Sia Ffér pwe Sipwe Manaw Tori Feilfeiló
ITÁ ié esap mochen manawattam me eáni eú manaw mi apwapwa? Anchangei pwe ka tongeni manaw fán pwapwa tori feilfeiló nge esap fán eú óm kopwe semmwen! Sia tongeni nómottam ren chókkewe sia tongeer, sáifetál wóón unusen fénúfan, ámááraatá tufichich kewe minefé, alapaaló ach tipachem, me unusen káéfichi met chék sia mochen.
Itá ese pwúng ena sókkun mochen? Pwata aramas ra mochen manaw tori feilfeiló? Ekkewe wokisin lón Paipel ra affata ngenikich pwe Kot a fen waalong lón kich ena mochen. (Än Salomon Afalafal 3:11) A pwal erá pwe “Kot mi tong.” (1 Johannes 4:8, Testament Mi Fö) Kot a tongekich me esap ngenikich ena mochen le manawffóch ika sise tongeni féri.
Ese fókkun wor emén a mochen máló. Ren enletin, ewe Paipel a áweweei pwe máló a usun emén ‘chon oputach’ sise sani le etiwa. (1 Korint 15:26) Ekkóch ra mákkái, nge ekkóch ra mámmang, nge ló, ló, ló, meinisin kich sipwe máló. Lape ngeni aramas rese sani ar repwe ekieki usun máló, ra pwal mwo nge niwokkus. Itá máló epwe úkútiw? Mi wesewesen tufich ena?
PISEKIN ÁNNET MI ATOTO NGENIKICH ÁPILÚKÚLÚK
Mi ámáirú ngonuk óm silei pwe esap letipen Kot pwe aramas repwe máló? Ewe puken Keneses a awora pisekin ánnet pwe letipen Kot án aramas repwe manaw tori feilfeiló wóón fénúfan. Jiowa Kot a fératá ei fénúfan fengen me mettóch meinisin mi lamot ngeni án aramas repwe manaw wóón me pwapwa ren. Mwirin a fératá ewe áeménún mwán, Atam, me a eleenia lón ewe paratis, ewe tánipiin Eten. Iwe, “Kot a nengeni meinisin mine a föri o küna pwe a fokun öch.”—Keneses 1:26, 31.
Kot a fératá Atam pwe epwe unuséch. (Tuteronomi 32:4) Pwúlúwen Atam we Efa a pwal unuséch ekiekin me inisin. Jiowa a ereniir: “Oupwe nöünöü o achomongakemi pwe fanüfan epwe masou remi o nom fän nemeniemi. Oupwe nemeni ekewe ikenen leset me ekewe mansüsü me mönün won unusen fanüfan.”—Keneses 1:28.
Epwe lamot watteen fansoun ren án Atam me Efa repwe amasoua fénúfan ren aramas. Efa epwe néúnéú, me néún kewe repwe pwal néúnéútiw tori án fénúfan epwe uroló ren aramas usun met Kot a mochen. (Aisea 45:18) Itá Jiowa epwe ngeni Atam me Efa ena wis ika pwe repwe chék manaw ren ekis fansoun le kúna mááritáán néúr kewe me eli néún néúr kewe, nge resap kúna pwénútáán?
Pwal ekieki ewe wis Kot a ngeniir ar repwe nemeni ekkewe man. Jiowa a ewisa ngeni Atam an epwe eita ekkewe man, me a lamot ngeni watteen fansoun. (Keneses 2:19) Nge ren án Atam epwe nemeni ekkewe man, epwe lamot an epwe káé usur me weweiti ifa usun epwe túmúnúúr. Epwe fen lamot ngeni watteen fansoun ren an epwe féri ena.
Iwe, án Kot ewisa ngeni Atam me Efa ar repwe amasoua fénúfan ren aramas me nemeni ekkewe man, a affata pwe Kot a fériir lón ewe napanap pwe repwe manawattam. Ren enletin Atam ese manawattam.
LETIPEN KOT FÁN ITEN ARAMAS AR REPWE MANAW TORI FEILFEILÓ LÓN PARATIS WÓÓN FÉNÚFAN
RA MANAWATTAM
A 930 ierin Atam
A 969 ierin Metusala
A 950 ierin Noa
Ikenái aramas ra chék manaw 70 ngeni 80 ier
Ewe Paipel a affata pwe me lóóm aramas ra manawattam senikich ikenái. A erá: “Ierin manauen Atam meinisin tiwepükü ilik.” Mwirin a eiteitetiw wonomén mi manaw lap seni 900 ier! Iir Set, Enos, Kenan, Jaret, Metusala, me Noa. Iir meinisin ra manaw mwen ewe Noter lón fansoun Noa we, me Noa a manaw ren úkúkún 600 ier mwen a fis ewe Noter. (Keneses 5:5-27; 7:6; 9:29) Pwata ra tongeni manawattam?
Ekkena mwán ra manaw mwirin chék án Atam me Efa ra chúen unuséch. Eli ina ewe popun ra manawattam. Nge ifa usun án emén unuséch a riri ngeni án emén manawattam? Me ifa usun máló epwe úkútiw? Ren ach sipwe kúna pélúwen ekkena kapas eis, a lamot sipwe akkomw weweiti pwata sia chinnapeló me máló.