIN MENEMENÉCH
Án Paipel emmwen: “Oupwe afälikemi pwe ousap manaueni eu manauen mochenian moni, nge oupwe menemenöch ren mine oua eäni.”—Ipru 13:5.
Ikenái a chómmóngóló ekkewe mettóch aramas ra erá pwe mi lamot epwe nóm rech. Nge ewe Paipel a erá pwe sipwe tongeni ‘menemenöch ren mine sia eäni.’ Ifa usun?
Túmúnú senikich “mochenian moni.” Aramas ra kan pennúkú péchékkúlen inisiir, ar famili, chiechier, limeliméchún manawer, me ésúfélúr fán iten “mochenian moni.” (1 Timoty 6:10) Ese fókkun wor aúchean ena! Ren enletin emén mi mochenian moni “esap menemenöch.”—Än Salomon Afalafal 5:10.
Aúcheani aramas, nge esap pisek. Mei pwúng pwe pisek a álilliséch. Nge ekkena mettóch rese tongeni tongekich are aúcheani minne sia féri, aramas chék ra tongeni féri ena. An wor “eman chiechiach” mi enlet, ina met epwe álisikich le pwapwaiti manawach.—Än Salomon Fos 17:17.
SIA TONGENI PWAPWA IEI IKA SIA ÁLLEASOCHISI ÁN PAIPEL KEWE EMMWEN
LIKIITÚ FÁN SEMMWEN
Án Paipel emmwen: “Eman mi pwapwa lon lelukan iei eu säfei mi mürina.”—Än Salomon Fos 17:22.
Pwapwa a usun “säfei mi mürina,” a tongeni álisikich le likiitú fán apwangapwangen inis. Nge ifa usun sipwe tongeni pwapwa atun sia semmwen?
Sipwe kilisou. Ika sia chék ekkekieki ach kewe osukosuk, usun itá mi chék ngaw ‘ränin manauach’ meinisin. (Än Salomon Fos 15:15) Nge ewe Paipel a erá pwe sipwe “kilisou.” (Kolose 3:15) Kilisou fán iten ekkewe mettóch mi kisikis lón manawach. Ikkeei ekkewe mettóch ra tongeni apwapwaok, eú mwiritup mi lingéch, enienin och ásepwál mi ekinamwe, me án emén ka tongei emelimel ngonuk.
Féri mettóch fán iten ekkewe ekkóch. Inaamwo ika a apwangapwang inisich, nge “sia feiöch ren ach fang lap seni ach angei mettoch.” (Föför 20:35) Atun aramas ra kilisou ngenikich fán iten och mettóch sia féri, sa pwapwa me sise kon ekieki usun ach kewe weires. Sipwe tongeni pwapwa lón manawach ika sia féri met ekkewe ekkóch repwe pwal pwapwa ren.
ALEN PÉCHÉKKÚLELÓÓN RIRIIN PWÚPWÚLÚ
Án Paipel emmwen: “Filätä mine a fokun mürina.”—Filipi 1:10.
Ekkewe pean pwúpwúlú rese kan awora ar fansounfengen, a tongeni ta ar ririin pwúpwúlú. A lamot ngeni ekkewe mwán me fefin mi pwúpwúlú ar repwe ekieki pwe ar pwúpwúlú ina eú me lein ekkewe mettóch mi kon aúchea lón manawer.
Fférfengeni mettóch. Epwe fen éch án ekkewe pean pwúpwúlú akkóta ar repwe fférfengeni mettóch, nge resap fen pwisin akkomwa mocheniir. Ewe Paipel a erá: “Ruoman ra feiöch seni eman chök.” (Än Salomon Afalafal 4:9) Oupwe kan álillisfengen le kuk enemi mwéngé, kunoufengen, are mwin le atawefengeni och mettóch.
Pwárfengeni ámi tong. Ewe Paipel a pesei ekkewe pean pwúpwúlú ar repwe tongfengen me súfélfengen. (Efisos 5:28, 33) A tongeni péchékkúletá eú ririin pwúpwúlú ika ekkewe pwúpwúlú ra kan emelimelfengen fán tong, foropachei ewe emén fán tong, are liffangfengen. Chechchemeni pwe ewe féffér lefilen mwán me fefin epwe chék fis lefilen pwúpwúlú.—Ipru 13:4.
